കോഴിക്കോട് : രാഹുല്‍ ഗാന്ധിയെ എംപി സ്ഥാനത്ത് നിന്ന് നീക്കം ചെയ്തുള്ള സംഘ് പരിവാര്‍ തീരുമാനത്തിനെതിരെ പ്രതിഷേധ ജ്വാല തീര്‍ക്കുമെന്ന് മുസ്ലിം യൂത്ത് ലീഗ് സംസ്ഥാന പ്രസിഡന്റ് സയ്യിദ് മുനവ്വറലി ശിഹാബ് തങ്ങളും ജനറല്‍ സെക്രട്ടറി പി.കെ ഫിറോസും പറഞ്ഞു. ശബ്ദിക്കുന്നവരുടെ വായ മൂടിക്കെട്ടുന്ന സംഘ്പരിവാര്‍ ഭരണകൂടത്തിനെതിരെയുള്ള പ്രതിഷേധം വന്‍ വിജയമാക്കാനും പ്രതിഷേധത്തില്‍ കണ്ണിചേരാനും നേതാക്കള്‍ അഭ്യര്‍ത്ഥിച്ചു.
പ്രതിഷേധ ജ്വാല നാളെ (മാർച്ച്‌ 26, ഞായറാഴ്ച) രാത്രി 10മണിക്ക് കോഴിക്കോട് അരയിടത്തുപാലം ജംഗ്ഷനില്‍ നിന്നും ആരംഭിച്ച് കോഴിക്കോട് കടപ്പുറത്ത് സമാപിക്കും.
രാഹുല്‍ ഗാന്ധിയെ എം.പി സ്ഥാനത്ത് നിന്നും നീക്കം ചെയ്ത നടപടി അങ്ങേയറ്റം ജനാധിപത്യ ധ്വംസനമാണെന്നും പ്രതിഷേധിക്കുന്നവരെ ഇല്ലായ്മ ചെയ്തുള്ള പ്രതിപക്ഷ രഹിത പാര്‍ലിമെന്റ് സ്വപ്നം കാണുകയാണ് ബിജെപിയെന്നും തങ്ങളും ഫിറോസും തുടര്‍ന്നു. സംഘ്പരിവാറിന്റെ ജനാധിപത്യ വിരുദ്ധ നടപടിയില്‍ പ്രതിഷേധിച്ച് രാജ്യവ്യാപകമായി നടക്കുന്ന പ്രതിഷേധത്തില്‍ യൂത്ത്‌ലീഗും പങ്ക്‌ചേരുകയാണെന്ന് നേതാക്കള്‍ കൂട്ടിച്ചേര്‍ത്തു.