ന്യൂഡല്‍ഹി: സംസ്ഥാനങ്ങളില്‍ പൊലീസ് മേധാവിമാരെ നിയമിക്കുന്നതിന് മാര്‍ഗ നിര്‍ദേശങ്ങളുമായി സുപ്രിം കോടതി. യു.പി.എസ്.സി തയാറാക്കുന്ന പാനലില്‍ നിന്നായിരിക്കണം ഡി.ജി.പി നിയമനമെന്ന് സുപ്രിം കോടതി നിര്‍ദേശിച്ചു. ചീഫ് ജസ്റ്റിസ് ദീപക്മിശ്ര അധ്യക്ഷനായ ബെഞ്ചാണ് ഉത്തരവ് പുറപ്പെടുവിച്ചിരിക്കുന്നത്.

ഡി.ജി.പിയായി നിയമിക്കാന്‍ ഉദ്ദേശിക്കുന്നവുടെ പട്ടിക സംസ്ഥാനങ്ങള്‍ യൂണിയന്‍ പബ്ലിക് സര്‍വീസ് കമ്മിഷനു നല്‍കണം. നിലവിലെ ഡി.ജി.പി വിരമിക്കുന്നതിന് മൂന്നു മാസം മുമ്പു തന്നെ പട്ടിക നല്‍കണം. ഈ പട്ടിക പരിശോധിച്ച് യു.പി.എസ്.സി പാനല്‍ തയാറാക്കും. ഈ പാനലില്‍ നിന്നായിരിക്കണം സംസ്ഥാന സര്‍ക്കാരുകള്‍ നിയമനം നടത്തേണ്ടതെന്ന് കോടതി വ്യക്തമാക്കി. കൂടാതെ കാലാവധി രണ്ടുവര്‍ഷം ഉറപ്പാക്കണമെന്നും സുപ്രീംകോടതി നിര്‍ദ്ദേശിക്കുന്നു.

ആക്ടിങ് ഡി.ജി.പി എന്ന ഒരു പദവി ഇല്ലെന്നും അങ്ങനെ ആരെയും നിയമിക്കാനാവില്ലെന്നും സുപ്രീം കോടതി മാര്‍ഗനിര്‍ദേശങ്ങളില്‍ വ്യക്തമാക്കി. ഡി.ജി.പിയായി നിയമിക്കപ്പെടുന്നയാള്‍ക്ക് രണ്ടു വര്‍ഷത്തെ കുറഞ്ഞ സേവന കാലാവധി ഉറപ്പാക്കണമെന്നും മാര്‍ഗനിര്‍ദേശങ്ങളിലുണ്ട്.