മാഡ്രിഡ്: സ്വന്തം മൈതാനത്ത് റയല്‍ മാഡ്രിഡിന് നാണക്കേട്. ലാലീഗയില്‍ തളര്‍ന്നു, തകര്‍ന്നു നില്‍ക്കുന്ന ടീമിനെ മാനം കെടുത്തിയത് വില്ലാ റയല്‍. ടേബിളില്‍ നാലാം സ്ഥാനത്ത് നില്‍ക്കുന്ന ചാമ്പ്യന്മാരുടെ വലയില്‍ മല്‍സരത്തിന്റെ അവസാനത്തില്‍ പന്തെത്തിച്ചാണ് ബെര്‍ണബുവിലെ ആദ്യ ജയം വില്ലാ റയല്‍ സ്വന്തമാക്കിയത്. മഴ പെയ്ത വൈകുന്നേരത്ത് പതിവ് പോലെ റയലിന്റെ സൂപ്പര്‍ താരങ്ങള്‍ മല്‍സരിച്ച് അവസരങ്ങള്‍ പാഴാക്കി. കൃസ്റ്റിയാനോ റൊണാള്‍ഡോ മാത്രം പാഴാക്കിയത് പതിമൂന്ന് അവസരങ്ങള്‍.
മല്‍സരമവസാനിക്കാന്‍ മൂന്ന് മിനുട്ട് മാത്രം ബാക്കി നില്‍ക്കെ നടത്തിയ പ്രത്യാക്രമണത്തിലാണ് വില്ലക്കാര്‍ സ്‌ക്കോര്‍ ചെയ്തത്. ഡിഫന്‍ഡര്‍ ഹെഡ്ഡറിലുടെ നല്‍കിയ പാസുമായി കുതിച്ചു കയറിയ ഉനാലിന്റെ ഷോട്ട് ഗോള്‍ക്കീപ്പര്‍ കൈലര്‍ നവാസ് മനോഹരമായി സേവ് ചെയ്തിരുന്നു. പക്ഷേ പന്ത് ലഭിച്ചത് ഫോര്‍നാലസിന്. അദ്ദേഹത്തിന്റെ ഷോട്ട് വലയില്‍ കയറുമ്പോള്‍ റയല്‍ ഡിഫന്‍ഡര്‍മാര്‍ എത്രയോ പിറകിലായിരുന്നു. തോല്‍വിയോടെ റയലിന്റെ നില വീണ്ടും പരുങ്ങലിലായി.