കൊച്ചി: ഐഎസ്എല്‍ പോരില്‍ ഒഡിഷ എഫ്‌സിയെ ഒറ്റ ഗോളില്‍ തളച്ചിട്ട് കേരളാ ബ്ലാസ്റ്റേഴ്സ്. കളി തീരാന്‍ മിനിറ്റുകള്‍ മാത്രം ബാക്കിയുള്ളപ്പോഴാണ് കേരളാ പഴയ കണക്ക് വീട്ടി കയ്യില്‍ കൊടുത്തത്. എവേ പോരിലേറ്റ തോല്‍വിക്കാണ് സ്വന്തം തട്ടകത്തില്‍ കണക്കു തീര്‍ത്തത്. പ്രതിരോധ താരം സന്ദീപ് സിങ് നേടിയ ഗോളാണ് സമനിലയിലേക്ക് നീങ്ങിയ പോരാട്ടത്തിന് വഴിത്തിരിവുണ്ടാക്കിയത്. ഇതോടെ ബ്ലാസ്റ്റേഴ്സ് അപരാജിതരായി ഏഴാം പോരാട്ടവും പൂര്‍ത്തിയാക്കി.
ജയത്തോടെ ബ്ലാസ്റ്റേഴ്സ് പോയിന്റ് പട്ടികയില്‍ മൂന്നാം സ്ഥാനത്താണ്. 11 മത്സരങ്ങളില്‍ നിന്ന് 22 പോയിന്റാണ് ടീമിനുള്ളത്. ഇരു പക്ഷവും ആക്രമണ ഫുട്‌ബോളാണ് പുറത്തെടുത്തത്. നിരവധി അവസരങ്ങളാണ് കൊമ്പന്‍മാര്‍ തുലച്ചു കളഞ്ഞത്. പന്തടക്കത്തിലും പാസിങിലുമൊക്കെ ബ്ലാസ്റ്റേഴ്സ് മുന്നില്‍ നിന്നു. ആദ്യ പകുതി ഒഡിഷയുടെ കൈയിലായിരുന്നുവെങ്കിലും ഗോള്‍ വഴങ്ങാതെ ബ്ലാസ്റ്റേഴ്സ് പിടിച്ചുനിന്നു.
രണ്ടാം പകുതിയുടെ തുടക്കത്തില്‍ ബ്ലാസ്റ്റേഴ്സ് ഉണര്‍ന്നു കളിച്ചു. ഒടുവില്‍ 86ാം മിനിറ്റില്‍ ബ്ലാസ്റ്റേഴ്സ് ഒഡിഷയുടെ പ്രതിരോധക്കോട്ട പൊളിച്ചു. കാത്തിരുന്ന ലീഡ് സന്ദീപ് സിങ് സമ്മാനിച്ചു. പകരക്കാരനായി ഇറങ്ങിയ െ്രെബസ് മിറാന്‍ഡയുടെ ക്രോസില്‍ നിന്നാണ് ഗോളിന്റെ പിറവി.