തലശ്ശേരി മാടപ്പീടികയില്‍ യുവാക്കളുടെ പരാക്രമം. എക്‌സ്സൈസ് ഓഫീസ് അടിച്ചു തകര്‍ത്തു. കഞ്ചാവ് കേസില്‍ എക്‌സൈസ് സംഘം പിടികൂടിയ പ്രതികളാണ് കസ്റ്റഡിയില്‍ നില്‍ക്കെ ഓഫീസിനകത്ത് അക്രമം അഴിച്ചു വിട്ടത്. പെരിങ്ങത്തൂര്‍ സ്വദേശി സുല്‍ത്താന്‍ ജമാല്‍, ധര്‍മ്മടം സ്വദേശി ഖലീല്‍ എന്നിവരാണ് അക്രമം നടത്തിയ്. ഇന്ന് വൈകിട്ട് അഞ്ചരയോടെയാണ് സംഭവം.

ഓഫീസിനകത്തെ മേശകളും കസേരകളും ഇരുവരും ചേര്‍ന്ന് തല്ലിപ്പൊട്ടിച്ചു. ഉദ്യോഗസ്ഥര്‍ ബലം പ്രയോഗിച്ചാണ് പ്രതികളെ കീഴ്‌പ്പെടുത്തിയത്. ഇവരുടെ പക്കല്‍ നിന്ന് 40 ഗ്രാം കഞ്ചാവാണ് എക്‌സൈസ് സംഘം പിടിച്ചെടുത്തത്. ഇരുവര്‍ക്കുമെതിരെ കഞ്ചാവ് കേസിന് പുറമെ പൊതുമുതല്‍ നശിപ്പിച്ചതിനും കൃത്യനിര്‍വഹണം നടത്തുകയായിരുന്ന ഉദ്യോഗസ്ഥരെ ആക്രമിച്ചതിനും കേസെടുക്കുമെന്ന് ഉദ്യോഗസ്ഥര്‍ അറിയിച്ചു.

തലശേരി എക്‌സൈസ് പ്രിവന്റീവ് ഓഫീസര്‍ സുധീര്‍ വാഴവളപ്പിലിന് ലഭിച്ച രഹസ്യവിവരത്തെ തുടര്‍ന്ന് വൈകുന്നേരത്തോടെയാണ് തലശേരിയിലെ സ്വകാര്യ ലോഡ്ജിന് മുന്നില്‍ നിന്നും ഇരുവരെയും കഞ്ചാവ് സഹിതം പിടികൂടുന്നത്. ഖലീലിന്റെ കൈവശം 18 ഗ്രാമും, ജമാലിന്റെ കൈവശം 22 ഗ്രാം കഞ്ചാവുമുണ്ടായിരുന്നു. പരിശോധനയില്‍ ജമാലിന്റെ കൈയ്യില്‍ നിന്നും എസ് മോഡല്‍ കത്തിയും പിടികൂടി.

ഓഫീസിലുണ്ടായിരുന്ന കമ്പ്യൂട്ടര്‍ സ്‌കാനര്‍ , പ്രിന്റര്‍, ടേബിള്‍, ഫാന്‍ എന്നിവ അടിച്ചു തകര്‍ത്തു. തുടര്‍ന്ന് അസി. എക്‌സൈസ് ഓഫീസര്‍ സെന്തില്‍കുമാര്‍, പ്രിവന്റീവ് ഓഫീസര്‍ വി.കെ ഷിബു, എക്‌സൈസ് ഉദ്യോഗസ്ഥരായ ലിമേഷ്, വി.കെ ഫൈസല്‍, യു.ഷെനിത്ത് രാജ്, ജസ്‌ന ജോസഫ്, എം.ബീന എന്നിവര്‍ ചേര്‍ന്നാണ് അക്രമികളെ പിടികൂടിയത്. വനിതാ ജീവനക്കാര്‍ അടക്കമുള്ളപ്പോഴായിരുന്നു അക്രമം. കഴിഞ്ഞ ദിവസവം ഖലീലിനെ എക്‌സ്സൈസ് സംഘം പിടികൂടിയിരുന്നു. ജാമ്യത്തിലിറങ്ങിയ ശേഷമാണ് വീണ്ടും കഞ്ചാവുമായി പിടിയിലായത്. ജമാല്‍ പെരിങ്ങത്തൂരിലെ സൂപ്പര്‍ മാര്‍ക്കറ്റ് അടിച്ചു പൊളിച്ച കേസിലും പ്രതിയാണ്. പ്രതികളെ ന്യൂമാഹി പൊലീസിന് കൈമാറും.