Connect with us

Features

കുട്ടികളില്‍ ക്ഷമാശീലം വളര്‍ത്താം; നോര്‍ത്ത് കരോലിന സ്‌റ്റേറ്റ് യൂണിവേഴ്‌സിറ്റി പഠനം

നോര്‍ത്ത് കരോലിന സ്‌റ്റേറ്റ് യൂണിവേഴ്‌സിറ്റിയിലെ സൈക്കോളജി അസോസിയേറ്റ് പ്രഫസറിന്റേതാണ് പുതിയ പഠനം

Published

on

ആധുനിക കാലത്ത് അന്യമായിക്കൊണ്ടിരിക്കുന്ന ശീലമാണ് ക്ഷമ. മനുഷ്യന്‍ സാമൂഹിക ജീവിയെന്ന നിലയില്‍ ഏകാന്ത ജീവിതം ഒരിക്കലും സാധ്യമല്ല. സമൂഹത്തിലെ വിവിധ കാഴ്ചപ്പാടുകളോടും രീതികളോടും ആശയങ്ങളോടും നമുക്ക് സംവദിക്കേണ്ടി വരും. വിയോജിപ്പുകള്‍ പലപ്പോഴും പ്രതികാരത്തിലേക്ക് നയിക്കുന്നതിന്റെ മുഖ്യകാരണം ക്ഷമയുടെ അഭാവമായി കാണാം. വിയോജിപ്പുകളിലും അനിഷ്ടങ്ങളിലും വികരപ്പെടുമ്പോള്‍ നമ്മുടെ ചിന്തകളും ആശയങ്ങളും കൃത്യമായി കൈമാറാന്‍ കഴിയാതെ വരുന്നു. ചുട്ടയിലെ ശീലം ചുടല വരെയെന്ന ചൊല്ല് ഇത്തരം സന്ദര്‍ഭങ്ങളിലാണ് കുടുതല്‍ അര്‍ഥം നല്‍കുന്നത്.

ജീവിത സാഹചര്യങ്ങള്‍ നമ്മില്‍ വരുത്തുന്ന മാറ്റം വളരെ വലുതാണ്. അതുകൊണ്ട് തന്നെ നല്ല ശീലങ്ങള്‍ ചെറുപ്പത്തിലേ സ്വീകരിക്കുന്നതാവും ഉചിതം. വാഷിംഗ്ടണില്‍ കുട്ടികളില്‍ നടത്തിയ പഠനത്തില്‍ പറയുന്നത് ചെറുപ്പത്തിലെ കുട്ടികളില്‍ ക്ഷമാശീലം വളര്‍ത്തിയെടുക്കണം എന്നാണ്. മറ്റുള്ളവരുടെ കാഴ്ചപ്പാടുകള്‍, ചിന്തകള്‍ എന്നിവ കുട്ടികള്‍ക്ക് മനസിലാക്കാന്‍ പ്രാപ്തരാക്കുന്നത് ഇതിന് സഹായകമാകുമെന്നും പഠനത്തില്‍ പറയുന്നു.

കുട്ടികള്‍ക്ക് ക്ഷമാശീലം പരിശീലിപ്പിക്കുന്നത് അവര്‍ക്കിടയില്‍ പുതിയ ബന്ധങ്ങള്‍ സ്ഥാപിക്കുന്നതിനും ഭാവിയിലെ സംഘര്‍ഷങ്ങള്‍ കുറയ്ക്കുന്നതിനും സഹായകമാകും. കുട്ടികള്‍ക്ക് പുറമെ മുതിര്‍ന്നവരിലും ക്ഷമാശീലം വളര്‍ത്തുന്നത് പ്രധാനമാണെന്ന് പഠനം നടത്തിയ കെല്ലി സിന്‍ മള്‍വി പറയുന്നു. നോര്‍ത്ത് കരോലിന സ്‌റ്റേറ്റ് യൂണിവേഴ്‌സിറ്റിയിലെ സൈക്കോളജി അസോസിയേറ്റ് പ്രഫസറിന്റേതാണ് പുതിയ പഠനം. ബാല്യം മുതല്‍ കൗമാരപ്രായം വരെയുള്ള കുട്ടികളിലാണ് പഠനം നടത്തിയത്. 185 കുട്ടികളില്‍ വിവിധ കളികളിലൂടെയാണ് പരീക്ഷണം നടത്തിയത്.

പഠനഫലത്തില്‍ കുട്ടികളോട് ക്ഷമാപണം നടത്തിയാല്‍ അവര്‍ തിരിച്ച് ക്ഷമിക്കും, കുട്ടികള്‍ അവരുടെ കൂട്ടത്തിലുള്ളവരോട് ക്ഷമിക്കാന്‍ കൂടുതല്‍ താത്പര്യം കാണിക്കുന്നു, കുട്ടികളുടെ മാനസിക വളര്‍ച്ചയ്ക്കനുസരിച്ച് ക്ഷമിക്കാനുള്ള ശേഷിയും വര്‍ധിക്കുന്നു എന്നീ മൂന്ന് കണ്ടെത്തലുകളാണ് ലഭ്യമായത്. പഠനത്തില്‍ കുടുതല്‍ ഗവേഷണം നടത്തണമെന്നും രചയിതാവ് പറയുന്നു.

Features

പ്രയാസമൊഴിയാതെ മത്സ്യവിതരണ തൊഴിലാളികള്‍

കേരള സ്റ്റേറ്റ് സ്വതന്ത്ര മത്സ്യ വിതരണ അനുബന്ധ തൊഴിലാളി ഫെഡറേഷന്‍ (എസ്.ടി.യു) കാര്യപ്രസക്തമായ ആവശ്യങ്ങള്‍ നിവേദനമായി നല്‍കിയിട്ടും ഈ മേഖലയിലുള്ളവരെ സര്‍ക്കാര്‍ കണ്ടില്ലെന്ന് നടിക്കുകയാണ്.

Published

on

സാഹിര്‍ പാലക്കല്‍

കേരളത്തിലെ പൊതുമാര്‍ക്കറ്റ് കേന്ദ്രീകരിച്ചും തലച്ചുമടായും റിക്ഷാ വാഹനങ്ങളിലും ഷോപ്പുകള്‍ കേന്ദ്രീകരിച്ചും മത്സ്യം വിതരണം ചെയ്തും സംസ്‌കരിച്ചും ഉപജീവനം തേടുന്ന തൊഴിലാളികള്‍ മത്സ്യവിതരണ അനുബന്ധ മേഖലയില്‍ ജോലി ചെയ്യുന്നുണ്ട്. എല്ലാ തൊഴിലാളി വിഭാഗത്തിനും അവരുടെ കാര്യങ്ങള്‍ അവതരിപ്പിക്കാനും ആനുകൂല്യങ്ങളില്‍ ഏകീകരണം നേടാനും കേരളത്തില്‍ ക്ഷേമ ബോര്‍ഡുകളുണ്ട്. എന്നാല്‍ കേരളത്തിലെ പതിനാല് ജില്ലകളിലും വ്യാപിച്ച് കിടക്കുന്ന മത്സ്യവിതരണ, അനുബന്ധ തൊഴിലാളികള്‍ക്ക് പ്രത്യേക ക്ഷേമനിധി ബോര്‍ഡ് ഇല്ല. മത്സ്യബന്ധന തൊഴിലാളികളുടെ ക്ഷേമ ബോര്‍ഡായ മത്സ്യതൊഴിലാളി ക്ഷേമനിധി ബോര്‍ഡില്‍ അനുബന്ധ തൊഴിലാളിയായി ചേര്‍ത്താണ് നിലവിലെ ക്ഷേമ നടപടികള്‍. ഈ സാഹചര്യത്തില്‍ കേരളത്തിലെ മത്സ്യ വിതരണ അനുബന്ധ മേഖലയില്‍ ജോലി ചെയ്യുന്ന തൊഴിലാളികള്‍ക്കും അവരെ ആശ്രയിച്ച് കഴിയുന്ന കുടുംബങ്ങള്‍ക്കും കാര്യമായ ആനുകൂല്യങ്ങള്‍ ലഭിക്കാറില്ല. കാലാവര്‍ഷക്കെടുതിയുള്‍പ്പെടെ ദുരന്ത സാഹചര്യങ്ങളിലും ഏറെ പ്രയാസം അനുഭവിക്കുന്നത് ഈ വിഭാഗം തൊഴിലാളികളാണ്. മത്സ്യകമ്മീഷന്‍ ഏജന്റുമാരില്‍നിന്നും മൊത്തക്കച്ചവടക്കാരില്‍നിന്നും തൂക്ക വിഷയത്തിലും മത്സ്യത്തില്‍ മായം കലര്‍ത്തുന്നുവെന്ന പേരിലും ഈ വിഭാഗം തൊഴിലാളികള്‍ ഏറെ പ്രയാസമനുഭവിക്കുകയാണ്.

കേരള സ്റ്റേറ്റ് സ്വതന്ത്ര മത്സ്യ വിതരണ അനുബന്ധ തൊഴിലാളി ഫെഡറേഷന്‍ (എസ്.ടി.യു) കാര്യപ്രസക്തമായ ആവശ്യങ്ങള്‍ നിവേദനമായി നല്‍കിയിട്ടും ഈ മേഖലയിലുള്ളവരെ സര്‍ക്കാര്‍ കണ്ടില്ലെന്ന് നടിക്കുകയാണ്. മത്സ്യത്തില്‍ മായം കലര്‍ത്തുന്നു എന്ന പേരില്‍ ചെറുകിട മത്സ്യവിതരണ തൊഴിലാളികളെ ദ്രോഹിക്കുന്ന സാഹചര്യമുണ്ട്. എന്നാല്‍ അതിര്‍ത്തി ചെക്ക്‌പോസ്റ്റുകളില്‍ പരിശോധന നടത്തുന്ന നടപടികളാണ് സര്‍ക്കാര്‍ കൈക്കൊള്ളേണ്ടത്. ഈ വിഭാഗം തൊഴിലാളികളുടെ മക്കള്‍ക്കും മത്സ്യതൊഴിലാളികളുടെ മക്കള്‍ക്ക് നല്‍കുന്ന വിദ്യാഭ്യാസ സ്‌കോളര്‍ഷിപ്പ് നല്‍കണം. സബ്‌സിഡിയോടെ ഭവന നിര്‍മാണ പദ്ധതി, നിലവില്‍ ജോലി ചെയ്യുന്ന തൊഴിലാളികള്‍ക്ക് ക്ഷേമ ബോര്‍ഡ് മുഖേനയോ കോര്‍പറേഷന്‍/മുനിസിപ്പല്‍/പഞ്ചായത്ത് മുഖേനയോ ലൈസന്‍സ് നല്‍കി അനധികൃത കച്ചവടം നിര്‍ത്തല്‍ ചെയ്ത് തൊഴില്‍ സുരക്ഷ ഉറപ്പാക്കുക, ക്ഷേമ ബോര്‍ഡില്‍ ചേരാന്‍ നിബന്ധനകള്‍ ലഘൂകരിക്കുക, എല്ലാ വിഭാഗം തൊഴിലാളികള്‍ക്കും നല്‍കുന്നത്‌പോലെ റിട്ടയര്‍മെന്റ് ആനുകൂല്യം നല്‍കുക, ക്ഷേമനിധി പെന്‍ഷനോടോപ്പം വാര്‍ധക്യകാല പെന്‍ഷനും അനുവദിക്കുക, നിര്‍ത്തിവെച്ച ‘തണല്‍’ പദ്ധതി പുനസ്ഥാപിക്കുക, ക്ഷേമാനുകൂല്യങ്ങള്‍ കാലോചിതമായി പരിഷ്‌കരിക്കുക, കേരളത്തിലെ ഹാര്‍ബറുകളില്‍ ഭൂരിഭാഗം ഹാര്‍ബറുകളിലും ചെറുകിട മത്സ്യവിതരണ തൊഴിലാളികള്‍ക്ക് ആവശ്യമായ പാര്‍ക്കിംഗ് സൗകര്യങ്ങളൊരുക്കുക എന്നിവയാണ് ഫെഡറേഷന്റെ ആവശ്യം.

(കേരള സ്റ്റേറ്റ് സ്വതന്ത്ര മത്സ്യവിതരണ അനുബന്ധ തൊഴിലാളി ഫെഡറേഷന്‍-എസ്ടിയു- സംസ്ഥാന പ്രസിഡന്റാണ് ലേഖകന്‍).

Continue Reading

Features

സര്‍ദാര്‍ വല്ലഭായ് പട്ടേല്‍; ഇന്ത്യയുടെ ഉരുക്കു മനുഷ്യന്‍

ഗാന്ധിജിയുമായുള്ള കൂടിക്കാഴ്ചയ്ക്ക് ശേഷം അദ്ദേഹം ജോലി ഉപേക്ഷിച്ച് ഇന്ത്യന്‍ നാഷണല്‍ കോണ്‍ഗ്രസില്‍ ചേര്‍ന്നു. ഇന്ത്യന്‍ പതാക ഉയര്‍ത്തുന്നത് നിരോധിക്കുന്ന ബ്രിട്ടീഷ് നിയമത്തിന് വിരുദ്ധമായി 1923ല്‍ നാഗ്പൂരില്‍ സത്യഗ്രഹ സമരത്തിനും സര്‍ദാര്‍ വല്ലഭായി പട്ടേല്‍ നേതൃത്വം നല്‍കി.

Published

on

ഇന്ത്യയുടെ ഏകീകരണത്തിന്റെ പ്രധാന ശില്‍പികളിലൊരാളായ സര്‍ദാര്‍ വല്ലഭായ് പട്ടേലിന്റെ ജന്മദിനമാണ് ഒക്്‌ടോബര്‍ 31. ഇന്ത്യയുടെ ഉരുക്കു മനുഷ്യനെന്ന പേരിലറിയപ്പെടുന്ന അദ്ദേഹത്തിന്റെ ജന്മദിനം രാജ്യം ഏകതാദിനമായി ആചരിക്കുന്നു. ഇന്ത്യയുടെ സ്വാതന്ത്ര്യ സമരത്തിന്റെ ഏറ്റവും പ്രധാനപ്പെട്ട മുഖങ്ങളിലൊരാളായ സര്‍ദാര്‍ വല്ലഭായ് പട്ടേലിന്റെ ദീര്‍ഘവീക്ഷണവും ദര്‍ശനങ്ങളും ഇന്നത്തെ ഇന്ത്യയെ വാര്‍ത്തെടുക്കുന്നതില്‍ വഹിച്ച പങ്ക് പ്രധാനമാണ്. 1875 ഒക്‌ടോബര്‍ 31-ന് ഗുജറാത്തിലെ ആനന്ദ് താലൂക്കില്‍പ്പെട്ട കരംസദ ഗ്രാമത്തിലെ ഒരു കര്‍ഷകകുടുംബത്തിലാണ് അദ്ദേഹം ജനിച്ചത്. പിതാവ് ജാബേര്‍ ഭായ് പട്ടേല്‍. മാതാവ് ലാഡ്ബായി. ആറ് മക്കളില്‍ നാലാമനായിരുന്നു. നദിയാദ്, പെറ്റ്‌ലാദ്, ബോസാദ് എന്നിവിടങ്ങളിലായിട്ടായിരുന്നു വിദ്യാഭ്യാസം.

22 ാമത്തെ വയസ്സില്‍ മെട്രിക്കുലേഷന്‍ പൂര്‍ത്തിയാക്കി. ഒരു ബാരിസ്റ്ററാവണം എന്നതായിരുന്നു ആഗ്രഹം. കഠിനാധ്വാനം കൊണ്ട് പട്ടേല്‍ രണ്ടു വര്‍ഷം കൊണ്ട് ബാരിസ്റ്റര്‍ ബിരുദം കരസ്ഥമാക്കി. ഗോധ്ര, ബോസാദ്, ആനന്ദ് എന്നിവിടങ്ങളില്‍ അഭിഭാഷകവൃത്തി ചെയ്തു. 36-ാമത്തെ വയസ്സില്‍ പട്ടേല്‍, ലണ്ടനിലെ മിഡ്ഡില്‍ ടെംപിള്‍ ഇന്നില്‍ ഉന്നത വിദ്യാഭ്യാസത്തിനായി ചേര്‍ന്നു.

ഗാന്ധിയുടെ സ്വരാജ് എന്ന ആശയത്തിനു പിന്തുണ നല്‍കിക്കൊണ്ടാണ് അദ്ദേഹം രാഷ്ട്രീയത്തിലേക്കിറങ്ങുന്നത്. 1917ലെ മഹാത്മാ ഗാന്ധിയുമായുള്ള കൂടിക്കാഴ്ചയാണ് സര്‍ദാര്‍ വല്ലഭായി പട്ടേലിന്റെ ജീവിതം മാറ്റി മറിച്ചത്. ഗാന്ധിജിയുമായുള്ള കൂടിക്കാഴ്ചയ്ക്ക് ശേഷം അദ്ദേഹം ജോലി ഉപേക്ഷിച്ച് ഇന്ത്യന്‍ നാഷണല്‍ കോണ്‍ഗ്രസില്‍ ചേര്‍ന്നു. ഇന്ത്യന്‍ പതാക ഉയര്‍ത്തുന്നത് നിരോധിക്കുന്ന ബ്രിട്ടീഷ് നിയമത്തിന് വിരുദ്ധമായി 1923ല്‍ നാഗ്പൂരില്‍ സത്യഗ്രഹ സമരത്തിനും സര്‍ദാര്‍ വല്ലഭായി പട്ടേല്‍ നേതൃത്വം നല്‍കി. 1931ലെ കറാച്ചി സമ്മേളനത്തില്‍ സര്‍ദാര്‍, കോണ്‍ഗ്രസിന്റെ പ്രസിഡന്റായി.

വട്ടമേശ സമ്മേളനത്തിന്റെ പരാജയത്തെത്തുടര്‍ന്ന് ഗാന്ധിജിയും പട്ടേലും ജയിലിലായി. സ്വാതന്ത്ര്യാനന്തരം ഇന്ത്യയുടെ ആദ്യത്തെ ആഭ്യന്തരമന്ത്രിയും ഉപപ്രധാനമന്ത്രിയും ആയിരുന്ന പട്ടേല്‍ പഞ്ചാബിലെയും ദില്ലിയിലെയും അഭയാര്‍ത്ഥികള്‍ക്ക് അവശ്യസാധനങ്ങള്‍ സംഘടിപ്പിച്ചു. രാജ്യത്താകമാനം സമാധാനം പുന:സ്ഥാപിക്കുവാന്‍ പരിശ്രമിച്ചു. ബ്രിട്ടീഷ് ഭരണത്തില്‍ നിന്ന് ഇന്ത്യയ്ക്ക് സ്വാതന്ത്ര്യം ലഭിക്കുന്നതിന് മുമ്പും പിമ്പുമായി 500 ലധികം നാട്ടുരാജ്യങ്ങളെ ഇന്ത്യയിലേക്ക് സംയോജിപ്പിക്കുന്നതിന് നേതൃത്വം നല്‍കിയ വ്യക്തി കൂടിയായിരുന്നു അദ്ദേഹം. ഇതിനായി മലയാളിയായ വിപി മേനോന്‍ അദ്ദേഹത്തിന്റെ കൂടെ നിന്നു.

 

Continue Reading

columns

ജനാധിപത്യ ഇന്ത്യയെ തിരിച്ചുപിടിക്കേണ്ടതാര്?

കൂട്ടായ മുന്നേറ്റത്തിലൂടെ പൊതുശത്രുവിനെ തുരത്താന്‍ നിശ്പ്രയാസം കഴിയും. നിലവില്‍ 12 സംസ്ഥാനങ്ങള്‍ ബി.ജെ.പി തനിച്ചാണ് ഭരിക്കുന്നത്. അഞ്ചിടത്തും ഒരു കേന്ദ്രഭരണ പ്രദേശത്തും ബി.ജെ.പി മുന്നണിയായും ഭരണത്തിലുണ്ട്. കോണ്‍ഗ്രസ് മുന്നണി അഞ്ചും മറ്റുള്ളവര്‍ എട്ടും എന്ന രീതിയിലാണ് ബി.ജെ.പി ഇതരുടെ ശബ്ദം. ഈ എട്ട് സംസ്ഥാനം ഭരിക്കുന്ന പലരും പ്രത്യക്ഷമായും പരോക്ഷമായും ബി.ജെ.പിയെ പലപ്പോഴായി സഹായിക്കുന്നവരുമാണ്.

Published

on

ടി.കെ സഫീറുല്‍ അക്ബര്‍

നോവേറ്റു പിടയുന്ന ഇന്ത്യയെയാണ് കഴിഞ്ഞ ഏതാനും വര്‍ഷങ്ങളായി നമ്മള്‍ കണ്ടുകൊണ്ടിരിക്കുന്നത്. ലോകത്തിലെ ഏറ്റവും വലിയ ജനാധിപത്യ രാജ്യമെന്ന് മേന്മ പറയുന്ന ഇന്ത്യ ഇന്ന് പണമിറക്കി ജനപ്രതിനിധികളെ ചാക്കിട്ടുപിടിക്കുന്ന ബി.ജെ.പിയുടെ രാഷ്ട്രീയ നെറികേടിന്റെ കേന്ദ്രമായി മാറിയിരിക്കുന്നു. സംഘപരിവാര്‍ സംഘടനകള്‍ എല്ലാ മേഖലകളും കയ്യടിക്കഴിഞ്ഞു. രാഷ്ട്രീയ, സാമ്പത്തിക സംവിധാനങ്ങള്‍ ദുരുപയോഗം ചെയ്ത് അവര്‍ മുന്നേറുകയാണ്. ഇവിടെയാണ് പ്രതിപക്ഷ കക്ഷികളുടെ ഐക്യമെന്ന വലിയ മുദ്രാവാക്യത്തിന്റെ പ്രസക്തി. ഓരോ പ്രാദേശിക രാഷ്ട്രീയ കക്ഷികളും തനിച്ചു പോരാടാന്‍ നിന്നാല്‍ ബി.ജെ.പിയെ അധികാരത്തില്‍ നിന്ന് മാറ്റിനിര്‍ത്താന്‍ ആര്‍ക്കും സാധിക്കില്ല. കഴിഞ്ഞ രണ്ട് പാര്‍ലമെന്റ് തിരഞ്ഞെടുപ്പും നല്‍കുന്ന പാഠം മറ്റൊന്നല്ല.

കൂട്ടായ മുന്നേറ്റത്തിലൂടെ പൊതുശത്രുവിനെ തുരത്താന്‍ നിശ്പ്രയാസം കഴിയും. നിലവില്‍ 12 സംസ്ഥാനങ്ങള്‍ ബി.ജെ.പി തനിച്ചാണ് ഭരിക്കുന്നത്. അഞ്ചിടത്തും ഒരു കേന്ദ്രഭരണ പ്രദേശത്തും ബി.ജെ.പി മുന്നണിയായും ഭരണത്തിലുണ്ട്. കോണ്‍ഗ്രസ് മുന്നണി അഞ്ചും മറ്റുള്ളവര്‍ എട്ടും എന്ന രീതിയിലാണ് ബി.ജെ.പി ഇതരുടെ ശബ്ദം. ഈ എട്ട് സംസ്ഥാനം ഭരിക്കുന്ന പലരും പ്രത്യക്ഷമായും പരോക്ഷമായും ബി.ജെ.പിയെ പലപ്പോഴായി സഹായിക്കുന്നവരുമാണ്. രാഷ്ട്രപതി, ഉപരാഷ്ട്രപതി തിരഞ്ഞെടുപ്പില്‍ ഇവരുടെ തനിരൂപം കാണാന്‍ കഴിഞ്ഞിട്ടുമുണ്ട്. ജനങ്ങളുടെ പ്രശ്‌നങ്ങളോ ജനാധിപത്യത്തിന്റെ നിലനില്‍പ്പോ ഇത്തരം കക്ഷികള്‍ക്ക് പലപ്പോഴും വിഷയമല്ല. വ്യക്തിപരമായ താല്‍പര്യങ്ങളും അധികാരമോഹവുമാണ് പലരുടെയും മുഖ്യഅജണ്ട. പല കക്ഷികളും അവകാശവാദങ്ങള്‍ ഉയര്‍ത്തുന്നുണ്ടെങ്കിലും അത്തരം പാര്‍ട്ടികള്‍ക്കൊന്നും ബി.ജെ.പിയെ ഒറ്റക്ക് പ്രതിരോധിക്കാന്‍ കഴിയില്ല എന്നതാണ് യാഥാര്‍ഥ്യം.

ഇവിടെയാണ് ഇന്ത്യന്‍ നാഷണല്‍ കോണ്‍ഗ്രസ് എന്ന മഹത്തായ പാര്‍ട്ടിയുടെ പ്രസക്തി. ഇന്ത്യയിലെ എല്ലാ സംസ്ഥാനങ്ങളിലും വേരോട്ടവും സംഘടനാ സംവിധാനവും പ്രതിപക്ഷ നിരയില്‍ ഇന്നുള്ളത് കോണ്‍ഗ്രസ് പാര്‍ട്ടിക്കാണ്. ഓരോ സംസ്ഥാനത്തും ശരാശരി 23 അസംബ്ലി സീറ്റുകള്‍ ഇപ്പോഴും കോണ്‍ഗ്രസിനുണ്ട്. അതുകൊണ്ടു തന്നെ ഇന്നത്തെ സാഹചര്യത്തില്‍ കോണ്‍ഗ്രസ് പാര്‍ട്ടിയെ മാറ്റിനിര്‍ത്തി ഒരു പ്രതിപക്ഷ ഐക്യം സാധ്യമല്ല.

ഇന്നത്തെ രാഷ്ട്രീയ സാഹചര്യത്തില്‍ ഇടതുപക്ഷ പ്രസ്ഥാനങ്ങളില്‍ പ്രധാനികളായ സി.പി.എം അടക്കം മാറ്റിചിന്തിച്ചുകൊണ്ടിരിക്കയാണ്. ബിഹാറും മഹാരാഷ്ട്രയും രാജസ്ഥാനും തെലങ്കാനയും അടക്കം തങ്ങള്‍ക്ക് സംഘടനാ സംവിധാനമുള്ളയിടങ്ങളില്‍ നിന്നൊക്കെ ഏതെങ്കിലും മുന്നണിയുടെ ഭാഗമായി പാര്‍ലമെന്റിലേക്ക് ജയിച്ച് കയറാനുള്ള പുറപ്പാടിലാണ് അവര്‍. 40ല്‍പരം എം.പി മാര്‍ ലോകസഭയിലും മൂന്ന് സംസ്ഥാനങ്ങളില്‍ ശക്തമായ സംഘടനാ സംവിധാനവും ഭരണവും കയ്യാളിയ പാര്‍ട്ടിക്ക് ഇന്ന് കേവലം മൂന്ന് പേരാണ് ലോകസഭയില്‍ ഉള്ളത് എന്ന യാഥാര്‍ഥ്യം കേരളത്തിലെ സി.പി.എമ്മുകാര്‍ മനസ്സിലാക്കുന്നില്ല. ആകെ പിടിച്ചുനില്‍ക്കുന്നത് കേരളത്തിലെ ഭരണത്തണലില്‍ മാത്രമാണ്.

മുന്നണി സംവിധാനങ്ങള്‍കൊണ്ട് ആര്‍ക്കും ഒരു കോട്ടവും ഇതുവരെ ഉണ്ടായിട്ടില്ല. സി.പി.എമ്മിനടക്കം നല്ലൊരു ലോകസഭാ പ്രാതിനിത്യം ഉണ്ടാക്കിയെടുക്കാന്‍ മുന്നണി സംവിധാനത്തിലൂടെ സാധിക്കുന്നതുമാണ്. ഇന്ത്യയുടെ നാഡീഞരമ്പുകള്‍ തൊട്ടറിയാന്‍ കോണ്‍ഗ്രസിനാവും. അതിന് ഉദാഹരണമാണ് രാഹുല്‍ ഗാന്ധി നയിക്കുന്ന ഭാരത് ജോഡോ യാത്ര. കാലിക പ്രസക്തമായ മുദ്രാവാക്യങ്ങള്‍ ഉയര്‍ത്തി ഇന്ത്യയെ വീണ്ടെടുക്കാന്‍ വേണ്ടിയുള്ള ഇത്തരത്തിലുള്ള യാത്രയെ പിന്തുണക്കേണ്ടത് അനിവാര്യമാണ്.

കഴിഞ്ഞ ജൂണ്‍ മാസത്തില്‍ മുസ്‌ലിം ലീഗ് സംസ്ഥാന പ്രസിഡന്റ് സയ്യിദ് സാദിഖലി ശിഹാബ് തങ്ങള്‍ കേരളത്തില്‍ നടത്തിയ യാത്രയും ഏറെ ചര്‍ച്ച ചെയ്യപ്പെട്ടതാണ്. ഇത്തരത്തിലുള്ള യാത്രകളും സംഗമങ്ങളും ചര്‍ച്ചാവേദികളും നടക്കുന്നത് മതേതര ജനാധിപത്യ പാര്‍ട്ടികള്‍ക്ക് മുതല്‍കൂട്ടാവും. തല്‍പ്പരകക്ഷികളായ മറ്റു പാര്‍ട്ടികളും അവര്‍ക്ക് ആവുന്ന മേഖലകളിലൊക്കെ ഇത്തരം യാത്രകളും സംഗമങ്ങളും സാംസ്‌കാരിക ഇടപെടലുകളും നടത്തിയാല്‍ പ്രതിപക്ഷനിരയെ ശക്തിപ്പെടുത്താന്‍ കൂടി അതുപകരിക്കും. ബി.ജെ.പി മുന്നണിക്ക് പുറത്തുള്ള ജനാധിപത്യ കക്ഷികളെ സംബന്ധിച്ചേടത്തോളം ഇത്തരത്തിലുള്ള യാത്രകള്‍ വലിയ പ്രചോദനമാണ്. അസ്തമിക്കുന്ന ജനാധിപത്യത്തെ തിരിച്ചുപിടിക്കാന്‍ മതേതര ഇന്ത്യയിലെ സെക്കുലര്‍ പാര്‍ട്ടികളുടെ പങ്ക് അനിവാര്യമാണ്.

2024ലെ പാര്‍ലമെന്റ് തിരഞ്ഞെടുപ്പ് ജനാധിപത്യ കക്ഷികള്‍ ഒന്നിച്ചുനിന്നാല്‍ ഒരിക്കലും ഒരു ബാലികേറാമലയല്ല. ഇന്ന് ഇന്ത്യയിലെ മുന്നണി സംവിധാനങ്ങളില്‍ കോണ്‍ഗ്രസ് നയിക്കുന്ന യു.പി.എ മുന്നണിയാണ് മുന്നിട്ട് നില്‍ക്കുന്നത്. പ്രബലരായ ഡി.എം.കെ, ആര്‍.ജെ.ഡി, ജെ.ഡി.യു, ശിവസേന, എന്‍.സി.പി, ജെ.എം.എം, ഇന്ത്യന്‍ യൂണിയന്‍ മുസ്‌ലിം ലീഗ്, ജമ്മു കാശ്മീര്‍ നാഷണല്‍ കോണ്‍ഫറന്‍സ്, വി.സി.കെ, ആര്‍.എസ്.പി തുടങ്ങിയവര്‍ ഇതിലംഗമാണ്. മുന്നണിക്ക് പുറത്തുള്ള സി.പി.എം, സി.പി.ഐ, തൃണമൂല്‍ കോണ്‍ഗ്രസ്, എസ്.പി, എ.ഐ.യു.ഡി.എഫ്, ബി.എസ്.പി, ടി.ആര്‍.എസ്, ടി.ഡി.പി, ജെ.ഡി.എസ് തുടങ്ങിയ പാര്‍ട്ടികളും കൂടെ നിന്നാല്‍ ബി.ജെ.പിയെ ശക്തമായി പ്രതിരോധിക്കാനാവും. എന്നാല്‍ ഇതില്‍ ചിലരുടെ ചുവട് എങ്ങനെയാവും എന്ന് പറയാന്‍ കഴിയില്ല. ബി.ജെ.പി മുന്നണി നോക്കിയാല്‍ പ്രബലരായി ശിവസേന (വിമതര്‍) ആണ് നിലവിലുള്ളത്. കൂടെ വടക്കു കിഴക്കന്‍ സംസ്ഥാനങ്ങളിലെ ചെറുകക്ഷികളും. നല്ലൊരു ഇന്ത്യക്കായി, നല്ലൊരു മാറ്റത്തിനായി മതേതര പ്രതിപക്ഷ പാര്‍ട്ടികളുടെ കൂട്ടായ്മ വരട്ടെ. ഇന്ത്യയുടെ ആത്മാവിനെ പുനരുജ്ജീവിപ്പിക്കാന്‍, തകര്‍ന്ന പൈതൃകവും സംസ്‌കാരവും ബഹുസ്വരതയും തിരിച്ചുകൊണ്ടുവരാന്‍, നല്ലൊരു നാളെ പുലരുക തന്നെ ചെയ്യും. അതിനാവട്ടെ നമ്മുടെ പരിശ്രമം.

Continue Reading

Trending