Connect with us

crime

ഭക്ഷണത്തില്‍ മാരക വിഷമുള്ള കൂണ്‍ നല്‍കി, ഭര്‍തൃ മാതാപിതാക്കള്‍ ഉള്‍പ്പെടെ 3 പേര്‍ മരിച്ചു; 49കാരി അറസ്റ്റില്‍

മെല്‍ബണിന്റെ തെക്ക് കിഴക്കന്‍ പ്രവിശ്യയായ ലിയോഗാതയിലാണ് കേസിന് ആസ്പദമായ സംഭവം നടന്നത്.

Published

on

ഭക്ഷണത്തില്‍ മാരക വിഷമുള്ള കൂണ്‍ ചേര്‍ത്ത് നല്‍കിയതിനെ തുടര്‍ന്ന് 3 പേര്‍ക്ക് ജീവന്‍ നഷ്ടമായ കേസില്‍ ഓസ്‌ട്രേലിയന്‍ പൊലീസ് പ്രതിയെ അറസ്റ്റ് ചെയ്തു. 49 കാരിയായ എറിന്‍ പാറ്റേഴ്‌സണ്‍ ആണ് അറസ്റ്റിലായത്.

മെല്‍ബണിന്റെ തെക്ക് കിഴക്കന്‍ പ്രവിശ്യയായ ലിയോഗാതയിലാണ് കേസിന് ആസ്പദമായ സംഭവം നടന്നത്. ടെക്‌നോളജി ഡിറ്റക്ഷന്‍ ഡോഗ്‌സിന്റെ സഹായത്തോടെ എറിന്റെ വീട്ടില്‍ പരിശോധന ആരംഭിച്ചുവെന്നും തെളിവായി യുഎസ്ബികളും മറ്റും കണ്ടെത്താന്‍ കഴിഞ്ഞേക്കുമെന്നും പൊലീസ് പറഞ്ഞു.

എന്നാല്‍ താന്‍ ഒരു കുറ്റവും ചെയ്തിട്ടില്ല എന്നും ബീഫ് വെല്ലിങ്ടണ്‍ ഡിഷ് എന്ന നിലയില്‍ താന്‍ ഭക്ഷണം പാകം ചെയ്ത് വിളമ്പുകയായിരുന്നു എന്നും അവര്‍ പറഞ്ഞു. ജൂലൈ മാസം നടന്ന ഈ സംഭവത്തില്‍ എറിന്‍ തന്റെ ഭര്‍തൃ മാതാപിതാക്കളായ ഡോണ്‍ പാറ്റെഴ്‌സനും ഗെയില്‍ പാറ്റെഴ്‌സനും പാസ്റ്ററായ ഇയാന്‍ വില്കിന്‍സണും അദ്ദേഹത്തിന്റെ ഭാര്യ ഹെതറിനുമാണ് ഭക്ഷണം നല്‍കിയത്.

ശാരീരിക അസ്വസ്ഥതകള്‍ പ്രകടിപ്പിച്ചതിനെ തുടര്‍ന്ന് ഇവരെ 4 പേരെയും അന്നു രാത്രി തന്നെ ആശുപത്രിയില്‍ പ്രവേശിപ്പിച്ചെങ്കിലും ഒരാഴ്ചക്കുള്ളില്‍ വൈദികന്‍ ഒഴികെ മറ്റ് മൂന്ന് പേരും മരിച്ചു.

കൊടും വിഷമുള്ള കൂണുകള്‍ ഭക്ഷണത്തില്‍ ഉപയോഗിച്ചതാണ് മരണ കാരണം എന്നാണ് കണ്ടെത്തല്‍. പരിശോധന പൂര്‍ത്തിയായാല്‍ ഉടന്‍ കൊലപാതക കേസുകള്‍ അന്വേഷിക്കുന്ന സംഘം എറിനെ ചോദ്യം ചെയ്യാന്‍ തുടങ്ങുമെന്ന് പോലീസ് മേധാവി ഡീന്‍ തോമസ് അറിയിച്ചു. പ്രതിയുടെ അറസ്റ്റ് സങ്കീര്‍ണമായ ഒരു കേസിന് പിന്നാലെയുള്ള ദീര്‍ഘ നാളത്തെ അന്വേഷണത്തിന്റെ ഫലമാണെന്നും കൂടുതല്‍ വിവരങ്ങള്‍ ഇനിയും പുറത്ത് വരാന്‍ ഉണ്ടെന്നും ഡീന്‍ തോമസ് മാധ്യമങ്ങളോട് പറഞ്ഞു. അന്താരാഷ്ട്ര തലത്തില്‍ വരെ ശ്രദ്ധിക്കപ്പെട്ട ഒരു കേസായി ഇത് മാറി എന്നും അദ്ദേഹം കൂട്ടിച്ചേര്‍ത്തു.

കൂടാതെ ഈ 3 പേരുടെയും മരണം ഏവരുടെയും ഹൃദയത്തെ എല്ലാ കാലവും വേദനിപ്പിക്കുന്നതാണെന്നും അദ്ദേഹം പറഞ്ഞു. വിഷമുള്ള കൂണുകളുടെ വിവിധ സ്പീഷീസുകള്‍ രാജ്യത്ത് ഉണ്ടെങ്കിലും, കൂണ്‍ കഴിച്ചതുമൂലമുള്ള മരണം ഇവിടെ അപൂര്‍വ്വമാണ്.

ഡെത്ത് ക്യാപ് വിഭാഗത്തില്‍പ്പെടുന്ന കൂണുകളാണ് ഇത്തരം മരണങ്ങള്‍ക്ക് കാരണമാവുക. ഓസ്‌ട്രേലിയയിലെ പല സ്ഥലങ്ങളിലും ഇത്തരം കൂണുകള്‍ കാണപ്പെടാറുണ്ട്. മറ്റ് കൂണുകളെ അപേക്ഷിച്ച് മധുരം കൂടുതലാണ് എങ്കിലും ഉഗ്ര വിഷം അടങ്ങിയവയാണിവ.

കഴിക്കുന്നയാളുടെ കരളിനെയും വൃക്കയെയും നേരിട്ട് ബാധിക്കുകയും അതുവഴി മരണത്തിലേക്ക് നയിക്കാന്‍ ഇത്തരം കൂണുകള്‍ക്ക് കഴിയും. ഭക്ഷണം കഴിച്ച 4 പേരില്‍ 69 കാരനായ വെല്ലിന്‍സണ്‍ മാത്രമാണ് 2 മാസത്തോളം ആശുപത്രി കിടക്കയില്‍ മരണത്തോട് പോരാടി രക്ഷപെട്ടത്. സെപ്റ്റംബര്‍ 23 ന് അദ്ദേഹം ആശുപത്രിയില്‍ നിന്നും വീട്ടിലെത്തി. ഒക്ടോബറില്‍ തന്റെ ഭാര്യയുടെ മരണാനന്തര ചടങ്ങില്‍ അദ്ദേഹം പങ്കെടുത്തിരുന്നു.

കമ്മ്യൂണിറ്റി ന്യൂസ് ലെറ്റര്‍ എഡിറ്ററായ പാറ്റെഴ്‌സന്‍ ആദ്യം മുതല്‍ക്കേ പോലീസിന്റെ നിരീക്ഷണത്തില്‍ ആയിരുന്നു. താന്‍ ഒരു കുറ്റവും ചെയ്തിട്ടില്ല എന്നും ഈ കൂണുകള്‍ ഒരു കടയില്‍ നിന്നും വിഷമുള്ളതാണ് എന്നറിയാതെ വാങ്ങിയതാണെന്നുമാണ് പാറ്റെഴ്‌സന്‍ പറയുന്നത്.’ എന്റെ പ്രീയപ്പെട്ടവരുടെ മരണത്തില്‍ എനിക്ക് അതീവ ദുഃഖമുണ്ട്, അവരെ കൊല്ലണമെന്നോ ഏതെങ്കിലും തരത്തില്‍ വേദനിപ്പിക്കണമെന്നോ എനിക്ക് യാതൊരു വിധ ഉദ്ദേശവും ഉണ്ടായിരുന്നില്ല ‘ പൊലീസിന് നല്‍കിയ മൊഴിയില്‍ പാറ്റെഴ്‌സന്‍ പറഞ്ഞു.

crime

യു.പിയിലും ഉത്തരാഖണ്ഡിലും അക്രമം അഴിച്ചുവിട്ട് കൻവാർ തീർത്ഥാടകർ; കാർ തല്ലിതകർത്തു

കാര്‍ തങ്ങളെ കടന്ന് പോയത് മതപരമായ ചടങ്ങുകളെ ബാധിച്ചെന്നാണ് അക്രമികള്‍ അവകാശപ്പെട്ടത്.

Published

on

ഉത്തര്‍പ്രദേശിലെ മുസാഫര്‍നഗറില്‍ കാര്‍ ആക്രമിച്ച് കന്‍വാര്‍ യാത്രക്കാര്‍. കാര്‍ തീര്‍ത്ഥാടകരെ കടന്നുപോയതിനാണ് സംഘം യാത്രക്കാരെ ആക്രമിച്ചത്. മുസാഫര്‍നഗറിലെ ചപ്പാര്‍ ഗ്രാമത്തിലാണ് സംഭവം. കാര്‍ തങ്ങളെ കടന്ന് പോയത് മതപരമായ ചടങ്ങുകളെ ബാധിച്ചെന്നാണ് അക്രമികള്‍ അവകാശപ്പെട്ടത്. തീര്‍ത്ഥാടകര്‍ കാര്‍ ആക്രമിക്കുന്നതിന്റെ ദൃശ്യങ്ങളും ഇപ്പോള്‍ സമൂഹമാധ്യമങ്ങളില്‍ പ്രചരിക്കുന്നുണ്ട്.

കാറിന്റെ ചില്ലുകള്‍ തകര്‍ത്ത തീര്‍ത്ഥാടകര്‍ ഡ്രൈവറെയും യാത്രക്കാരെയും മര്‍ദിച്ചെന്നും ദേശീയ മാധ്യമങ്ങള്‍ റിപ്പോര്‍ട്ട് ചെയ്തു. തുടര്‍ന്ന്, മുസാഫര്‍നഗര്‍ പൊലീസ് ഉദ്യോഗസ്ഥര്‍ സ്ഥലത്തെത്തി സ്ഥിതിഗതികള്‍ നിയന്ത്രണവിധേയമാക്കിയെന്നും ദേശീയ മാധ്യമങ്ങള്‍ റിപ്പോര്‍ട്ട് ചെയ്തു. കന്‍വാര്‍ തീര്‍ത്ഥാടകരെ തങ്ങള്‍ കാര്യങ്ങള്‍ പറഞ്ഞ് മനസിലാക്കിയതോടെ അവര്‍ യാത്ര പുനരാരംഭിച്ചെന്നാണ് പൊലീസ് നല്‍കിയ വിശദീകരണം. അതേസമയം പ്രദേശത്തെ സി.സി.ടി.വി ദൃശ്യങ്ങള്‍ ശേഖരിച്ച് അന്വേഷണം ആരംഭിച്ചിട്ടുണ്ടെന്നും പൊലീസ് അറിയിച്ചു.

ഉത്തരാഖണ്ഡിലും കന്‍വാര്‍ തീര്‍ത്ഥാടകര്‍ ഒരു സെക്യൂരിറ്റി ജീവനക്കാരനെ മര്‍ദിച്ചതായി റിപ്പോര്‍ട്ടുണ്ട്. ഉത്തരാഖണ്ഡിലെ തെഹ്രിയിലെ നീലകണ്ഠ ക്ഷേത്രത്തിന് സമീപം പാര്‍ക്കിങ്ങിന്റെ പേരിലുണ്ടായ തര്‍ക്കമാണ് ആക്രമണത്തിലേക്ക് നയിച്ചത്. തര്‍ക്കത്തിനിടെ സെക്യൂരിറ്റി ജീവനക്കാരനെ വാളുകൊണ്ട് ആക്രമിച്ചെന്നാണ് ദേശീയ മാധ്യമങ്ങള്‍ റിപ്പോര്‍ട്ട് ചെയ്തത്.

അതിനിടെ, കന്‍വാര്‍ യാത്ര കടന്നു പോകുന്ന വഴികളിലെ ഹോട്ടലുടമകളോട് അവരുടെ പേരുകള്‍ പ്രദര്‍ശിപ്പിക്കാന്‍ നിര്‍ദേശം നല്‍കിയ യു.പി, ഉത്തരാഖണ്ഡ് സര്‍ക്കാര്‍ ഉത്തരവ് സുപ്രീം കോടതി ഇന്ന് സ്റ്റേ ചെയ്തു. ജസ്റ്റിസുമാരായ ഹൃഷികേശ് റോയ്, എസ്.വി.എന്‍. ഭട്ടി എന്നിവരടങ്ങിയ ബെഞ്ചാണ് സര്‍ക്കാര്‍ നിര്‍ദേശങ്ങള്‍ ചോദ്യം ചെയ്ത് സമര്‍പ്പിച്ച ഒരു കൂട്ടം ഹരജികളില്‍ ഇടക്കാല ഉത്തരവ് പുറപ്പെടുവിച്ചത്. എന്നാല്‍, ഏത് തരം ഭക്ഷണമാണ് വിളമ്പുന്നതെന്ന് ഹോട്ടലുകള്‍ പ്രദര്‍ശിപ്പിക്കണമെന്നും ബെഞ്ച് വ്യക്തമാക്കി.

ഉത്തര്‍പ്രദേശ്, ഉത്തരാഖണ്ഡ് സര്‍ക്കാരുകളുടെ നിര്‍ദേശത്തിനെതിരെ ദല്‍ഹി സര്‍വകലാശാല പ്രൊഫസര്‍ അപൂര്‍വാനന്ദും മനുഷ്യാവകാശ പ്രവര്‍ത്തകന്‍ ആകര്‍ പട്ടേലും ഞായറാഴ്ച സുപ്രീം കോടതിയെ സമീപിച്ചിരുന്നു. വിഷയത്തില്‍ മഹുവ മൊയ്ത്ര അടക്കമുള്ള പ്രതിപക്ഷ കക്ഷികളും ഹരജി ഫയല്‍ ചെയ്തിരുന്നു.

Continue Reading

crime

ഭക്ഷണത്തിൽ ഉള്ളി കണ്ടെന്നാരോപണം; ഹോട്ടൽ തല്ലിതകർത്ത് കൻവാർ തീർത്ഥാടകർ

മുസാഫർനഗർ ജില്ലയിലെ സിസൗന ബ്ലോക്കിൽ ദൽഹി-ഹരിദ്വാർ ഹൈവേയിലെ ‘തൗ ഹുക്കേവാല ഹരിയാൻവി ടൂറിസ്റ്റ് ധാബ’ യാണ് തീർത്ഥാടകർ തകർത്തത്.

Published

on

ഭക്ഷണത്തിൽ ഉള്ളി കണ്ടെന്നാരോപിച്ച് ഹോട്ടൽ തല്ലിതകർത്ത് കൻവാർ തീർത്ഥാടകർ. ഉത്തർപ്രദേശിലെ മുസാഫർനഗർ ജില്ലയിലാണ് ഭക്ഷണത്തിൽ ഉള്ളി കഷ്ണങ്ങൾ കണ്ടെന്നാരോപിച്ച് ഹോട്ടൽ തകർത്തത്. മുസാഫർനഗർ ജില്ലയിലെ സിസൗന ബ്ലോക്കിൽ ദൽഹി-ഹരിദ്വാർ ഹൈവേയിലെ ‘തൗ ഹുക്കേവാല ഹരിയാൻവി ടൂറിസ്റ്റ് ധാബ’ യാണ് തീർത്ഥാടകർ തകർത്തത്.
കൻവാർ യാത്രാ വഴിയിലുള്ള ഹോട്ടലുകൾ നെയിംപ്ലേറ്റുകൾ പ്രദർശിപ്പിക്കണമെന്ന് ഉത്തർപ്രദേശ് സർക്കാർ നിർബന്ധമാക്കിയതിന് തൊട്ടുപിന്നാലെയാണ് സംഭവം. ഗംഗയിൽ നിന്ന് ശേഖരിച്ച വെള്ളവുമായി ഹരിദ്വാറിലേക്ക് പോയ കൻവാർ തീർത്ഥാടക സംഘം വഴിക്കു വെച്ച് ഭക്ഷണം കഴിക്കാൻ ഹോട്ടലിൽ കയറുകയായിരുന്നു.
എന്നാൽ കഴിക്കാൻ കൊണ്ട് വെച്ച കറിയിൽ ഉള്ളി കഷ്ണം കണ്ടെന്നും പറഞ്ഞ് പാചകക്കാരൻ ഉൾപ്പടെ ഹോട്ടലിലെ ജീവനക്കാരെ മർദിക്കുകയായിരുന്നു. ഹോട്ടലിലെ ഫർണിച്ചറുകളും മറ്റ് സാധനങ്ങളും തീർത്ഥാടകർ നശിപ്പിച്ചു. ശിവഭക്തർ ലളിതമായ  ഭക്ഷണം കഴിക്കുന്നതിനാൽ, കറിയിൽ ഉള്ളി കണ്ടാൽ അവർ അസ്വസ്ഥരാകുമെന്ന് ചാപ്പർ പോലീസ് സ്റ്റേഷൻ ഓഫീസർ ത്യാഗി പറഞ്ഞു.
എന്നാൽ ആശയ കുഴപ്പം മൂലമാണ് ഇത് സംഭവിച്ചതെന്നും കൻവാർ തീർത്ഥാടകർ ഉള്ളി ഭക്ഷണത്തിൽ ഉൾപ്പെടുത്തില്ലെന്ന കാര്യം തങ്ങൾക്കറിയില്ലെന്നും ഹോട്ടൽ ഉടമ പ്രമോദ് കുമാർ പറഞ്ഞു.സംഭവത്തിൽ നിരവധി പേർക്ക് പരിക്കേറ്റു. പരിക്കേറ്റവരെ സമീപത്തുള്ള ആശുപത്രിയിൽ പ്രവേശിപ്പിച്ചു.

Continue Reading

crime

യു.പിയിൽ എസ്.പി നേതാവ് കൊല്ലപ്പെട്ടു; ബി.ജെ.പി കൗൺസിലർ ഉൾപ്പെടെ 5 പേർക്കെതിരെ കേസ്

വെള്ളിയാഴ്ച രാത്രിയാണ് ഓം പ്രകാശ് സിങ് എന്നയാളെ വീട്ടിൽ അതിക്രമിച്ച് കയറി ആയുധങ്ങൾ ഉപയോഗിച്ച് കൊലപ്പെടുത്തിയത്.

Published

on

യു.പിയിലെ  ഗോണ്ട ജില്ലയിൽ സമാജ്‌വാദി പാർട്ടി പ്രാദേശിക നേതാവ് കൊല്ലപ്പെട്ട സംഭവത്തിൽ ബി.ജെ.പി കൗൺസിലർ ഉൾപ്പെടെ അഞ്ച് പേർക്കെതിരെ കേസെടുത്തു. വെള്ളിയാഴ്ച രാത്രിയാണ് ഓം പ്രകാശ് സിങ് എന്നയാളെ വീട്ടിൽ അതിക്രമിച്ച് കയറി ആയുധങ്ങൾ ഉപയോഗിച്ച് കൊലപ്പെടുത്തിയത്.

പോസ്റ്റ്‌മോർട്ടം നടത്തി സിങിന്‍റെ മൃതദേഹം കുടുംബത്തിന് വിട്ടുകൊടുത്തെങ്കിലും അന്ത്യകർമങ്ങൾ നടത്താൻ വീട്ടുകാർ വിസമ്മതിച്ചു. പ്രതികളെ പിടികൂടിയതിന് ശേഷം മാത്രമേ സംസ്‌കാര ചടങ്ങുകൾ നടത്തുകയുള്ളൂവെന്ന് വീട്ടുകാർ അറിയിച്ചു. സമാജ്‌വാദി പാർട്ടിയുടെ മുതിർന്ന നേതാവ് യോഗേഷ് പ്രതാപ് സിങ്, മുൻ എം.എൽ.എ ബൈജ്‌നാഥ് ദുബെ, മറ്റ് പാർട്ടി നേതാക്കളും അദ്ദേഹത്തിൻ്റെ വീട്ടിലെത്തിയിരുന്നു. അഡീഷണൽ സൂപ്രണ്ട് ഓഫ് പൊലീസ് (വെസ്റ്റ്) രാധശ്യാം റായിയും കേണൽഗഞ്ച് പൊലീസ് സർക്കിൾ ഓഫീസർ ചന്ദ്രപാൽ ശർമ്മയും സംഭവസ്ഥലത്തെത്തി. ഉടൻ നടപടിയെടുക്കുമെന്ന് പ്രതിഷേധക്കാർക്ക് ഉറപ്പുനൽകി.

സിങിന്‍റെ ഭാര്യ നീലത്തിൻ്റെ പരാതിയുടെ അടിസ്ഥാനത്തിൽ പരസ്പൂർ നഗർ പഞ്ചായത്തിലെ ബി.ജെ.പി കൗൺസിലറായ ഉദയ്ഭൻ സിങ് എന്ന ലല്ലൻ സിങ്, അദ്ദേഹത്തിൻ്റെ മൂന്ന് ആൺമക്കൾ എന്നിവരുൾപ്പെടെ അഞ്ച് പേർക്കെതിരെ എഫ്.ഐ.ആർ രജിസ്റ്റർ ചെയ്തിട്ടുണ്ട്. പ്രതികളെ പിടികൂടാൻ പ്രത്യേക സംഘം രൂപീകരിച്ചിട്ടുണ്ട്.

ഭർത്താവിനെയും മകനെയും മർദിച്ചുവെന്നും രണ്ട് തവണ തങ്ങളെ ആക്രമിച്ചിട്ടുണ്ടെന്നും നീലം പരാതിയിൽ പറയുന്നു. ലോക്കൽ പൊലീസ് സ്റ്റേഷനിൽ പരാതി നൽകിയിട്ടും രാഷ്ട്രീയ സമ്മർദത്തെ തുടർന്ന് നടപടിയുണ്ടായില്ല. മുമ്പ് നൽകിയ പരാതികളിൽ പൊലീസ് നടപടിയെടുത്തിരുന്നെങ്കിൽ തന്‍റെ ഭർത്താവ് ജീവിച്ചിരിക്കുമായിരുന്നെന്നും അവർ കൂട്ടിച്ചേർത്തു. സംഭവത്തിൽ അന്വേഷണം പുരോഗമിക്കുകയാണ്.

Continue Reading

Trending