ഉത്തര്‍പ്രദേശിലെ സിദ്ധാര്‍ഥ് നഗറില്‍ പ്രായപൂര്‍ത്തിയാകാത്ത 2 കുട്ടികളെ മര്‍ദിച്ച് മൂത്രം കുടിപ്പിക്കുകയും സ്വകാര്യ ഭാഗങ്ങളില്‍ മുളകുപൊടി പുരട്ടുകയും ചെയ്തു. കോഴി ഫാമില്‍ നിന്ന് കോഴിയെ മോഷ്ടിച്ചെന്നാരോപിച്ചായിരുന്നു മര്‍ദനം. സംഭവത്തില്‍ 6 പേരെ അറസ്റ്റ് ചെയ്തതായി പൊലീസ് അറിയിച്ചു.
ശനിയാഴ്ച്ച ചില പ്രാദേശിക വാട്‌സ് അപ്പ് ഗ്രൂപ്പുകളില്‍ വിഡിയോ പ്രചരിച്ചതോടെയാണ് മര്‍ദ്ദനവിവരം പുറത്തറിയുന്നത്. വാട്‌സ് അപ്പ് ഗ്രൂപ്പില്‍ അംഗമായ ഒരു പൊലീസ് കോണ്‍സ്റ്റബിള്‍ വീഡിയോ കണ്ട ഉടനെ മുതിര്‍ന്ന ഉദ്യോഗസ്ഥരെയും സൈബര്‍ വിഭാഗത്തേയും വിവരം അറിയിച്ചു. അങ്ങനെയാണ് സംഭവം നടന്ന സ്ഥലവും മറ്റ് വിവരങ്ങളും കണ്ടെത്തുന്നത്.
ചോദ്യം ചെയ്യലില്‍ വ്യാഴാഴ്ച ഉച്ചയ്ക്ക് 10 ഉം 14 ഉം വയസ്സുള്ള രണ്ട് കുട്ടികള്‍ തന്റെ കടയില്‍ അതിക്രമിച്ച് കയറുകയും പണപ്പെട്ടിയില്‍ കൃത്രിമം കാണിക്കാന്‍ ശ്രമിക്കുകയും ചെയ്‌തെന്നും അതാണ് മര്‍ദിക്കാന്‍ കാരണമെന്നുമാണ് ഫാം ഉടമ പൊലീസിനോട് പറഞ്ഞത്.