പ്രതിപക്ഷനേതാവ് രാഹുൽ ഗാന്ധിക്കും പ്രിയങ്ക ഗാന്ധി എംപിക്കും സംഭലിലേക്ക് പോകാൻ അനുമതി നിഷേധിച്ച് പൊലീസ്. യുപി ഡൽഹി അതിർത്തിയിലെത്തിയ രാഹുലിനെയും പ്രിയങ്കയെയും പൊലീസ് തടയുകയും നീണ്ട നേരം ചർച്ചകൾ നടത്തുകയും ചെയ്തു. എല്ലാം ഫലം കാണാതെ വന്നപ്പോൾ ഡൽഹിയിലേക്ക് മടങ്ങിപ്പോകാൻ രാഹുലും പ്രിയങ്കയും തീരുമാനിച്ചു.

ഒറ്റയ്ക്ക് പോകാമെന്ന് അറിയിച്ചിട്ടും അനുമതി രാഹുലിന് പ്രിയങ്കയ്ക്കും പൊലീസ് അനുമതി നൽകിയില്ല. പൊലീസ് നടപടി തെറ്റെന്ന് വിമർശിച്ച രാഹുലും പ്രിയങ്കയും ഭരണഘടന ഉയർത്തിപ്പിടിച്ച ശേഷമാണ് മടങ്ങാൻ തീരുമാനിച്ചത്.

സംഭലിലേക്ക് പോകാനും കൊല്ലപ്പെട്ടവരുടെ കുടുംബത്തെ ആശ്വസിപ്പിക്കാനും ആഗ്രഹിച്ചു എന്നാണ് രാഹുൽ ഗാന്ധി ഭരണഘടന ഉയർത്തി ഗാസിപ്പൂരിൽ പറഞ്ഞത്.

ന്യൂഡല്‍ഹി: വനിതാ ജഡ്ജിമാരെ പിരിച്ചുവിടുകയും അവരെ തിരിച്ചെടുക്കാന്‍ വിസമ്മതിക്കുകയും ചെയ്ത കേസില്‍ മധ്യപ്രദേശ് ഹൈക്കോടതിക്ക് സുപ്രിംകോടതിയുടെ രൂക്ഷവിമര്‍ശനം. ജഡ്ജിമാരുടെ ശാരീരികവും മാനസികവുമായ അവസ്ഥ മനസ്സിലാക്കാതെ ജോലിയില്‍ അവരുടെ കഴിവ് നിശ്ചയിക്കാനാവില്ലെന്ന് കോടതി. ജസ്റ്റിസുമാരായ ബി.വി നാഗരത്‌ന, എന്‍ കോട്ടീശ്വര്‍ സിങ് എന്നിവരടങ്ങിയ ബെഞ്ചാണ് കേസ് പരിഗണിച്ചത്.

2013ലാണ് ജൂണിലാണ് പ്രൊബേഷന്‍ സമയത്തെ പ്രകടനം മോശമെന്ന് വിലയിരുത്തി ആറ് വനിതാ ജഡ്ജിമാരെയാണ് മധ്യപ്രദേശ് സര്‍ക്കാര്‍ പിരിച്ചുവിട്ടിരുന്നത്. കഴിഞ്ഞ ജനുവരി മുതല്‍ കോടതിയുടെ പരിഗണനയിലുള്ള കേസായിരുന്നിത്. ജഡ്ജിമാരെ പിരിച്ചുവിട്ട നടപടി പുനഃപരിശോധിക്കണമെന്ന് ഹൈക്കോടതിയോട് സുപ്രിംകോടതി ഉത്തരവിട്ടിരുന്നു. എന്നാല്‍ ഇതുവരെയും ഇതില്‍ തീര്‍പ്പാക്കാന്‍ ഹൈക്കോടതിക്കായില്ലെന്ന് ചൂണ്ടിക്കാട്ടിയാണ് സുപ്രിംകോടതി രൂക്ഷവിമര്‍ശനമുന്നയിച്ചത്

സര്‍ക്കാര്‍ നടപടി പുനഃപരിശോധിക്കാന്‍ രണ്ട് തവണ ഹൈക്കോടതിക്ക് സുപ്രിംകോടതി നിര്‍ദേശം നല്‍കിയിരുന്നു. ‘പിരിച്ചു വിടുകയാണെന്ന് പറഞ്ഞ് വീട്ടിലയയ്ക്കാന്‍ എളുപ്പമാണ്. ഈ കേസിന്റെ കാര്യം തന്നെ നോക്കൂ, നമ്മളിത് എത്രനാളായി പരിഗണിക്കുകയാണ്. നാം ജോലിയില്‍ പിറകിലാണെന്ന് പറയാനാകുമോ? ശാരീരികവും മാനസികവുമായൊക്കെ ആളുകള്‍ ബുദ്ധിമുട്ടുമ്പോള്‍ അവര്‍ ജോലിയില്‍ പിന്നിലാണ് എന്ന് പറഞ്ഞ് പറഞ്ഞ് വിടുകയല്ല വേണ്ടത്, പ്രത്യേകിച്ച് സ്ത്രീകളെ. ഇതേ മാനദണ്ഡം തന്നെ പുരുഷന്മാര്‍ക്കും ബാധകമാക്കി നോക്കൂ. എന്താ സംഭവിക്കുന്നതെന്ന് കാണാം’.എന്നായിരുന്നു ജസ്റ്റിസ് നാഗരത്ന  അഭിപ്രായപ്പെട്ടത്. കേസ് വീണ്ടും പരിഗണിക്കുന്നതിനായി ഡിസംബര്‍ പന്ത്രണ്ടിലേയ്ക്ക് മാറ്റി.

ബറേലി: അറിയാത്ത വഴിയില്‍ ഗൂഗിള്‍ മാപ്പ് കാണിച്ചുകൊടുത്ത ‘എളുപ്പവഴി’യിലൂടെ സഞ്ചരിച്ച കാറും യാത്രക്കാരുടെ സംഘവും കനാലില്‍ വീണു. കനാലില്‍ വെള്ളമില്ലാതിരുന്നതിനാല്‍ അപകടം ഒഴിവായെങ്കിലും കാറിലുണ്ടായിരുന്ന മൂന്ന് പേര്‍ക്കും ചെറിയ പരിക്ക്പറ്റി. ഉത്തര്‍പ്രദേശിലെ ബറൈലിയിലാണ് അപകടം.

ബറൈലിയില്‍ നിന്ന് പിലിഭിത്തിലേക്ക് ഗൂഗിള്‍ മാപ്പിന്റെ സഹായത്താല്‍ പോവുകയായിരുന്നു കാര്‍ യാത്രക്കാര്‍. ഇടയ്ക്ക് കലാപൂര്‍ ഗ്രാമത്തില്‍ നിന്ന് ഗൂഗില്‍ മാപ്പില്‍ ഒരു ഷോട്ട് കട്ട് ഓപ്ഷന്‍ കിട്ടി. മറ്റൊന്നും ആലോചിക്കാതെ ഈ വഴി തെരഞ്ഞെടുത്ത് മുന്നോട്ട് നീങ്ങിയതാണ് ഒടുവില്‍ കനാലില്‍ വീഴുന്നതില്‍ കലാശിച്ചതെന്ന് പൊലീസ് ഉദ്യോഗസ്ഥര്‍ പറഞ്ഞു.

കാര്‍ അപകടത്തില്‍ പെടുന്നത് നാട്ടുകാര്‍ കണ്ടിരുന്നു. നാട്ടുകാര്‍ അറിയിച്ചതനുസരിച്ച് പൊലീസ് സ്ഥലത്തെത്തി. കാറിലുണ്ടായിരുന്ന മൂന്ന് പേരെയും ആശുപത്രിയിലെത്തിച്ചു. ട്രാക്ടറില്‍ കെട്ടിവലിച്ചാണ് കാര്‍ കനാലില്‍ നിന്ന് പുറത്തെടുത്തത്.അറിയാത്ത വഴിയിലൂടെ ഗൂഗിള്‍ മാപ്പിനെ മാത്രം വിശ്വാസത്തിലെടുത്ത് യാത്ര ചെയ്തവരാണ് അപകടത്തില്‍ പെട്ടതെന്ന് പൊലീസ് സൂപ്രണ്ട് മനുഷ് പരിക് പറഞ്ഞു. ഹരിയാന രജിസ്‌ട്രേഷനിലുള്ള കാറായിരുന്നു. .