കിണറ്റില്‍നിന്ന് കരകയറാന്‍ കേവലമായ ആവേശം പോരാ. കൂടെ മതിയായ ഉപകരണങ്ങളും വേണം. അതുപോലെ രാജ്യമിപ്പോള്‍ നിപതിച്ചിരിക്കുന്ന കെണിയില്‍നിന്ന് രക്ഷപ്പെടാനും വെറും ആഗ്രഹപ്രകടനമോ പ്രസ്താവനകളോ മതിയാവില്ല. ദീര്‍ഘദര്‍ശിത്വമായ നയനിലപാടുകളും തന്ത്രങ്ങളുമാണ് അതിനായി പ്രയോഗവല്‍കരിക്കേണ്ടത്. നാലേമുക്കാല്‍ വര്‍ഷം കൊണ്ട് രാജ്യത്തെ തകര്‍ത്ത് തരിപ്പണമാക്കി വര്‍ഷങ്ങള്‍ പിന്നാക്കമാക്കിയ നരേന്ദ്രമോദി സര്‍ക്കാരിനെതിരെ പ്രതിപക്ഷ കക്ഷികള്‍ ഒന്നിച്ചുനിന്നാലല്ലാതെ ജനാധിപത്യവും മതേതരത്വവും ഭരണഘടനയും അതേപടി നിലനിര്‍ത്താന്‍ കഴിയില്ലെന്ന് ഇതിനകം വ്യക്തമായതാണ്. കൂടുതല്‍ ശുഭോദര്‍ക്കമായ നീക്കങ്ങളാണ് പ്രതിപക്ഷ കക്ഷികളില്‍നിന്ന് പൊതുതെരഞ്ഞെടുപ്പിന്റെ പതിനൊന്നാം മണിക്കൂറില്‍ മഹാഭൂരിപക്ഷം ജനതയും പ്രതീക്ഷിക്കുന്നതും ആവശ്യപ്പെടുന്നതും. അതിന് വിലങ്ങുതടിയാകുന്ന ഒരുവിധനീക്കവും ആരുടെ ഭാഗത്തുനിന്നും ഉണ്ടാകാന്‍ പാടില്ലാത്തതാണ്.
ഇക്കഴിഞ്ഞ നവംബര്‍-ഡിസംബറിലായി നടന്ന അഞ്ചു സംസ്ഥാനങ്ങളിലെ നിയമസഭാവോട്ടെടുപ്പിന്റെ ഫലങ്ങള്‍ രാജ്യത്തെ പ്രതിപക്ഷ കക്ഷികള്‍ക്ക്, വിശേഷിച്ച് കോണ്‍ഗ്രസിന് ആവേശവും ആത്മവിശ്വാസവും പകരുന്നവയാണ്. അഞ്ചില്‍ മൂന്നിലും-മധ്യപ്രദേശ്, രാജസ്ഥാന്‍, ഛത്തീസ്ഗഡ്- കോണ്‍ഗ്രസിന് ഭരണരൂപവല്‍കരണം സാധ്യമായി. തിങ്കളാഴ്ച ഈ മൂന്നുസംസ്ഥാനങ്ങളിലെയും മുഖ്യമന്ത്രിമാര്‍ സത്യപ്രതിജ്ഞ ചെയ്ത് അധികാരമേറ്റെടുത്തു. രാവിലെയും ഉച്ചക്കും വൈകീട്ടുമായി നടന്ന മൂന്നു തലസ്ഥാനങ്ങളിലെയും സത്യപ്രതിജ്ഞാചടങ്ങുകളില്‍ സോണിയാഗാന്ധിയും കോണ്‍ഗ്രസ് അധ്യക്ഷന്‍ രാഹുല്‍ഗാന്ധിയും ആന്ധ്രപ്രദേശ് മുഖ്യമന്ത്രി ചന്ദ്രബാബുനായിഡു, ഡി.എം.കെ അധ്യക്ഷന്‍ എം.കെ സ്റ്റാലിന്‍ പോലുള്ള നേതാക്കളും സജീവ സാന്നിധ്യമറിയിക്കുകയുണ്ടായി. പ്രതിപക്ഷ ഐക്യത്തിന്റെ പുത്തന്‍ കാഹളമാണ് അവിടങ്ങളില്‍ മുഴങ്ങിയത്. ഇതിനുമുമ്പ് ഡിസംബര്‍ പത്തിന് ഡല്‍ഹിയിലും 21 പ്രതിപക്ഷകക്ഷികളുടെ നേതാക്കള്‍ പങ്കെടുത്ത സംയുക്തയോഗവും കോണ്‍ഗ്രസ് നേതാവ് സോണിയാഗാന്ധിയുടെ നേതൃത്വത്തില്‍ ചേരുകയുണ്ടായി. ഡല്‍ഹിയിലെ സ്ഥിരവൈരിയായ ആംആദ്മി പാര്‍ട്ടിയുടെ മുഖ്യമന്ത്രി അരവിന്ദ്‌കെജ്‌രിവാള്‍, സ്റ്റാലിന്‍, സമാജ്‌വാദിപാര്‍ട്ടി നേതാവ് അഖിലേഷ് യാദവ്, ചന്ദ്രബാബു നായിഡു, ലോക്താന്ത്രിക് ജനതാദളിലെ ശരത്‌യാദവ്, എന്‍.സി.പി നേതാവ് ശരത്പവാര്‍ തുടങ്ങിയവര്‍ ഈ യോഗത്തില്‍ പങ്കെടുത്തിരുന്നു. 2019ലെ ലോക്‌സഭാതെരഞ്ഞെടുപ്പില്‍ മോദിയുടെ നേതൃത്വത്തിലുള്ള സര്‍ക്കാരിനെ താഴെയിറക്കണമെന്ന ഏകഅജണ്ടയിലാണ് യോഗം നടന്നത്. ഞായറാഴ്ച ഡി.എം.കെ നേതാവ് അന്തരിച്ച മുത്തുവേല്‍ കരുണാനിധിയുടെ പ്രതിമാഅനാച്ഛാദനച്ചടങ്ങിലും ഈ ഐക്യം പ്രോജ്വലമായി. സോണിയയെയും രാഹുലിനെയും കൂടാതെ ദക്ഷിണേന്ത്യയിലെ മുഖ്യമന്ത്രിമാരായ സി.പി.എം നേതാവ് പിണറായി വിജയനും നായിഡുവും ഈ ചടങ്ങില്‍ പങ്കെടുത്തു. യോഗത്തില്‍ സംസാരിച്ച കരുണാനിധിയുടെ പുത്രന്‍ കൂടിയായ എം.കെ സ്റ്റാലിന്‍, അടുത്തപ്രധാനമന്ത്രിയായി രാഹുല്‍ഗാന്ധി വരണമെന്ന് അഭിപ്രായപ്പെട്ടു. ഇത് ചൂണ്ടിക്കാട്ടുന്നത് ഇക്കഴിഞ്ഞ നിയമസഭാതെരഞ്ഞെടുപ്പിനുശേഷം പൊതുവെ രാജ്യത്ത് കോണ്‍ഗ്രസിനും രാഹുല്‍ഗാന്ധിക്കും അനുകൂലമായി നേതാക്കള്‍ക്കിടയിലും കൂടുതല്‍ അനുകൂലമായ അന്തരീക്ഷം ഉയര്‍ന്നുവരുന്നുവെന്നതാണ്.
അതേസമയം തന്നെ ഈ അന്തരീക്ഷത്തെ ആശങ്കപ്പെടുത്തുന്നത്, ഡല്‍ഹിയിലും ചെന്നൈയിലും മുഖ്യമന്ത്രിമാരുടെ സത്യപ്രതിജ്ഞാചടങ്ങുകളിലും കാണാതിരുന്ന ചില പ്രതിപക്ഷ നേതൃമുഖങ്ങളെക്കുറിച്ചുള്ളതാണ്. ഇവിടെയെവിടെയും പ്രതിപക്ഷത്തെ പ്രമുഖ കക്ഷികളായ മമത ബാനര്‍ജിയും ബി.എസ്.പി നേതാവ് മായാവതിയും പങ്കെടുത്തില്ല. പ്രതിപക്ഷത്തിന്റെ ഐക്യമില്ലാതെ രാജ്യത്ത് ബാധിച്ചിരിക്കുന്ന വര്‍ഗീയതയെയും ബി.ജെ.പി സര്‍ക്കാരിനെയും തൂത്തെറിയാന്‍ കഴിയില്ലെന്ന് അറിയാവുന്നവര്‍ തന്നെയാണ് മമതയും മായാവതിയും. എന്നിട്ടും ലോക്‌സഭാതെരഞ്ഞെടുപ്പിന് മൂന്നുമാസം മാത്രമുള്ളപ്പോള്‍ പോലും അവര്‍ സംയുക്തയോഗങ്ങളില്‍നിന്ന് വിട്ടുനില്‍ക്കുന്നത് ആരുടെ ഗുണത്തിനാണെന്ന് സംശയിക്കേണ്ടിയിരിക്കുന്നു. പശ്ചിമബംഗാളില്‍ കോണ്‍ഗ്രസുമായി സഖ്യത്തിനില്ലെന്നാണ് കഴിഞ്ഞദിവസം തൃണമൂല്‍ കോണ്‍ഗ്രസ് പ്രഖ്യാപിച്ചിരിക്കുന്നത്. ബി.ജെ.പിക്കെതിരെയാണ് പ്രധാന പോരാട്ടമെന്ന് മമതയും സി.പി.എം നേതാവ് സീതാറാം യെച്ചൂരിയും പറയുന്നു. എന്നിട്ടും അവിടെ എന്തുകൊണ്ട് ബി.ജെ.പിക്കെതിരായ വിശാല സഖ്യത്തിന് ഇവര്‍ തയ്യാറാകുന്നില്ല. എങ്ങനെയും തങ്ങളുടെ വോട്ടുകള്‍ വര്‍ധിപ്പിക്കുക എന്നതാണ് ലക്ഷ്യമെങ്കില്‍ മധ്യപ്രദേശില്‍ ഇത്തവണയും കഴിഞ്ഞ തവണ യു.പിയിലും അനുഭവിക്കേണ്ടിവന്ന തിക്തഫലം പ്രതിപക്ഷത്തിന് ആവര്‍ത്തിക്കും. യു.പി മുഖ്യമന്ത്രി യോഗി ആദിത്യനാഥ് വിജയിച്ച ഗോരഖ്പൂര്‍ മണ്ഡലത്തിലെ ഉപതെരഞ്ഞെടുപ്പില്‍ കോണ്‍ഗ്രസ്-ബി.എസ്.പി-എസ്.പി സഖ്യം നേടിയ ഗംഭീര വിജയം ഇവര്‍ മറക്കരുത്. കര്‍ണാടകയിലെയും ഗുരുദാസ്പൂര്‍, അജ്മീര്‍ തുടങ്ങിയ ലോക്‌സഭാമണ്ഡലങ്ങളിലെയും യു.പി.എ സഖ്യത്തിന്റെ വിജയങ്ങളും എല്ലാവര്‍ക്കും പാഠമാകണം. കര്‍ണാടകത്തില്‍ 2017 മേയിലെ നിയമസഭാതെരഞ്ഞെടുപ്പിന്‌ശേഷം ഏറ്റവും വലിയ ഒറ്റക്കക്ഷിയായിട്ടും ബി.ജെ.പിക്ക് സഭയില്‍ ഭൂരിപക്ഷം തെളിയിക്കാനാകാതിരുന്നതിനെതുടര്‍ന്ന് മുഖ്യമന്ത്രി യെദിയൂരപ്പക്ക് രാജിവെച്ചുപോകേണ്ടിവന്നുവെന്നത് കാണിക്കുന്നത്, കോണ്‍ഗ്രസ് എന്തുവിട്ടുവീഴ്ചക്കും തയ്യാറാണ് എന്നതാണ്. തങ്ങളേക്കാള്‍ എം.എല്‍.എമാര്‍ കുറവായിരുന്നിട്ടും ജനതാദളിന്റെ (എസ്) കുമാരസ്വാമിയെയാണ് അവിടെ കോണ്‍ഗ്രസ് മുഖ്യമന്ത്രിയാക്കിയത്. ഈ വിശാലചിന്താഗതിയാവണം പ്രതിപക്ഷത്തെ മുഴുവന്‍ കക്ഷികളെയും നയിക്കേണ്ടത്. തെരഞ്ഞെടുപ്പിനുശേഷം സഖ്യമാകാമെന്ന സീതാറാം യെച്ചൂരിയുടെ പ്രസ്താവനയില്‍ പ്രകടമാകുന്നത് തങ്ങളുടെ കയ്യിലുള്ളവ ഇനിയും നഷ്ടപ്പെടരുതെന്ന തോന്നലാണ്. 2014ലെ തെരഞ്ഞെടുപ്പില്‍ ചെയ്ത വോട്ടിന്റെ വെറും 33 ശതമാനംമാത്രം കൊണ്ടാണ് അവര്‍പോലും പ്രതീക്ഷിക്കാതെ ബി.ജെ.പി 282 സീറ്റുകള്‍ നേടി അധികാരത്തിലെത്തിയതെന്ന കാര്യം വിസ്മരിക്കപ്പെടരുത്.
പുതിയ ഭീഷണി തിരിച്ചറിഞ്ഞുതുടങ്ങിയിരിക്കുന്നു മോദിയും കൂട്ടരുമെന്ന ്‌തെളിയിക്കുന്നതാണ് കഴിഞ്ഞദിവസം ഗുജറാത്തില്‍ വൈദ്യുതി കുടിശിക ബി.ജെ.പി സര്‍ക്കാര്‍ എഴുതിത്തള്ളിയത്. അധികാരമേറ്റ് മണിക്കൂറുകള്‍ക്കകം മധ്യപ്രദേശിലും രാജസ്ഥാനിലും കാര്‍ഷിക കടങ്ങള്‍ എഴുതിത്തള്ളാന്‍ കോണ്‍ഗ്രസ് സര്‍ക്കാരുകള്‍ കാട്ടിയ ആര്‍ജവമാണ് ബി.ജെ.പിയെ ഭയപ്പെടുത്തുന്നതെന്ന ്‌വ്യക്തം. കാര്‍ഷികടങ്ങള്‍ ദേശീയാടിസ്ഥാനത്തില്‍ എഴുതിത്തള്ളാതെ മോദിയെ ഉറങ്ങാന്‍ അനുവദിക്കില്ലെന്ന് രാഹുല്‍ഗാന്ധി ചൊവ്വാഴ്ച നടത്തിയ പരാമര്‍ശം അദ്ദേഹം പ്രധാനമന്ത്രിപദത്തിലേക്ക് കൂടുതല്‍ കൂടുതല്‍ യോഗ്യനാകുന്നുവെന്നതിന്റെ നിദര്‍ശനമാണ്. ഈ ആവേശത്തിനും ജനേച്ഛക്കും പരമാവധി പിന്തുണ ഉറപ്പാക്കുകയാണ് യഥാര്‍ത്ഥ മതേര വിശ്വാസികളുടെ ഇന്നിന്റെ അടിയന്തിരകടമ. അല്ലാതിരുന്നാല്‍ കുടംകമഴ്്ത്തി വെള്ളമൊഴിച്ച ഫലമാകും 2019ലും; ഇന്ത്യ എന്ന മതേതര ജനാധിപത്യ റിപ്പബ്ലിക്കിന്റെ അന്ത്യവും.