സുപ്രിം കോടതി മുന് ചീഫ് ജസ്റ്റിസ് ഡി വൈ ചന്ദ്രചൂഡിനെതിരായ പരാതിയില് നടപടികള്ക്കായി നിയമ മന്ത്രാലയം പേഴ്സണല് കാര്യമന്ത്രാലയത്തിന് കൈമാറി. മുന് പാട്ന ഹൈക്കോടതി ജഡ്ജി രാകേഷ് കുമാറാണ് ഡി വൈ ചന്ദ്രചൂഡിനെതിരെ പരാതി നല്കിയത്.
സാമൂഹിക പ്രവര്ത്തക ടീസ്റ്റ സെതല്വാദിന് ജാമ്യം നല്കിയതില് വഴിവിട്ട ഇടപെടല് ഉണ്ടായെന്നാണ് പരാതിയിലെ പ്രധാന ആരോപണം. സിബിഐ അന്വേഷണമാവശ്യപ്പെട്ടായിരുന്നു പരാതി. നവംബറില് നല്കിയ പരാതിയുടെ അടിസ്ഥാനത്തിലായാണ് തുടര് നടപടികള് ആരംഭിച്ചത്.
2016 മെയ് 13 നായിരുന്നു ഡി വൈ ചന്ദ്രചൂഡ് സുപ്രീം കോടതി ജഡ്ജി ആയി ചുമതലയേല്ക്കുന്നത്. അതിനുമുമ്പ് രണ്ട് വര്ഷവും ഏഴ് മാസവും അലഹബാദ് ഹൈക്കോടതി ചീഫ് ജസ്റ്റിസ് ആയിരുന്നു. 2000 മാര്ച്ച് 29നാണ് അദ്ദേഹം ബോംബൈ ഹൈക്കോടതി അഡീഷണല് ജഡ്ജിയായി ചുമതലയേല്ക്കുന്നത്.
1998 മുതല് ബോംബൈ ഹൈക്കോടതി ജഡ്ജി ആകുന്നതുവരെ കേന്ദ്ര സര്ക്കാരിന്റെ അഡീഷണല് സോളിസിറ്റര് ജനറല് ആയും സേവനം അനുഷ്ഠിച്ചിട്ടുണ്ട്.