വാഹന പരിശോധനയെ തുടര്‍ന്നുണ്ടായ അന്വേഷണത്തില്‍ വ്യാജ നമ്പര്‍പ്ലേറ്റുള്ള ബൈക്ക് കണ്ടെത്തിയ വീട്ടില്‍ വീണ്ടും വ്യാജ നമ്പറില്‍ വാഹനം. ഒരേ നമ്പറിലുള്ള രണ്ട് ഇരുചക്രവാഹനങ്ങള്‍ പിടികൂടിയ കേസില്‍ നടത്തിയ അന്വേഷണത്തിലാണ് വ്യാജ രജിസ്‌ട്രേഷന്‍ നമ്പറിലുള്ള മറ്റൊരു ബൈക്കുകൂടെ കടമ്പനാട് ഭാഗത്തെ വീട്ടില്‍ നിന്ന് മോട്ടോര്‍ വാഹന വകുപ്പ് പിടിച്ചെടുത്തത്. സംഭവത്തില്‍ കടമ്പനാട് കലതിവിള പുത്തന്‍ വീട്ടില്‍ അഖിലിനെ (30) ഏനാത്ത് പൊലീസ് അറസ്റ്റ് ചെയ്തു.
നമ്പര്‍ മറ്റൊരു ബൈക്കിന്റേതാണെന്ന് തെളിഞ്ഞതോടെ മോട്ടോര്‍ വാഹന വകുപ്പ് ഉദ്യോഗസ്ഥര്‍ വാഹനം കസ്റ്റഡിയിലെടുത്ത് അടൂര്‍ പൊലീസിന് കൈമാറി. ബൈക്ക് മറ്റാരോ തന്നതാണെന്നും രേഖകള്‍ കൈവശമില്ലെന്നും ഇയാള്‍ ഉദ്യോഗസ്ഥരോട് പറഞ്ഞത്.