കോഴിക്കോട്: ഒഞ്ചിയത്തെ മണ്ണില്‍ വീണ്ടും സി.പി.എമ്മിന് കാലിടറി. ഒഞ്ചിയം ഗ്രാമ പഞ്ചായത്തിലെ അഞ്ചാം വാര്‍ഡിലേക്ക് നടന്ന തെരഞ്ഞെടുപ്പില്‍ ആര്‍.എം.പിയുടെ സ്ഥാനാര്‍ത്ഥിയായി മത്സരിച്ച പി.ശ്രീജിത്തിന് വമ്പന്‍ വിജയം. ഇവിടെ 308 വോട്ടുകള്‍ക്കാണ് എല്‍.ഡി.എഫ് സ്ഥാനാര്‍ഥിയായ രാജാറാം തൈപ്പള്ളിയെ ആര്‍.എം.പി തോല്‍പിച്ചത്. കേവലം ഒരു പഞ്ചായത്തിലെ വാര്‍ഡിലേക്കുള്ള ഉപതെരഞ്ഞെടുപ്പിന് സി.പി.എം വന്‍ പ്രാധാന്യമാണ് നല്‍കിയിരുന്നത്. സംസ്ഥാന നേതാക്കളടക്കം ഇവിടെ പ്രചാരണ പരിപാടികള്‍ക്കായി എത്തിയിരുന്നു. കൂടാതെ കവിയും സാംസ്‌കാരിക പ്രവര്‍ത്തകനുമായ രാജാറാം തൈപ്പളളിയെ സ്ഥാനാര്‍ത്ഥിയായി നിര്‍ത്തിയതും വിജയം ലക്ഷ്യം വെച്ചായിരുന്നു. പഞ്ചായത്തംഗമായിരുന്ന എ.ജി ഗോപിനാഥിന്റെ നിര്യാണത്തെ തുടര്‍ന്നാണ് ഉപതെരഞ്ഞെടുപ്പ് നടന്നത്. ആര്‍.എം.പിയുടെ കരുത്ത് വ്യക്തമാക്കുന്നതാണ് വിജയമെന്ന് ആര്‍.എം.പി നേതാവ് എന്‍. വേണു പറഞ്ഞു.