kerala
സ്കൂട്ടര് റോഡിലെ കുഴിയില് വീണുണ്ടായ അപകടം; യുവാവിന്റെ വലതു കൈ മുറിച്ചുമാറ്റി
കാസര്ഗോഡ് റോഡിലെ കുഴിയില് സ്കൂട്ടര് വീണുണ്ടായ അപകടത്തെ തുടര്ന്ന് യുവാവിന്റെ കൈ മുറിച്ചുമാറ്റി. മേല്പ്പറമ്പ് സ്വദേശി പ്രകാശിനാണ് വലതു കൈ നഷ്ടമായത്. ഓഗസ്റ്റ് 30 ന് രാത്രി 8 മണിയോടെ ചെമ്മനാട് പെട്രോള് പമ്പിന് സമീപമായിരുന്നു അപകടം.
കാസര്ഗോഡ് നിന്ന് മേല്പ്പറമ്പിലെ വീട്ടിലേക്കുള്ള യാത്രയ്ക്കിടെ പ്രകാശന് ഓടിച്ചിരുന്ന സ്കൂട്ടര് റോഡിലെ കുഴിയില് വീണു. വലതു കൈക്ക് ഗുരുതരമായി പരുക്കേറ്റ പ്രകാശനെ പൊലീസ് ആണ് ആദ്യം കാസര്ഗോഡ് ഗവ. ജനറല് ആശുപത്രിയില് എത്തിച്ചത്. പിന്നീട് വിദഗ്ധ ചികിത്സയ്ക്കായി സ്വകാര്യ ആശുപത്രിയിലേക്ക് മാറ്റി. എംആര്ഐ സ്കാനും, സിടി സ്കാനും എടുക്കുകയും ഡോക്ടര്മാര് വിശ്രമം നിര്ദ്ദേശിക്കുകയും ചെയ്തു. പിറ്റേദിവസം കയ്യില് നിന്ന് ദുര്ഗന്ധം വന്നതോടെയാണ് അണുബാധ ഉണ്ടായതായി സ്ഥിരീകരിച്ചത്. തുടര്ന്ന് മംഗലാപുരത്തെ ആശുപത്രിയിലേക്ക് മാറ്റി.
നാല്പതുകാരനായ പ്രകാശന്റെ ഉപജീവനമാര്ഗ്ഗമായിരുന്നു ഡ്രൈവര് ജോലി. വലതു കൈ നഷ്ടപ്പെട്ടതോടെ നിസ്സഹായാവസ്ഥയിലാണ് പ്രകാശനും കുടുംബവും. ആദ്യം ചികിത്സിച്ച ആശുപത്രിയിലെ ഡോക്ടര്മാര്ക്ക് പിഴവ് സംഭവിച്ചെന്നും കുടുംബം ആരോപിക്കുന്നുണ്ട്. പ്രകാശന് അപകടം സംഭവിക്കുന്നതിന് ഒരാഴ്ച മുന്പ് മറ്റൊരു യുവാവ് ഈ പ്രദേശത്ത് റോഡിലെ കുഴിയില് വീണുണ്ടായ അപകടത്തില് മരിച്ചിരുന്നു.
kerala
ഗവേഷക വിദ്യാര്ഥിക്ക് ജാതിവിവേചനം നേരിട്ട സംഭവം: വകുപ്പ് മേധാവിയുടെ അറസ്റ്റ് വിലക്കി
ഗവേഷക വിദ്യാര്ഥിക്ക് ജാതിവിവേചനം നേരിട്ടതുമായി ബന്ധപ്പെട്ട പരാതിയില് കേരള സര്വകലാശാല സംസ്കൃത വകുപ്പ് മേധാവി പ്രഫ. സി.എന്. വിജയകുമാരിയുടെ അറസ്റ്റ് ഹൈകോടതി വിലക്കി.
കൊച്ചി: ഗവേഷക വിദ്യാര്ഥിക്ക് ജാതിവിവേചനം നേരിട്ടതുമായി ബന്ധപ്പെട്ട പരാതിയില് കേരള സര്വകലാശാല സംസ്കൃത വകുപ്പ് മേധാവി പ്രഫ. സി.എന്. വിജയകുമാരിയുടെ അറസ്റ്റ് ഹൈകോടതി വിലക്കി. വിപിന് വിജയനെന്ന ഗവേഷക വിദ്യാര്ഥിയുടെ പരാതി കെട്ടിച്ചമച്ചതാണെന്നും ജാമ്യമില്ലാത്ത കേസില് കുടുക്കുകയായിരുന്നു ഉദ്ദേശ്യമെന്നും കാട്ടി വിജയകുമാരി സമര്പ്പിച്ച മുന്കൂര്ജാമ്യ ഹരജിയിലാണ് ജസ്റ്റിസ് കെ. ബാബുവിന്റെ ഇടക്കാല ഉത്തരവ്.
സംസ്കൃതം അറിയാത്ത വിദ്യാര്ഥിക്ക് സംസ്കൃതത്തില് പിഎച്ച്.ഡി നല്കരുതെന്നാവശ്യപ്പെട്ട് വിജയകുമാരി കത്ത് നല്കിയത് വിവേചനമാണെന്നും നിരന്തരം ജാതിപറഞ്ഞ് അവഹേളിച്ചിരുന്നെന്നും ആരോപിച്ച് എസ്.പിക്ക് വിപിന് നല്കിയ പരാതിയെത്തുടര്ന്നാണ് പൊലീസ് കേസ് രജിസ്റ്റര് ചെയ്തത്. എന്നാല്, പ്രബന്ധത്തിലെ ന്യൂനതകള് ചൂണ്ടിക്കാട്ടുകയും വി.സിക്ക് റിപ്പോര്ട്ട് നല്കുകയും ചെയ്തതിന്റെ വിരോധമാണ് തെറ്റായ പരാതിക്ക് അടിസ്ഥാനമെന്നാണ് ഹരജിയിലെ ആരോപണം. അറസ്റ്റ് വിലക്കിയ കോടതി പരാതിക്കാരനടക്കം എതിര്കക്ഷികള്ക്ക് നോട്ടീസ് അയച്ചു. തുടര്ന്ന് ഹരജി പിന്നീട് പരിഗണിക്കാന് മാറ്റി.
kerala
ചക്രവാതച്ചുഴി: സംസ്ഥാനത്ത് ഇന്ന് മൂന്ന് ജില്ലകളില് ശക്തമായ മഴയ്ക്ക് സാധ്യത
ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്.
തിരുവനന്തപുരം: സംസ്ഥാനത്ത് തെക്കന് ജില്ലകളില് ശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥാ വകുപ്പ്. മുന്ന് ജില്ലകളില് യെല്ലോ അലര്ട്ട് പ്രഖ്യാപിച്ചിട്ടുണ്ട്. തിരുവനന്തപുരം, ഇടുക്കി, എറണാകുളം ജില്ലകളിലാണ് മഴമുന്നറിയിപ്പുള്ളത്. തെക്കന് കേരളത്തിന് സമീപം പുതിയ ചക്രവാതച്ചുഴി രൂപപ്പെട്ടിരുന്നു. ഈ പശ്ചാത്തലത്തിലാണ് കലാവസ്ഥാ വകുപ്പ് മഴ മുന്നറിയിപ്പ് പുറപ്പെടുവിച്ചത്.
ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറില് 64.5 മില്ലിമീറ്റര് മുതല് 115.5 മില്ലിമീറ്റര് വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അര്ത്ഥമാക്കുന്നത്. ഇടിമിന്നല് അപകടകാരിയായതിനാല് ജനങ്ങള് അതീവ ജാഗ്രത പാലിക്കണമെന്ന് അധികൃതര് നിര്ദേശിച്ചു.
തെക്കന് ജില്ലകളില് ഉച്ചക്ക് ശേഷവും രാത്രിയും ഇടി മിന്നലോടു കൂടിയ മഴയ്ക്ക് സാധ്യതയുള്ളതായി മുന്നറിയിപ്പ്. തുലാവര്ഷം സജീവമായതോടെ മധ്യ കേരളത്തിലും തെക്കന് ജില്ലകളിലും മഴയുണ്ടാകുമെന്നാണ് കാലാവസ്ഥ വകുപ്പിന്റെ പ്രവചനം.
kerala
സംസ്ഥാന സ്കൂൾ ശാസ്ത്രോത്സവം; മലപ്പുറത്തിന് ഹാട്രിക്ക് കിരീടം
പാലക്കാടിന് രണ്ടാം സ്ഥാനം, കണ്ണൂർ മൂന്നാമത്
പാലക്കാട്: സംസ്ഥാന സ്കൂൾ ശാസ്ത്രോത്സവത്തിൽ മലപ്പുറം ജില്ല ഓവറോൾ ചാംപ്യൻമാരായി. ആതിഥേയരായ പാലക്കാട് രണ്ടാം സ്ഥാനവും കണ്ണൂർ മൂന്നാം സ്ഥാനവും നേടി. 1548 പോയിന്റും 21 ഒന്നാം സ്ഥാനങ്ങളുമായാണ് മലപ്പുറത്തിന്റെ കിരീടധാരണം. തുടരെ മൂന്നാം തവണയാണ് മലപ്പുറം കിരീടം സ്വന്തമാക്കുന്നത്.
പാലക്കാടിനും കണ്ണൂരിനും 1487 പോയിന്റുകളാണ്. എന്നാൽ ഒന്നാം സ്ഥാനങ്ങളുടെ എണ്ണത്തിൽ കണ്ണൂരിനെ പിന്തള്ളിയാണ് പാലക്കാട് രണ്ടാം സ്ഥാനം ഉറപ്പിച്ചത്. 17 ഓന്നാം സ്ഥാനങ്ങളാണ് പാലക്കാടിന്. കണ്ണൂരിന് 16 ഒന്നാം സ്ഥാനങ്ങൾ.
സബ്ജില്ലകളിൽ മാനന്തവാടിയാണ് ഓവറോൾ കിരീടം സ്വന്തമാക്കിയത്. 580 പോയിന്റുകളാണ് അവർക്ക്. സുൽത്താൻ ബത്തേരി 471 പോയിന്റുമായി രണ്ടാമതും 410 പോയിന്റുമായി കട്ടപ്പന മൂന്നാമതും എത്തി.
സ്കൂളുകളിൽ വയനാട് ദ്വാരക സേക്രഡ് ഹാർട്ട് എച്എസ്എസിനാണ് കിരീടം. കാഞ്ഞങ്ങാട് ദുർഗ എച്എസ്എസ് രണ്ടാം സ്ഥാനവും ഇടുക്കി കൂമ്പൻപാറ എഫ്എംജിഎച്എസ്എസ് മൂന്നാം സ്ഥാനവും നേടി. പൊതുവിദ്യാഭ്യാസ ഡയറക്ടർ എൻഎസ്കെ ഉമേഷ് ഐഎഎസ് ട്രോഫികൾ സമ്മാനിച്ചു.
-
kerala1 day agoതദ്ദേശ തിരഞ്ഞെടുപ്പ് പ്രഖ്യാപനം നാളെ ?, 20ന് മുന്പ് വോട്ടെണ്ണല്
-
india2 days agoമകന് പഠനത്തില് മോശമെന്ന് പിതാവിനോട് അധ്യാപകര്; പിന്നാലെ വിദ്യാര്ഥി ജീവനൊടുക്കി
-
entertainment3 days agoകമല് ഹാസന് നായകനാകുന്ന പുതിയ ചിത്രത്തിന് സംഗീതം ജേക്സ് ബിജോയ്
-
News3 days agoഗസ്സ വംശഹത്യ; നെതന്യാഹുവിനെതിരെ തുര്ക്കിയില് അറസ്റ്റ് വാറണ്ട്
-
india1 day agoഡോക്ടര്മാര് മരിച്ചതായി വിധിയെഴുതി; സംസ്കാര ചടങ്ങിനിടെ ശ്വസിച്ച് യുവാവ്
-
india2 days agoഹെല്മറ്റ് ധരിക്കാത്തതിന് സ്കൂട്ടര് ഉടമയ്ക്ക് 20 ലക്ഷത്തിലേറെ രൂപ പിഴ ചുമത്തി യുപി പൊലീസ്
-
News2 days agoകെട്ടിട അവിശിഷ്ടങ്ങള്ക്കടിയില് നിന്ന് ഇസ്രാഈലി സൈനികന്റെ മൃതദേഹം കണ്ടെടുത്ത് ഹമാസ്
-
kerala2 days agoകുഞ്ഞിന്റെ മരണം കൊലപാതകമെന്ന് പിതാവ്; അമ്മയും ലെസ്ബിയന് പങ്കാളിയും അറസ്റ്റില്

