GULF
കെഎംസിസി ബഹ്റൈന് തിരൂര് മണ്ഡലം കമ്മിറ്റി നിലവില് വന്നു
ബഹ്റൈനില് തിരൂര് മണ്ഡലം കെഎംസിസി നിലവില് വന്നു.

മനാമ : ബഹ്റൈനില് തിരൂര് മണ്ഡലം കെഎംസിസി നിലവില് വന്നു. ബഹ്റൈന് കെഎംസിസിയില് തിരൂര് മണ്ഡലത്തില് നിന്നും മെമ്പര്ഷിപ്പ് എടുത്ത മെമ്പര്മാരുടെ കൗണ്സില് മീറ്റില് വെച്ചാണ് മണ്ഢലം കമ്മിറ്റി നിലവില് വന്നത്.
മുഖ്യ ഭാരവാഹികള്:
പ്രസിഡന്റ്: അഷ്റഫ് കുന്നത്ത് പറമ്പില് തിരൂര്
ജനറല് സെക്രട്ടറി: എം. മൗസല് മൂപ്പന് തിരൂര്.
ട്രഷറര്: അബ്ദുല് ജാസിര് കന്മനം
ഓര്ഗനൈസിങ് സെക്രട്ടറി: മുഹമ്മദ് റമീസ് പഴംകുളങ്ങര.
വൈസ് പ്രസിഡന്റുമാര്: എം മൊയ്ദീന് ബാവ മൂപ്പന് ചെമ്പ്ര, സുലൈമാന് പട്ടര്നടക്കാവ്, ഇബ്രാഹീം പരിയാപുരം, മുഹമ്മദ് ഫാറൂഖ് തിരൂര്, താജുദ്ധീന് ചെമ്പ്ര
ജോ. സെക്രട്ടറിമാര്: മുനീര് ഉമ്മിണിയാട്ടില് ആതവനാട്,, റഷീദ് കെ പുന്നത്തല, ഹുനൈസ് മാങ്ങാട്ടിരി,, ഷംസുദ്ധീന് കുറ്റൂര്, മുഹമ്മദ് ഷാഫി ചെമ്പ്ര.
കെ എം സി സി ബഹ്റൈന് മനാമ കേന്ദ്ര കമ്മിറ്റി യുടെ മിനി ഓഡിറ്റോറിയത്തില് വെച്ച് നടന്ന ചടങ്ങില് അഷ്റഫ് കുന്നത്ത് പറമ്പില് അദ്ധ്യക്ഷനായി. കെഎംസിസി ബഹ്റൈന് മലപ്പുറം ജില്ലാ ജനറല് സെക്രട്ടറി അലി അക്ബര് കൈത്തമണ്ണ സംഗമം ഉദ്ഘാടനം ചെയ്തു. സുലൈമാന് ഉസ്താദ് പ്രാര്ത്ഥന നടത്തി . മലപ്പുറം ജില്ലാ ഭാരവാഹികള് ആയ ശിഹാബ് പൊന്നാനി, മുജീബ് മേല്മുറി എന്നിവര് റിട്ടേണിങ് ഓഫീസര് മാരായി തെരഞ്ഞെടുപ്പ് നിയന്ത്രിച്ചു.
കെഎംസിസി ബഹ്റൈന് മലപ്പുറം ജില്ലാ മുന് പ്രസിഡന്റ് സലാം മമ്പാട്ട് മൂല, അബ്ദുല് റഹ്മാന് സാഹിബ് പകര, ബിയ്യാത്തിയില് അബ്ദുല് വാഹിദ് വൈലത്തൂര്, ഉമ്മര് കൂട്ടിലങ്ങാടി, മഹ്റൂഫ്ആലുങ്ങള് മൊയ്ദീന്കൂട്ടിലങ്ങാടി, ഷഹീന് പകര എന്നിവര് ആശംസകള് നേര്ന്നു സംസാരിച്ചു. എം മൗസല് മൂപ്പന് തിരൂര് സ്വാഗതവും മുഹമ്മദ് റമീസ് പഴംകുളങ്ങര നന്ദിയും പറഞ്ഞു.
GULF
വിപഞ്ചികയുടെ മരണം: ഭര്ത്താവ് നിതീഷിനെതിരെ കേസെടുത്തു

ഷാര്ജ: അല് നഹ്ദയില് ഒന്നര വയസുകാരിയായ പെണ്കുഞ്ഞിനെ കൊലപ്പെടുത്തി കൊല്ലം കേരളപുരം സ്വദേശിയായ യുവതി ജീവനൊടുക്കിയ സംഭവത്തില് ഭര്ത്താവിനും ഭര്ത്താവിന്റെ വീട്ടുകാര്ക്കുമെതിരെ കുണ്ടറ പൊലീസ് കേസെടുത്തു. മരണപ്പെട്ട യുവതിയുടെ മാതാവിന്റെ പരാതിയില് ആത്മഹത്യ പ്രേരണ, സ്ത്രീധന പീഡനം തുടങ്ങിയ വകുപ്പുകള് പ്രകാരമാണ് കേസ്. കുറ്റാരോപിതര് മൂന്നുപേരും നിലവില് ഷാര്ജയിലാണ്. ഇവര് നാട്ടില് എത്തിയ ശേഷമാകും അറസ്റ്റ് ഉള്പ്പെടെയുള്ള കാര്യങ്ങളിലേക്ക് പൊലീസ് കടക്കുക. സ്ത്രീധനത്തെ ചൊല്ലി വിപഞ്ചികയെ ഭര്തൃവീട്ടുകാര് മാനസികമായി പീഡിപ്പിച്ചെന്നും ദേഹോപദ്രവം ഏല്പ്പിച്ചെന്നും എഫ്.ഐ.ആറില് പറയുന്നു. കേസില് സൈബര് സെല്ലും അന്വേഷണം നടത്തുന്നുണ്ട്. മരണ ശേഷം വിപഞ്ചികയുടെ സാമുഹ്യ മാധ്യമ പോസ്റ്റുകള് അപ്രത്യക്ഷമായത് തെളിവ് നശിപ്പിക്കാനാണെന്ന നിഗമനത്തിലാണ് സൈബര് സെല്ലിന്റെ പ്രത്യേക അന്വേഷണം.
കൊറ്റംകര കേരളപുരം രജിത ഭവനില് വിപഞ്ചിക മണിയന്റെ(33) മരണത്തിലാണ് ഭര്ത്താവ് നിതീഷ്, ഇയാളുടെ സഹോദരി നീതു, പിതാവ് മോഹനന് എന്നിവരെ പ്രതിചേര്ത്തത്. കഴിഞ്ഞ ചൊവ്വാഴ്ച രാത്രി 11 ഓടെയാണ് ഷാര്ജയില് സ്വകാര്യ കമ്പനിയില് എച്ച്.ആര് മാനേജറായിരുന്ന വിപഞ്ചികയും മകള് ഒന്നര വയസുകാരി വൈഭവിയും ഷാര്ജയിലെ ഫഌറ്റില് ജീവനൊടുക്കിയത്. മകളുടെ കഴുത്തില് കയറിട്ട് തൂക്കിയ ശേഷം മറ്റേ അറ്റത്ത് വിപഞ്ചികയും തൂങ്ങി മരിക്കുകയായിരുന്നു. ഭര്ത്താവ് നിതീഷ് കോട്ടയം സ്വദേശിയാണ്. ഇയാള് ഷാര്ജയില് എഞ്ചിനീയറാണ്.
സ്ത്രീധനത്തിന്റെ പേരില് തന്നെ കൊല്ലാക്കൊല ചെയ്തു എന്ന് പരാമര്ശിക്കുന്ന വിപഞ്ചികയുടെ ആറ് പേജുള്ള ആത്മഹത്യാ കുറിപ്പ് നേരത്തെ സാമൂഹ്യ മാധ്യമം വഴി പുറത്തുവന്നിരുന്നു. മരണത്തിന് ശേഷമാണ് ഇത് ഫെയ്സ്ബുക്കില് അപ്ലോഡ് ചെയ്തത്. ടൈമര് സെറ്റ് ചെയ്ത് വെച്ചായിരുന്നു അപ്ലോഡ് ചെയ്തത്. ഇതോടെയാണ് ബന്ധുക്കള്ക്ക് വിവരം ലഭിച്ചത്. വൈകാതെ ഫെയ്സ്ബുക്കിലെ കത്ത് അപ്രത്യക്ഷമായി. മരണപ്പെട്ട വിപഞ്ചികയുടെ ഫോണ് കൈക്കലാക്കിയ ഭര്ത്താവ് നിതീഷ് മോഹനും സഹോദരിയും കത്ത് ഡിലീറ്റ് ചെയ്തതായാണ് ബന്ധുക്കള് സംശയിക്കുന്നത്. കൊടിയ പീഡനമാണ് വിപഞ്ചിക ഭര്തൃവീട്ടില് അനുഭവിച്ചതെന്നാണ് ആത്മഹത്യാ കുറിപ്പില് പറയുന്നത്. ഭര്തൃ പിതാവ് അപമര്യാദയായി പെരുമാറിയതായും സ്ത്രീധനം കുറഞ്ഞതിന്റെ പേരില് ക്രൂരമായി പീഡിപ്പിച്ചെന്നും കുറിപ്പിലുണ്ട്. മരിക്കാന് ഒരാഗ്രഹവുമില്ല. മകളുടെ മുഖം കണ്ട് കൊതിതീര്ന്നിട്ടില്ല. ഒരിക്കലും കൊലയാളികളെ വെറുതെ വിടരുത്. തന്റെ മരണത്തില് നിതീഷ് മോഹന്, ഭര്തൃസഹോദരി നീതു എന്നിവരാണ് ഒന്നാം പ്രതികള്. രണ്ടാം പ്രതി ഭര്ത്താവിന്റെ പിതാവ് മോഹനന്. പിതാവ് അപമര്യാദയായി പെരുമാറി എന്നറിഞ്ഞിട്ടും നിതീഷ് പ്രതികരിച്ചില്ല. ഭര്തൃസഹോദരി തന്നെ ജീവിക്കാന് അനുവദിച്ചിട്ടില്ലെന്നും കുറിപ്പില് വെളിപ്പെടുത്തുന്നു. കല്യാണം ആഡംബരമായി നടത്തിയില്ല, സ്ത്രീധനം കുറഞ്ഞുപോയി, കാര് കൊടുത്തില്ല എന്നൊക്കെ പറഞ്ഞ് എന്നെ കൊല്ലാക്കൊല ചെയ്തു. കുഞ്ഞിനെ ഓര്ത്ത് തന്നെ വിടാന് കെഞ്ചിയിട്ടും ഭര്തൃസഹോദരി കേട്ടില്ല. ഒരിക്കല് ഇവരുടെ വാക്കും കേട്ട് നിതീഷ് വീട്ടില് വലിയ ബഹളമുണ്ടാക്കി.
ഒരിക്കലും ആ സ്ത്രീ എന്നെ ജീവിക്കാന് അനുവദിച്ചില്ല. ഗര്ഭിണിയായി ഏഴാം മാസത്തില് തന്നെ നിതീഷ് വീട്ടില്നിന്ന് ഇറക്കിവിട്ടു. നിതീഷിന് ഒരുപാട് സ്ത്രീകളുമായി ബന്ധമുണ്ടെന്നും കത്തില് പരാമര്ശമുണ്ട്. തുടക്കത്തിലൊക്കെ നിതീഷ് തന്നെ തല്ലുമായിരുന്നുവെങ്കിലും കാര്യങ്ങള് നോക്കുമായിരുന്നുവെന്നും എന്നാല് ഒരു വര്ഷത്തിലേറെയായി തനിക്ക് വെള്ളമോ ആഹാരമോ വസ്ത്രമോ ഒന്നും തരില്ലെന്നും വ്യക്തമാക്കുന്നു. എന്നെ അവര്ക്ക് ഒരു മാനസികരോഗിയാക്കണം. എന്റെ കൂട്ടുകാര്ക്കും ഓഫിസിലുള്ളവര്ക്കുമെല്ലാം നിതീഷും അയാളുടെ സഹോദരിയും അച്ഛനും ചെയ്യുന്ന ദ്രോഹങ്ങളെക്കുറിച്ച് അറിയാമെന്നും പറഞ്ഞാണ് കത്ത് അവസാനിപ്പിക്കുന്നത്. വിപഞ്ചികയുടെ ആത്മഹത്യ കുറിപ്പ് പുറത്തുവന്നതോടെ മരണത്തില് ദുരൂഹത ആരോപിച്ച് വിപഞ്ചികയുടെ കുടുംബം യുഎഇ എംബസി, മുഖ്യമന്ത്രി, സിറ്റി പൊലിസ് കമ്മിഷണര് എന്നിവര്ക്ക് പരാതി നല്കുകയായിരുന്നു. വിപഞ്ചിക ആത്മഹത്യ ചെയ്യില്ലെന്ന് ഉറച്ച് പറയുകയാണ് മാതാവും സഹോദരനും. ഭര്ത്താവായ നിതീഷിനും കുടുംബത്തിനുമെതിരേ ഗുരുതര ആരോപണങ്ങളാണ് വിപഞ്ചികയുടെ മാതാവ് ഷൈലജ ഉന്നയിക്കുന്നത്. ഭര്ത്താവിന്റെ സഹോദരിയാണ് എല്ലാത്തിനും കാരണമെന്ന് മാതാവ് ആരോപിച്ചു. മകള് കൊടിയപീഡനത്തിനിരയായ കാര്യം തന്നെ അറിയിച്ചിരുന്നില്ലെന്നും അറിഞ്ഞിരുന്നെങ്കില് ഇതൊന്നും താന് അനുവദിക്കില്ലായിരുന്നുവെന്നും മാതാവ് പറഞ്ഞു.
വിപഞ്ചികയെ ഭര്തൃ പിതാവിനും ഭര്തൃ സഹോദരിക്കും ഇഷ്ടമല്ലായിരുന്നു.
കൊടിയപീഡനങ്ങളാണ് മകള് അനുഭവിച്ചത്. താന് വിഷമിക്കാതിരിക്കാനാണ് ഇതൊന്നും അറിയിക്കാതെയിരുന്നത്. ഇപ്പോള് ഫോട്ടോയും വീഡിയോയും കാണുമ്പോഴാണ് മകള് ഇത്രയും കൊടിയ പീഡനം സഹിച്ചിരുന്ന വിവരമറിയുന്നത്. ഇതറിഞ്ഞിരുന്നെങ്കില് ഞാന് അനുവദിക്കില്ലായിരുന്നു. നിതീഷിന്റെ പീഡനം കാരണമാണ് മകള് മുടി മുറിച്ചതെന്നും മാതാവ് പറഞ്ഞു. വിപഞ്ചികയുടെ പിതാവ് മണിയന് കുവൈത്തിലാണ്. നിയമക്കുരുക്കില്പ്പെട്ടതിനാല് ഇദ്ദേഹം നാട്ടില് എത്താന് കഴിയാത്ത അവസ്ഥയിലാണ്. വിപഞ്ചികയുടെയും കുഞ്ഞിന്റെയും മൃതദേഹം നാട്ടിലെത്തിച്ച് സംസ്കരിക്കണമെന്നാണ് കുടുംബത്തിന്റെ ആവശ്യം. എന്നാല് കുഞ്ഞിന്റെ മൃതദേഹം ഷാര്ജയില് സംസ്കരിക്കണമെന്നാണ് നിതീഷിന്റെ ആവശ്യം. ഇത് അനുവദിക്കരുതെന്നും മകളെയും കുഞ്ഞിനെയും മരണത്തിലേക്ക് തള്ളിവിട്ട അയാള്ക്ക് പരമാവധി ശിക്ഷ ലഭിക്കണമെന്നും മാതാവ് പറഞ്ഞു.
GULF
നിമിഷ പ്രിയയുടെ വധശിക്ഷ മാറ്റിവെയ്ക്കണം; യെമന് സര്ക്കാരിന് അപേക്ഷ നല്കി അമ്മ
കൊല്ലപ്പെട്ട തലാലിന്റെ കുടുംബവുമായി ദയാധന ചര്ച്ച പുരോഗമിക്കുന്ന സാഹചര്യത്തിലാണ് അപേക്ഷ.

നിമിഷ പ്രിയയുടെ വധശിക്ഷ മാറ്റിവെയ്ക്കണമെന്ന് ആവശ്യപ്പെട്ട് യെമന് സര്ക്കാരിന് അപേക്ഷ നല്കി നിമിഷപ്രിയയുടെ അമ്മ പ്രേമകുമാരി. കൊല്ലപ്പെട്ട തലാലിന്റെ കുടുംബവുമായി ദയാധന ചര്ച്ച പുരോഗമിക്കുന്ന സാഹചര്യത്തിലാണ് അപേക്ഷ. നിമിഷപ്രിയയെ വധശിക്ഷയില് നിന്ന് രക്ഷിക്കാന് ഇടപെടണമെന്ന് ആവശ്യപ്പെട്ടുള്ള ആക്ഷന് കൗണ്സിലിന്റെ ഹര്ജിയില് കേന്ദ്ര സര്ക്കാര് നാളെ മറുപടി നല്കും.
ബുധനാഴ്ച വധശിക്ഷ നടപ്പാക്കാനാണ് യെമന് ഭരണകൂടത്തിന്റെ തീരുമാനം. എന്നാല് കൊല്ലപ്പെട്ട തലാല് അബ്ദു മഹദിയുടെ കുടുംബവുമായി ബ്ലഡ് മണി സംബന്ധിച്ച ചര്ച്ച പുരോഗമിക്കുകയാണ്. അവസാന നിമിഷമെങ്കിലും കുടുംബവുമായി സമവായത്തിലെത്തിയാല് നിമിഷപ്രിയയെ വധശിക്ഷയില് നിന്ന് രക്ഷിക്കാനാകുമെന്നാണ് കുടുംബത്തിന്റെയും ആക്ഷന് കൗണ്സിലിന്റെയും പ്രതീക്ഷ. ഈ സാഹചര്യത്തിലാണ് വധശിക്ഷ നടപ്പാക്കുന്നത് മാറ്റിവയ്ക്കണം എന്നാവശ്യപ്പെട്ട് യെമനിലെ പബ്ലിക് പ്രൊസിക്യൂഷന് ഡയറക്ടര് ജനറലിന് പ്രേമകുമാരി അപേക്ഷ നല്കിയത്.
പബ്ലിക് പ്രൊസിക്യൂഷന് ഡയറക്ടര് ജനറലുമായുള്ള കൂടിക്കാഴ്ചയില് ഇന്ത്യന് എംബസി അധികൃതരും യെമനിലുള്ള ആക്ഷന് കൗണ്സിലംഗം സാമുവല് ജെറോമും പ്രേമകുമാരിക്കൊപ്പം പങ്കെടുത്തു. വധശിക്ഷ നടപ്പാക്കുന്നത് യെമന് ഭരണകൂടം മാറ്റിവെയ്ക്കുമെന്നാണ് സേവ് നിമിഷപ്രിയ ആക്ഷന് കൗണ്സിലിന്റെ പ്രതീക്ഷ. ആക്ഷന് കൗണ്സിലിന്റെ ഹര്ജി സുപ്രിംകോടതി നാളെ പരിഗണിക്കും. ഹര്ജിയില് കേന്ദ്ര സര്ക്കാരിന് വേണ്ടി അറ്റോര്ണി ജനറല് ഹാജരായി മറുപടി നല്കും.
GULF
റഹീമിന് തടവ് 20 വർഷം തന്നെ; കീഴ്ക്കോടതി വിധി അപ്പീൽ കോടതി ശരിവെച്ചു

റിയാദ്: സൗദി ജയിലിൽ കഴിയുന്ന കോഴിക്കോട് സ്വദേശി അബ്ദുൽ റഹീമിന്റെ കേസിൽ കീഴ്കോടതി വിധി ശരിവെച്ച് അപ്പീൽ കോടതിയുടെ ഉത്തരവ്. മെയ് 26 നാണ് 20 വർഷത്തെ തടവിന് വിധിച്ചുള്ള കീഴ്ക്കോടതി വിധിയുണ്ടായത്. വിധിക്ക് ശേഷം പ്രോസിക്യൂഷൻ അപ്പീൽ സമർപ്പിച്ചതിനെ തുടർന്നാണ് ഇന്ന് രാവിലെ 11 മണിക്ക് അപ്പീൽ കോടതിയിൽ സിറ്റിങ് ഉണ്ടായത്.
19 വർഷം പിന്നിട്ട പ്രതിക്ക് മോചനം അനുവദിക്കണമെന്ന് പ്രതിഭാഗം ആവശ്യപ്പെട്ടെങ്കിലും കോടതി പരിഗണിച്ചില്ല. എന്നാൽ ആവശ്യമെങ്കിൽ പ്രതിഭാഗത്തിന് മേൽക്കോടതിയെ സമീപിക്കാം എന്നും കോടതി പറഞ്ഞു.
റഹീമിന്റെ അഭിഭാഷകാരും ഇന്ത്യൻ എംബസ്സി പ്രതിനിധി സവാദ് യൂസഫും റഹീം കുടുംബ പ്രതിനിധി സിദ്ദീഖ് തുവ്വൂരും ഓൺലൈൻ കോടതിയിൽ ഹാജരായിരുന്നു. കീഴ്ക്കോടതി വിധി ശരിവെച്ച അപ്പീൽ കോടതിയുടെ വിധി ആശ്വാസകരമാണെന്ന് വിധിക്ക് ശേഷം റിയാദ് റഹീം സഹായ സമിതി അറിയിച്ചു.
-
kerala3 days ago
മലക്കം മറിഞ്ഞ് മന്ത്രി; പ്രതിഷേധം ശക്തമായപ്പോള് സ്കൂള് സമയമാറ്റത്തില് ചര്ച്ചക്ക് തയ്യാറാണെന്ന് മന്ത്രി ശിവന്കുട്ടി
-
kerala3 days ago
അമിത് ഷാ പങ്കെടുത്ത ബി.ജെ.പിയുടെ ഓഫിസ് ഉദ്ഘാടനത്തില് പങ്കെടുക്കാതെ സുരേഷ്ഗോപി
-
india22 hours ago
നിമിഷ പ്രിയയുടെ മോചനം; കാന്തപുരം മുസ്ലിയാരുടെ ഇടപെടലില് യെമനില് അടിയന്തര യോഗം
-
kerala3 days ago
‘കയ്യുവെട്ടും കാലുംവെട്ടും, വേണ്ടി വന്നാല് തലയും വെട്ടും’; പൊലീസിനെതിരെ കൊലവിളി മുദ്രാവാക്യം മുഴക്കി സിപിഎം
-
kerala3 days ago
മുസ്ലിം ലീഗ് വയനാട് പുനരധിവാസ പദ്ധതി; തടസ്സങ്ങളുണ്ടാക്കി സര്ക്കാര് പകപോക്കുന്നു; പി.എം.എ സലാം
-
kerala3 days ago
വയനാട് പുനരധിവാസ പദ്ധതി; ആരൊക്കെ മുടക്കാന് നോക്കിയാലും മുസ്ലിംലീഗ് വാക്ക് പാലിക്കും; പി.കെ ബഷീര് എം.എല്.എ
-
india2 days ago
ഡല്ഹിയില് ഫുട്പാത്തില് ഉറങ്ങിക്കിടന്ന അഞ്ചു പേരുടെ മേല് മദ്യപിച്ച് കാര് കയറ്റി; ഡ്രൈവര് അറസ്റ്റില്
-
kerala2 days ago
കാലിക്കറ്റ് യൂണിവേഴ്സിറ്റി കാമ്പസില് സമരങ്ങള്ക്ക് നിരോധനം; വിദ്യാര്ത്ഥി സംഘടനകള്ക്ക് കത്തയച്ച് പൊലീസ്