Connect with us

columns

മുസ്‌ലിം സ്ത്രീ ശക്തി ഇന്ത്യയില്‍

പൗരത്വ ബില്ലിനെതിരായി ഇന്ത്യയിലുടനീളം നടന്ന പ്രക്ഷോഭങ്ങളിലെ മുസ്‌ലിം സ്ത്രീ ശക്തി രാജ്യം കണ്ടതാണ്

Published

on

അഡ്വ. അഹമ്മദ് മാണിയൂര്‍

മുസ്‌ലിം സ്ത്രീകളൂടെ സാമൂഹിക, രാഷ്ട്രീയ പങ്കാളിത്തം ഇന്ത്യയില്‍ എക്കാലത്തെയും വിമര്‍ശന വിഷയമാണ്. മുസ്‌ലിം പുരുഷ സമൂഹം ‘ന: സ്ത്രീ സ്വാതന്ത്ര്യമര്‍ഹിതി’ എന്ന ചിന്ത പിന്തുടരുന്നുവെന്നും മുസ്‌ലിം മത സാമൂഹിക രാഷ്ട്രീയ സംഘടനകള്‍ സ്ത്രീകളെ അന്യവത്കരിച്ചു നിര്‍ത്തുന്നു എന്നുമാണ് ആക്ഷേപം. എന്നാല്‍ ചരിത്രവും സമകാലീനതകളും അത്തരം വിമര്‍ശനങ്ങള്‍ക്കു മറുപടി നിരത്തുന്നുണ്ട്.

ലോക മുസ്‌ലിം ചരിത്രത്തില്‍ ആദ്യമായി ഒരു മുസ്‌ലിം സ്ത്രീ രാജ്യഭരണം കയ്യാളിയത് ഇന്ത്യയിലാണ്. അതുതന്നെ പതിമൂന്നാം നൂറ്റാണ്ടില്‍. എ.ഡി 1236 ഒക്ടോബര്‍ 10 മുതല്‍ 1240 ഒക്ടോബര്‍ 14 വരെ ഡല്‍ഹി ആസ്ഥാനമായി രാജ്യം ഭരിച്ച റസിയ സുല്‍ത്താന. ഡല്‍ഹി സുല്‍ത്താന്‍ ആയിരുന്ന ഇല്‍ത്തത് മിഷിന്റെ മകളായി ഡല്‍ഹിയിലാണ് റസിയ സുല്‍താന ജനിച്ചതും വളര്‍ന്നതും. ഇല്‍ത്തത് മിഷിന് ആണ്‍ മക്കള്‍ ഉണ്ടായിരുന്നിട്ടും മകളായ റസിയയെയാണ് അദ്ദേഹം പിന്‍ഗാമിയായി നിശ്ചയിച്ചത്. നാലു കൊല്ലക്കാലം മാത്രമേ ഭരിക്കാന്‍ അവസരം ലഭിച്ചുള്ളുവെങ്കിലും ചുരുങ്ങിയ കാലംകൊണ്ടുതന്നെ വന്‍ ജനപ്രീതി നേടി. ജനങ്ങള്‍ റസിയ സുല്‍ത്താനയെ പുണ്യവതിയായാണ് കണ്ടിരുന്നതെന്നും മരണശേഷം അവരുടെ ഖബറിടത്തില്‍ പ്രാര്‍ത്ഥനകള്‍ക്കായി ധാരാളം ആളുകള്‍ എത്താറുണ്ടായിരുന്നുവെന്നും പിന്നീട് 1334 ല്‍ ഇന്ത്യ സന്ദര്‍ശിച്ച മൊറോക്കോക്കാരനായ ലോകസഞ്ചാരി ഇബ്‌നു ബത്തൂത്ത രേഖപ്പെടുത്തിയിട്ടുണ്ട്. ഡല്‍ഹിയില്‍ തുര്‍ക്കുമാന്‍ ഗേറ്റ് പ്രദേശത്ത് ബുള്‍ബുള്‍ഖാന്‍ മൊഹല്ലയില്‍ റസിയ സുല്‍ത്താനയുടെ ഖബറിടം ഇപ്പോഴും ഉണ്ട്.

മുഗള്‍ സാമ്രാജ്യത്തിന്റെ സ്ഥാപകനായ ബാബറുടെ പുത്രി ഗുല്‍ ബദന്‍ ബീഗം (1523-1603) അക്കാലത്ത് ഇന്ത്യയിലെങ്ങും പ്രസിദ്ധയായ തത്ത്വചിന്തകയും ഗ്രന്ഥകാരിയുമായിരുന്നു. അവര്‍ രചിച്ച ‘ഹുമയൂണ്‍ നാമ’ എന്ന ജീവചരിത്ര ഗ്രന്ഥം ഇന്ത്യയിലെ മുഗള്‍ രാജകൊട്ടാരങ്ങളിലെ അന്തപുര രഹസ്യങ്ങളുടെ നേര്‍ചരിതങ്ങളായി ഗണിക്കപ്പെടുന്നു. അക്ബര്‍ ചക്രവര്‍ത്തിക്കുവേണ്ടി അദ്ദേഹത്തിന്റെ കൊട്ടാര ഉപദേശകരില്‍ ഒരാളായ അബുല്‍ ഫാസല്‍ രചിച്ച ‘അക്ബര്‍ നാമ’യുടെ രചനയില്‍ മുഖ്യ സ്വാധീനം ഗുല്‍ ബദന്‍ ബീഗമായിരുന്നുവെന്ന് ചരിത്രകാരന്മാര്‍ രേഖപ്പെടുത്തിയിട്ടുണ്ട്. ഔറംഗസീബിന്റെ പുത്രി സൈബുന്നിസ (1638 -1702) കവയിത്രിയും ഗ്രന്ഥകാരിയുമായിരുന്നു. ഇന്ത്യയില്‍ ദൗലത്താബാദില്‍ ഔറംഗസീബിന്റെ കൊട്ടാരത്തിലായിരുന്നു ജനനം. ഇന്ത്യന്‍ പുരാണങ്ങള്‍ പേര്‍ഷ്യന്‍ ഭാഷയിലേക്ക് പരിവര്‍ത്തനം ചെയ്തിട്ടുണ്ട്. സൈബുന്നിസയുടെ രചനകള്‍ പേര്‍ഷ്യയില്‍ വിദ്യാലയങ്ങളില്‍ പാഠ്യവിഷയമായിരുന്നു.

കണ്ണൂര്‍ ആസ്ഥാനമായി ഭരിച്ച അറക്കല്‍ രാജവംശത്തിലെ മുതിര്‍ന്ന അംഗം സ്ത്രീ ആയാലും അവര്‍ക്കായിരുന്നു രാജപട്ടം. സ്ത്രീകള്‍ ഭരിക്കുമ്പോഴും അവരുടെ പരിധിയിലുള്ള മഹല്ലുകളുടെയും മതകാര്യങ്ങളുടെയും തീര്‍പ്പധികാരികളും അവരായിരുന്നു. പോര്‍ച്ചുഗീസുകാര്‍ ഡച്ചുകാര്‍ ഇംഗ്ലീഷുകാര്‍ എന്നിവര്‍ക്കെതിരായി ചരിത്രപ്രധാനമായ യുദ്ധങ്ങളും അറക്കല്‍ ബീവിമാരുടെ ഭരണകാലത്ത് നടന്നിട്ടുണ്ട്. ബ്രിട്ടീഷ് കാര്‍ക്കെതിരായി 1780 ല്‍ അറക്കല്‍ ബീവി ജുനുമ്മാബി തുര്‍ക്കിയിലെ ഒട്ടോമന്‍ ഭരണാധികാരികളില്‍നിന്ന് സഹായം തേടി കരാര്‍ ഉണ്ടാക്കിയിട്ടുണ്ട്. 1857 ലെ ഒന്നാം സ്വാതന്ത്ര്യ സമരത്തില്‍ ബ്രിട്ടീഷുകാര്‍ക്കെതിരായി വീരേതിഹാസികമായ പോരാട്ടങ്ങള്‍ നയിച്ച വനിതയായിരുന്നു ഔധിലെ ഭരണാധിപയായിരുന്ന ബീഗം ഹസ്രത്ത് മഹല്‍. ഔധിലെ നവാബായിരുന്ന വാജിദ് അലി ഷായുടെ പത്‌നിയായിരുന്നു. നവാബിന്റെ മരണശേഷം ഔധിന്റെ ഭരണം ഹസ്രത്ത് മഹലിന്റെ കയ്യിലായി. ഇംഗ്ലീഷ് ഈസ്റ്റ് ഇന്ത്യാ കമ്പനിക്കെതിരായി നേരിട്ട് സേനയെ നയിച്ച് പൊരുതി. ഒന്നാം സ്വാതന്ത്ര്യ സമരത്തിലെ ഇന്ത്യന്‍ പോരാളികളുടെ മുഖ്യ മാര്‍ഗദര്‍ശിയും ആവേശവുമായിരുന്നു അവര്‍. 1820 ല്‍ ഔധിലായിരുന്നു ജനനം. യുദ്ധത്തില്‍ ബ്രിട്ടീഷുകാരുടെ മുന്നില്‍ തോല്‍വി ഉറപ്പായപ്പോള്‍ പിടികൊടുക്കാതെ നേപ്പാളില്‍ അഭയം തേടി. ബ്രിട്ടീഷ് അധീനതയിലായ ഔധിലേക്ക് തിരിച്ചുവരാന്‍ ബ്രിട്ടീഷ് ഭരണകൂടം ഹസ്രത്തു മഹലിന് സുരക്ഷിതവും സുഖകരവുമായ ഭാവി ജീവിതം വാഗ്ദാനം ചെയ്‌തെങ്കിലും വൈദേശികാധിപത്യത്തിലുള്ള ഒരു രാജ്യത്ത് ജീവിക്കാന്‍ താല്‍പര്യമില്ലെന്ന് പറഞ്ഞ് നിരസിക്കുകയായിരുന്നു. 1879 ഏപ്രില്‍ ഏഴിന് നേപ്പാളില്‍ അന്തരിച്ചു. 2020 ആഗസ്ത് 15ന് ഉപരാഷ്ട്രപതി വെങ്കട നായിഡു ഫേസ്ബുക്ക് പോസ്റ്റില്‍ ബീഗം ഹസ്രത്ത് മഹലിനെ ഇന്ത്യന്‍ സ്വാതന്ത്ര്യസമര ചരിത്രത്തിലെ അപൂര്‍വ്വം വനിതാപോരാളികളില്‍ ഒരാളായി വിശേഷിപ്പിക്കുകയും അവരുടെ ധീരോദാത്തമായ പോരാട്ടങ്ങളെ എടുത്തുപറയുകയും ചെയ്തിട്ടുണ്ട്. ഡല്‍ഹി ആസ്ഥാനമായി പ്രവര്‍ത്തിക്കുന്ന അബുല്‍ കലാം ആസാദ് ഫൗണ്ടേഷന്‍ ബീഗം ഹസ്രത്ത് മഹലിന്റെ സ്മരണക്കായി സ്‌കോളര്‍ഷിപ്പ് നല്‍കിവരുന്നുണ്ട്. 2021-22 വര്‍ഷത്തേക്കും അവര്‍ സ്‌കോളര്‍ഷിപ്പ് അപേക്ഷ ക്ഷണിച്ചിട്ടുണ്ട്.

1857 ലെ ഒന്നാം സ്വാതന്ത്ര്യസമരത്തില്‍ മുസ്‌ലിംകള്‍ക്ക് ബ്രിട്ടീഷ് പട്ടാളത്തില്‍നിന്ന് വലിയ പീഡനങ്ങള്‍ ഏല്‍ക്കേണ്ടിവന്നു. ഡല്‍ഹി, മീററ്റ് തുടങ്ങിയ സ്ഥലങ്ങളില്‍ സാധാരണക്കാരായ മുസ്‌ലിംകളെ പോലും ബ്രിട്ടീഷുകാര്‍ വേട്ടയാടി. അത് രാജ്യത്താകെ മുസ്‌ലിംകളെ തളര്‍ത്തി. അതിനുശേഷം പത്തൊമ്പതാം നൂറ്റാണ്ടിന്റെ അവസാനത്തോടെ സര്‍ സയ്യിദ് അഹമ്മദ് ഖാനും മറ്റും നടത്തിയ നവോത്ഥാന പ്രവര്‍ത്തനങ്ങളാണ് മുസ്‌ലിംകളെ മുഖ്യധാരയിലെത്തിച്ചത്. 1875 ല്‍ സര്‍ സയ്യിദ് അഹമ്മദ് ഖാന്റെ നേതൃത്വത്തില്‍ അലീഗഡില്‍ മുഹമ്മദന്‍ ആംഗ്ലോ ഓറിയന്റല്‍ സ്‌കൂള്‍ സ്ഥാപിച്ചതോടെ മുസ്‌ലിംകള്‍ക്കിടയില്‍ വിദ്യാഭ്യാസ മുന്നേറ്റത്തിനും തുടക്കമായി. ഈ വിദ്യാഭ്യാസ സ്ഥാപനമാണ് പിന്നീട് അലിഗഡ് മുസ്‌ലിം യൂനിവേഴ്‌സിറ്റിയായി വളര്‍ന്നത്. ബംഗാളിലും സമാനമായ മുന്നേറ്റങ്ങള്‍ ഉണ്ടായി. മുസ്‌ലിം സ്ത്രീകള്‍ വിദ്യാഭ്യാസത്തില്‍ മുന്നേറി. അവരില്‍ പലരും സ്വാതന്ത്ര്യ പ്രസ്ഥാനത്തിലും രാഷ്ട്രീയ സാമൂഹിക രംഗങ്ങളിലും സജീവമായി.1906 ല്‍ ആള്‍ ഇന്ത്യാ മുസ്‌ലിംലീഗ് പ്രവര്‍ത്തനം ആരംഭിച്ചപ്പോള്‍ മുസ്‌ലിം സ്ത്രീകള്‍ രാഷ്ട്രീയ നേതൃത്തത്തിലും എത്തി. മുസ്‌ലിംലീഗിന്റെ കേന്ദ്ര കമ്മിറ്റിയില്‍ എട്ട് അംഗങ്ങള്‍ വനിതകളായി ഉണ്ടായിരുന്നു. മുഹമ്മദലി ജിന്നയുട സഹോദരി ഫാത്തിമ ജിന്ന, ലിയാഖത്ത് അലി ഖാന്റ പത്‌നി ബീഗം ലിയാഖത്ത്, മിയാന്‍ മുഹമ്മദ് ഷാഫിയുടെ മകള്‍ ബീഗം ജഹന്നാരാ ഷാനവാസ് തുടങ്ങിയവരാണ് അവരില്‍ പ്രമുഖര്‍. ജഹന്നാര ഷാനവാസ് വലിയ പണ്ഡിതയും പ്രഭാഷകയുമായിരുന്നു. 1930 ല്‍ ലണ്ടനില്‍ വട്ടമേശാസമ്മേളത്തില്‍ മുസ്‌ലിംലീഗിനെ പ്രതിനിധീകരിച്ചു പങ്കെടുത്തു. വട്ട മേശ സമ്മേളനത്തില്‍ അവര്‍ ചെയത പ്രസംഗം വികാരനിര്‍ഭരവും ബ്രീട്ടീഷ് മേധാവികളെ ഇരുത്തി ചിന്തിപ്പിക്കുന്നതുമായിരുന്നു എന്ന് ചിക്കാഗോ സര്‍വകലാശാലയിലെ ചരിത്ര വിഭാഗം തലവന്‍ സ്റ്റാന്‍ലിവുള്‍പെര്‍ട്ട് എഴുതിയ ‘ജിന്നാ ഓഫ് പാകിസ്താന്‍’ എന്ന ഗ്രന്ഥത്തില്‍ വിവരിച്ചിട്ടുണ്ട്. അവരുടെ നേതൃത്വത്തില്‍ മുസ്‌ലിംലീഗിന് വനിതാവിഭാഗം രൂപീകരിക്കുകയും ഇന്ത്യയില്‍ മുഴുക്കെ മുസ്‌ലിം സ്ത്രീ സമ്മേളനങ്ങള്‍ നടത്തുകയും ചെയ്തിരുന്നു. 1937 ല്‍ മുസ്‌ലിം ലീഗിന്റെ നിയന്ത്രണത്തിലുണ്ടായിരുന്ന പഞ്ചാബ് പ്രവിശ്യാ ഗവണ്‍മെന്റില്‍ വിദ്യാഭ്യാസ, ആരോഗ്യ വകുപ്പ് മന്ത്രിയുമായിരുന്നു. 1979 ല്‍ പാകിസ്താനില്‍ മരിച്ചു.

കേരളത്തില്‍ സയ്യിദ് സനാഉല്ല മുക്തി തങ്ങളുടെയും മറ്റും നേതൃത്വത്തില്‍ നടന്ന വിദ്യാഭ്യാസ നവോത്ഥാന പ്രവര്‍ത്തനങ്ങളും സ്ത്രീ ശാക്തീകരണത്തിന് വഴിയൊരുക്കി. എന്നാല്‍ ഖിലാഫത്ത് പ്രസ്ഥാനവും മലബാര്‍ കലാപവും മലബാറില്‍ മുസ്‌ലിംകളെ വിദ്യാഭ്യാസ രംഗത്തു പിന്നാക്കം നിര്‍ത്തി. മലബാര്‍ കലാപം അടിച്ചമര്‍ത്താന്‍ ബ്രിട്ടീഷ് ഭരണകൂടം സ്വീകരിച്ച കിരാത നടപടികളും ഖിലാഫത്തു നേതാക്കളുടെ ബ്രിട്ടീഷ് ബഹിഷ്‌ക്കരണാഹ്വാനവും മുസ്‌ലിംകളെ തീര്‍ത്തും ബ്രിട്ടീഷ് വിരോധികളാക്കി. ഇംഗ്ലീഷ് വിദ്യാഭ്യാസത്തെയും രീതികളെയും അവര്‍ വെറുത്തു. ചില പണ്ഡിതന്മാരും വിദ്യാഭ്യാസ ബഹിഷ്‌കരണത്തെ പ്രോത്സാഹിപ്പിച്ചു. ഇതുണ്ടാക്കിയ സാമൂഹിക വിദ്യാഭ്യാസ പിന്നാക്കാവസ്ഥയില്‍ നിന്നുള്ള മോചനം ലക്ഷ്യം വെച്ചാണ് 1922 ല്‍ മുസ്‌ലിം ഐക്യ കേരള സംഘം രൂപീകരിച്ചത്. ഏകദേശം പന്ത്രണ്ടു കൊല്ലക്കാലത്തോളം മാത്രമേ ആ സംഘം പ്രവര്‍ത്തിച്ചുള്ളൂവെങ്കിലും അവരുടെ പ്രവര്‍ത്തനങ്ങള്‍ മുസ്‌ലിം നവോത്ഥാന രംഗത്ത് വലിയ ഗുണഫലങ്ങള്‍ ഉണ്ടാക്കി. 1946 ല്‍ ഫാറൂഖ് കോളജ് സ്ഥാപിച്ചു. ഐക്യകേരള സംഘത്തിന്റെ നേതാക്കളായിരുന്ന കെ.എം സീതി സാഹിബ്, കെ.എം മൗലവി തുടങ്ങിയവരൊക്കെ തന്നെയായിരുന്നു ഫാറൂഖ് കോളജ് സ്ഥാപിച്ചതിന്റെ പിന്നിലും. മുസ്‌ലിം സ്ത്രീവിദ്യാഭ്യാസം തന്നെയായിരുന്നു മുഖ്യ ലക്ഷ്യം.

സ്വാതന്ത്ര്യ ലബ്ധിക്കുശേഷം 1948 ല്‍ ഇന്ത്യന്‍ യൂനിയന്‍ മുസ്‌ലിം ലീഗ് പ്രവര്‍ത്തനം ആരംഭിച്ചപ്പോഴും അതിന്റെ മുഖ്യ പ്രവര്‍ത്തനമേഖലയായി പ്രഖ്യാപിക്കപ്പെട്ടതും വിദ്യാഭ്യാസ സാമൂഹിക മേഖലകള്‍ തന്നെയാണ് . പകുതി രാഷ്ട്രീയവും പകുതി വിദ്യാഭ്യാസ സാമൂഹിക സേവന പ്രവര്‍ത്തനങ്ങളും നടത്തുന്ന അര്‍ദ്ധരാഷ്ട്രീയ പ്രസ്ഥാനമെന്നാണ് ഇന്ത്യന്‍ യൂനിയന്‍ മുസ്‌ലിംലീഗിന്റെ രൂപീകരണ സമ്മേളനത്തില്‍ പാര്‍ട്ടിയുടെ പ്രസിഡന്റായി തെരഞ്ഞെടുക്കപ്പെട്ട മുഹമ്മദ് ഇസ്മയില്‍ സാഹിബ് പാര്‍ട്ടിയെ പരിചയപ്പെടുത്തിയത്. 1967 ല്‍ ഇ.എം.എസ് മന്ത്രിസഭയിലും തുടര്‍ന്നു വന്ന യു.ഡി.എഫ് മന്ത്രിസഭകളിലും വിദ്യാഭ്യാസ വകുപ്പ് ഏറ്റെടുത്ത് സി.എച്ച് മുഹമ്മദ് കോയ അടക്കമുള്ള മുസ്‌ലിം ലീഗ് മന്ത്രിമാര്‍ സ്ത്രീ വിദ്യാഭ്യാസത്തിനും ശാക്തീകരണത്തിനും വേണ്ടി വലിയ പ്രയത്‌നങ്ങള്‍ നടത്തി. മുസ്‌ലിംലീഗിന്റെ നേതൃത്വത്തില്‍ നിരവധി വിദ്യാഭ്യാസ സ്ഥാപനങ്ങള്‍ കേരളത്തിലും തമിഴ്‌നാട്ടിലുമായി ഉയര്‍ന്നുവന്നിട്ടുണ്ട്. സ്വാഭാവികമായും സ്ത്രീ വിദ്യാഭ്യാസത്തിലും മുന്നേറ്റങ്ങളുണ്ടായി. ഉന്നത വിദ്യാഭ്യാസ രംഗത്തും ആണ്‍കുട്ടികളെ വെല്ലുന്ന വിധം മുസ്‌ലിം പെണ്‍കുട്ടികള്‍ ഉയര്‍ന്നു. ഐ.എ.എസ്, ഐ. പി.എസ് പദവികളിലും അവര്‍ തിളങ്ങുന്നു. രാജ്യത്തിനു വേണ്ടി യുദ്ധം ചെയ്യാന്‍ പരിശീലനത്തിനായി മിലിട്ടറി അക്കാദമികളിലും മുസ്‌ലിം പെണ്‍കുട്ടികള്‍ ചേര്‍ന്നുതുടങ്ങിയിട്ടുണ്ട്. ഈ ശാക്തീകരണത്തിന്റെ പ്രതിഫലനങ്ങള്‍ രാഷ്ട്രീയ സാമൂഹിക മേഖലകളിലെല്ലാം തുടിച്ചുനില്‍ക്കുന്നു. മുസ്‌ലിം സ്ത്രീ നേതൃത്വമില്ലാത്ത മുഖ്യധാരാ രാഷ്ട്രീയ സംഘടനകള്‍ കേരളത്തിലോ ഇന്ത്യയില്‍ തന്നെയൊ ഇല്ല.

പൗരത്വ ബില്ലിനെതിരായി ഇന്ത്യയിലുടനീളം നടന്ന പ്രക്ഷോഭങ്ങളിലെ മുസ്‌ലിം സ്ത്രീ ശക്തി രാജ്യം കണ്ടതാണ്. ഡല്‍ഹിയിലെ ഷഹീന്‍ ബാഗും അതിന് നേതൃത്വം നല്‍കിയ ബല്‍ഖീസ് ബാനുവിനെ പോലുള്ളവരും പുരുഷമേധാവിത്വത്തിലുള്ള ഒരു സമൂഹം വളര്‍ത്തിയെടുത്ത ക്രമാനുഗതമായ മുസ്‌ലിം സ്ത്രീ ശാക്തീകരണത്തിന്റെ പ്രോജ്വല പ്രതീകങ്ങള്‍ തന്നെയല്ലെ.

 

 

 

Continue Reading
Advertisement
Click to comment

Leave a Reply

Your email address will not be published. Required fields are marked *

columns

കേരളീയം എന്ന ധൂര്‍ത്ത് മേള-എഡിറ്റോറിയല്‍

സംസ്ഥാനം സാമ്പത്തിക പ്രതിസന്ധിയുടെ വന്‍ ഗര്‍ത്തത്തില്‍ അകപ്പെട്ട് നില്‍ക്കുമ്പോള്‍ കേരളീയത്തിന്റെ പേരില്‍ കോടികള്‍ പൊടിപൊടിക്കുന്ന സര്‍ക്കാര്‍ റോമാ നഗരം കത്തിയെരിയുമ്പോള്‍ വീണ വായിച്ച നീറോ ചക്രവര്‍ത്തിമാരെയാണ് ഓര്‍മപ്പെടുത്തുന്നത്.

Published

on

സംസ്ഥാനം സാമ്പത്തിക പ്രതിസന്ധിയുടെ വന്‍ ഗര്‍ത്തത്തില്‍ അകപ്പെട്ട് നില്‍ക്കുമ്പോള്‍ കേരളീയത്തിന്റെ പേരില്‍ കോടികള്‍ പൊടിപൊടിക്കുന്ന സര്‍ക്കാര്‍ റോമാ നഗരം കത്തിയെരിയുമ്പോള്‍ വീണ വായിച്ച നീറോ ചക്രവര്‍ത്തിമാരെയാണ് ഓര്‍മപ്പെടുത്തുന്നത്. ചരിത്രത്തിലെ ഏറ്റവും വലിയ കടബാധ്യതയുമായി, എല്ലാ വകുപ്പുകളിലും കോടികളുടെ കുടിശ്ശിക നിലനില്‍ക്കുന്ന ഒരു സര്‍ക്കാറാണ് കേരളം ഭരിച്ചുകൊണ്ടിരിക്കുന്നത്. ക്ഷേമ പെന്‍ഷനുകള്‍ മുടങ്ങിയിട്ട് മാസങ്ങള്‍ പിന്നിട്ടു, കെ.എസ്.ആര്‍.ടി.സിയില്‍ ശമ്പളവും പെന്‍ഷനുമില്ല, സ്‌കൂള്‍ കുട്ടികളുടെ ഉച്ചഭക്ഷണത്തിനു പോലും പണം നല്‍കാനില്ല, നെല്‍കര്‍ഷകരുടെ കുടിശ്ശിക കൊടുത്തുവീട്ടാന്‍ കഴിയുന്നില്ല, കുടിശ്ശിക നല്‍കാത്തതിനാല്‍ സപ്ലൈക്കോയില്‍ വിതരണക്കാര്‍ ടെണ്ടര്‍ എടുക്കുന്നില്ല, ലൈഫ് മിഷന്‍ പദ്ധതിയിലും കാരുണ്യ ഫണ്ടിലുമൊന്നും തുക ലഭ്യമാകുന്നില്ല തുടങ്ങിയ അതി ഗുരുതരമായ സാമ്പത്തിക സാഹചര്യമാണ് സംസ്ഥാനത്ത് നിലനില്‍ക്കുന്നത്. സാമ്പത്തിക തകര്‍ച്ചയിലേക്ക് കൂപ്പുകുത്തിയ ഭരണകൂടങ്ങള്‍ പ്രകടമാക്കിയ എല്ലാ തരത്തിലുള്ള അസ്ഥിരതകളും ഈ സര്‍ക്കാര്‍ കാണിച്ചുകൊണ്ടിരിക്കുകയാണ്. ഈ ഘട്ടത്തിലാണ് തകര്‍ച്ചക്ക് ആക്കം കൂട്ടുന്ന രീതിയില്‍ ധൂര്‍ത്തിന്റെ മഹാമേളയായി കേരളീയം തലസ്ഥാന നഗരിയില്‍ അരങ്ങേറുന്നത്. 27 കോടി രൂപ ചിലവഴിച്ച് സര്‍ക്കാര്‍ നടത്തുന്ന ഈ മഹാമഹം ധൂര്‍ത്തിന്റെ മാത്രമല്ല അഴിമതിയുടെയും കൂടിച്ചേരല്‍ കൂടിയാണ്. ടെണ്ടര്‍പോലുമില്ലാതെ ഇഷ്ടക്കാര്‍ക്ക് പരിപാടിയുടെ കരാര്‍ നല്‍കിയതു മുതല്‍ തുടങ്ങുന്നു അഴിമതിയുടെ ഗന്ധം.

കേരളം നിലവില്‍ വന്നതിനു ശേഷമുള്ള മുഴുവന്‍ വികസന പ്രവര്‍ത്തനങ്ങളുടെയും പിതൃത്വം നിര്‍ലജ്ജം തന്റെ പേരിനോട് ചേര്‍ത്തുവെക്കുന്ന മുഖ്യമന്ത്രി അതേ അല്‍പ്പത്തരത്തോടെ തന്നെ കേരളീയവുമായി ബന്ധപ്പെട്ട് സംസ്ഥാനത്തുടനീളം തന്റെ മുഖം പ്രതിഷ്ടിച്ചുകൊണ്ടിരിക്കുകയാണ്. മാധ്യമങ്ങളായ മാധ്യമങ്ങളിലെല്ലാം ബഹുവര്‍ണ ചിത്രങ്ങള്‍ വെച്ചുള്ള പരസ്യം നല്‍കിയിട്ടും മതിവരാഞ്ഞിട്ട് പ്രധാന നഗരങ്ങളില്‍ കോടികള്‍ ചിലവഴിച്ച് ബഹുരാഷ്ട്ര കമ്പനികളുടെ പരസ്യബോര്‍ഡുകളെ വെല്ലുന്ന ഫോള്‍ഡിങ്ങുകള്‍ സ്ഥാപിച്ച് സായൂജ്യമടയുകയാണ്. ജി ട്വന്റി ഉച്ചകോടിയുടെ പേരില്‍ ഡല്‍ഹി നഗരം തന്റെ മാത്രം ചിത്രങ്ങളാല്‍ അലങ്കരിച്ച് ലോക രാഷ്ട്രങ്ങള്‍ക്കു മുന്നില്‍ രാജ്യത്തെ നാണംകെടുത്തിയ പ്രധാനമന്ത്രിയുടെ അതേ പാത പിന്തുടര്‍ന്ന് കേരളീയം നടക്കുന്ന തിരുവനന്തപുരം നഗരത്തെ തന്റെ സ്വന്തമാക്കിമാറ്റിയിരിക്കുകയാണ് മുഖ്യമന്ത്രി. വിവിധ സെഷനുകളില്‍ പങ്കെടുക്കുമ്പോള്‍ സ്വന്തം പേര് പ്രിന്റ് ചെയ്ത മുണ്ടും ഷര്‍ട്ടും കൂടി ധരിക്കാന്‍ ശ്രദ്ധിച്ചാല്‍ പ്രധാനമന്ത്രിയെപോലെ സമ്മേളനത്തെ കൈയ്യിലെടുക്കാന്‍ മുഖ്യമന്ത്രിക്കും സാധിക്കുന്നതേയുള്ളൂ.

ലോക കേരള സഭ പോലെ സംസ്ഥാന സര്‍ക്കാറിന്റെ നേട്ടങ്ങളെ ലോകം മുഴുവന്‍ എത്തിക്കുക എന്നതാണ് പരിപാടിയുടെ പ്രഖ്യാപിത ലക്ഷ്യമായി സര്‍ക്കാര്‍ പറയുന്നത്. എന്നാല്‍ കോടികള്‍ ചിലവഴിച്ച് നടത്തുന്ന ലോക കേരള സഭകള്‍ സംസ്ഥാനത്തിന് എന്ത് നേട്ടമുണ്ടാക്കി എന്നന്വേഷിക്കുമ്പോഴാണ് ഈ പരിപാടികളുടെ പൊള്ളത്തരം വ്യക്തമാകുന്നത്. വേണ്ടപ്പെട്ടവരെ ആനയിച്ചു കൊണ്ടുവന്ന് തങ്ങളെക്കുറിച്ച് മുഖസ്തുതി പറയിപ്പിക്കുക എന്നതല്ലാതെ ലോക കേരള സഭ വഴി സംസ്ഥാനത്തുണ്ടായ എന്തെങ്കിലുമൊരു നേട്ടം എടുത്തുകാണിക്കാന്‍ സര്‍ക്കാറിന് സാധ്യമല്ല. ഈ സാഹചര്യത്തിലാണ് ഇതേ മാതൃകയില്‍ തന്നെ വിവിധ മേഖലകളിലെ പ്രമുഖരെക്കൊണ്ട് മുഖ്യമന്ത്രിയുടെയും സര്‍ക്കാറിന്റെയും അവതാനങ്ങള്‍ പാടിപ്പുകഴ്ത്തിക്കുകയും അതുകാണിച്ച് ആരാധക വൃന്തത്തെ ആനന്ദലബ്ധിയില്‍ ആറാടിപ്പിക്കുകയും ചെയ്യുന്നത്. തിരഞ്ഞെടുപ്പ് പ്രചരണം പോലെയുള്ള രംഗങ്ങളില്‍ ഈ സംവിധാനങ്ങളെല്ലാം ഉപയോഗപ്പെടുത്തുകയും ചെയ്യുക എന്ന ലക്ഷ്യവും ഇതിനെല്ലാം പിന്നിലുണ്ടാകാം. നഷ്ടപ്പെട്ടുപോയ ജന പിന്തുണ തിരിച്ചു പിടിക്കാന്‍ പി.ആര്‍ ഏജന്‍സികള്‍ പറഞ്ഞു തരുന്ന എന്ത് ചെപ്പടി വിദ്യകളും ഉപയോഗിക്കാനുള്ള പൂര്‍ണ സ്വാതന്ത്ര്യം പിണറായി വിജയനുണ്ട്. പക്ഷേ അത് സ്വന്തം ചിലവില്‍ ആകണമെന്നു മാത്രം. ജനങ്ങളുടെ നികുതിപ്പണം ഉപയോഗിച്ച് നടത്തിക്കൊണ്ടിരിക്കുന്ന ഈ കോപ്രായങ്ങല്‍ക്കെല്ലാം കാലം മറുപടി പറയിപ്പിക്കുമെന്ന കാര്യം നിസ്സംശയമാണ്.

 

Continue Reading

columns

ഗസ്സ മരണ മുനമ്പാക്കിയത് ആര്

അമേരിക്കന്‍ പിന്തുണയോടെ ഇസ്രാ ഈല്‍ നിരപരാധികളായ നൂറുകണക്കിന് ഫലസ്തീന്‍ കുഞ്ഞുങ്ങളേയും സ്ത്രീകളേയും നിഷ്‌കരുണം ബോംബിട്ട് കൊല്ലുകയാണ്. മരണ മുനമ്പായിമാറിയിരിക്കുന്നു ഗസ്സ.

Published

on

റിയാസ് ഹുദവി പുലിക്കണ്ണി

അമേരിക്കന്‍ പിന്തുണയോടെ ഇസ്രാ ഈല്‍ നിരപരാധികളായ നൂറുകണക്കിന് ഫലസ്തീന്‍ കുഞ്ഞുങ്ങളേയും സ്ത്രീകളേയും നിഷ്‌കരുണം ബോംബിട്ട് കൊല്ലുകയാണ്. മരണ മുനമ്പായിമാറിയിരിക്കുന്നു ഗസ്സ. അയ്യായിരത്തോളം പൗരന്‍മാന്‍ നിഷ്ഠൂരമായി കൊല്ലപ്പെട്ടു, നിരപരാധികളായ ആയിരക്കണക്കിന് കുട്ടികളും സ്ത്രീകളും അവയില്‍ ഉള്‍പ്പെടുന്നുണ്ട്. യുദ്ധത്തിന്റെ സര്‍വ മര്യാദകളും ധാരണകളും ലംഘിച്ച് ഇസ്രാ ഈല്‍ നരനായാട്ട് തുടരുകയാണ്. കഴിവതും വേഗം പ്രശ്‌നങ്ങള്‍ പരിഹരിച്ച് സമാധാനം പുന:സ്ഥാപിക്കേണ്ട ഐക്യരാഷ്ട്ര സഭയും മറ്റു ലോക രാഷ്ട്രങ്ങളും ഇസ്രാ ഈലിന്റെ കിരാതന തേര്‍വാഴ്ചയെ തള്ളിപറയുന്നതിനപ്പുറം കര്‍ക്കശമായ മറ്റൊരു കടുത്ത നിലപാടിലേക്കും കടക്കാതെ കാഴ്ചക്കാരായി നില്‍ക്കുന്നുവെന്നതാണ് ഏറെ ദു:ഖകരം. ഭക്ഷണം, കുടിവെള്ളം, വൈദ്യുതി, ഇന്ധനം തുടങ്ങി സര്‍വ മേഖലയിലും ഉപരോധം ഏര്‍പ്പെടുത്തിയും പാര്‍പ്പിടങ്ങളും സ്‌കൂളുകളും അഭയാര്‍ത്ഥി ക്യാമ്പുകളും ബോബിട്ട് നിലം പരിശാക്കിയും ഫലസ്തീന്‍ ജനതയെ ക്രൂരമായി പീഡിപ്പിച്ചിട്ടും, അക്രമിച്ചിട്ടും യാതൊരു ദാക്ഷിണ്യവുമില്ലാതെ ആയിരക്കണക്കായ പിഞ്ചുകുഞ്ഞുങ്ങളും സ്ത്രീകളും പരിക്കേറ്റ് ചികിത്സയില്‍ കഴിയുന്ന ആശുപത്രികള്‍പോലും മനുഷ്യത്വം ഇല്ലാത്ത ഇസ്രാ ഈല്‍ സൈന്യം ബോംബിട്ട് നശിപ്പിച്ചു. പ്രാചീന കാലത്തേക്കാള്‍ ലോകം മനുഷ്യത്വപരമായും ധാര്‍മികമായും വളര്‍ച്ച കൈവരിച്ചുവെന്ന് അവകാശവാദം ഉന്നയിക്കുന്ന പുതിയ കാലത്ത് ഇങ്ങനെയൊക്കെ സംഭവിക്കുന്നുവെന്നത്തന്നെ മനുഷ്യത്വമുള്ളവര്‍ക്ക് ചിന്തിക്കാനും ചെയ്യാനും കഴിയാത്തതാണ്. അത്രമേല്‍ ഭീകരമാണ് ഹമാസിനെ പ്രത്രിരോധിക്കുന്നുവെന്ന പേരില്‍ ഇസ്രാ ഈല്‍ ഗസ്സയിലും ഫലസ്തീനിന്റെ മറ്റു പ്രദേശങ്ങളിലും നടത്തികൊണ്ടിരിക്കുന്ന മനസ്സുലക്കുന്ന കൃത്യങ്ങള്‍.

ഇറാന്‍, ഖത്തര്‍, സഊദി അടക്കമുള്ള അറബ് രാജ്യങ്ങള്‍ ഇസ്രാഈലിന്റ അതിരുകടന്ന അക്രമങ്ങളെയും ഫലസ്തീന്‍ അധിവേശത്തേയും അപലപിച്ചിട്ടും നിലവിലെ ഇസ്രാഈലിന്റെ ഇടപെടലുകള്‍ പശ്ചിമേഷ്യയില്‍ കൂടുതല്‍ രക്ത ചൊരിച്ചിലുകള്‍ക്ക് വഴിവെക്കുമെന്ന് വ്യക്തമാക്കിയിട്ടും തങ്ങളുടെ പ്രഖ്യാപിത നിലപാടില്‍നിന്ന് പിന്നോട്ട് പോകാതെ ഇസ്രാഈല്‍ രക്തരൂക്ഷിതമായ യുദ്ധത്തിനു മുതിരുന്നതിന്റെ പൂര്‍ണ ഉത്തരവാദിത്വം ലോക പൊലിസായി ചമയുന്ന അമേരിക്കക്കു മാത്രമാണ്. കാരണം ഇസ്രാഈലിനെതിരെ ഹമാസിന്റെ അപ്രതീക്ഷിത ആക്രമണം നടന്നപ്പോള്‍ മുമ്പും പിമ്പും നോക്കാതെ പൂര്‍ണ പിന്തുണ പ്രഖ്യാപിച്ച രാജ്യമാണ് അമേരിക്ക. മാത്രമല്ല, തങ്ങളുടെ വിദേശകാര്യ സെക്രട്ടറി ആന്റണി ബ്ലിങ്കണ്‍ ഹമാസിന്റെ ആക്രമണത്തെ അപലപിച്ചു നടത്തിയ ആദ്യ പ്രതികരണം താനും ഒരു ജൂതനാണെന്നാണ്. അതോടൊപ്പം നാളിതുവരെ തങ്ങള്‍ ചെയ്ത്‌കൊണ്ടിരിക്കുന്ന കണ്ണില്ലാത്ത ക്രൂരതകളെ മറച്ചുപിടിക്കാനും ലോക രാജ്യങ്ങളുടെ പിന്തുണ നേടാനും ഹമാസിനെ തീവ്രവാദ സംഘടനയായി മുദ്രകുത്താനും ജൂത സൈന്യം പടച്ചുണ്ടാക്കിയ ‘ബന്ദികളായ 40 കുട്ടികളെ ഹമാസ് പോരാളികള്‍ കഴുത്തറത്ത് കൊന്നെന്ന’ കല്ലുവെച്ച നുണകള്‍ അപ്പാടെ നിസ്സംശയം മാധ്യമങ്ങള്‍ക്ക്മുമ്പാകെ ഏറ്റുപറഞ്ഞ് ഇസ്രാഈലിനെ പരസ്യമായി പിന്തുണക്കുന്ന അമേരിക്കന്‍ പ്രസിഡന്റ് ബൈഡന്റെ കാഴ്ചയും കണ്ടതാണ്. ഫലസ്തീനിലെ നിലവിലെ സാഹചര്യങ്ങളെ കൂടുതല്‍ വഷളാക്കിയത് അമേരിക്കയാണെന്ന് പറയുന്നതായിരിക്കും കൂടുതല്‍ നല്ലത്. റഷ്യ യുക്രെന്‍ യുദ്ധം പൊട്ടി പുറപ്പെട്ടപ്പോള്‍ യൂറോപ്യന്‍ യൂണിയനെ കൂട്ടുപ്പിടിച്ച് റഷ്യക്കെതിരെ സാമ്പത്തിക ഉപരോധം ഏര്‍പ്പെടുത്തി ഇരയോടൊപ്പമാണെന്ന് പ്രസ്താവിച്ച അമേരിക്കയും ബൈഡനും സയണിസ്റ്റ് സൈന്യത്തിന്റെ മിസൈല്‍ ആക്രമണത്തില്‍ ദിനംപ്രതി മരിച്ച് വീഴുന്ന നൂറുകണക്കിനു കുഞ്ഞുങ്ങള്‍ക്കു വേണ്ടിയും തകര്‍ന്നടിഞ്ഞ പാര്‍പ്പിടങ്ങള്‍ക്കിടയില്‍ സര്‍വതും നഷ്ടപ്പെട്ട് നിലവിളിക്കുന്ന നിരപരാധികളായ ആയിരങ്ങള്‍ക്കു വേണ്ടിയും പ്രസ്താവന പോലും നടത്താത്തത്. പിറന്ന മണ്ണില്‍ അധിവസിക്കാന്‍ അധിനിവേശ ശക്തിക്കെതിരെ പോരാട്ടം നടത്തുന്ന ‘ഹമാസിനെ’ ഇസ്‌ലാമിക് സ്റ്റേറ്റിന്റെ അക്രമങ്ങളോട് തുലനം ചെയ്യാനും ഇസ്രാഈലിനെ വെള്ളപൂശാനും അമേരിക്കയും മറ്റു പാശ്ചാത്യശക്തികളും ശ്രമിക്കുന്നത് ജൂതരാഷ്ട്ര പിറവിയുടെ ചരിത്രം അറിയാത്തതു കൊണ്ടോ ഓര്‍മയില്ലാത്തതുകൊണ്ടോയല്ല, മറിച്ച് മുസ്‌ലിം വിരോധത്തിന്റെയും മത വര്‍ഗ വെറിയുടേയും അവര്‍ണ ബോധം ഇപ്പോഴും വെള്ളക്കാരന്റെ മനോമുകുരങ്ങളില്‍ അന്തര്‍ലീനമായി കിടപ്പുണ്ടെന്നതിന്റെ പ്രകടമായ പ്രതീകം കൂടിയാണ്. രണ്ടാം ലോക യുദ്ധാനന്തര ജാരസന്തതിയായി പാശ്ചാത്യ രാജ്യങ്ങളുടെ കുടില തന്ത്രങ്ങളാല്‍ പിറവി കൊണ്ട ജൂത രാഷ്ട്രത്തിന് ഇപ്പോഴും നല്‍കികൊണ്ടിരിക്കുന്ന അകമഴിഞ്ഞ പിന്തുണയും. കൂടാതെ പശ്ചിമേഷ്യന്‍ രാജ്യങ്ങളില്‍ ഇടക്കിടെ യുദ്ധവും ഒടുങ്ങാത്ത ആഭ്യന്തര കലാപങ്ങളും സംഘര്‍ഷങ്ങളും സൃഷ്ടിച്ചു ആയുധ കച്ചവടം പൊടിപൊടിക്കാനും അതിലൂടെ സാമ്പത്തിക നേട്ടം കൊയ്യാനും അമേരിക്കയടങ്ങുന്ന പാശ്ചാത്യന്‍ സാമ്രാജ്യത്വ ശക്തികള്‍ കാലങ്ങളായി നടത്തികൊണ്ടിരിക്കുന്ന മനുഷ്യത്വരഹിതമായ നാടകം കൂടിയാണ് ഇസ്രാഈല്‍ ഫലസ്തീന്‍ വിഷയത്തില്‍ അമേരിക്ക ഇപ്പോള്‍ നടത്തികൊണ്ടിരിക്കുന്ന അനുനയനീക്കങ്ങള്‍ എന്നു കൂടി അനുമാനിക്കാം. അതിനാല്‍ നിലവിലെ ഫലസ്തീന്‍ ഇസ്രാഈല്‍ സംഘട്ടനങ്ങളുടെ താത്കാലിക വിരാമത്തിനുള്ള നയതന്ത്ര നീക്കങ്ങളല്ല ലോക രാജ്യങ്ങളും ഐക്യരാഷ്ട്ര സഭയും നടത്തേണ്ടത്, മറിച്ച് കുടിയിറക്കപ്പെട്ട് ആട്ടിയോടിക്കപ്പെട്ട ഒരു വിഭാഗം ജനതക്ക് അധിവസിക്കാനൊരിടം അനുവദിച്ചതിന്റെ പേരില്‍ സൈ്വര്യമായ ഉറക്കവും സുരക്ഷിതമായ പാര്‍പ്പിടവും സ്വരാജ്യംതന്നെയും കാലങ്ങളായി നഷ്ടപ്പെട്ട ഫലസ്തീനികള്‍ക്ക് സ്വതന്ത്രമായൊരു രാജ്യം സാക്ഷാത്കരിച്ച് കൊടുക്കുകയെന്നതാണ് സുതാര്യമായ പരിഹാരം. എങ്കിലേ നിരന്തരം ഉയരുന്ന ഗസ്സയിലെ പതിനായിരങ്ങളുടെ രോദനം എന്നെന്നേക്കുമായി നിലച്ച് സമാധാനത്തിന്റെ പുതിയ സൂര്യോദയങ്ങള്‍ ഉദയം ചെയ്യൂ.

 

Continue Reading

columns

പ്രവാചക നാമത്തിൻ്റെ പൊരുൾ

ലോകത്ത് വളരെ കൂടുതൽ ഉച്ചരിക്കുകയും സ്തുതി കീർത്തനങ്ങൾക്ക് വിധേയമാവുകയും ചെയ്യുന്ന നാമമാണ് മുഹമ്മദ് .പ്രാർത്ഥനകളിൽ, കാവ്യങ്ങളിൽ , കഥാവിഷ്കാരങ്ങളിൽ ആ നാമം ആവർത്തിച്ചു വരുന്നു.

Published

on

പാണക്കാട് സയ്യിദ് മുനവ്വറലി
ശിഹാബ് തങ്ങൾ

ലോകത്ത് വളരെ കൂടുതൽ ഉച്ഛരിക്കുകയും സ്തുതി കീർത്തനങ്ങൾക്ക് വിധേയമാവുകയും ചെയ്യുന്ന നാമമാണ് മുഹമ്മദ് .പ്രാർത്ഥനകളിൽ, കാവ്യങ്ങളിൽ , കഥാവിഷ്കാരങ്ങളിൽ ആ നാമം ആവർത്തിച്ചു വരുന്നു .തിരുനബിയുടെ നാമകരണ ചടങ്ങിൽ പ്രപിതാവായ അബ്ദുൽ മുത്തലിബിനോട് ബന്ധുക്കളായ ഖുറൈശികൾ ചോദിക്കുന്നുണ്ട്: കൊച്ചു മകനെ എന്ത് പേരാണ് വിളിക്കുന്നത്? അദ്ദേഹം മറുപടി നൽകി: പ്രിയങ്കരനായ പേര് മുഹമ്മദ് .ലോകാലോകങ്ങളിൽ ഉള്ളവർ അവനെ അനുധാവനം ചെയ്യണമെന്ന് ആഗ്രഹിക്കുന്നു.” വന്ധ്യവയോധികനായ ഉപ്പൂപ്പയുടെ ആഗ്രഹത്തിന് പടച്ചവൻ ഉത്തരം നൽകി. മണ്ണിൽ മനുഷ്യരും ആകാശത്ത് മാലാഖമാരും ആ പേര് ഉൾപ്പുള്കത്തോടെ ഉരുക്കഴിക്കുന്നു .തിരുനബിയുടെ നാമകീർത്തനം പാഠവത്കരിക്കുകയും അത് വിശ്വാസിയുടെ ഉത്തരവാദിത്തമാണെന്ന് നിർദ്ദേശിക്കുകയും ചെയ്ത ഖുർആൻ ഇങ്ങനെ പ്രഖ്യാപിച്ചു :നബിയുടെ മേൽ അല്ലാഹു അനുഗ്രഹം വർഷിക്കുന്നു, മലക്കുകൾ പ്രാർത്ഥിക്കുന്നു, സത്യവിശ്വാസികളെ നബിക്ക് അനുഗ്രഹം. സമാധാന വർഷത്തിനായി നിങ്ങളും പ്രാർത്ഥിക്കുക.

56 തലമുറകളിലൂടെ തുടരുന്ന ഈ മുഹമ്മദീയ പ്രകീർത്തനത്തിൻറെ പൊരുൾ എന്താണ് ?അനുയായികളാൽ ആപാദചൂഢം പിന്തുടരുന്ന ഒന്നായി മുഹമ്മദ് എന്ന നാമവും നബിയുടെ ചര്യകളും മാറുന്നതെന്തുകൊണ്ട് എന്നത് വിമർശകരെ പോലും വിസ്മയിപ്പിക്കുന്നതാണ്. കൗമാരപ്രായത്തിൽ കേട്ട മുഹമ്മദ് എന്ന നാമത്തിന്റെ സൗന്ദര്യത്തിന് പിന്നാലെ സഞ്ചരിക്കുകയും ചരിത്രത്തിലും കവിതയിലും നാടകത്തിലും ആവർത്തിക്കുന്ന ആ പേരിൻറെ ആവിഷ്കാരങ്ങളെ നാലു പതിറ്റാണ്ടുകളിലൂടെ നീളം പഠിക്കുകയും ചെയ്ത ജർമൻ ഓറിയന്റലിസ്റ്റ് ആൻമേരി ഷിമ്മൽ രചിച്ച ‘ മുഹമ്മദ് ദൈവത്തിൻറെ തിരുദൂതർ ‘എന്ന പുസ്തകം പ്രസിദ്ധമാണ്. മധ്യകാലത്ത് നിലനിന്ന നബിനിന്ദക്കുള്ള പണ്ഡിതോചിതമായ പ്രായശ്ചിത്തമായി വേണം ഈ പുസ്തകത്തെ കണക്കാക്കാൻ. സെമറ്റിക്പാരമ്പര്യത്തിലും ആഫ്രിക്കാൻ പാശ്ചാത്യ പൗരസ്ത്യ ദേശങ്ങളിലും നബി ചരിത്രരചനയുടെയും കീർത്തനങ്ങളുടെയും കുത്തൊഴുക്ക് വലിയൊരു പഠന മേഖലയാണ് തോമസ് കാർലൈൽ 19-)0 നൂറ്റാണ്ടിന്റെ ആദ്യത്തിൽ ലണ്ടനിൽ നടത്തിയ മൂന്നു പ്രഭാഷണങ്ങളിൽ ഒന്ന് ഹീറോ ആസ് എ പ്രോഫറ്റ് ‘ എന്ന തലവാചകത്തിൽ മുഹമ്മദ് നബിയെ കുറിച്ചായിരുന്നു .അതുവരെ പ്രചരിക്കപ്പെട്ടിരുന്ന എല്ലാ ആരോപണങ്ങൾക്കും വസ്തുതകൾ അപഗ്രഥിച്ച് യുക്തിസഹമായി മറുപടി പറഞ്ഞു .ഇസ്ലാം വാളുകൊണ്ട് പ്രചരിപ്പിക്കപ്പെട്ട മതമാണെന്ന വിമർശനത്തിന് അദ്ദേഹം നൽകിയ മറുപടി പ്രസക്തമാണ്. കാറിൽ പറയുന്നു ,ഏതൊരു രാഷ്ട്രീയവും ഒരാളുടെ മനസ്സിൽ ആണല്ലോ ആദ്യമായി ഉദിക്കുക.മുഹമ്മദിന് ലഭിച്ച ഇസ്ലാം എന്ന ആശയം പ്രചരിപ്പിക്കാൻ ലോകത്ത് അപ്പോൾ മുഹമ്മദ് മാത്രമേയുള്ളൂ .തന്റെ കയ്യിൽ ഒരു വാളും. ഈ അവസ്ഥയിൽ എങ്ങനെയാണ് മുഹമ്മദിന് ലോകം കീഴടക്കാൻ സാധിക്കുക? വാളുകൊണ്ട് പ്രചരിപ്പിക്കാൻ ആണെങ്കിൽ വേണ്ടത്ര വാളുകളും പ്രയോഗിക്കാൻ അനുയായികളും വേണം. മുഹമ്മദിന് അതിനായി അനുയായികൾ ഉണ്ടായേ പറ്റൂ. ഈ വസ്തുത തെളിയിക്കുന്നത് വാളുകൊണ്ടല്ല ഇസ്ലാം പ്രചരിച്ചത് എന്ന സത്യമാണ് .തിരുനബിനൽകിയ രണ്ട് സന്ദേശങ്ങൾ എടുത്തു പറയേണ്ടതാണ്. ഒന്ന് ,ഐഹികവും പാരത്രികവുമായ അഥവാ ഭൗതികവും ആധ്യാത്മവുമായ രണ്ട് തലങ്ങൾ ഉൾച്ചേർന്നതാണ് ജീവിതം എന്ന കാഴ്ചപ്പാട്. മതമെന്നത് പ്രാർത്ഥനകളുടെയും ആരാധനകളുടെയും (സഷ്ടാവുമായുള്ള കെട്ടുപാടുകളുടെയും കേവലസംഹിതം മാത്രമല്ല, മറിച്ച് നാഗരിക രാഷ്ട്രീയ നിർമാണത്തിന്റെ ബഹുപാOങ്ങൾ ചേർത്ത് സർഗാത്മകവും സാമൂഹികോ ന്മുഖവുമാക്കേണ്ടതാണെന്ന് തിരുനബി പഠിപ്പിച്ചു. ഇത് കൂടുതൽ ജനപ്രിയമായ ഒരു മതത്തിന്റെയും ജനോപകരമായ ജീവിത പദ്ധതിയുടെയും ഉയർപ്പിന് കാരണമായി.അബ്ബാസിയ ഖിലാഫത്തിൻ്റെയും സ്പാനിഷ് മുസ്ലിം ഭരണത്തിന്റെയും കാലത്ത് തുടക്കം കുറിച്ച വൈജ്ഞാനിക പുരോഗതിയുടെയും നാഗരിക വളർച്ചയുടെയും പാരമ്പര്യം ഈ സാമൂഹിക കാഴ്ചപ്പാടിന്റെ ഭാഗമായിരുന്നു. നവോത്ഥാനകാലത്ത് ഉയർന്നു വരാൻ യൂറോപ്പിന് സകല സാധ്യതയും നൽകിയതിൽ തിരുനബിയുടെ പിന്തുണക്കാരിലൂടെ വളർന്ന വൈജ്ഞാനിക വിപ്ലവത്തിന് ചെറുതല്ലാത്ത പങ്ക് ഉണ്ടായിരുന്നു .ഇസ്ലാം തുടങ്ങിയത് പൂർത്തീകരിക്കുക അല്ലാതെ യൂറോപ്പിന് മറ്റൊന്ന് ചെയ്യാൻ ഉണ്ടായിരുന്നില്ല എന്ന് ഫിലിപ് കെ ഹിറ്റി ഈ ചരിത്രത്തെ പറ്റി എഴുതുന്നുണ്ട് .ഇത്തരത്തിൽ ആഘോഷിക്കപ്പെട്ട ഒരു ജനകീയ പ്രവാചകൻ ലോകത്തിനു മുമ്പിൽ ഉണ്ട്. അതിലൂടെയാണ് മുഹമ്മദ് എന്ന സ്തുതിക്കപ്പെട്ട നബി രൂപപ്പെട്ടുവന്നത്. രണ്ടാമതായി എടുത്തു പറയേണ്ടത്, സഹിഷ്ണുത എന്ന വലിയ മൂല്യത്തെ യാഥാർത്ഥ്യമാക്കുന്നതിലും ജനകീയമാക്കുന്നതിലും മുഹമ്മദ് നബി വഹിച്ച പങ്കാണ് പതിറ്റാണ്ടുകൾ യുദ്ധത്തിൽ ഏർപ്പെട്ടുപോകുന്ന ഗോത്രങ്ങളെ തമ്മിലടുപ്പിക്കിയും സഹോദര മതക്കാരെ വിശ്വാസത്തിൽ എടുത്തും മദീനയിൽ നിർമ്മിച്ച രാഷ്ട്രത്തിൻറെ അത്ഭുതം എടുത്തു പറയേണ്ടതാണ് .വിടവാങ്ങൽ പ്രസംഗത്തിൽ ലോക മനസ്സാക്ഷിക്ക് നൽകിയ സമഭാവനയുടെ ഉൾക്കാഴ്ചകൾ അവസാനമില്ലാത്തതാണ്. ഇത്തരത്തിൽ ഇന്ന് കാണുന്ന ലോകത്തെ സമാധാനപൂർണ്ണമായ നിലനിർത്തുന്നതിൽക്കുള്ള പങ്കാളിത്തത്തിന്റെ പേരിൽ കൂടിയാണ് മുഹമ്മദ് സ്തുതിക്കപ്പെട്ടവൻ എന്ന പേര് അർത്ഥപൂർണ്ണം ആകുന്നത്

(മലയാള മനോരമ ദിനപത്രത്തിൽ 28-09-2023 ന് പ്രസിദ്ധീകരിക്കപ്പെട്ടത് )

Continue Reading

Trending