തൃശൂര്‍: മന്ത്രി എസി മൊയ്തീനെതിരെ ഗുരുതര ആരോപണവുമായി അനില്‍ അക്കര എംഎല്‍എ. സ്വര്‍ണക്കടത്ത് കേസ് പ്രതി സ്വപ്ന സുരേഷിന് മെഡിക്കല്‍ കോളേജില്‍ ചര്‍ച്ചക്ക് സൗകര്യമൊരുക്കിയത് മന്ത്രി സി മൊയ്തീന്‍ നേരിട്ടെത്തിയാണെന്ന് അനില്‍ അക്കര എം.എല്‍.എ ഫേസ്ബുക്കില്‍ കുറിച്ചു. സംഭവത്തില്‍ ജില്ല കലക്ടര്‍, മെഡിക്കല്‍ കോളേജ് പ്രിന്‍സിപ്പല്‍ എന്നിവര്‍ക്കും പങ്കുണ്ടെന്നും അനില്‍ അക്കര ആരോപിക്കുന്നു.

സ്ഥലം എംഎല്‍എയെയും എംപിയെയും ഒഴിവാക്കിയാണ് മന്ത്രി തൃശൂര്‍ മെഡിക്കല്‍ കോളേജിന്റെ വികസന പ്രവര്‍ത്തനം വിലയിരുത്താന്‍ എത്തിയതെന്നും അദ്ദേഹം ആരോപിക്കുന്നു.

സ്വര്‍ണ്ണക്കടത്ത് കേസിലെ പ്രതികളായ സ്വപ്ന സുരേഷിനും റമീസിനും ആശുപത്രിയില്‍ ഒരേസമയം ചികിത്സ നല്‍കിയതിനെക്കുറിച്ച് ജയില്‍ വകുപ്പ് റിപ്പോര്‍ട്ട് തേടിയിട്ടുണ്ട്. വിയ്യൂര്‍ ജയില്‍ മെഡിക്കല്‍ ഓഫീസറോടാണ് റിപ്പോര്‍ട്ട് തേടിയത്.