ആല്‍ബത്തില്‍ അഭിനയിക്കാനെത്തിയ നടിയെ മദ്യം നല്‍കി പീഡിപ്പിക്കാന്‍ ശ്രമിച്ചെന്ന കേസില്‍ പ്രതിയായ മുന്‍ ഡിവൈഎസ്പി മധുസൂദനന്റെ മൊഴി രേഖപ്പെടുത്തും. ജാമ്യം ലഭിക്കുന്ന വകുപ്പുകളാണ് ചുമത്തിയിരിക്കുന്നതെന്ന് അന്വേഷണത്തിന്റെ ചുമതലയുള്ള ഡിവൈഎസ്പി പറഞ്ഞു. ബേക്കല്‍ പൊലീസാണ് കേസ് രജിസ്റ്റര്‍ ചെയ്തിരിക്കുന്നത്.
മധുസൂദനോട് ചോദ്യം ചെയ്യലിന് ഹാജരാകാന്‍ നോട്ടിസ് നല്‍കും. പരാതിയുടെ നിജസ്ഥിതി പരിശോധിക്കും. പരാതി കെട്ടിച്ചമച്ചതാണോ എന്നതടക്കമുള്ള കാര്യങ്ങളും പരിശോധനയ്ക്ക് വിധേയമാക്കും. ഹോസ്ദുര്‍ഗ് ബാറിലെ അഭിഭാശകനാണ് മധുസൂദനന്‍. കഴിഞ്ഞ കുറെ കാലമായി സിനിമാ അഭിനയ രംഗത്തുണ്ട്. ആന്‍ഡ്രോയിഡ് കുഞ്ഞപ്പന്‍, തൊണ്ടിമുതലും ദൃക്‌സക്ഷിയും, കക്ഷി അമ്മിണിപ്പിള്ള എന്നീ ചലചിത്രങ്ങളില്‍ അഭിനയിച്ചു.
കൊല്ലം സ്വദേശിയായ യുവതിയാണ് മധുസൂദനെതിരെ പരാതി നല്‍കിയത്. ബേക്കലില്‍ ഹോം സ്‌റ്റേയിലാണ് നടിക്ക് താമസസൗകര്യം ഒരുക്കിയിരുന്നത്. ആല്‍ബങ്ങള്‍ സ്ഥിരമായി ഉപയോഗിക്കുന്ന താമസ സ്ഥലമാണിത്. ഹോം സ്‌റ്റേയിലെത്തിയ മധുസൂദനന്‍ ബിയര്‍ നല്‍കിയ ശേഷം സിനിമയില്‍ അഭിനയിപ്പിക്കാമെന്ന് വാഗ്ദാനം ചെയ്ത് മോശമായി പെരുമാറി എന്നാണ് പരാതി. കഴിഞ്ഞ ശനിയാഴ്ചയാണ് പരാതി നല്‍കിയത്.