കല്പറ്റ: വയനാട് വന്യജീവി സങ്കേതത്തില് തീപിടിത്തം. ബത്തേരി റേഞ്ചിലെ ഓടപ്പള്ളി വനമേഖലയിലാണ് തീപിടുത്തമുണ്ടായത്. വനംവകുപ്പും ഫയര്ഫോഴ്സും ചേര്ന്ന് നാലു മണിക്കൂര് നടത്തിയ ശ്രമത്തിനൊടുവില് തീ നിയന്ത്രണവിധേയമാക്കി.
ശനിയാഴ്ച ഉച്ചക്ക് ഒന്നോടെയാണ് തീപിടുത്തമുണ്ടായത്. നായ്ക്കട്ടി ഫോറസ്റ്റ് സ്റ്റേഷന് പരിധിയിലാണ് ആദ്യം തീ പടര്ന്നതായി ശ്രദ്ധയില്പെട്ടത്. വേനല് കനത്തതോടെ അടിക്കാട്, മരങ്ങള്, മുള എന്നിവ ഉണങ്ങിയതിനാല് തീ വളരെ വേഗത്തില് പടര്ന്നു പിടിക്കുകയായിരുന്നു. ഉടന്തന്നെ വനംവകുപ്പ് ഉദ്യോഗസ്ഥര് അഗ്നിശമനസേനയെ വിവരമറിയിച്ചു.