ഭുവനേശ്വര്‍: ഐഎസ്എലില്‍ കേരള ബ്ലാസ്റ്റേഴ്‌സിന് ഇന്ന് ആദ്യ എവേ മത്സരം. കൊച്ചിയില്‍ ജയത്തോടെ തുടങ്ങിയ ടീം രണ്ടാം മത്സരത്തില്‍ എടികെ മോഹന്‍ബഗാനോട് 5-2ന് തോറ്റിരുന്നു. ഈ തോല്‍വി മറക്കാനാണ് ബ്ലാസ്റ്റേഴ്‌സ് ഇന്ന് ഒഡീഷ എഫ്‌സിക്കെതിരെ ഇറങ്ങുന്നത്. വൈകിട്ട് 7.30നാണ് കിക്കോഫ്. രണ്ടു മത്സരങ്ങളില്‍ നിന്ന് മൂന്ന് പോയിന്റുള്ള ബ്ലാസ്റ്റേഴ്‌സ് നിലവില്‍ എട്ടാം സ്ഥാനത്താണ്. സമാന സ്ഥിതിയിലുള്ള ഒഡീഷ എഫ്‌സി ഒമ്പതാം സ്ഥാനത്തും.
ആദ്യ രണ്ട് രണ്ട് മത്സരങ്ങളിലും അറ്റാക്കിന് മുന്‍തൂക്കം നല്‍കി കളിച്ച ബ്ലാസ്റ്റേഴ്‌സ് ഇന്നും ശൈലി തുടരുമെന്ന് കോച്ച് ഇവാന്‍ വുകോമനോവിച്ച് പറയുന്നു. കളിക്കാര്‍ അറ്റാക്കിങ് ഫുട്‌ബോള്‍ ആസ്വദിക്കുന്നുണ്ട്. പ്രതിരോധ പിഴവുകള്‍ വരും മത്സരങ്ങളില്‍ പരിഹരിക്കും. എന്നും വിജയം തന്നെയാണ് ടീം ലക്ഷ്യമിടുന്നത്. വിജയിച്ചാലും പരാജയപ്പെട്ടാലും കാര്യങ്ങളെ ടീം പോസിറ്റീവായി കാണും. ഒഡീഷ കരുത്തരായ ടീമാണെന്നും കോച്ച് കൂട്ടിച്ചേര്‍ത്തു. കഴിഞ്ഞ മത്സരത്തിലെ ടീമില്‍ നിന്ന് കാര്യമായ മാറ്റം ഇന്നുണ്ടാവാന്‍ സാധ്യതയില്ല.
ആദ്യ മത്സരത്തില്‍ ജംഷെഡ്പൂരിനെ തോല്‍പ്പിക്കുകയും രണ്ടാം മത്സരത്തില്‍ മുംബൈയോട് തോല്‍ക്കുകയും ചെയ്ത ഒഡീഷയുടെ ആദ്യ ഹോം മത്സരമാണിന്ന്. ഏറ്റവുമൊടുവില്‍ കലിംഗയില്‍ ഇരുടീമുകളും നേര്‍ക്കനേര്‍ വന്നപ്പോള്‍ ആവേശ സമനിലയായിരുന്നു ഫലം (4-4).