കൊച്ചി: 39ാമത് സംസ്ഥാന സബ്ജൂനിയര്‍ ഫുട്‌ബോള്‍ ചാമ്പ്യന്‍ഷിപ്പ് കിരീടം കോഴിക്കോടിന്. ഫോര്‍ട്ട്‌കൊച്ചി വെളി ഗ്രൗണ്ടില്‍ നടന്ന കലാശകളിയില്‍ തിരുവനന്തപുരത്തെ പെനാല്‍റ്റി ഷൂട്ടൗട്ടില്‍ (65) തോല്‍പ്പിച്ചാണ് കോഴിക്കോട് കിരീടമുയര്‍ത്തിയത്. നിശ്ചിത സമയത്ത് ഇരുടീമുകളും ഓരോ ഗോള്‍ വീതം നേടി ഒപ്പത്തിനൊപ്പം നിന്നു.
കളിയുടെ ഒമ്പതാം മിനുറ്റില്‍ എബിന്‍ ദാസിലൂടെ തിരുവനന്തപുരമാണ് ലീഡ് നേടിയത്. എന്നാല്‍ അവസാന മിനുറ്റില്‍ റഹാഫ് അല്‍ അബീസിലൂടെ ഗോള്‍ മടക്കി കോഴിക്കോട് മത്സരം സമനിലയിലാക്കി. റഹാഫിന് പുറമെ രെഹാന്‍ രാജീവ്, ദേവാംഗ്.പി, അന്‍സാഫ് പി.പി, സന്ദീപ്.കെ എന്നിവര്‍ പെനാല്‍റ്റി ഷൂട്ടൗട്ടില്‍ ലക്ഷ്യം കണ്ടതോടെ ചാമ്പ്യന്‍ഷിപ്പ് കോഴിക്കോട് നേടി. രാവിലെ നടന്ന ലൂസേഴ്‌സ് ഫൈനലില്‍ എറണാകുളത്തെ എതിരില്ലാത്ത മൂന്നു ഗോളുകള്‍ക്ക് തോല്‍പ്പിച്ച് കാസര്‍ഗോഡ് മൂന്നാം സ്ഥാനക്കാരായി. മുഹമ്മദ്, അമോഗ് ചിത്ത്, ആദില്‍.പി എന്നിവര്‍ വിജയികള്‍ക്കായി എതിര്‍വല കുലുക്കി.