വെള്ളറടയില്‍ യാത്രയ്ക്കിടയില്‍ കെ.എസ്.ആര്‍.ടി.സി ബസിനുള്ളില്‍ ഛര്‍ദിച്ച പെണ്‍കുട്ടിയേയും സഹോദരിയേയും തടഞ്ഞ് വെച്ച് ബസിനുള്‍വശം കഴുകിച്ച സംഭവത്തില്‍ താത്കാലിക ഡ്രൈവറെ ജോലിയില്‍നിന്ന് നീക്കി. നെയ്യാറ്റിന്‍കര ഡിപ്പോയിലെ ആര്‍എന്‍സി 105 ാം നമ്പര്‍ ചെമ്പൂര് വെള്ളറട ബസ്സിലെ ഡ്രൈവര്‍ എസ്.എന്‍.ഷിജിയെയാണ് പരാതിയെ തുടര്‍ന്ന് ജോലിയില്‍ നിന്ന് നീക്കിയത്. വ്യാഴാഴ്ച വൈകീട്ട് മൂന്ന് മണിയോടെ വെള്ളറട കെ.എസ്. ആര്‍.ടി.സി ഡിപ്പോയില്‍ ആണ് സംഭവം.
വര്‍ഷങ്ങളായി കെ.എസ്. ആര്‍.ടി.സിയില്‍ ഡ്രൈവറായി ജോലി നോക്കുന്ന വ്യക്തിയുടെ മകള്‍ക്കാണ് ദുരനുഭവമുണ്ടായത്. യാത്രക്കിടെ പെണ്‍കുട്ടി ബസിനുള്ളില്‍ ഛര്‍ദിച്ചതോടെയാണ് വണ്ടി കഴുകിയിട്ട് പോയാല്‍ മതിയെന്ന് ഡ്രൈവര്‍ നിര്‍ബന്ധം പിടിച്ചത്. സഹോദരിക്കൊപ്പം ആശുപത്രിയില്‍ പോയി മടങ്ങുകയായിരുന്ന നേഴ്‌സിംഗ് വിദ്യാര്‍ത്ഥിനിയായ പെണ്‍കുട്ടി ബസ്സിനുള്ളില്‍ ഛര്‍ദ്ദിക്കുകയായിരുന്നു. ബസ് വെള്ളറട ഡിപ്പോയിലെത്തി ഇറങ്ങാന്‍ തുടങ്ങുകയാണ് വണ്ടി കഴുകിയിട്ട് പോയാല്‍ മതിയെന്ന് ഡ്രൈവര്‍ പെണ്‍കുട്ടികളോട് പറഞ്ഞത്.
തുടര്‍ന്ന് അവശനിലയില്‍ ആയിരുന്ന പെണ്‍കുട്ടിയും സഹോദരിയും ഡിപ്പോയിലെ വാഷ് ബേസിനില്‍ നിന്ന് കപ്പില്‍ വെള്ളം എടുത്ത് ബസ്സ് വൃത്തിയാക്കി. ഇതിന് ശേഷം ആണ് ഇവരെ ഡ്രൈവര്‍ പോകാന്‍ സമ്മതിച്ചത് എന്നാണ് പരാതി. ബസ് വൃത്തിയാക്കാന്‍ ഡിആര്‍എല്‍ സ്റ്റാഫ് ഉള്ളപ്പോഴാണു പെണ്‍കുട്ടികളെ കൊണ്ട് ഡ്രൈവര്‍ ബസ്സ് കഴുകിപ്പിച്ചത്. പെണ്‍കുട്ടികള്‍ പിതാവിനോട് കാര്യം പറഞ്ഞതോടെ ഇവര്‍ പരാതി നല്‍കുകയായിരുന്നു. തുടര്‍ന്നാണ് െ്രെഡവറെ ജോലിയില്‍ നിന്ന് നീക്കിയത്.