സ്‌കൂളിലുണ്ടായ തര്‍ക്കത്തെ തുടര്‍ന്ന് പ്രയാഗ് രാജില്‍ പത്താം ക്ലാസ് വിദ്യാര്‍ഥിയെ സഹപാഠികള്‍ അടിച്ചുകൊന്നു. വൈകീട്ട് സഹോദരിക്കൊപ്പം വീട്ടിലേക്ക് പോവുമ്പോഴായിരുന്നു സംഭവം. കൊല്ലപ്പെട്ട വിദ്യാര്‍ഥിയും സഹപാഠികളും തമ്മില്‍ സ്‌കൂളില്‍വെച്ച് തര്‍ക്കമുണ്ടായിരുന്നു. അധ്യാപകര്‍ ഇടപെട്ട് ഇത് ഒത്തുതീര്‍പ്പാക്കിയിരുന്നു.
വൈകീട്ട് സഹോദരിക്കൊപ്പം പോവുമ്പോള്‍ നേരത്തെ തര്‍ക്കമുണ്ടായ വിദ്യാര്‍ഥികള്‍ അവര്‍ക്കെതിരെ അധിക്ഷേപകരമായ പരാമര്‍ശങ്ങള്‍ നടത്തുകയായിരുന്നു. വിദ്യാര്‍ഥി ഇത് ചോദ്യം ചെയ്തതിനെ തുടര്‍ന്നുണ്ടായ തര്‍ക്കമാണ് കൊലപാതകത്തില്‍ കലാശിച്ചത്.
സ്‌കൂളിലുണ്ടായ തര്‍ക്കമാണ് കൊലപാതകത്തിലെത്തിയതെന്ന് പൊലീസ് പറഞ്ഞു. പട്ടികകൊണ്ടുള്ള അടിയേറ്റ് ഗുരതരാവസ്ഥയിലായ വിദ്യാര്‍ഥി ആശുപത്രിയില്‍ ചികിത്സയിലിരിക്കുമ്പോഴാണ് മരിച്ചത്. സംഭവവുമായി ബന്ധപ്പെട്ട് മൂന്നുപേരെ അറസ്റ്റ് ചെയ്തിട്ടുണ്ടെന്നും ഇവരെ ചോദ്യം ചെയ്തുവരികയാണെന്നും പൊലീസ് പറഞ്ഞു. സംഭവത്തെ തുടര്‍ന്ന് പ്രകോപിതരായ നാട്ടുകാര്‍ റോഡ് ഉപരോധിച്ചു. സംഘര്‍ഷാവസ്ഥ നിലനില്‍ക്കുന്നതിനാല്‍ വന്‍ പൊലീസ് സന്നാഹം പ്രദേശത്ത് നിലയുറപ്പിച്ചിട്ടുണ്ട്.