പ്രസവിച്ചു കിടക്കുന്ന യുവതിയെ ആശുപത്രിയില്‍ നഴ്‌സിന്റെ വേഷത്തിലെത്തി കുത്തിവെച്ച് കൊല്ലാന്‍ ശ്രമിച്ചതിന് പൊലീസ് പിടിയിലായ അനുഷയെ പൊലീസ് കസ്റ്റഡിയില്‍ വിട്ട് തിരുവല്ല കോടതി. പ്രതിക്കായി നല്‍കിയ ജാമ്യാപേക്ഷ തള്ളിയ കോടതി പ്രോസിക്യൂഷന്റെ വാദം ശരിവച്ച് പൊലീസ് കസ്റ്റഡി അനുവദിക്കുകയായിരുന്നു.
കാമുകന്‍ അരുണിന്റെ സ്‌നേഹം പിടിച്ചു പറ്റാനാണ് കായംകുളം പുല്ലുകുളങ്ങര സ്വദേശി സ്‌നേഹയെ കുത്തിവെച്ച് കൊലപ്പെടുത്താന്‍ ശ്രമിച്ചത്. വൈദ്യശാസ്ത്രത്തില്‍ അറിവുള്ള അനുഷ പൂര്‍ണ ബോധ്യത്തോടെയാണ് ഈ രീതി അവംലംബിച്ചതെന്നു പൊലീസ് പറഞ്ഞു. അനുഷയ്‌ക്കെതിരെ ആള്‍മാറാട്ടം, വധശ്രമം, ജീവപര്യന്തം തടവുശിക്ഷ ലഭിക്കാവുന്ന രീതിയില്‍ അതിക്രമിച്ചു കടക്കുക എന്നീ കുറ്റങ്ങളാണ് പൊലീസ് ചുമത്തിയിരിക്കുന്നത്.