കോട്ടയം: പാമ്പാടിയിലെ ജ്വല്ലറി മോഷണത്തില്‍ ബിജെപി പ്രാദേശിക നേതാവ് അറസ്റ്റില്‍. കൂട്ടിക്കല്‍ ടോപ്പ് സ്വദേശി അജീഷിനെയാണ് പാമ്പാടി പൊലീസ് അറസ്റ്റ് ചെയ്തത്. വീട്ടില്‍ നിന്ന് അറസ്റ്റ് ചെയ്ത് പോകുമ്പോള്‍ ബിജെപി പ്രവര്‍ത്തകര്‍ പോലീസ് വാഹനം തടഞ്ഞു. കഴിഞ്ഞ ത്രിതല പഞ്ചായത്ത് തെരഞ്ഞെടുപ്പില്‍ ബിജെപി സ്ഥാനാര്‍ത്ഥിയായിരുന്നു അജീഷ്.
പാമ്പാടിയിലെ കയ്യാലപ്പറമ്പില്‍ ജ്വല്ലറിയിലായിരുന്നു മോഷണം നടന്നത്. കടയില്‍ എത്തിയ അജീഷ് മാല വാങ്ങാനെന്ന പേരില്‍ മാല കാണിക്കാന്‍ കടയുടമയോട് ആവശ്യപ്പെട്ടു. രണ്ടു മാലകള്‍ നോക്കുന്നതിനിടെ ഉടമ കടയുടെ ഉള്ളിലേക്ക് പോയി. ഈ സമയത്ത് നാലു പവന്റെ രണ്ടു മാലകളുമായി അജീഷ് സ്‌കൂട്ടറില്‍ കടന്നു കളയുകയായിരുന്നു. മോഷണം പോയെന്ന് അറിഞ്ഞതോടെ ജയകുമാര്‍ വിവരം പൊലീസില്‍ അറിയിച്ചു. സിസി ടിവി ദൃശ്യങ്ങളുടെ അടിസ്ഥാനത്തില്‍ നടത്തിയ അന്വേഷണത്തിലാണ് അജീഷിനെ പിടികൂടിയത്. മോഷണം നടത്തിയതിന്റെ പേരില്‍ അജീഷിന് മാനസിക പ്രയാസം ഉണ്ടെന്ന് പോലീസ് പറഞ്ഞു.