ഉത്സവത്തിന് ക്രമസമാധാന ഡ്യൂട്ടിക്കെത്തിയ എസ്.ഐ യുടെ നൃത്തം സോഷ്യൽ മീഡിയയിൽ വൈറലായതോടെ എസ് .ഐ യെ സസ്പെൻഡ് ചെയ്തു. ഇടുക്കി ജില്ലയിലെ ശാന്തൻപാറ പോലീസ് സ്റ്റേഷനിലെ എസ്. ഐയാണ് നൃത്തം ചെയ്ത് വിവാദത്തിലായിരിക്കുന്നത്. ചൊവ്വാഴ്ച രാത്രിയാണ് സംഭവം.
ശാന്തൻപാറ സ്റ്റേഷൻ പരിധിയിലെ പൂപ്പാറ ടൗണിലുള്ള മാരിയമ്മൻ കോവിലിൽ ക്രമസമാധാന ഡ്യൂട്ടിക്കെത്തിയതായിരുന്നു എസ്.ഐയും സംഘവും. രാത്രിയിൽ ക്ഷേത്രാചാരങ്ങളുടെ ഭാഗമായി മാരിയമ്മ . കാളിയമ്മ എന്ന തമിഴ് ഗാനം ഉച്ചഭാഷിണിയിലൂടെ മുഴങ്ങിയതോടെയാണ് എസ്.ഐ പരിസരം മറന്ന് നൃത്തം ആരംഭിച്ചത്.ചിലർ ഇതിന്റെ ദൃശ്യങ്ങൾ മൊബൈലിൽ പകർത്തി സോഷ്യൽ മീഡിയയിൽ പങ്കുവച്ചതോടെയാണ് പോലീസ് രഹസ്യാന്വേഷണ വിഭാഗം അന്വേഷണം നടത്തി സസ്പെൻഡ് ചെയ്തത്