ലണ്ടന്‍: ഇംഗ്ലീഷ് പ്രീമിയര്‍ ലീഗിലെ കരുത്തരായ മാഞ്ചസ്റ്റര്‍ സിറ്റിയെ തോല്‍പ്പിച്ച് ഫ്രഞ്ച് ക്ലബ്ബ് ലിയോണ്‍ ചാമ്പ്യന്‍സ് ലീഗ് ഫുട്‌ബോളിന്റെ സെമി ഫൈനലിലേക്ക് മുന്നേറി. ഒന്നിനെതിരേ മൂന്നു ഗോളിനായിരുന്നു ലിയോണിന്റെ വിജയം. ഇതോടെ സെമിയില്‍ ആരാധകരെ കാത്തിരിക്കുന്നത് ജര്‍മന്‍ഫ്രഞ്ച് ടീമുകളുടെ സെമി ഫൈനലാണ്. ലിയോണ്‍ ജര്‍മന്‍ ക്ലബ്ബ് ബയേണ്‍ മ്യൂണികിനെ നേരിടുമ്പോള്‍ ഫ്രഞ്ച് ക്ലബ്ബായ പി.എസ്.ജിയുടെ എതിരാളി ജര്‍മന്‍ ക്ലബ്ബ് ആര്‍ബി ലെയ്പിസിഗാണ്.
തീര്‍ത്തും പ്രതിരോധത്തിലൂന്ന് ആദ്യ ഇലവനെ ഇറക്കിയ സിറ്റിയുടെ പരിശീലകന്‍ ഗാര്‍ഡിയോളക്ക് പിഴക്കുകകയായിരുന്നു. 24ാം മിനിറ്റില്‍ മാക്‌സ്വെല്‍ കോര്‍ണെറ്റിലൂടെ ലിയോണ്‍ മുന്നിലെത്തി. 55ാം മിനിറ്റില്‍ മെഹ്‌റസിനെ ഇറക്കിയതോടെ സിറ്റിക്ക് കൂടുതല്‍ അവസരങ്ങള്‍ സൃഷ്ടിക്കാനായി. ഇതിന്റെ ഫലമായി 69ാം കെവിന്‍ ഡി ബ്രുയ്‌നിലൂടെ സിറ്റി സമനില ഗോള്‍ കണ്ടെത്തി. എന്നാല്‍ പിന്നീട് മൂസ ഡെംബലെയുടെ മിന്നുന്ന പ്രകടനമാണ് കണ്ടത്.
79ാം മിനിറ്റില്‍ ഡെംബലയിലൂടെ ലിയോണ്‍ വീണ്ടും ലീഡെടുത്തു. എട്ടു മിനിറ്റിന് ശേഷം ഡെംബലെയിലൂടെ ലിയോണ്‍ വീണ്ടും ഗോള്‍ കണ്ടെത്തി. പിന്നീട് സിറ്റിക്ക് തിരിച്ചുവരാനായില്ല. ഇന്ത്യന്‍ സമയം ഓഗസ്റ്റ് 18ന് രാത്രി 12.30ന് പി.എസ്ജി-ലെപ്‌സിഗ് പോരാട്ടവും ഓഗസ്റ്റ് 19 രാത്രി 12.30ന് ബയേണ്‍-ലിയോണ്‍ പോരാട്ടവും നടക്കും.