മുൻ യുഎസ് വൈസ് പ്രസിഡന്റ് ഡിക് ചെനി അന്തരിച്ചു

വാഷിങ്ടൺ: അമേരിക്കയുടെ മുൻ വൈസ് പ്രസിഡന്റ് ഡിക് ചെനി (84) അന്തരിച്ചു. ന്യൂമോണിയയും ഹൃദയാഘാതവുമാണ് മരണകാരണമെന്ന് കുടുംബം പ്രസ്താവനയിൽ അറിയിച്ചു. 2001 മുതൽ 2009 വരെ ജോർജ് ഡബ്ല്യു. ബുഷിന്റെ ഭരണകാലത്ത് വൈസ് പ്രസിഡന്റായിരുന്ന ചെനി, യുഎസിന്റെ ഏറ്റവും ശക്തമായ വൈസ് പ്രസിഡന്റുകളിലൊരാളായി വിലയിരുത്തപ്പെടുന്ന വ്യക്തിയായിരുന്നു.

2003-ലെ ഇറാഖ് അധിനിവേശത്തിന്റെ പ്രധാന സൂത്രധാരൻ ആയിരുന്നു ഡിക് ചെനി. ഇറാഖിൽ കൂട്ടനശീകരണ ആയുധങ്ങൾ ഉണ്ടെന്ന ആരോപണത്തിന് പിന്നിൽ പ്രധാനമായി പ്രവർത്തിച്ചയാളും ചെനിയാണ്. എന്നാൽ പിന്നീട് അത്തരമൊരു ആയുധവും കണ്ടെത്താനായില്ല. ഇതോടെ അദ്ദേഹത്തിന്റെ വാദം തള്ളിക്കളയപ്പെട്ടെങ്കിലും, അധിനിവേശം ശരിയായ തീരുമാനമായിരുന്നു എന്ന് ചെനി തുടർച്ചയായി ഉറപ്പിച്ചു പറഞ്ഞിരുന്നു.

ഗൾഫ് യുദ്ധകാലത്ത് പ്രതിരോധ സെക്രട്ടറിയായും ജോർജ് ബുഷ് (സീനിയർ) സർക്കാരിൽ പ്രവർത്തിച്ച ചെനി, കുവൈത്തിൽ നിന്ന് ഇറാഖ് സൈന്യത്തെ പുറത്താക്കാനുള്ള യുഎസ് സൈനിക നീക്കങ്ങൾ ആസൂത്രണം ചെയ്തതിൽ പ്രധാന പങ്കുവഹിച്ചു.

ചെനിയുടെ മകൾ ലിസ് ചെനി റിപ്പബ്ലിക്കൻ പാർട്ടിയിലെ പ്രമുഖ നിയമനിർമ്മാണ സഭാംഗമായിരുന്നു. റിപ്പബ്ലിക്കൻ ആണെങ്കിലും, ഡൊണാൾഡ് ട്രംപിനെതിരെ തുറന്ന വിമർശനം നടത്തിയ കുറച്ച് നേതാക്കളിൽ ഒരാളായിരുന്നു ഡിക് ചെനി.

2024ലെ യുഎസ് പ്രസിഡന്റ്ഷിപ് തിരഞ്ഞെടുപ്പിൽ അദ്ദേഹം ഡെമോക്രാറ്റിക് സ്ഥാനാർത്ഥിയായ കമലാ ഹാരിസിന് വോട്ട് ചെയ്യുമെന്ന് പ്രഖ്യാപിച്ചിരുന്നു.

“യുഎസിന്റെ 248 വർഷത്തെ ചരിത്രത്തിൽ ട്രംപിനേക്കാൾ ഭീഷണിയായ വ്യക്തിയെ രാജ്യം കണ്ടിട്ടില്ല,”എന്നായിരുന്നു ചെനിയുടെ പ്രസ്താവന.

റിച്ചാർഡ് ബ്രൂസ് ‘ഡിക്’ ചെനി, ആധുനിക അമേരിക്കൻ രാഷ്ട്രീയത്തിലെ വിവാദങ്ങളുടെയും ശക്തമായ നയതന്ത്ര ഇടപെടലുകളുടെയും പ്രതീകമായാണ് ഓർമ്മിക്കപ്പെടുന്നത്.