Connect with us

Video Stories

കാശാവരുത്, മികവാകട്ടെ കലയുടെ മാനദണ്ഡം

Published

on

കലയുടെ കണ്ണായ കണ്ണൂരില്‍ ഉല്‍സവാന്തരീക്ഷത്തില്‍ അമ്പത്തേഴാമത് സംസ്ഥാന സ്‌കൂള്‍ കലാമേളക്ക് തിരശീല ഉയര്‍ന്നപ്പോള്‍ തന്നെ മേളക്കു പുറത്തുള്ള കള്ളക്കളികളെക്കുറിച്ചുള്ള ആശങ്കകളും പിന്നണിയില്‍ നിന്നുയരുന്നു. 232 ഇനങ്ങളിലായി പന്ത്രണ്ടായിരത്തോളം വരുന്ന കൊച്ചുകലാകാരന്മാരും കലാകാരികളും വേദികളില്‍ തങ്ങളുടെ പ്രതിഭ പുറത്തെടുക്കാനെത്തുന്നത് കേരളത്തിന്റെ കലാ രംഗത്തെ വളര്‍ച്ചക്കും ഭാവിക്കും വലിയ നേട്ടമാണെങ്കിലും ഇതിന്റെ നടത്തിപ്പിനെക്കുറിച്ചും വിധി നിര്‍ണയത്തെക്കുറിച്ചുമുള്ള പരാതി പ്രളയങ്ങള്‍ പായസത്തിലെ കല്ലുകടിയാകുകയാണ്.

 

യേശുദാസ്, ജയചന്ദ്രന്‍, വിനീത്, മഞ്ജുവാര്യര്‍, കാവ്യാമാധവന്‍ പോലുള്ള ഒട്ടനവധി കലാകാരന്മാരും സംഗീതജ്ഞരും വളര്‍ന്നുവന്ന മേളയാണ് ഇത്. അതുകൊണ്ടുതന്നെ സിനിമയിലേക്കുള്ള കവാടമെന്ന വിശേഷണം ഭാഗ്യവശാലോ നിര്‍ഭാഗ്യവശാലോ സ്‌കൂള്‍ കലാമേളക്ക് ചാര്‍ത്തിക്കിട്ടിയിരിക്കുന്നു. സബ്ജില്ലാ കലാമേളകളിലും ജില്ലാ കലോല്‍സവങ്ങളിലും നിന്ന് ഉയര്‍ന്നുകേട്ട ക്രമക്കേടുകളും അഴിമതികളും പതിവുപോലെ ഇത്തവണയുംനമ്മെ വ്യാകുലപ്പെടുത്തുന്നതാണ്.

ഒരു വിധികര്‍ത്താവ് തനിക്ക് നാലു ലക്ഷം രൂപ തന്നാല്‍ ഒന്നാമതെത്തിക്കാം എന്ന് രക്ഷിതാവിനോട് വാഗ്ദാനം ചെയ്യുന്ന മൊബൈല്‍സംസാരം പരസ്യമാകുകയുണ്ടായി. തൃശൂര്‍ ജില്ലാ കലോല്‍സവത്തിനിടെ മാര്‍ക്ക് കുറഞ്ഞതിന് കുട്ടിയുടെ മാതാവ് വിധി കര്‍ത്താവിന്റെ കരണത്തടിച്ചതും നാം കേട്ടു. കോഴിക്കോട് ജില്ലാ കലോല്‍സവത്തിനിടെ വിജിലന്‍സ് പരിശോധന. കലാമണ്ഡലത്തിലെ പ്രശസ്ത നര്‍ത്തകിയുടെ പേരില്‍ ആള്‍മാറാട്ടവും നടന്നു. മേളയിലെ വിജയത്തിലൂടെ സിനിമയിലും മറ്റും മുഖം കാണിക്കാമെന്ന കൊതിയാണ് ചിലര്‍ക്കെങ്കില്‍ ലക്ഷങ്ങള്‍ ചെലവഴിച്ച് മക്കളെ പണം കായ്ക്കുന്ന താരങ്ങളാക്കാമെന്ന ആര്‍ത്തിയാണ് മറ്റുചില രക്ഷിതാക്കള്‍ക്ക്.

ഒന്നാം സ്ഥാനം നേടിയവരാണ് മുന്‍കാലങ്ങളില്‍ കേരളത്തിന്റെ കലാ സംഗീത രംഗങ്ങളില്‍ പിന്നീട് ഉയര്‍ന്നുവന്നിട്ടുള്ളതെന്ന് പിന്‍വാതില്‍ ശരണക്കാര്‍ തെറ്റിദ്ധരിച്ചിരിക്കുന്നു. ക്ലാസിക് നൃത്തയിനങ്ങളില്‍ ലക്ഷങ്ങള്‍ ചെലവഴിച്ചെത്തുന്ന പലരും ഈ അനഭിലഷണീയ പ്രവണതകള്‍ക്ക് കൂട്ടുനില്‍ക്കുന്നവരാണ്. ഇതൊക്കെ വ്യക്തമാക്കുന്നത് കലോല്‍സവ വിധി നിര്‍ണയത്തിലെ നിഷ്പക്ഷത ഇപ്പോഴും അമ്മാത്തെത്തിയിട്ടില്ല എന്നുതന്നെ.

 

തന്റെ കുട്ടിക്ക് ഒന്നാം സ്ഥാനം തന്നെ ലഭിക്കണമെന്ന വാശിയുമായി വന്‍തുക ചെലവഴിച്ച് കലോല്‍സവത്തിനെത്തുന്ന കൊച്ചമ്മമാരെ നിലക്കുനിര്‍ത്താന്‍ സംഘാടകര്‍ക്ക് കഴിയണം. മേളയില്‍ ആയിരക്കണക്കിന് അപ്പീലുകള്‍ എത്തുന്നുവെന്നതും ഫലങ്ങള്‍ കോടതി കയറുന്ന പ്രവണതയും ഭൂഷണമല്ല. വിധി നിര്‍ണയം ഉപജില്ലാ തലങ്ങളില്‍ തന്നെ കുറ്റമറ്റതാക്കാനായാലേ അനാവശ്യമായ അപ്പീലുകള്‍ കുറക്കാനാകൂ. ഇതിനാകണം വിദ്യാഭ്യാസ വകുപ്പ് ശ്രദ്ധിക്കേണ്ടത്. മാപ്പിള കലാമല്‍സരങ്ങള്‍ക്കും അനഭിലഷണീയമായ വിധി നിര്‍ണയങ്ങള്‍ നടക്കുന്നുണ്ട്. തമിഴ് വിദ്യാര്‍ഥികളുടെ പരാതികളും പരിഗണിക്കപ്പെടണം.

വിധി കര്‍ത്താക്കളുടെ പേരുകള്‍ വകുപ്പിലെ ചിലര്‍ മുന്‍കൂട്ടിതന്നെ പരസ്യപ്പെടുത്തുകയും അവരെ രക്ഷിതാക്കളും ഗുരുക്കന്മാരും മറ്റും രഹസ്യമായി കണ്ട് മുന്‍കൂട്ടി തന്നെ കരാറുറപ്പിക്കുകയും ചെയ്യുന്നു. വിദ്യാഭ്യാസ വകുപ്പിലെ രാഷ്ട്രീയ സംഘടനകളില്‍പെട്ടവരാണ് ഇതിനുപിന്നില്‍. കല എന്നതൊരു തപസ്യയാണ്. കാശാകരുത്, മെറിറ്റാകണം അതിലെ മാനദണ്ഡം. സാധാരണക്കാരും പട്ടിണിക്കാരുമായ കുട്ടികളുടെ കലാ മികവ് പ്രകടിപ്പിക്കാനും അവരെ കൈപിടിച്ച് ഉയര്‍ത്തിക്കൊണ്ടുവരാനുമാവണം സംഘടാകരുടെയും കലാകേരളത്തിന്റെയും ശ്രദ്ധ. ലക്ഷങ്ങള്‍ ചെലവഴിച്ചെത്തുന്ന കുട്ടികള്‍ക്കിടയില്‍ കെട്ടിട നിര്‍മാണത്തൊഴിലാളി അനിലിന്റെ മക്കളായ ആഷ്ബിനും ആഷ്‌ലിയും ചിലങ്ക കടം വാങ്ങിയാണ് പാലക്കാട്ടെ മേളയിലെത്തിയത്.

പണമില്ലാത്തതുകാരണം ജില്ലാ കലോല്‍സവത്തില്‍ ഈ പിതാവ് തന്നെയാണ് നൃത്തയിനങ്ങളില്‍ മകന്റെ ചമയം നിര്‍വഹിച്ചത്. സമര്‍പ്പിത മനസ്‌കരായ കലാകാരന്മാരുടെ പരിശീലനവും കുട്ടികളുടെ കഴിവിനെ പരിപോഷിപ്പിക്കുന്നുണ്ട്. ഇവരുടെയെല്ലാം സല്‍പേരിന് കളങ്കം ചാര്‍ത്തുന്ന വിധമാണ് മറ്റു ചിലരുടെ പെരുമാറ്റവും കാശിനുവേണ്ടിയുള്ള ആര്‍ത്തിയും. കുട്ടികളുടെ കലാപ്രകടനത്തെ അവര്‍ക്കു മാത്രമായി വിടുകയാണ് ഓരോരുത്തരും ചെയ്യേണ്ടത്. കലോല്‍സവ മാന്വല്‍ 1995ന് ശേഷം ഇതുവരെയും പരിഷ്‌കരിച്ചിട്ടില്ല. അടുത്ത വര്‍ഷം അതുണ്ടാകുമെന്നാണ് സര്‍ക്കാര്‍ പറയുന്നത്. നല്ലതുതന്നെ. ഗോത്ര വര്‍ഗ കലകളെ ഉള്‍പെടുത്താനുള്ള ശ്രമവും സ്വാഗതാര്‍ഹമാണ്.

മംഗലംകളി, വട്ടക്കളി, ഇന്ദ്രജാലം, പുള്ളുവന്‍പാട്ട് തുടങ്ങിയവ പരിഗണനയിലാണ്. എന്നാല്‍ എല്ലാറ്റിനുമുപരി നാം ചെയ്യേണ്ടത് കുട്ടികളില്‍ അനാവശ്യമായ മാനസിക സമ്മര്‍ദം സൃഷ്ടിക്കാതിരിക്കുകയാണ്. ക്ലാസിക് എന്ന പേരില്‍ അവതരിപ്പിക്കപ്പെടുന്ന നൃത്തയിനങ്ങള്‍ക്ക് കേരളവുമായി പുലബന്ധം പോലുമില്ലെന്ന വിമര്‍ശവുമുണ്ട്. കലാതിലകം, പ്രതിഭ പട്ടങ്ങള്‍ പിന്‍വലിച്ചെങ്കിലും ഗ്രേസ് മാര്‍ക്ക് എന്ന ആകര്‍ഷണമാണ് മറ്റൊരു കടമ്പ. എഞ്ചിനീയറിങിനും മറ്റും ഈ മാര്‍ക്ക് കിട്ടിയിട്ടെന്ത് നേട്ടമാണ് കുട്ടിക്കുള്ളത്.

കലാ പരിശീലനം മൂലം മറ്റു വിഷയങ്ങള്‍ക്ക് മാര്‍ക്ക് കുറയുന്നുവെന്ന് കണ്ടാണ് ഇത് ഏര്‍പെടുത്തിയതെങ്കിലും മികച്ച ഗ്രേഡ് നേടിയവര്‍ക്ക് മാത്രമായി ഇത് ചുരുങ്ങുന്നതും മല്‍സരത്തിന് വഴിവെക്കുന്നുണ്ട്. കഴിഞ്ഞ വര്‍ഷത്തെ 1.75 കോടിയില്‍ നിന്ന് 2.10 കോടിയായി കലോല്‍സവ വിഹിതം നീക്കിവെച്ചിട്ടുണ്ടെങ്കിലും നോട്ട് റദ്ദാക്കല്‍ മൂലം സമ്മാനം, ഊട്ടുപുര, ഗതാഗതം തുടങ്ങിയവക്കൊക്കെ ചെക്ക് എന്നത് കണ്ണൂരില്‍ ബുദ്ധിമുട്ടുണ്ടാക്കുന്നുണ്ട്. ഇതിന് സര്‍ക്കാരും ബാങ്കുകളും ഇടപെട്ട് പരിഹാരം കാണണം.

പരിസ്ഥിതി സൗഹാര്‍ദ മേളയെന്നതും പച്ചക്കറികള്‍ ആതിഥേയജില്ലയിലെ കുട്ടികള്‍ സ്വന്തം വീടുകളില്‍ വിളയിച്ച് എത്തിച്ചുവെന്നതും മറ്റൊരു കലയാണ്. കണ്ണൂരിലെ വേദികള്‍ക്ക് നല്‍കിയിരിക്കുന്ന പേരുകള്‍ കേരളത്തിന്റെ മുഴുവന്‍ പ്രദേശങ്ങളെയും പ്രതീകാത്മകമായി രേഖപ്പെടുത്തുന്നതാണ്. സന്മസ്സുള്ളവര്‍ക്കേ ഇങ്ങനെയൊക്കെ ചിന്തിക്കാനും പ്രവര്‍ത്തിക്കാനും കഴിയൂ. ഈ വിദ്യാര്‍ഥികളായിരിക്കട്ടെ സ്‌കൂള്‍ കലോല്‍സവ സംഘാടകര്‍ക്കും രക്ഷിതാക്കള്‍ക്കും പരിശീലകര്‍ക്കുമെല്ലാമുള്ള വഴികാട്ടി.

Continue Reading
Advertisement
Click to comment

Leave a Reply

Your email address will not be published. Required fields are marked *

Health

പൾസ് പോളിയോ ഇമ്മ്യൂണൈസേഷൻ നാളെ; മലപ്പുറത്ത്‌ 4,45,201 കുട്ടികൾ തുള്ളിമരുന്ന് സ്വീകരിക്കും

ഇതിനായി ജില്ലയില്‍ 3780 പോളിയോ തുള്ളിമരുന്ന് വിതരണ ബൂത്തുകൾ സജ്ജമാക്കിയിട്ടുണ്ട്.

Published

on

പോളിയോ രോഗം നിര്‍മാര്‍ജനം ചെയ്യുന്നതിനായുള്ള പള്‍സ് പോളിയോ ഇമ്മ്യൂണൈസേഷൻ പരിപാടി നാളെ (മാര്‍ച്ച് മൂന്നിന്) നടക്കും. മലപ്പുറം ജില്ലയില്‍ 4,45,201 കുട്ടികൾക്കാണ് തുള്ളിമരുന്ന് നൽകുക. ഇതിനായി ജില്ലയില്‍ 3780 പോളിയോ തുള്ളിമരുന്ന് വിതരണ ബൂത്തുകൾ സജ്ജമാക്കിയിട്ടുണ്ട്.

ബസ് സ്റ്റാന്റുകൾ, റെയിൽവേ സ്റ്റേഷനുകൾ തുടങ്ങി 108 പൊതു സ്ഥലങ്ങളിലും പോളിയോ തുള്ളിമരുന്ന് നൽകുന്നതിനുള്ള സജ്ജീകരണങ്ങള്‍ ഒരുക്കിയിട്ടുണ്ട്. പരിപാടിയുടെ ജില്ലാതല ഉദ്ഘാടനം നാളെ രാവിലെ എട്ടിന് മലപ്പുറം താലൂക്ക് ആശുപത്രിയിൽ നടക്കും. ആദ്യദിനം ബൂത്തിൽ എത്തി തുള്ളിമരുന്ന് നൽകാൻ സാധിക്കാത്തവർക്ക് തുടർദിനങ്ങളിൽ ആരോഗ്യപ്രവർത്തകരും വളണ്ടിയർമാരും വീടുകളിലെത്തി പോളിയോ തുള്ളിമരുന്ന് നൽകും. ഇതിനായി പ്രത്യേക പരിശീലനം നല്‍കി 458 സൂപ്പർവൈസർമാരെയും 7794 വളണ്ടിയർമാരെയും സജ്ജരാക്കിയിട്ടുണ്ട്.

സംസ്ഥാനത്ത് രണ്ടായിരത്തിന് ശേഷവും ഇന്ത്യയിൽ 2011ന് ശേഷവും പോളിയോ രോഗം റിപ്പോർട്ട് ചെയ്തിട്ടില്ല. 2014 മാർച്ചിൽ ലോകാരോഗ്യ സംഘടന ഇന്ത്യയെ പോളിയോ മുക്തരാജ്യമായി പ്രഖ്യാപിച്ചെങ്കിലും അയൽ രാജ്യങ്ങളിൽ പോളിയോ രോഗം റിപ്പോർട്ട് ചെയ്യപ്പെടുന്നതിനാൽ രോഗസാധ്യത ഒഴിവാക്കുന്നതിനായി അഞ്ചു വയസ്സിൽ താഴെയുള്ള എല്ലാ കുട്ടികൾക്കും പോളിയോ തുള്ളിമരുന്ന് നൽകണമെന്ന് ജില്ലാ മെഡിക്കല്‍ ഓഫീസര്‍ ഡോ. ആര്‍ രേണുക അറിയിച്ചു.

Continue Reading

kerala

മരിച്ച വിദ്യാർഥിക്കെതിരെ വ്യാജ ആരോപണം, ഒരു വധശിക്ഷ കഴിഞ്ഞ് വേറൊരു വധശിക്ഷ നടപ്പാക്കി: വി ഡി സതീശൻ

എസ്എഫ്ഐ, ഡിവൈഎഫ്ഐ ക്രിമിനലുകൾക്ക് എല്ലാ പ്രോത്സാഹനവും കൊടുക്കുന്നത് മുഖ്യമന്ത്രിയാണെന്നും വി ഡി സതീശന്‍ ആരോപിച്ചു.

Published

on

പൂക്കോട് വെറ്ററിനറി കോളേജില്‍ മരിച്ച വിദ്യാർഥിക്കെതിരെ വ്യാജ ആരോപണം ഉയർത്തുകയാണെന്ന് പ്രതിപക്ഷനേതാവ് വി ഡി സതീശന്‍. ആന്തൂർ സാജൻ്റെ കാര്യത്തിൽ സംഭവിച്ച പോലെ സിദ്ധാർഥനെയും കുടുംബത്തെയും അപമാനിക്കുകയാണ്.

മുഴുവൻ പ്രതികളെയും സിപിഎം സംരക്ഷിക്കുകയാണ്. കേരളത്തിലെ രക്ഷിതാക്കളെ മുഴുവൻ ഭയത്തിലാക്കി. എസ്എഫ്ഐ, ഡിവൈഎഫ്ഐ ക്രിമിനലുകൾക്ക് എല്ലാ പ്രോത്സാഹനവും കൊടുക്കുന്നത് മുഖ്യമന്ത്രിയാണെന്നും വി ഡി സതീശന്‍ ആരോപിച്ചു.

ഒരു വധശിക്ഷ കഴിഞ്ഞ് വേറൊരു വധശിക്ഷ നടപ്പാക്കിയിരിക്കുകയാണ്. വ്യാജ ആരോപണങ്ങൾ ഉണ്ടാക്കി ആ കുടുംബത്തെ അപമാനിക്കുന്നു. പ്രതികളെ മജിസ്‌ട്രേറ്റിനു മുന്നിൽ ഹാജരാക്കിയപ്പോൾ വയനാട്ടിലെ മുതിർന്ന സിപിഐഎം നേതാവ് തന്നെ കൂടെ വന്നു. ഇത് ഭീഷണിയാണ്, അന്വേഷണ ഉദ്യോഗസ്ഥനെ വിരട്ടലാണ്.
മുഖ്യമന്ത്രി മഹാമൗനത്തിന്റെ മാളങ്ങളിൽ ഒളിച്ചിരിക്കുകയാണ്. ക്രിമിനലുകൾക്ക് അഴിഞ്ഞാടാൻ മുഖ്യമന്ത്രി അവസരം കൊടുക്കുകയാണ്. എസ്എഫ്ഐ സംസ്ഥാന സെക്രട്ടറി തന്നെ ക്രിമിനൽ കേസിൽ പ്രതിയാണ്. ഈ ക്രിമിനലുകളിൽ നിന്ന് കേരളത്തെ രക്ഷിക്കണമെന്നും വി ഡി സതീശന്‍ പറഞ്ഞു.

സിദ്ധാർത്ഥ് ഒരു പെൺകുട്ടിയോട് മോശമായി പെരുമാറിയെന്ന് സിദ്ധാർത്ഥിന്‍റെ മരണശേഷം കോളേജിന് പരാതി ലഭിച്ചിരുന്നു. ഫെബ്രുവരി 14ന് കോളേജിൽ ഉണ്ടായ സംഭവങ്ങളുടെ പശ്ചാത്തലത്തിലായിരുന്നു ആരോപണം. കോളേജിലെ ആഭ്യന്തര പരാതി സെല്ലിലാണ് പരാതി കൊടുത്തിരുന്നത്. ഈ പരാതി കെട്ടിച്ചമതാണെന്നാണ് സംശയം. കുറ്റാരോപിതന് നോട്ടീസ് നൽകാൻ കഴിഞ്ഞില്ലെന്നാണ് ആഭ്യന്തര പരാതി സെല്ലിന്റെ റിപ്പോർട്ട്.

വയനാട് പൂക്കോട് വെറ്ററിനറി കോളേജിലെ രണ്ടാം വര്‍ഷ വെറ്ററിനറി സയന്‍സ് ബിരുദ വിദ്യാര്‍ത്ഥിയും തിരുവനന്തപുരം നെടുമങ്ങാട് സ്വദേശിയുമായ സിദ്ധാര്‍ത്ഥനെ ഫെബ്രുവരി 18-ന് ഉച്ചയ്ക്ക് ഒന്നരയോടെയാണ് ഹോസ്റ്റലിലെ ശുചിമുറിയില്‍ തൂങ്ങിമരിച്ച നിലയില്‍ കണ്ടെത്തിയത്.

ആത്മഹത്യ എന്നായിരുന്നു പ്രാഥമിക നിഗമനം. എന്നാല്‍ സിദ്ധാര്‍ഥ് ക്രൂരമായ മര്‍ദ്ദനത്തിന് ഇരയായിരുന്നുവെന്ന് പോസ്റ്റ്മോര്‍ട്ടം റിപ്പോര്‍ട്ടില്‍ കണ്ടെത്തി. കഴിഞ്ഞ വാലന്റൈന്‍സ് ദിനത്തില്‍ കോളേജില്‍ വിദ്യാര്‍ത്ഥികള്‍ തമ്മില്‍ ചില പ്രശ്നങ്ങള്‍ ഉണ്ടായിരുന്നുവെന്നും സുഹൃത്തുക്കളും സീനിയേഴ്സും ചേര്‍ന്ന് സിദ്ധാര്‍ത്ഥനെ മര്‍ദ്ദിച്ച് കെട്ടിതൂക്കിയെന്നും ആരോപണം ഉണ്ട്.

സിദ്ധാര്‍ത്ഥനെ കോളേജ് പരിസരത്ത് നാലിടത്ത് വെച്ച് സംഘം മര്‍ദ്ദിച്ചതായി ആന്റി റാഗിങ്ങ് കമ്മിറ്റിയുടെ റിപ്പോർട്ടും പുറത്തു വന്നു. കോളേജ് ഹോസ്റ്റലിന്റെ നടുമുറ്റം, കോളേജ് ഹോസ്റ്റൽ, ഹോസ്റ്റലിന് സമീപത്തെ കുന്ന്, ഡോര്‍മെറ്ററിക്ക് അകത്ത് എന്നിവിടങ്ങളിൽ വെച്ചാണ് മര്‍ദ്ദനമുണ്ടായത്. ഹോസ്റ്റലിൽ കിടന്നുറങ്ങിയ വിദ്യാർത്ഥിയെ വിളിച്ച് മർദനം ‘ഡെമോ’ പോലെ കാണിച്ചു കൊടുത്തെന്നും റിപ്പോർട്ടിൽ പറയുന്നു.

31-ൽ 19പേരാണ് സിദ്ധാർഥിനോട് മൃഗീയമായി പെരുമാറിയത്. ബെൽറ്റ് കൊണ്ട് ഒട്ടേറെ തവണ അതിക്രൂരമായി മർദ്ദിച്ചു. ചവിട്ടി നിലത്തിട്ടു. ഡോർമെറ്ററിയിലെ കട്ടിലിൽ ഇരുന്നപ്പോൾ അവിടെ വെച്ചും മർദ്ദിച്ചു.സിദ്ധാർത്ഥന്റെ രണ്ട് സുഹൃത്തുക്കളെ വിളിച്ചുവരുത്തി അവരെ ഭീഷണിപ്പെടുത്തി അടിപ്പിച്ചു. മുറിയിലെ വെള്ളം തുടപ്പിച്ചു. പുറത്ത് പറയരുതെന്ന് കുട്ടികളെ അക്രമി സംഘം ഭീഷണിപ്പെടുത്തിയെന്നും റിപ്പോർട്ടിലുണ്ട്. പ്രധാന പ്രതികളിലൊരാളായ കാശിനാഥനെ പൊലീസ് അറസ്റ്റ് ചെയ്തിട്ടുണ്ട്.

Continue Reading

Health

വൈറൽ ഹെപറ്റൈറ്റിസ് ബാധിച്ച് മലപ്പുറത്ത് ഒരാൾകൂടി മരിച്ചു

ഇതോടെ വൈറൽ ഹെപറ്റൈറ്റിസ് ബാധിച്ച് മരിച്ചവരുടെ എണ്ണം മൂന്നായി.

Published

on

വൈറൽ ഹെപറ്റൈറ്റിസ് ബാധിച്ച് ജില്ലയിൽ ഒരാൾകൂടി മരിച്ചു. എടക്കര പഞ്ചായത്തിലെ ചെമ്പൻകൊല്ലി സ്വദേശിയായ 32കാരനാണ് മരിച്ചത്. മഞ്ഞപ്പിത്തം കരളിനെ ബാധിച്ചാണ് മരണം. ഇതോടെ വൈറൽ ഹെപറ്റൈറ്റിസ് ബാധിച്ച് മരിച്ചവരുടെ എണ്ണം മൂന്നായി.

പോത്തുകല്ല്, എടക്കര പഞ്ചായത്തുകളിലാണ് വൈറൽ ഹെപറ്റൈറ്റിസ് സ്ഥിരീകരിച്ചത്. 152 പേർക്ക് രോഗം ബാധിച്ചതായാണ് ആരോഗ്യവകുപ്പ് അറിയിക്കുന്നത്. 38 പേരെ ആശുപത്രിയിൽ പ്രവേശിപ്പിച്ചു.

പ്രദേശത്ത് ആറ് കിണറുകളില്‍ പരിശോധിച്ചതിൽ മൂന്നെണ്ണത്തില്‍ വെള്ളം ഉപയോഗശൂന്യമാണെന്ന് കണ്ടെത്തിയിരുന്നു. കിണറുകളിലെ വെള്ളം മൂന്ന് ദിവസത്തിലൊരിക്കൽ ക്ലോറിനേറ്റ് ചെയ്ത് ശുചീകരിക്കാനുള്ള നടപടികളും ആരോഗ്യപ്രവർത്തകരുടെ നേതൃത്വത്തിൽ ആരംഭിച്ചു.

സ്ഥലത്ത് പ്രതിരോധ പ്രവർത്തനങ്ങൾ ഊർജിതമാക്കിയിട്ടുണ്ട്. തദ്ദേശ സ്ഥാപനങ്ങളുടെ അടക്കം സഹകരണത്തോടെയാണ് പ്രതിരോധ പ്രവർത്തനം. വീടുകൾ കയറിയിറങ്ങി ബോധവത്കരണവും നൽകുന്നുണ്ട്. പനി, ക്ഷീണം, ഛർദ്ദി, വയറുവേദന തുടങ്ങിയ ലക്ഷണങ്ങൾ കണ്ടാൽ ചികിത്സ തേടണമെന്നും ആരോഗ്യപ്രവർത്തകരെ അറിയിക്കണമെന്നും നിർദേശമുണ്ട്.

Continue Reading

Trending