അടുത്ത വര്‍ഷം തന്റെ കണ്ണുകള്‍ക്ക് കാഴ്ച്ചശക്തി ലഭിക്കുമെന്ന് പ്രതീക്ഷിക്കുന്നതായി പ്രശസ്ത ഗായിക വൈക്കം വിജയലക്ഷ്മി. ഇതിനായി അമേരിക്കയില്‍ ചികിത്സ തേടുന്നതായും വിജയലക്ഷ്മി പറഞ്ഞു. ഒരു ചാനലിലെ പരിപാടിയില്‍ പങ്കെടുത്ത് സംസാരിക്കുകയായിരുന്നു അവര്‍. ഈ മാസം 22-ന് വൈക്കം വിജയലക്ഷ്മിയുടെ വിവാഹമാണ്. മിമിക്രി ആര്‍ട്ടിസ്റ്റ് അനൂപാണ് വരന്‍.
‘അടുത്ത വര്‍ഷമാകുമ്പോഴേക്ക് കാഴ്ച്ചശക്തി ലഭിക്കുമെന്ന പ്രതീക്ഷയിലാണ് താന്‍. അടുത്ത വര്‍ഷം ലോകം കണ്ടിരിക്കും. രണ്ട് വര്‍ഷത്തിനുള്ളില്‍ അമേരിക്കയില്‍ പുതിയ ചികിത്സാരീതിയൊക്കെ വരുന്നുണ്ട്. കഴിഞ്ഞ വര്‍ഷം അമേരിക്കയില്‍ പോയി ഡോക്ടറുമായി സംസാരിച്ചിരുന്നു. ഇപ്പോ നല്ല മാറ്റമുണ്ട്. ഈ വെളിച്ചമൊക്കെ കാണാം,’ വിജയലക്ഷ്മി പറഞ്ഞു.
വൈക്കം മഹാദേവക്ഷേത്രത്തില്‍ 22-ന് രാവിലെയാണ് വിജയലക്ഷ്മി-അനൂപ് വിവാഹം. രണ്ടു വര്‍ഷമായി അനൂപിനെ അറിയാം. ‘ഈയിടെയാണ് വിവാഹം കഴിക്കുവാന്‍ താല്‍പര്യമുണ്ടെന്ന് പറയുന്നത്. എന്റെ സംഗീതവും ഹ്യൂമര്‍സെന്‍സും ഇഷ്ടമാണെന്നും വിവാഹം കഴിക്കാന്‍ ആഗ്രഹമുണ്ടെന്നും പറയുകയായിരുന്നു. തുടര്‍ന്ന് വീട്ടുകാരോട് സംസാരിക്കുകയായിരുന്നു.
കുടുംബാംഗങ്ങള്‍ തമ്മില്‍ പരസ്പരം അറിയാം. അതുകൊണ്ട് കൂടുതലൊന്നും അന്വേഷിക്കേണ്ടി വന്നില്ല. മിമിക്രി ആര്‍ട്ടിസ്റ്റാണ്. അദ്ദേഹത്തിന് സംഗീതവും അറിയാം. എനിക്കും മിമിക്രി ഇഷ്ടമാണ്. രണ്ടുപേരും കലാരംഗത്ത് പ്രവര്‍ത്തിക്കുന്നതിനാല്‍ പരസ്പരം പിന്തുണ നല്‍കി ജീവിതം മുന്നോട്ട് കൊണ്ടുപോകാന്‍ കഴിയുമെന്ന് ഞാന്‍ പ്രതീക്ഷിക്കുന്നു’-വിജയലക്ഷ്മി പറഞ്ഞു.
നേരത്തേ, വിജയലക്ഷ്മിയുടെ വിവാഹനിശ്ചയം തൃശൂര്‍ സ്വദേശിയായ സന്തോഷുമായി കഴിഞ്ഞിരുന്നു. വിവാഹശേഷം സംഗീതത്തില്‍ നിന്ന് വിട്ടു നില്‍ക്കണമെന്ന് ആവശ്യപ്പെട്ടതോടെ വിവാഹം വേണ്ടെന്ന തീരുമാനത്തിലെത്തുകയായിരുന്നു വിജയലക്ഷ്മി.