കൊച്ചി: ഷവര്‍മ ഉണ്ടാക്കാനായി 500 കിലോ പഴകിയ ഇറച്ചി എത്തിച്ച കേസില്‍ മണ്ണാര്‍ക്കാട് സ്വദേശി പിടിയില്‍. പാലക്കാട് മണ്ണാര്‍ക്കാട് സ്വദേശി ജുനൈസിന്റെ അറസ്റ്റ് ആണ് കളമശ്ശേരി പൊലീസ് രേഖപ്പെടുത്തിയത്. ജനുവരി 12നാണ് കളമശ്ശേരിയില്‍ വെച്ച് പഴകിയ നിലയിലുള്ള 500 കിലോ ഇറച്ചി പിടികൂടിയത്.
കളമശ്ശേരി നഗരസഭ ആരോഗ്യ വിഭാഗം നടത്തിയ പരിശോധനയിലാണ് പഴകിയ ഇറച്ചി പിടികൂടിയത്.
തമിഴ്‌നാട്ടിലെ പൊള്ളാച്ചിയില്‍ നിന്നാണ് പഴകിയ ഇറച്ചി കൊണ്ടുവന്നതെന്ന് ജുനൈസ് പൊലീസിന് മൊഴി നല്‍കിയിട്ടുണ്ട്. കുറേ മാസങ്ങളായി ഹോട്ടലുകള്‍ക്ക് ഇറച്ചി വിതരണം ചെയ്യുന്നുണ്ട്. നല്ല ഇറച്ചിയാണ് വിതരണത്തിന് കൊണ്ടു വന്നതെന്നും പ്രതി പറഞ്ഞതായാണ് വിവരം.
ഇന്നലെ മലപ്പുറം പൊന്നാനിയില്‍ നിന്നാണ് ജുനൈസിനെ കസ്റ്റഡിയിലെടുത്തത്. മുതിര്‍ന്ന ഉദ്യോഗസ്ഥരുടെ ചോദ്യം ചെയ്യലിന് ശേഷം ഇന്ന് കോടതിയില്‍ ഹാജരാക്കും.