കൊളംബോ: ഈസ്റ്റര്‍ ദിനത്തില്‍ ലോകത്തെ നടുക്കി ശ്രീലങ്കയിലുണ്ടായ ഭീകരാക്രമണത്തില്‍ അനുശോചനം രേഖപ്പെടുത്തിയും ഐക്യദാര്‍ഢ്യം പ്രഖ്യാപിച്ചും യു.എ.ഇ. ലോകത്തിലെ ഏറ്റവും ഉയരം കൂടിയ കെട്ടിടമായ ബുര്‍ജ് ഖലീഫയാണ് സ്‌ഫോടന പരമ്പരയില്‍ യു.എ.ഇയുടെ ഐക്യദാര്‍ഢ്യം പ്രഖ്യാപിച്ച് ലങ്കന്‍ പതാകയണിഞ്ഞത്. കെട്ടിടം ആകെ ശ്രീലങ്കന്‍ പതാകയുടെ നിറം അണിഞ്ഞു.
സഹവര്‍ത്തിത്വവും സഹിഷ്ണുതയും കൊണ്ട് പടുത്തുയര്‍ത്തപ്പെടുന്ന ലോകത്തിന് വേണ്ടിയാണിതെന്ന് ബുര്‍ജ് ഖലീഫയുടെ ട്വിറ്റര്‍ പേജില്‍ കുറിച്ചു. എമിറേറ്റ്‌സ് പാലസ്, ശൈഖ് സായിദ് ബ്രിഡ്ജ്, അഡ്‌നോക് ബില്‍ഡിങ്, ക്യാപിറ്റല്‍ ഗേറ്റ് എന്നിവ ഉള്‍പ്പെടെയുള്ള യു.എ.ഇയുടെ നിര്‍മിതികളും ലങ്കന്‍ പതാകയണിഞ്ഞു.