ഇറാനില്‍ കാണാതായ മൂന്ന് ഇന്ത്യന്‍ പൗരന്മാരെ തെഹ്‌റാന്‍ പൊലീസ് മോചിപ്പിച്ചു. തെഹ്റാനിലെ വരാമില്‍ പൊലീസ് നടത്തിയ ഓപറേഷനിലാണ് ഇന്ത്യക്കാരെ രക്ഷപ്പെടുത്തിയതെന്ന് അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്യ്തു. ഇന്ത്യയിലെ ഇറാന്‍ എംബസിയാണ് പൗരന്മാരെ രക്ഷപ്പെടുത്തിയ വിവരം ഔദ്യോഗിക എക്‌സ് പേജിലൂടെ അറിയിച്ചത്. സുരക്ഷിതരായി നാട്ടിലേക്ക് മടങ്ങാനുള്ള നടപടി സ്വീകരിക്കുമെന്നും വിദേശകാര്യ മന്ത്രാലയം വക്താവ് രണ്‍ധീര്‍ ജയ്സ്വാള്‍ അറിയിച്ചു.

‘തെഹ്റാന്‍ പൊലീസ് കാണാതായ മൂന്ന് ഇന്ത്യന്‍ പൗരന്മാരെയും മോചിപ്പിച്ചു. ഇറാനില്‍ കാണാതായ മൂന്ന് ഇന്ത്യക്കാരെ പൊലീസ് കണ്ടെത്തി വിട്ടയച്ചതായി ഇറാനിലെ പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്യുന്നു -ഇറാന്‍ എംബസിയുടെ എക്‌സ് പോസ്റ്റില്‍ പറയുന്നു.

കഴിഞ്ഞ മാസമാണ് മൂന്ന് ഇന്ത്യന്‍ പൗരന്മാരെ തട്ടിക്കൊണ്ടു പോയതായി തെഹാറാന്‍ പൊലീസ് റിപ്പോര്‍ട്ട് ചെയ്തത്. പഞ്ചാബില്‍ നിന്നുള്ള മൂന്നു പേരാണ് ആസ്‌ട്രേലിയയിലേക്കുള്ള യാത്രാമധ്യേ ഇറാനിലെത്തിയത്. ഇറാനില്‍ എത്തിയതിന് പിന്നാലെ മൂന്നു പേരെയും കാണാതാവുകയായിരുന്നു. മേയ് 29ന് കാണാതായവര്‍ക്കായി തിരച്ചില്‍ നടക്കുന്നതായി ഇന്ത്യയിലെ ഇറാന്‍ എംബസി ഔദ്യോഗികമായി അറിയിച്ചിരുന്നു.

കോഴിക്കോട് ഒമ്പതാംക്ലാസുകാരന് പത്താംക്ലാസ് വിദ്യാര്‍ഥികളുടെ ക്രൂര മര്‍ദ്ദനം. പുതുപ്പാടി ഗവ. ഹൈസ്‌കൂളിലെ വിദ്യാര്‍ത്ഥിയായ അടിവാരം കളക്കുന്നുമ്മല്‍ അജില്‍ ഷാനാണ് മര്‍ദ്ദനമേറ്റത്. കുട്ടിയുടെ തലയിലും കണ്ണിനും പരുക്കേറ്റതായാണ് റിപ്പോര്‍ട്ട്.

നാലുമാസം മുമ്പ് അടിവാരം പള്ളിയില്‍ അജില്‍ഷാന്റെ സുഹൃത്തുക്കളും മറ്റൊരു സംഘവും തമ്മില്‍ വാക്കുതര്‍ക്കം ഉണ്ടായിരുന്നു. ഈ സംഘമാണ് ആക്രമണത്തിന് പിന്നിലെന്നാണ് കണ്ടെത്തല്‍. ഇതിന്റെ തുടര്‍ച്ചയായാണ് പുതിയ ആക്രമണമെന്നാണ് കുടുംബം പറയുന്നത്.

പരുക്കേറ്റ വിദ്യാര്‍ത്ഥിയെ അധ്യാപകര്‍ ആശുപത്രിയില്‍ എത്തിച്ചില്ലെന്ന് രക്ഷിതാക്കള്‍ ആരോപിച്ചു. ആക്രമം നടന്ന് രണ്ട് മണിക്കൂറിനുശേഷമാണ് രക്ഷിതാക്കള്‍ക്ക് വിവരം അറിയിച്ചതെന്നും കുടുംബം ആരോപിച്ചു. സംഭവത്തില്‍ ജുവനൈല്‍ ജസ്റ്റിസ് ബോര്‍ഡിന് താമരശ്ശേരി പൊലീസ് റിപ്പോര്‍ട്ട് നല്‍കിയിട്ടുണ്ട്.

ഇസ്രാഈലിന്റെ മിസൈല്‍ നിര്‍മ്മാണ ലൈസന്‍സ് താല്‍ക്കാലികമായി നിര്‍ത്തിവയ്ക്കാന്‍ സ്പാനിഷ് പ്രതിരോധ മന്ത്രാലയത്തിന്റെ ഉത്തരവ്. സ്പാനിഷ് സൈന്യത്തിനും മറൈന്‍ കോര്‍പ്‌സിനും വേണ്ടിയുള്ള 168 സ്‌പൈക്ക് എല്‍ആര്‍2 ആന്റി ടാങ്ക് സിസ്റ്റങ്ങള്‍ വിതരണം ചെയ്യുന്നതിനുള്ള 285 മില്യണ്‍ യൂറോയുടെ കരാര്‍ റദ്ദാക്കിക്കിയതായും അന്താരാഷ്ട്ര വാര്‍ത്താ ഏജന്‍സി റിപ്പോര്‍ട്ട് ചെയ്തു.

2023 ഒക്ടോബര്‍ 3-നാണ് ഇസ്രഈലുമായി സ്‌പെയിന്‍ കരാറിലെത്തിയത്. ഗസ്സയിലെ ഇസ്രാഈല്‍ യുദ്ധം ആരംഭിക്കുന്നതിന് ഏതാനും ദിവസങ്ങള്‍ക്ക് മുമ്പായിരുന്നു ഇത്. ഇസ്രാഈല്‍ സൈനിക വ്യവസായവുമായി സ്‌പെയിന്‍ നടത്തിയ മൂന്ന് പ്രധാന കരാറുകളില്‍ ഒന്നാണിത്. ഗസ്സയില്‍ വംശഹത്യ നടത്തുന്ന ഇസ്രഈലുമായി ഒരു തരത്തിലുമുള്ള ബന്ധവും വേണ്ടെന്ന ശ്രമത്തിന്റെ ഭാഗമാണ് ഈ തീരുമാനം എന്ന് സ്പാനിഷ് വാര്‍ത്താ ഏജന്‍സി റിപ്പോര്‍ട്ട് ചെയ്തു.

പ്രതിരോധ മന്ത്രാലയം ഇസ്രാഇല്‍ കമ്പനിയായ റാഫേലിന്റെ ലൈസന്‍സ് പിന്‍വലിച്ചുവെന്ന് സ്പാനിഷ് ഔദ്യോഗിക വൃത്തങ്ങള്‍ പറഞ്ഞതായി അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്യുന്നു. ഇസ്രാഈല്‍ കമ്പനിയില്‍ നിന്ന് സാങ്കേതികമായും സുരക്ഷാപരമായും വേര്‍പെടുത്തുന്നതിനുള്ള ഒരു പദ്ധതിയില്‍ മന്ത്രാലയം പ്രവര്‍ത്തിക്കുന്നുണ്ടെന്നും അവര്‍ പറഞ്ഞു.