Connect with us

columns

ശുചിത്വം എന്ന ശ്രേഷ്ഠശീലം

അന്ത്യപ്രവാചകര്‍ (സ) വൃത്തിയുടെ കാര്യത്തില്‍ പുലര്‍ത്തിയ പ്രത്യേക താല്‍പര്യം ശ്രദ്ധേയമാണ്. ജലം അപൂര്‍വ വസ്തുവായി തോന്നുന്ന, വരണ്ട മരുഭൂമിയില്‍ ജീവിച്ചുപോന്ന അറബികള്‍ക്ക് വെള്ളം കൊണ്ടുള്ള ശുചിത്വത്തിന്റെ വിവിധ മുറകള്‍ പഠിപ്പിക്കുമ്പോള്‍ അതൊരു പുതിയ
സംസ്‌കാരത്തിന്റെ ബാലപാഠം കൂടിയായിരുന്നു.

Published

on

സിദ്ദീഖ് നദ്‌വി ചേരൂര്‍

ശുചിത്വം സംബന്ധിച്ച് സമൂഹത്തിന് പ്രത്യേക അവബോധം കൈവന്ന കാലമാണിത്. മുമ്പ് പല രോഗങ്ങളും മനുഷ്യരെ തഴുകി കടന്നുപോയിട്ടുണ്ടെങ്കിലും കോവിഡ് 19 പേലെ ലോകത്തിന് മൊത്തം ശുചിത്വത്തിന്റെ നിര്‍ണായക പാഠങ്ങള്‍ നല്‍കിയ മറ്റൊരു രോഗത്തെക്കുറിച്ച് നാം കേട്ടിട്ടില്ല. ഇടയ്ക്കിടെ വെള്ളവും സോപ്പും ഉപയോഗിച്ച് കൈ കഴുകാനും വസ്ത്രവും പരിസരവുമെല്ലാം വൃത്തിയായി സൂക്ഷിക്കാനും മുമ്പ് ശീലിക്കാത്ത പലരും പഠിച്ചു തുടങ്ങിയ കാലമാണ്. ശരീരത്തിലെ തുറന്ന ദ്വാരങ്ങളിലൂടെ പുറത്ത്‌വരുന്ന ദ്രാവകങ്ങളെല്ലാം വിസര്‍ജ്യങ്ങളാണെന്നും അവ മറ്റുള്ളവരിലേക്ക് പരക്കാതെ സൂക്ഷിക്കേണ്ടത് അനിവാര്യമാണെന്നും പലരെയും പഠിപ്പിച്ചത് കോവിഡ് മഹാമാരിയാണ്.

ഇസ്‌ലാം ശുചിത്വത്തിന് നല്‍കിയ പ്രാധാന്യവും ശരീരവും വസ്ത്രവും താമസസ്ഥലവും എത്രത്തോളം ഹൈജെനിക് (ഒ്യഴശലിശര) ആകണമെന്ന കാര്യത്തില്‍ ഇസ്‌ലാമിന്റെ കാര്‍ക്കശ്യം അപഗ്രഥിക്കുന്നത് കാലിക പ്രസക്തമാണ്. അന്ത്യപ്രവാചകര്‍ (സ) വൃത്തിയുടെ കാര്യത്തില്‍ പുലര്‍ത്തിയ പ്രത്യേക താല്‍പര്യം ശ്രദ്ധേയമാണ്. ജലം അപൂര്‍വ വസ്തുവായി തോന്നുന്ന, വരണ്ട മരുഭൂമിയില്‍ ജീവിച്ചുപോന്ന അറബികള്‍ക്ക് വെള്ളം കൊണ്ടുള്ള ശുചിത്വത്തിന്റെ വിവിധ മുറകള്‍ പഠിപ്പിക്കുമ്പോള്‍ അതൊരു പുതിയ സംസ്‌കാരത്തിന്റെ ബാലപാഠം കൂടിയായിരുന്നു. വൃത്തിയെക്കുറിച്ച് ഇസ്‌ലാമിന്റെ കാഴ്ചപ്പാട്തന്നെ തികച്ചും വ്യത്യസ്തമാണ്. പൊതുവേ വൃത്തിയുള്ളതായി കരുതുന്ന പലതും ഇസ്‌ലാമിന്റെ കാഴ്ചപ്പാടില്‍ അങ്ങനെ ആകണമെന്നില്ല. മൂത്രത്തിന്റെ ചെറിയ അംശം തട്ടിയ വസ്ത്രം ഉണങ്ങിക്കഴിഞ്ഞാല്‍ പൊതു കാഴ്ചപ്പാടില്‍ അതില്‍ വലിയ കുഴപ്പമൊന്നുമില്ല. അത് ധരിച്ച് എന്ത് കാര്യത്തിന് ചെല്ലുന്നതിനും അവന് വിലക്കില്ല. എന്നാല്‍ ഒരു മുസ് ലിമിന് അത് ധരിച്ച് ദിവസേന അഞ്ച് തവണ നിര്‍ബന്ധമായും നിര്‍വഹിക്കേണ്ട നമസ്‌കാരം നിര്‍വഹിക്കാന്‍ സാധ്യമല്ല. നമസ്‌കരിക്കുന്നവന്റെ ദേഹവും വസ്ത്രവും സ്ഥലവും ശുദ്ധമായിരിക്കണമെന്നാണ് തിരുനബി (സ) പഠിപ്പിച്ചത്.

ലഹരിവസ്തുക്കള്‍ നിര്‍ബാധം പ്രചരിക്കുന്ന ലോകത്ത് ലഹരിയുണ്ടാക്കുന്ന വസ്തുക്കളെല്ലാം മലിനവും വര്‍ജ്യവുമാണെന്ന് പറയുമ്പോള്‍ അതുള്‍ക്കൊള്ളാന്‍ പലരുടെയും മനസ്സ് പാകമാകണമെന്നില്ല. ഭക്ഷ്യയോഗ്യമായ മൃഗങ്ങള്‍തന്നെ അറുത്തു കഴിഞ്ഞാല്‍ അവ ശുദ്ധവും ചാവുകയോ കൊല്ലുകയോ ചെയ്താല്‍ അശുദ്ധവും വര്‍ജ്യവുമാണെന്ന നിലപാട് പുതിയ ശുചിത്വത്തിന്റെ വക്താക്കള്‍ക്ക് ദഹിക്കുന്നതല്ല.
വീട്ടുപടിക്കലൂടെ ഒരു നദിയൊഴുകുന്നു. ദിവസേന അഞ്ച് നേരം അതില്‍ മുങ്ങിക്കുളിക്കുന്നു. അങ്ങനെ ചെയ്താല്‍ ദേഹത്ത് വല്ല മാലിന്യവും അവശേഷിക്കുമോ? മരുഭൂമിയില്‍ ജനിച്ചു വളര്‍ന്ന തിരുനബി(സ) അതേ പശ്ചാത്തലത്തില്‍ വളര്‍ന്ന അനുയായികളോട് ചോദിക്കുകയാണ്. അവര്‍ ഏകസ്വരത്തില്‍ ഇല്ലെന്ന് പ്രതികരിച്ചു. തുടര്‍ന്നു അവിടന്ന് ഉല്‍ബോധിപ്പിക്കുകയാണ് അതുപോലെയാണ് അഞ്ച് നേരത്തെ നമസ്‌കാരം. അത് നിങ്ങളെ ദോഷങ്ങളില്‍നിന്ന് ശുദ്ധീകരിക്കും (ബുഖാരി, മുസ്‌ലിം).

എത്ര മനോഹരമായ ഉപമ. ഇതില്‍ വെള്ളം, കുളി എന്നീ പദങ്ങളിലൂടെ ശുചിത്വ സങ്കല്‍പ്പത്തിലേക്കാണവരെ കൂട്ടിക്കൊണ്ട്‌പോകുന്നത്. തുടര്‍ന്നു നമസ്‌ക്കാരത്തിലൂടെ കൈവരുന്ന ആന്തരിക ശുദ്ധിയെപ്പറ്റി ഉണര്‍ത്തുന്നു. ഒരേ സമയം ബാഹ്യവും ആന്തരികവുമായ ശുദ്ധിയുടെ വിളനിലമാണ് നമസ്‌കാരമെന്നത് മറ്റൊരു വശം. നമസ്‌കരിക്കുന്നവന്‍ അംഗശുദ്ധി വരുത്തണം. കുളി നിര്‍ബന്ധമായ അവസ്ഥയിലാണെങ്കില്‍ ആദ്യം കുളിച്ചു ദേഹശുദ്ധി വരുത്തണം. ധരിക്കുന്ന വസ്ത്രവും സ്ഥലവും ശുദ്ധമായിരിക്കണം. നിര്‍ബന്ധമായും അഞ്ച് നേരം ഇങ്ങനെ വിശുദ്ധിയുടെ കര്‍മസാക്ഷിയാകേണ്ട വിശ്വാസിക്കെങ്ങനെ മാലിന്യവുമായി കൂട്ടുകൂടാനാകും? ശ്രദ്ധേയമായ മറ്റൊരു കാര്യം, പ്രവാചക പാഠം അനുസരിച്ച് രണ്ട് തരം അശുദ്ധിയുണ്ട്. ചെറിയ അശുദ്ധിയും വലിയ അശുദ്ധിയും. വുളു (അംഗസ്‌നാനം) ചെയ്താല്‍ ചെറിയ അശുദ്ധിയില്‍നിന്ന് മുക്തി നേടി. കുളിച്ചാല്‍ വലിയ അശുദ്ധിയും പോയി. നമസ്‌കാരം അടക്കമുള്ള പ്രധാന ആരാധനകള്‍ക്ക് ഒരുങ്ങുംമുമ്പേ ഈ രണ്ട് ശുദ്ധിയും ഉറപ്പുവരുത്തണം. വലിയ അശുദ്ധിയുണ്ടെങ്കില്‍ കുളിക്കണം. ചെറിയ അശുദ്ധി ഒഴിവാക്കാന്‍ അംഗ സ്‌നാനം ചെയ്യണം. ശാസ്ത്രീയമായി ഈ രീതി ശുചിത്വത്തിന്റെ ഏറ്റവും ഉദാത്തമായ നിലവാരത്തിലാണെന്ന് നിക്ഷ്പക്ഷമായി നിരീക്ഷിക്കുന്ന ആര്‍ക്കും ബോധ്യമാകും.

വുളു, കുളി എന്നിവയ്ക്ക്പുറമെ ദേഹശുദ്ധിയുടെ ഹൈജെനിക് പാഠങ്ങളായി തിരുദൂതര്‍ പഠിപ്പിച്ച ചില പ്രധാന കാര്യങ്ങളുണ്ട്. അവ കൂടി പാലിക്കുമ്പോഴേ ശാരീരിക ശുചിത്വം പൂര്‍ണമാകൂ. പൊതു സമൂഹം പലപ്പോഴും അവഗണിക്കുകയോ അലംഭാവം പുലര്‍ത്തുകയോ ചെയ്യുന്ന കാര്യങ്ങളാണിവ. ഫാഷന്റെയും പരിഷ്‌കാരത്തിന്റെയും പേരില്‍ ഈ കാര്യങ്ങളോട് അലസമായി പെരുമാറുകയും ആ കുറവ് പരിഹരിക്കാന്‍ ബോഡിസ്‌പ്രേകളും പൗഡറുകളും മറ്റു സൗന്ദര്യ വര്‍ധക വസ്തുക്കള്‍ വാരിവലിച്ചു ഉപയോഗിക്കുകയും ചെയ്യുന്ന പ്രവണത കണ്ടു വരുന്നു. പ്രകൃതിയുടെ ശുചിത്വ പാഠങ്ങളായാണ് തിരുനബി പഠിപ്പിച്ചത്. ആയിശ(റ) നിവേദനം ചെയ്ത നബിവചനം പത്ത് കാര്യങ്ങളെ പ്രകൃതിയുടെ ശുചി പാഠങ്ങളായി എണ്ണിത്തന്നു. ഒന്നാമതായി മീശ വെട്ടുകയും താടി നീട്ടിയിടുകയും ചെയ്യുക. മീശനീണ്ടു മേല്‍ ചുണ്ടിലേക്കിറങ്ങിയാല്‍ വായിലേക്ക് പോകുന്ന ഭക്ഷണ പാനീയങ്ങള്‍ ആ രോമങ്ങളില്‍ തട്ടിയാണ് കടന്നുപോവുക. നിരന്തരം വായുവും കാറ്റും തട്ടി പുറത്തെ മാലിന്യങ്ങള്‍ പറ്റിപ്പിടിക്കാന്‍ സാധ്യതയുള്ള മീശ രോമങ്ങളില്‍ തട്ടി അകത്തുപോകുന്ന സാധനങ്ങള്‍ രോഗാണു വ്യാപനത്തിന് നിമിത്തമാകുമല്ലോ. അതിനാല്‍ മേല്‍ ചുണ്ടിലെ ചുവപ്പ് കാണത്തക്കവിധം മീശ രോമം മുറിച്ച് പാകപ്പെടുത്തണമെന്നാണ് നിര്‍ദേശം. മറ്റൊന്ന് പല്ല് തേക്കലാണ്. ഇതിന് തിരുനബി(സ) നല്‍കിയ പ്രാധാന്യം പ്രസിദ്ധമാണ്. എന്റെ സമുദായത്തിന് പ്രയാസമാകുമെന്ന് ഭയന്നിരുന്നില്ലെങ്കില്‍ ഓരോ നമസ്‌കാരത്തോടനുബന്ധിച്ചും ദന്ത ശുദ്ധി വരുത്താന്‍ ഞാന്‍ നിര്‍ബന്ധമാക്കുമായിരുന്നു (ബുഖാരി: 857). നിര്‍ബന്ധമാക്കിയില്ലെങ്കിലും ദന്ത ശുദ്ധി ഐച്ഛികമാക്കി വച്ചിട്ടുണ്ട്. എന്ത് നല്ല കാര്യങ്ങള്‍ ചെയ്യുമ്പോഴും ആരംഭത്തില്‍ പല്ല് തേച്ചു വൃത്തിയാവുക. ആള്‍കൂട്ടത്തിലേക്ക് കടന്നു ചെല്ലുന്നതിന്മുമ്പ് പ്രത്യേകം താല്‍പ്പര്യപ്പെട്ടിട്ടുണ്ട്. സാധാരണ ഭിഷഗ്വരന്‍മാര്‍ രണ്ട് നേരം ദന്ത ശുദ്ധി വരുത്തുന്ന കാര്യമേ ഉണര്‍ത്തിക്കാണാറുള്ളൂ. ഉറങ്ങാന്‍ പോകുമ്പോഴും ഉറങ്ങിയെണീറ്റാലും. എന്നാല്‍ പ്രവാചക പാഠ പ്രകാരം വായയ്ക്കകത്ത് പകര്‍ച്ച അനുഭവപ്പെടുമ്പോഴെല്ലാം പല്ല് തേപ്പ് അനിവാര്യമാണ്. അതിന് പ്രത്യേക ബ്രഷും പേസ്റ്റും തന്നെ കാത്തിരിക്കണമെന്നുമില്ല. അറാക് മരത്തിന്റെ കമ്പ് വിശേഷമാണ്. അതിന്റെ സത്തയില്‍ പേസ്റ്റുകളില്‍ അടങ്ങിയതിലപ്പുറം അണുനാശിനികള്‍ അടങ്ങിയിട്ടുണ്ടെന്ന് പുതിയ പഠനങ്ങള്‍ സൂചിപ്പിക്കുന്നു.

ചേലാകര്‍മമാണ് മറ്റൊരു ശുചിത്വ മുറ. ഇതിപ്പോള്‍ മുസ്‌ലിംകളുടെ തിരിച്ചറിയല്‍ അടയാളമെന്ന പേരില്‍ പലരും പ്രത്യേക ദൃഷ്ടിയില്‍ നോക്കിക്കണ്ടു വിമര്‍ശിക്കാന്‍ ശ്രമിക്കാറുണ്ടെങ്കിലും ഇതിന്റെ പിന്നിലെ ആരോഗ്യ രഹസ്യം വിദഗ്ധര്‍ അംഗീകരിച്ചു കഴിഞ്ഞതാണ്. ഗുഹ്യ രോമങ്ങള്‍ ഒഴിവാക്കലാണ് മറ്റൊരു മുറ. ഇതും ശുചിത്വത്തിന് എത്ര അനിവാര്യമാണെന്ന കാര്യം ആലോചിച്ചാല്‍ ബോധ്യപ്പെടും. ദേഹത്തിലെ കൂടുതല്‍ വിയര്‍ക്കുന്ന, മാലിന്യങ്ങള്‍ അടിഞ്ഞുകൂടാന്‍ കൂടുതല്‍ സാധ്യതയുള്ള മേഖലയെന്ന നിലയ്ക്ക് ഇടയ്ക്കിടെ രോമങ്ങള്‍ വടിച്ച് വൃത്തിയാക്കുക വഴി ശുചിത്വം ഉറപ്പിക്കാമെന്ന കാര്യത്തില്‍ തര്‍ക്കമുണ്ടാവില്ല. നഖങ്ങള്‍ വെട്ടിമാറ്റുന്നതും ശുചീകരണ പ്രക്രിയയില്‍ പ്രധാന മുന്‍കരുതലാണ്. നഖത്തിനടിയില്‍ പറ്റിപ്പിടിക്കുന്ന മാലിന്യങ്ങള്‍ക്കൊപ്പം രോഗാണുക്കള്‍ക്ക് അകത്ത് കടക്കാന്‍ എളുപ്പമാണ്. ഇതെല്ലാം ഇടയ്ക്കിടെ നീക്കം ചെയ്യുക വഴി ശുചിത്വം ഉറപ്പ് വരുത്തണമെന്നാണ് പ്രവാചക നിര്‍ദേശം. പരമാവധി 40 ദിവസങ്ങള്‍ക്കകം ഒരിക്കലെങ്കിലും ചെയ്തിരിക്കണമെന്ന് പ്രത്യേകം നിഷ്‌കര്‍ഷിച്ചിട്ടുണ്ട്. ശരീരത്തിലെ ചുക്കിച്ചുളിഞ്ഞ ഭാഗങ്ങള്‍ പ്രത്യേകം തേച്ചു കഴുകുക, അംഗ സ്‌നാന സമയത്തും മറ്റും വായില്‍ വെള്ളം കയറ്റി കുലുക്കിത്തുപ്പുക, മൂക്കില്‍ വെള്ളം കയറ്റിച്ചീറ്റുക. തുടങ്ങിയവയും ശുചിത്വ മുറയായി പഠിപ്പിച്ചിട്ടുണ്ട്.

തലമുടി വളര്‍ത്താം. പക്ഷേ, അതിനെ എണ്ണ തേച്ചു, ചീകിയൊതുക്കി പരിപാലിക്കാന്‍ കഴിയണം. എല്ലാ കാര്യത്തിലും വൃത്തിയും വെടിപ്പും ചിട്ടയും വേണം. സൗന്ദര്യബോധം സൂക്ഷിക്കണം. അല്ലാഹു സുന്ദരനാണ്, അവന്‍ സൗന്ദര്യം ഇഷ്ടപ്പെടുന്നുവെന്ന വചനത്തിലൂടെ ശുചിത്വത്തോടൊപ്പം സൗന്ദര്യബോധവും ദീക്ഷിക്കണമെന്ന ഉണര്‍ത്തല്‍ കാണാം.

 

 

Continue Reading
Advertisement
Click to comment

Leave a Reply

Your email address will not be published. Required fields are marked *

columns

കേരളീയം എന്ന ധൂര്‍ത്ത് മേള-എഡിറ്റോറിയല്‍

സംസ്ഥാനം സാമ്പത്തിക പ്രതിസന്ധിയുടെ വന്‍ ഗര്‍ത്തത്തില്‍ അകപ്പെട്ട് നില്‍ക്കുമ്പോള്‍ കേരളീയത്തിന്റെ പേരില്‍ കോടികള്‍ പൊടിപൊടിക്കുന്ന സര്‍ക്കാര്‍ റോമാ നഗരം കത്തിയെരിയുമ്പോള്‍ വീണ വായിച്ച നീറോ ചക്രവര്‍ത്തിമാരെയാണ് ഓര്‍മപ്പെടുത്തുന്നത്.

Published

on

സംസ്ഥാനം സാമ്പത്തിക പ്രതിസന്ധിയുടെ വന്‍ ഗര്‍ത്തത്തില്‍ അകപ്പെട്ട് നില്‍ക്കുമ്പോള്‍ കേരളീയത്തിന്റെ പേരില്‍ കോടികള്‍ പൊടിപൊടിക്കുന്ന സര്‍ക്കാര്‍ റോമാ നഗരം കത്തിയെരിയുമ്പോള്‍ വീണ വായിച്ച നീറോ ചക്രവര്‍ത്തിമാരെയാണ് ഓര്‍മപ്പെടുത്തുന്നത്. ചരിത്രത്തിലെ ഏറ്റവും വലിയ കടബാധ്യതയുമായി, എല്ലാ വകുപ്പുകളിലും കോടികളുടെ കുടിശ്ശിക നിലനില്‍ക്കുന്ന ഒരു സര്‍ക്കാറാണ് കേരളം ഭരിച്ചുകൊണ്ടിരിക്കുന്നത്. ക്ഷേമ പെന്‍ഷനുകള്‍ മുടങ്ങിയിട്ട് മാസങ്ങള്‍ പിന്നിട്ടു, കെ.എസ്.ആര്‍.ടി.സിയില്‍ ശമ്പളവും പെന്‍ഷനുമില്ല, സ്‌കൂള്‍ കുട്ടികളുടെ ഉച്ചഭക്ഷണത്തിനു പോലും പണം നല്‍കാനില്ല, നെല്‍കര്‍ഷകരുടെ കുടിശ്ശിക കൊടുത്തുവീട്ടാന്‍ കഴിയുന്നില്ല, കുടിശ്ശിക നല്‍കാത്തതിനാല്‍ സപ്ലൈക്കോയില്‍ വിതരണക്കാര്‍ ടെണ്ടര്‍ എടുക്കുന്നില്ല, ലൈഫ് മിഷന്‍ പദ്ധതിയിലും കാരുണ്യ ഫണ്ടിലുമൊന്നും തുക ലഭ്യമാകുന്നില്ല തുടങ്ങിയ അതി ഗുരുതരമായ സാമ്പത്തിക സാഹചര്യമാണ് സംസ്ഥാനത്ത് നിലനില്‍ക്കുന്നത്. സാമ്പത്തിക തകര്‍ച്ചയിലേക്ക് കൂപ്പുകുത്തിയ ഭരണകൂടങ്ങള്‍ പ്രകടമാക്കിയ എല്ലാ തരത്തിലുള്ള അസ്ഥിരതകളും ഈ സര്‍ക്കാര്‍ കാണിച്ചുകൊണ്ടിരിക്കുകയാണ്. ഈ ഘട്ടത്തിലാണ് തകര്‍ച്ചക്ക് ആക്കം കൂട്ടുന്ന രീതിയില്‍ ധൂര്‍ത്തിന്റെ മഹാമേളയായി കേരളീയം തലസ്ഥാന നഗരിയില്‍ അരങ്ങേറുന്നത്. 27 കോടി രൂപ ചിലവഴിച്ച് സര്‍ക്കാര്‍ നടത്തുന്ന ഈ മഹാമഹം ധൂര്‍ത്തിന്റെ മാത്രമല്ല അഴിമതിയുടെയും കൂടിച്ചേരല്‍ കൂടിയാണ്. ടെണ്ടര്‍പോലുമില്ലാതെ ഇഷ്ടക്കാര്‍ക്ക് പരിപാടിയുടെ കരാര്‍ നല്‍കിയതു മുതല്‍ തുടങ്ങുന്നു അഴിമതിയുടെ ഗന്ധം.

കേരളം നിലവില്‍ വന്നതിനു ശേഷമുള്ള മുഴുവന്‍ വികസന പ്രവര്‍ത്തനങ്ങളുടെയും പിതൃത്വം നിര്‍ലജ്ജം തന്റെ പേരിനോട് ചേര്‍ത്തുവെക്കുന്ന മുഖ്യമന്ത്രി അതേ അല്‍പ്പത്തരത്തോടെ തന്നെ കേരളീയവുമായി ബന്ധപ്പെട്ട് സംസ്ഥാനത്തുടനീളം തന്റെ മുഖം പ്രതിഷ്ടിച്ചുകൊണ്ടിരിക്കുകയാണ്. മാധ്യമങ്ങളായ മാധ്യമങ്ങളിലെല്ലാം ബഹുവര്‍ണ ചിത്രങ്ങള്‍ വെച്ചുള്ള പരസ്യം നല്‍കിയിട്ടും മതിവരാഞ്ഞിട്ട് പ്രധാന നഗരങ്ങളില്‍ കോടികള്‍ ചിലവഴിച്ച് ബഹുരാഷ്ട്ര കമ്പനികളുടെ പരസ്യബോര്‍ഡുകളെ വെല്ലുന്ന ഫോള്‍ഡിങ്ങുകള്‍ സ്ഥാപിച്ച് സായൂജ്യമടയുകയാണ്. ജി ട്വന്റി ഉച്ചകോടിയുടെ പേരില്‍ ഡല്‍ഹി നഗരം തന്റെ മാത്രം ചിത്രങ്ങളാല്‍ അലങ്കരിച്ച് ലോക രാഷ്ട്രങ്ങള്‍ക്കു മുന്നില്‍ രാജ്യത്തെ നാണംകെടുത്തിയ പ്രധാനമന്ത്രിയുടെ അതേ പാത പിന്തുടര്‍ന്ന് കേരളീയം നടക്കുന്ന തിരുവനന്തപുരം നഗരത്തെ തന്റെ സ്വന്തമാക്കിമാറ്റിയിരിക്കുകയാണ് മുഖ്യമന്ത്രി. വിവിധ സെഷനുകളില്‍ പങ്കെടുക്കുമ്പോള്‍ സ്വന്തം പേര് പ്രിന്റ് ചെയ്ത മുണ്ടും ഷര്‍ട്ടും കൂടി ധരിക്കാന്‍ ശ്രദ്ധിച്ചാല്‍ പ്രധാനമന്ത്രിയെപോലെ സമ്മേളനത്തെ കൈയ്യിലെടുക്കാന്‍ മുഖ്യമന്ത്രിക്കും സാധിക്കുന്നതേയുള്ളൂ.

ലോക കേരള സഭ പോലെ സംസ്ഥാന സര്‍ക്കാറിന്റെ നേട്ടങ്ങളെ ലോകം മുഴുവന്‍ എത്തിക്കുക എന്നതാണ് പരിപാടിയുടെ പ്രഖ്യാപിത ലക്ഷ്യമായി സര്‍ക്കാര്‍ പറയുന്നത്. എന്നാല്‍ കോടികള്‍ ചിലവഴിച്ച് നടത്തുന്ന ലോക കേരള സഭകള്‍ സംസ്ഥാനത്തിന് എന്ത് നേട്ടമുണ്ടാക്കി എന്നന്വേഷിക്കുമ്പോഴാണ് ഈ പരിപാടികളുടെ പൊള്ളത്തരം വ്യക്തമാകുന്നത്. വേണ്ടപ്പെട്ടവരെ ആനയിച്ചു കൊണ്ടുവന്ന് തങ്ങളെക്കുറിച്ച് മുഖസ്തുതി പറയിപ്പിക്കുക എന്നതല്ലാതെ ലോക കേരള സഭ വഴി സംസ്ഥാനത്തുണ്ടായ എന്തെങ്കിലുമൊരു നേട്ടം എടുത്തുകാണിക്കാന്‍ സര്‍ക്കാറിന് സാധ്യമല്ല. ഈ സാഹചര്യത്തിലാണ് ഇതേ മാതൃകയില്‍ തന്നെ വിവിധ മേഖലകളിലെ പ്രമുഖരെക്കൊണ്ട് മുഖ്യമന്ത്രിയുടെയും സര്‍ക്കാറിന്റെയും അവതാനങ്ങള്‍ പാടിപ്പുകഴ്ത്തിക്കുകയും അതുകാണിച്ച് ആരാധക വൃന്തത്തെ ആനന്ദലബ്ധിയില്‍ ആറാടിപ്പിക്കുകയും ചെയ്യുന്നത്. തിരഞ്ഞെടുപ്പ് പ്രചരണം പോലെയുള്ള രംഗങ്ങളില്‍ ഈ സംവിധാനങ്ങളെല്ലാം ഉപയോഗപ്പെടുത്തുകയും ചെയ്യുക എന്ന ലക്ഷ്യവും ഇതിനെല്ലാം പിന്നിലുണ്ടാകാം. നഷ്ടപ്പെട്ടുപോയ ജന പിന്തുണ തിരിച്ചു പിടിക്കാന്‍ പി.ആര്‍ ഏജന്‍സികള്‍ പറഞ്ഞു തരുന്ന എന്ത് ചെപ്പടി വിദ്യകളും ഉപയോഗിക്കാനുള്ള പൂര്‍ണ സ്വാതന്ത്ര്യം പിണറായി വിജയനുണ്ട്. പക്ഷേ അത് സ്വന്തം ചിലവില്‍ ആകണമെന്നു മാത്രം. ജനങ്ങളുടെ നികുതിപ്പണം ഉപയോഗിച്ച് നടത്തിക്കൊണ്ടിരിക്കുന്ന ഈ കോപ്രായങ്ങല്‍ക്കെല്ലാം കാലം മറുപടി പറയിപ്പിക്കുമെന്ന കാര്യം നിസ്സംശയമാണ്.

 

Continue Reading

columns

ഗസ്സ മരണ മുനമ്പാക്കിയത് ആര്

അമേരിക്കന്‍ പിന്തുണയോടെ ഇസ്രാ ഈല്‍ നിരപരാധികളായ നൂറുകണക്കിന് ഫലസ്തീന്‍ കുഞ്ഞുങ്ങളേയും സ്ത്രീകളേയും നിഷ്‌കരുണം ബോംബിട്ട് കൊല്ലുകയാണ്. മരണ മുനമ്പായിമാറിയിരിക്കുന്നു ഗസ്സ.

Published

on

റിയാസ് ഹുദവി പുലിക്കണ്ണി

അമേരിക്കന്‍ പിന്തുണയോടെ ഇസ്രാ ഈല്‍ നിരപരാധികളായ നൂറുകണക്കിന് ഫലസ്തീന്‍ കുഞ്ഞുങ്ങളേയും സ്ത്രീകളേയും നിഷ്‌കരുണം ബോംബിട്ട് കൊല്ലുകയാണ്. മരണ മുനമ്പായിമാറിയിരിക്കുന്നു ഗസ്സ. അയ്യായിരത്തോളം പൗരന്‍മാന്‍ നിഷ്ഠൂരമായി കൊല്ലപ്പെട്ടു, നിരപരാധികളായ ആയിരക്കണക്കിന് കുട്ടികളും സ്ത്രീകളും അവയില്‍ ഉള്‍പ്പെടുന്നുണ്ട്. യുദ്ധത്തിന്റെ സര്‍വ മര്യാദകളും ധാരണകളും ലംഘിച്ച് ഇസ്രാ ഈല്‍ നരനായാട്ട് തുടരുകയാണ്. കഴിവതും വേഗം പ്രശ്‌നങ്ങള്‍ പരിഹരിച്ച് സമാധാനം പുന:സ്ഥാപിക്കേണ്ട ഐക്യരാഷ്ട്ര സഭയും മറ്റു ലോക രാഷ്ട്രങ്ങളും ഇസ്രാ ഈലിന്റെ കിരാതന തേര്‍വാഴ്ചയെ തള്ളിപറയുന്നതിനപ്പുറം കര്‍ക്കശമായ മറ്റൊരു കടുത്ത നിലപാടിലേക്കും കടക്കാതെ കാഴ്ചക്കാരായി നില്‍ക്കുന്നുവെന്നതാണ് ഏറെ ദു:ഖകരം. ഭക്ഷണം, കുടിവെള്ളം, വൈദ്യുതി, ഇന്ധനം തുടങ്ങി സര്‍വ മേഖലയിലും ഉപരോധം ഏര്‍പ്പെടുത്തിയും പാര്‍പ്പിടങ്ങളും സ്‌കൂളുകളും അഭയാര്‍ത്ഥി ക്യാമ്പുകളും ബോബിട്ട് നിലം പരിശാക്കിയും ഫലസ്തീന്‍ ജനതയെ ക്രൂരമായി പീഡിപ്പിച്ചിട്ടും, അക്രമിച്ചിട്ടും യാതൊരു ദാക്ഷിണ്യവുമില്ലാതെ ആയിരക്കണക്കായ പിഞ്ചുകുഞ്ഞുങ്ങളും സ്ത്രീകളും പരിക്കേറ്റ് ചികിത്സയില്‍ കഴിയുന്ന ആശുപത്രികള്‍പോലും മനുഷ്യത്വം ഇല്ലാത്ത ഇസ്രാ ഈല്‍ സൈന്യം ബോംബിട്ട് നശിപ്പിച്ചു. പ്രാചീന കാലത്തേക്കാള്‍ ലോകം മനുഷ്യത്വപരമായും ധാര്‍മികമായും വളര്‍ച്ച കൈവരിച്ചുവെന്ന് അവകാശവാദം ഉന്നയിക്കുന്ന പുതിയ കാലത്ത് ഇങ്ങനെയൊക്കെ സംഭവിക്കുന്നുവെന്നത്തന്നെ മനുഷ്യത്വമുള്ളവര്‍ക്ക് ചിന്തിക്കാനും ചെയ്യാനും കഴിയാത്തതാണ്. അത്രമേല്‍ ഭീകരമാണ് ഹമാസിനെ പ്രത്രിരോധിക്കുന്നുവെന്ന പേരില്‍ ഇസ്രാ ഈല്‍ ഗസ്സയിലും ഫലസ്തീനിന്റെ മറ്റു പ്രദേശങ്ങളിലും നടത്തികൊണ്ടിരിക്കുന്ന മനസ്സുലക്കുന്ന കൃത്യങ്ങള്‍.

ഇറാന്‍, ഖത്തര്‍, സഊദി അടക്കമുള്ള അറബ് രാജ്യങ്ങള്‍ ഇസ്രാഈലിന്റ അതിരുകടന്ന അക്രമങ്ങളെയും ഫലസ്തീന്‍ അധിവേശത്തേയും അപലപിച്ചിട്ടും നിലവിലെ ഇസ്രാഈലിന്റെ ഇടപെടലുകള്‍ പശ്ചിമേഷ്യയില്‍ കൂടുതല്‍ രക്ത ചൊരിച്ചിലുകള്‍ക്ക് വഴിവെക്കുമെന്ന് വ്യക്തമാക്കിയിട്ടും തങ്ങളുടെ പ്രഖ്യാപിത നിലപാടില്‍നിന്ന് പിന്നോട്ട് പോകാതെ ഇസ്രാഈല്‍ രക്തരൂക്ഷിതമായ യുദ്ധത്തിനു മുതിരുന്നതിന്റെ പൂര്‍ണ ഉത്തരവാദിത്വം ലോക പൊലിസായി ചമയുന്ന അമേരിക്കക്കു മാത്രമാണ്. കാരണം ഇസ്രാഈലിനെതിരെ ഹമാസിന്റെ അപ്രതീക്ഷിത ആക്രമണം നടന്നപ്പോള്‍ മുമ്പും പിമ്പും നോക്കാതെ പൂര്‍ണ പിന്തുണ പ്രഖ്യാപിച്ച രാജ്യമാണ് അമേരിക്ക. മാത്രമല്ല, തങ്ങളുടെ വിദേശകാര്യ സെക്രട്ടറി ആന്റണി ബ്ലിങ്കണ്‍ ഹമാസിന്റെ ആക്രമണത്തെ അപലപിച്ചു നടത്തിയ ആദ്യ പ്രതികരണം താനും ഒരു ജൂതനാണെന്നാണ്. അതോടൊപ്പം നാളിതുവരെ തങ്ങള്‍ ചെയ്ത്‌കൊണ്ടിരിക്കുന്ന കണ്ണില്ലാത്ത ക്രൂരതകളെ മറച്ചുപിടിക്കാനും ലോക രാജ്യങ്ങളുടെ പിന്തുണ നേടാനും ഹമാസിനെ തീവ്രവാദ സംഘടനയായി മുദ്രകുത്താനും ജൂത സൈന്യം പടച്ചുണ്ടാക്കിയ ‘ബന്ദികളായ 40 കുട്ടികളെ ഹമാസ് പോരാളികള്‍ കഴുത്തറത്ത് കൊന്നെന്ന’ കല്ലുവെച്ച നുണകള്‍ അപ്പാടെ നിസ്സംശയം മാധ്യമങ്ങള്‍ക്ക്മുമ്പാകെ ഏറ്റുപറഞ്ഞ് ഇസ്രാഈലിനെ പരസ്യമായി പിന്തുണക്കുന്ന അമേരിക്കന്‍ പ്രസിഡന്റ് ബൈഡന്റെ കാഴ്ചയും കണ്ടതാണ്. ഫലസ്തീനിലെ നിലവിലെ സാഹചര്യങ്ങളെ കൂടുതല്‍ വഷളാക്കിയത് അമേരിക്കയാണെന്ന് പറയുന്നതായിരിക്കും കൂടുതല്‍ നല്ലത്. റഷ്യ യുക്രെന്‍ യുദ്ധം പൊട്ടി പുറപ്പെട്ടപ്പോള്‍ യൂറോപ്യന്‍ യൂണിയനെ കൂട്ടുപ്പിടിച്ച് റഷ്യക്കെതിരെ സാമ്പത്തിക ഉപരോധം ഏര്‍പ്പെടുത്തി ഇരയോടൊപ്പമാണെന്ന് പ്രസ്താവിച്ച അമേരിക്കയും ബൈഡനും സയണിസ്റ്റ് സൈന്യത്തിന്റെ മിസൈല്‍ ആക്രമണത്തില്‍ ദിനംപ്രതി മരിച്ച് വീഴുന്ന നൂറുകണക്കിനു കുഞ്ഞുങ്ങള്‍ക്കു വേണ്ടിയും തകര്‍ന്നടിഞ്ഞ പാര്‍പ്പിടങ്ങള്‍ക്കിടയില്‍ സര്‍വതും നഷ്ടപ്പെട്ട് നിലവിളിക്കുന്ന നിരപരാധികളായ ആയിരങ്ങള്‍ക്കു വേണ്ടിയും പ്രസ്താവന പോലും നടത്താത്തത്. പിറന്ന മണ്ണില്‍ അധിവസിക്കാന്‍ അധിനിവേശ ശക്തിക്കെതിരെ പോരാട്ടം നടത്തുന്ന ‘ഹമാസിനെ’ ഇസ്‌ലാമിക് സ്റ്റേറ്റിന്റെ അക്രമങ്ങളോട് തുലനം ചെയ്യാനും ഇസ്രാഈലിനെ വെള്ളപൂശാനും അമേരിക്കയും മറ്റു പാശ്ചാത്യശക്തികളും ശ്രമിക്കുന്നത് ജൂതരാഷ്ട്ര പിറവിയുടെ ചരിത്രം അറിയാത്തതു കൊണ്ടോ ഓര്‍മയില്ലാത്തതുകൊണ്ടോയല്ല, മറിച്ച് മുസ്‌ലിം വിരോധത്തിന്റെയും മത വര്‍ഗ വെറിയുടേയും അവര്‍ണ ബോധം ഇപ്പോഴും വെള്ളക്കാരന്റെ മനോമുകുരങ്ങളില്‍ അന്തര്‍ലീനമായി കിടപ്പുണ്ടെന്നതിന്റെ പ്രകടമായ പ്രതീകം കൂടിയാണ്. രണ്ടാം ലോക യുദ്ധാനന്തര ജാരസന്തതിയായി പാശ്ചാത്യ രാജ്യങ്ങളുടെ കുടില തന്ത്രങ്ങളാല്‍ പിറവി കൊണ്ട ജൂത രാഷ്ട്രത്തിന് ഇപ്പോഴും നല്‍കികൊണ്ടിരിക്കുന്ന അകമഴിഞ്ഞ പിന്തുണയും. കൂടാതെ പശ്ചിമേഷ്യന്‍ രാജ്യങ്ങളില്‍ ഇടക്കിടെ യുദ്ധവും ഒടുങ്ങാത്ത ആഭ്യന്തര കലാപങ്ങളും സംഘര്‍ഷങ്ങളും സൃഷ്ടിച്ചു ആയുധ കച്ചവടം പൊടിപൊടിക്കാനും അതിലൂടെ സാമ്പത്തിക നേട്ടം കൊയ്യാനും അമേരിക്കയടങ്ങുന്ന പാശ്ചാത്യന്‍ സാമ്രാജ്യത്വ ശക്തികള്‍ കാലങ്ങളായി നടത്തികൊണ്ടിരിക്കുന്ന മനുഷ്യത്വരഹിതമായ നാടകം കൂടിയാണ് ഇസ്രാഈല്‍ ഫലസ്തീന്‍ വിഷയത്തില്‍ അമേരിക്ക ഇപ്പോള്‍ നടത്തികൊണ്ടിരിക്കുന്ന അനുനയനീക്കങ്ങള്‍ എന്നു കൂടി അനുമാനിക്കാം. അതിനാല്‍ നിലവിലെ ഫലസ്തീന്‍ ഇസ്രാഈല്‍ സംഘട്ടനങ്ങളുടെ താത്കാലിക വിരാമത്തിനുള്ള നയതന്ത്ര നീക്കങ്ങളല്ല ലോക രാജ്യങ്ങളും ഐക്യരാഷ്ട്ര സഭയും നടത്തേണ്ടത്, മറിച്ച് കുടിയിറക്കപ്പെട്ട് ആട്ടിയോടിക്കപ്പെട്ട ഒരു വിഭാഗം ജനതക്ക് അധിവസിക്കാനൊരിടം അനുവദിച്ചതിന്റെ പേരില്‍ സൈ്വര്യമായ ഉറക്കവും സുരക്ഷിതമായ പാര്‍പ്പിടവും സ്വരാജ്യംതന്നെയും കാലങ്ങളായി നഷ്ടപ്പെട്ട ഫലസ്തീനികള്‍ക്ക് സ്വതന്ത്രമായൊരു രാജ്യം സാക്ഷാത്കരിച്ച് കൊടുക്കുകയെന്നതാണ് സുതാര്യമായ പരിഹാരം. എങ്കിലേ നിരന്തരം ഉയരുന്ന ഗസ്സയിലെ പതിനായിരങ്ങളുടെ രോദനം എന്നെന്നേക്കുമായി നിലച്ച് സമാധാനത്തിന്റെ പുതിയ സൂര്യോദയങ്ങള്‍ ഉദയം ചെയ്യൂ.

 

Continue Reading

columns

പ്രവാചക നാമത്തിൻ്റെ പൊരുൾ

ലോകത്ത് വളരെ കൂടുതൽ ഉച്ചരിക്കുകയും സ്തുതി കീർത്തനങ്ങൾക്ക് വിധേയമാവുകയും ചെയ്യുന്ന നാമമാണ് മുഹമ്മദ് .പ്രാർത്ഥനകളിൽ, കാവ്യങ്ങളിൽ , കഥാവിഷ്കാരങ്ങളിൽ ആ നാമം ആവർത്തിച്ചു വരുന്നു.

Published

on

പാണക്കാട് സയ്യിദ് മുനവ്വറലി
ശിഹാബ് തങ്ങൾ

ലോകത്ത് വളരെ കൂടുതൽ ഉച്ഛരിക്കുകയും സ്തുതി കീർത്തനങ്ങൾക്ക് വിധേയമാവുകയും ചെയ്യുന്ന നാമമാണ് മുഹമ്മദ് .പ്രാർത്ഥനകളിൽ, കാവ്യങ്ങളിൽ , കഥാവിഷ്കാരങ്ങളിൽ ആ നാമം ആവർത്തിച്ചു വരുന്നു .തിരുനബിയുടെ നാമകരണ ചടങ്ങിൽ പ്രപിതാവായ അബ്ദുൽ മുത്തലിബിനോട് ബന്ധുക്കളായ ഖുറൈശികൾ ചോദിക്കുന്നുണ്ട്: കൊച്ചു മകനെ എന്ത് പേരാണ് വിളിക്കുന്നത്? അദ്ദേഹം മറുപടി നൽകി: പ്രിയങ്കരനായ പേര് മുഹമ്മദ് .ലോകാലോകങ്ങളിൽ ഉള്ളവർ അവനെ അനുധാവനം ചെയ്യണമെന്ന് ആഗ്രഹിക്കുന്നു.” വന്ധ്യവയോധികനായ ഉപ്പൂപ്പയുടെ ആഗ്രഹത്തിന് പടച്ചവൻ ഉത്തരം നൽകി. മണ്ണിൽ മനുഷ്യരും ആകാശത്ത് മാലാഖമാരും ആ പേര് ഉൾപ്പുള്കത്തോടെ ഉരുക്കഴിക്കുന്നു .തിരുനബിയുടെ നാമകീർത്തനം പാഠവത്കരിക്കുകയും അത് വിശ്വാസിയുടെ ഉത്തരവാദിത്തമാണെന്ന് നിർദ്ദേശിക്കുകയും ചെയ്ത ഖുർആൻ ഇങ്ങനെ പ്രഖ്യാപിച്ചു :നബിയുടെ മേൽ അല്ലാഹു അനുഗ്രഹം വർഷിക്കുന്നു, മലക്കുകൾ പ്രാർത്ഥിക്കുന്നു, സത്യവിശ്വാസികളെ നബിക്ക് അനുഗ്രഹം. സമാധാന വർഷത്തിനായി നിങ്ങളും പ്രാർത്ഥിക്കുക.

56 തലമുറകളിലൂടെ തുടരുന്ന ഈ മുഹമ്മദീയ പ്രകീർത്തനത്തിൻറെ പൊരുൾ എന്താണ് ?അനുയായികളാൽ ആപാദചൂഢം പിന്തുടരുന്ന ഒന്നായി മുഹമ്മദ് എന്ന നാമവും നബിയുടെ ചര്യകളും മാറുന്നതെന്തുകൊണ്ട് എന്നത് വിമർശകരെ പോലും വിസ്മയിപ്പിക്കുന്നതാണ്. കൗമാരപ്രായത്തിൽ കേട്ട മുഹമ്മദ് എന്ന നാമത്തിന്റെ സൗന്ദര്യത്തിന് പിന്നാലെ സഞ്ചരിക്കുകയും ചരിത്രത്തിലും കവിതയിലും നാടകത്തിലും ആവർത്തിക്കുന്ന ആ പേരിൻറെ ആവിഷ്കാരങ്ങളെ നാലു പതിറ്റാണ്ടുകളിലൂടെ നീളം പഠിക്കുകയും ചെയ്ത ജർമൻ ഓറിയന്റലിസ്റ്റ് ആൻമേരി ഷിമ്മൽ രചിച്ച ‘ മുഹമ്മദ് ദൈവത്തിൻറെ തിരുദൂതർ ‘എന്ന പുസ്തകം പ്രസിദ്ധമാണ്. മധ്യകാലത്ത് നിലനിന്ന നബിനിന്ദക്കുള്ള പണ്ഡിതോചിതമായ പ്രായശ്ചിത്തമായി വേണം ഈ പുസ്തകത്തെ കണക്കാക്കാൻ. സെമറ്റിക്പാരമ്പര്യത്തിലും ആഫ്രിക്കാൻ പാശ്ചാത്യ പൗരസ്ത്യ ദേശങ്ങളിലും നബി ചരിത്രരചനയുടെയും കീർത്തനങ്ങളുടെയും കുത്തൊഴുക്ക് വലിയൊരു പഠന മേഖലയാണ് തോമസ് കാർലൈൽ 19-)0 നൂറ്റാണ്ടിന്റെ ആദ്യത്തിൽ ലണ്ടനിൽ നടത്തിയ മൂന്നു പ്രഭാഷണങ്ങളിൽ ഒന്ന് ഹീറോ ആസ് എ പ്രോഫറ്റ് ‘ എന്ന തലവാചകത്തിൽ മുഹമ്മദ് നബിയെ കുറിച്ചായിരുന്നു .അതുവരെ പ്രചരിക്കപ്പെട്ടിരുന്ന എല്ലാ ആരോപണങ്ങൾക്കും വസ്തുതകൾ അപഗ്രഥിച്ച് യുക്തിസഹമായി മറുപടി പറഞ്ഞു .ഇസ്ലാം വാളുകൊണ്ട് പ്രചരിപ്പിക്കപ്പെട്ട മതമാണെന്ന വിമർശനത്തിന് അദ്ദേഹം നൽകിയ മറുപടി പ്രസക്തമാണ്. കാറിൽ പറയുന്നു ,ഏതൊരു രാഷ്ട്രീയവും ഒരാളുടെ മനസ്സിൽ ആണല്ലോ ആദ്യമായി ഉദിക്കുക.മുഹമ്മദിന് ലഭിച്ച ഇസ്ലാം എന്ന ആശയം പ്രചരിപ്പിക്കാൻ ലോകത്ത് അപ്പോൾ മുഹമ്മദ് മാത്രമേയുള്ളൂ .തന്റെ കയ്യിൽ ഒരു വാളും. ഈ അവസ്ഥയിൽ എങ്ങനെയാണ് മുഹമ്മദിന് ലോകം കീഴടക്കാൻ സാധിക്കുക? വാളുകൊണ്ട് പ്രചരിപ്പിക്കാൻ ആണെങ്കിൽ വേണ്ടത്ര വാളുകളും പ്രയോഗിക്കാൻ അനുയായികളും വേണം. മുഹമ്മദിന് അതിനായി അനുയായികൾ ഉണ്ടായേ പറ്റൂ. ഈ വസ്തുത തെളിയിക്കുന്നത് വാളുകൊണ്ടല്ല ഇസ്ലാം പ്രചരിച്ചത് എന്ന സത്യമാണ് .തിരുനബിനൽകിയ രണ്ട് സന്ദേശങ്ങൾ എടുത്തു പറയേണ്ടതാണ്. ഒന്ന് ,ഐഹികവും പാരത്രികവുമായ അഥവാ ഭൗതികവും ആധ്യാത്മവുമായ രണ്ട് തലങ്ങൾ ഉൾച്ചേർന്നതാണ് ജീവിതം എന്ന കാഴ്ചപ്പാട്. മതമെന്നത് പ്രാർത്ഥനകളുടെയും ആരാധനകളുടെയും (സഷ്ടാവുമായുള്ള കെട്ടുപാടുകളുടെയും കേവലസംഹിതം മാത്രമല്ല, മറിച്ച് നാഗരിക രാഷ്ട്രീയ നിർമാണത്തിന്റെ ബഹുപാOങ്ങൾ ചേർത്ത് സർഗാത്മകവും സാമൂഹികോ ന്മുഖവുമാക്കേണ്ടതാണെന്ന് തിരുനബി പഠിപ്പിച്ചു. ഇത് കൂടുതൽ ജനപ്രിയമായ ഒരു മതത്തിന്റെയും ജനോപകരമായ ജീവിത പദ്ധതിയുടെയും ഉയർപ്പിന് കാരണമായി.അബ്ബാസിയ ഖിലാഫത്തിൻ്റെയും സ്പാനിഷ് മുസ്ലിം ഭരണത്തിന്റെയും കാലത്ത് തുടക്കം കുറിച്ച വൈജ്ഞാനിക പുരോഗതിയുടെയും നാഗരിക വളർച്ചയുടെയും പാരമ്പര്യം ഈ സാമൂഹിക കാഴ്ചപ്പാടിന്റെ ഭാഗമായിരുന്നു. നവോത്ഥാനകാലത്ത് ഉയർന്നു വരാൻ യൂറോപ്പിന് സകല സാധ്യതയും നൽകിയതിൽ തിരുനബിയുടെ പിന്തുണക്കാരിലൂടെ വളർന്ന വൈജ്ഞാനിക വിപ്ലവത്തിന് ചെറുതല്ലാത്ത പങ്ക് ഉണ്ടായിരുന്നു .ഇസ്ലാം തുടങ്ങിയത് പൂർത്തീകരിക്കുക അല്ലാതെ യൂറോപ്പിന് മറ്റൊന്ന് ചെയ്യാൻ ഉണ്ടായിരുന്നില്ല എന്ന് ഫിലിപ് കെ ഹിറ്റി ഈ ചരിത്രത്തെ പറ്റി എഴുതുന്നുണ്ട് .ഇത്തരത്തിൽ ആഘോഷിക്കപ്പെട്ട ഒരു ജനകീയ പ്രവാചകൻ ലോകത്തിനു മുമ്പിൽ ഉണ്ട്. അതിലൂടെയാണ് മുഹമ്മദ് എന്ന സ്തുതിക്കപ്പെട്ട നബി രൂപപ്പെട്ടുവന്നത്. രണ്ടാമതായി എടുത്തു പറയേണ്ടത്, സഹിഷ്ണുത എന്ന വലിയ മൂല്യത്തെ യാഥാർത്ഥ്യമാക്കുന്നതിലും ജനകീയമാക്കുന്നതിലും മുഹമ്മദ് നബി വഹിച്ച പങ്കാണ് പതിറ്റാണ്ടുകൾ യുദ്ധത്തിൽ ഏർപ്പെട്ടുപോകുന്ന ഗോത്രങ്ങളെ തമ്മിലടുപ്പിക്കിയും സഹോദര മതക്കാരെ വിശ്വാസത്തിൽ എടുത്തും മദീനയിൽ നിർമ്മിച്ച രാഷ്ട്രത്തിൻറെ അത്ഭുതം എടുത്തു പറയേണ്ടതാണ് .വിടവാങ്ങൽ പ്രസംഗത്തിൽ ലോക മനസ്സാക്ഷിക്ക് നൽകിയ സമഭാവനയുടെ ഉൾക്കാഴ്ചകൾ അവസാനമില്ലാത്തതാണ്. ഇത്തരത്തിൽ ഇന്ന് കാണുന്ന ലോകത്തെ സമാധാനപൂർണ്ണമായ നിലനിർത്തുന്നതിൽക്കുള്ള പങ്കാളിത്തത്തിന്റെ പേരിൽ കൂടിയാണ് മുഹമ്മദ് സ്തുതിക്കപ്പെട്ടവൻ എന്ന പേര് അർത്ഥപൂർണ്ണം ആകുന്നത്

(മലയാള മനോരമ ദിനപത്രത്തിൽ 28-09-2023 ന് പ്രസിദ്ധീകരിക്കപ്പെട്ടത് )

Continue Reading

Trending