ഇടുക്കിയിലെ കൈയേറ്റം ഒഴിപ്പിക്കാന് സര്ക്കാര് പ്രത്യേക ദൗത്യസംഘത്തെ നിയോഗിച്ചു. ജില്ലാ കളക്ടര് ദൗത്യത്തിന് നേതൃത്വം നല്കും. പട്ടയം അനുവദിക്കാത്ത കൈയേറ്റങ്ങള് ഒഴിപ്പിക്കാനാണ് സര്ക്കാര് ഉത്തരവ്. ജില്ലാ കളക്ടര്ക്ക് പുറമെ സബ് കളക്ടറും ആര്.ഡി.ഒയും ഉള്പ്പെട്ടതാണ് സംഘം.
കൈയേറ്റം ഒഴിപ്പിക്കാന് ജില്ലാ പോലീസ് മേധാവി മതിയായ സുരക്ഷ ഒരുക്കണം. വനം, പൊതുമരാമത്ത്, തദ്ദേശ ഭരണവകുപ്പുകള് ആവശ്യമായ സഹായങ്ങള് നല്കണമെന്നും ഉത്തരവില് പറയുന്നു.
എന്നാല്, മൂന്നാര് ദൗത്യസംഘത്തെ ഭയപ്പെടുന്നില്ലെന്ന് എം.എം. മണി എം.എല്.എ. പറഞ്ഞു. കാലങ്ങളായി കുടിയേറി കുടില്കെട്ടി താമസിക്കുന്നവരുടേയും വ്യാപാര സ്ഥാപനങ്ങള് നടത്തുന്നവരുടേയും മെക്കിട്ട് കേറാന് അനുവദിക്കില്ല. നിയമവിരുദ്ധമായി ദൗത്യസംഘം പെരുമാറിയാല് അവരെ തുരത്തും. ടാറ്റയുടേയും ഹാരിസണ് മലയാളത്തിന്റേയും കൈയേറ്റമാണ് പരിശോധിക്കേണ്ടതെന്നും എം.എം. മണി പറഞ്ഞു.