കോഴിക്കോട് യുവതിക്കും കുടുംബത്തിനും നേരെ പൊലീസുകാരന്റെ മര്‍ദനം. നടക്കാവ് എസ്‌ഐയ്ക്കും സംഘത്തിനും എതിരെയാണ് പരാതി. എടക്കര ചീക്കിലോട് വാഹനം സൈഡ് നല്‍കുന്നതുമായി ബന്ധപ്പെട്ട തര്‍ക്കമാണ് മര്‍ദനത്തിന് കാരണം. യുവതിയും കുടുംബവും സ്വകാര്യ ആശുപത്രിയില്‍ ചികിത്സയിലാണ്.
കോഴിക്കോട് അത്തോളി സ്വദേശിനിയും മനശാസ്ത്രജ്ഞയുമായ അഫ്‌ന അബ്ദുള്‍ നാഫി(30)നാണ് മര്‍ദനത്തിന് ഇരയായത്. ഒരു ഫാമിലി ഫങ്ക്ഷനില്‍ പങ്കെടുത്ത ശേഷം മുക്കത്ത് നിന്ന് വീട്ടിലേക്ക് മടങ്ങുകയായിരുന്നു കുടുംബം. ഇതിനിടയിലായിരുന്നു മര്‍ദനം. യുവതിയുടെ അടിനാഭിയില്‍ തൊഴിച്ചെന്നാണ് ആരോപണം. ഭര്‍ത്താവിനും ക്രൂരമായ മര്‍ദനമേറ്റു.
പൊലീസുകാരന്‍ മദ്യപിച്ചിരുന്നതായി യുവതി ആരോപിക്കുന്നു. എസ്‌ഐയും സംഘവും അസഭ്യം പറഞ്ഞതായും യുവതി ട്വന്റി ഫോറിനോട് പറഞ്ഞു. സംഭവത്തില്‍ കാക്കൂര്‍ സ്‌റ്റേഷനില്‍ പരാതി നല്‍കിയിട്ടുണ്ട്. സംഭവത്തില്‍ അന്വേഷണം നടത്തുമെന്നും പൊലീസുകാരന്‍ കുറ്റക്കാരനാണെന്ന് കണ്ടെത്തിയാല്‍ ഉടന്‍ നടപടിയെടുക്കുമെന്നും ഡിസിപി അറിയിച്ചു. വിഷയം പരിശോധിക്കുമെന്ന് സിറ്റി പൊലീസ് കമ്മീഷണര്‍ രാജ്പാല്‍ മീണ പറഞ്ഞു.