ഗോരഖ്പൂര്‍: ‘മോദിജിയുടെ പുതിയ ഇന്ത്യ ഇതാണെങ്കില്‍ ഞങ്ങള്‍ക്ക് ഇത്തരത്തിലുള്ള പുതിയ ഇന്ത്യ വേണ്ടെന്ന് രാഹുല്‍ഗാന്ധി. ഞങ്ങള്‍ക്ക് വേണ്ടത് ആശുപത്രിയിലെത്തുന്ന രോഗികള്‍ അസുഖം മാറി സന്തോഷത്തോടെ തിരിച്ചുപോകുന്ന ഇന്ത്യയെയാണ്’. ബി.ആര്‍.ഡി ആശുപത്രിയില്‍ ഓക്‌സിജന്‍ കിട്ടാതെ മരിച്ച കുഞ്ഞുങ്ങളുടെ വീട് സന്ദര്‍ശിച്ചശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം. ഗോരഖ്പൂര്‍ ദുരന്തം രാജ്യത്തിന്റെ ആരോഗ്യമേഖലയിലെ ദയനീയ അവസ്ഥയാണ് വെളിവാക്കുന്നതെും രാഹുല്‍ പറഞ്ഞു.

ആശുപത്രിയുടെ ദയനീയാവസ്ഥ നേരത്തെതന്നെ പ്രധാനമന്ത്രിയുടെ ശ്രദ്ധയില്‍പ്പെടുത്തിയിരുന്നെന്ന് രാഹുല്‍ പറഞ്ഞു. ദുരന്തത്തെ മറയ്ക്കാന്‍ ശ്രമിക്കുന്നതിനു പകരം സംഭവത്തില്‍ ഉചിതമായ നടപടിയെടുക്കണമെന്നും മുഖ്യമന്ത്രി യോഗി ആദിത്യനാഥിനോട് രാഹുല്‍ ആവശ്യപ്പെട്ടു.

നേരത്തെ രാഹുല്‍ ഗാന്ധി ഗോരഖ്പൂര്‍ ആശുപത്രി സന്ദര്‍ശിക്കുന്നതിനെ എതിര്‍ത്ത് യോഗി ആദിത്യനാഥ് രംഗത്ത് വന്നിരുന്നു. ഗോരഖ്പൂരിനെ പിക്‌നിക് സ്‌പോട്ടാക്കാന്‍ അനുവദിക്കില്ലെന്നാണ് യോഗി പറഞ്ഞിരുന്നത്. ഡല്‍ഹിയിലെ ‘യുവരാജാവിന്’ ഗൊരഖപുര്‍ ഒരു ഉല്ലാസകേന്ദ്രമാക്കാന്‍ അനുവദിക്കില്ലെന്നായിരുന്നു യോഗിയുടെ പരിഹാസം. ഗൊരഖ്പുരിലെ കുട്ടികളുടെ കൂട്ടമരണം വിഷയത്തില്‍ അലഹാബാദ് ഹൈക്കോടതി ശക്തമായി വിമര്‍ശിച്ചിരുന്നു. ഇതിനിടെയുള്ള കോണ്‍ഗ്രസ് ഉപാധ്യക്ഷന്റെ സന്ദര്‍ശനം യോഗിക്ക് കടുത്ത വെല്ലുവിളിയാണ് ഉയര്‍ന്നത്.

സ്വച്ഛ് യുപി, സ്വസ്ത്യ യുപി ക്യാംപയിന്റെ ഉദ്ഘാടനം നിര്‍വഹിക്കവെയാണ് യോഗി രാഹുലിന്റെ സന്ദര്‍ശനത്തെ പരിഹസിച്ചത്. ഡല്‍ഹിയില്‍ ഇരിക്കുന്ന യുവരാജാവിന് ശുചിത്വത്തിന്റെ പ്രധാന്യം മനസിലാകില്ലെന്നും, ഗൊരഖപുരിനെ ഒരു ഉല്ലാസകേന്ദ്രമാക്കാന്‍ അനുവദിക്കില്ലെന്നുമായിരുന്നു യോഗിയുടെ പരിഹാസം. രാഹുലിന്റെ സന്ദര്‍ശനം യോഗിയുടെ പരിഹാസത്തിനുള്ള ശക്തമായ മറുപടി കൂടിയായിരുന്നു.