അഡ്വ. അബൂ സിദ്ധീഖ്‌

ഭരണത്തിലും ഭരണനിര്‍വഹണത്തിലും ഭരണകര്‍ത്താക്കളെ തിരഞ്ഞെടുക്കുന്നതിലും ജനങ്ങള്‍ക്ക് സമഗ്രമായ പങ്കാളിത്തം നല്‍കുന്ന ജനാധിപത്യമാണ് ഭരണഘടനയുടെ കാതലും കരുത്തും. അതു കൊണ്ട് തന്നെ ലോകത്തിലെ ഏറ്റവും വലിയ ജനാധിപത്യ രാജ്യവുമാണ് ഇന്ത്യ. ഇന്ത്യയിലെ വൈവിധ്യങ്ങളേയും, വൈജാത്യങ്ങളേയും ഭാരതീയര്‍ എന്ന ഏക വികാരത്തില്‍ ഒരുമിപ്പിക്കുകയും ഒന്നാക്കി നിര്‍ത്തുകയും ചെയ്യുന്ന ചാലകശക്തിയും ഭരണഘടനയാണ്.

ഭരണഘടനാനിര്‍മാണ സഭാംഗങ്ങള്‍ എന്ന നിലയില്‍ ഖാഇദേ മില്ലത്ത് മുഹമ്മദ് ഇസ്മയില്‍ സാഹിബ്, ബി. പോക്കര്‍ സാഹിബ്, ബി.ആര്‍ അംബേദ്ക്കര്‍, പണ്ഡിറ്റ് ജവഹര്‍ലാല്‍ നെഹ്‌റു എന്നിവരുടെ നിരന്തരമായ പോരാട്ടത്തിന്റേയും ആവശ്യത്തിന്റേയും വാദത്തിന്റേയും അടിസ്ഥാനത്തിലാണ് ഭരണഘടനയില്‍ അഭിപ്രായ സ്വാതന്ത്ര്യം, വിശ്വാസ സ്വാതന്ത്ര്യം, ന്യൂന പക്ഷാവകാശം, അവസര സമത്വം, തുല്യനീതി, ആരാധാന സ്വാതന്ത്ര്യം എന്നീ സുപ്രധാന ആശയങ്ങള്‍ ഉള്‍പ്പെട്ടതും ഉള്‍കൊള്ളിച്ചതും. എന്നാല്‍ വര്‍ത്തമാന കാല ഇന്ത്യ ഈ ആശയങ്ങളെ എല്ലാം ഇല്ലാതാക്കാനുള്ള നീക്കത്തിന് ഭരണകൂടം തന്നെ കൂട്ടുനില്‍ക്കുന്ന കാഴ്ചക്കാണ് സാക്ഷ്യം വഹിക്കേണ്ടി വരുന്നത്.

ഭരണഘടനാമൂല്യങ്ങളും ആശയങ്ങളും നിലനില്‍ക്കുന്നത് ലെജിസ്ലേച്ചര്‍, എക്‌സിക്യൂട്ടീവ്, ജുഡീഷ്യറി, പ്രസ്സ് എന്നീ നാല് സ്തംബങ്ങളാണ് . എന്നാല്‍ ഈ സുപ്രധാന ഘടകങ്ങളേയും ദുര്‍ബലപ്പെടുത്താനും, ദുഷിപ്പിക്കാനുമുള്ള നീക്കങ്ങളും രാജ്യത്ത് ദ്രുതഗതിയില്‍ നടന്നുവരുന്നു. പൗരന്റെ അവസാന അഭയമായ ജുഡീഷ്യറിയെ പോലും സ്വതന്ത്രമായി പ്രവര്‍ത്തിക്കാന്‍ അനുവദിക്കുന്നില്ല. നീതിമാന്മാരായ ന്യായാധിപന്മാരെ ഭീഷണിപെടുത്തിയും സ്ഥലം മാറ്റിയും പ്രലോഭിച്ചും വരുതിയിലാക്കാന്‍ ശ്രമിക്കുന്നു. നിര്‍മിക്കപ്പെട്ട നിയമങ്ങള്‍ യഥാവിധം നടപ്പിലാക്കേണ്ടവരായ എക്‌സിക്യൂട്ടീവ് പക്ഷം ചേരുന്നു.

ലെജിസ്ലേജര്‍, ഭരണഘടനാശില്‍പികള്‍ കൊണ്ടുവന്ന എല്ലാ ആശയങ്ങളേയും ഇല്ലാതാകുന്ന തരത്തിലുള്ള നിയമങ്ങള്‍ തരാതരം പോലെ പാസ്സാക്കുന്നു. യാന്ത്രികമായി നിര്‍മിക്കുന്നു. ഫോര്‍ത്ത് എസ്റ്റേറ്റ് എന്നറിയപ്പെടുന്ന പ്രസ്സിന്റെ സ്വതന്ത്ര പ്രവര്‍ത്തനങ്ങളെ ഭരണാധികാരം ഉപയോഗിച്ച് തടയുന്നു. ജനാധിപത്യ രീതിയില്‍ തിരഞ്ഞെടുക്കപ്പെട്ട ഗവണ്‍മെന്റുകളെ, നിയമസഭകളെ മൂകസാക്ഷികളാക്കി, ഭരണത്തിന്റേയും ഭരണഘടനാപദവി കളുടേയും സ്വാധീനം ഉപയോഗിച്ച് അട്ടിമറിച്ച് രാജ്യത്തെ ജനാധിപത്യ സമ്പ്രദായത്തെ അപ്രസക്തമാക്കുന്നു. സത്യസന്ധരായ ന്യായാധിപന്മാര്‍, സിവില്‍ സര്‍വന്റ്‌സ്, മാധ്യമ പ്രവര്‍ത്തകര്‍, ബുദ്ധിജീവികള്‍, സാംസ്‌കാരിക നായകര്‍ എന്നിവരെല്ലാം നിരന്തരം ആക്രമിക്കപ്പെടുന്നു. ഭരണഘടനാദിനം ആചരിക്കപ്പെടുന്ന ഈ സുദിനത്തില്‍ ഇത്തരം വിഷയങ്ങളെല്ലാം ഏറെ ചര്‍ച്ചക്ക് വിധേയമാക്കേണ്ടവയാണ്. രാജ്യത്തിന്റെ ഫെഡല്‍ സംവിധാനം, സാമ്പത്തിക സൈനിക പ്രതിരോധ സംവിധാനം, ഭരണഘടനാ പദവികളിലെ നിയമനങ്ങള്‍, ജഡ്ജിമാരുടെ നിയമന സമ്പ്രദായം, സര്‍ക്കാര്‍ ഗവര്‍ണര്‍ തര്‍ക്കം തുടങ്ങിയ വിഷയങ്ങളും ചര്‍ച്ച ചെയ്യപ്പെടേണ്ടതാണ്.

എം. കൃഷ്ണകുമാര്‍

കേരളത്തിലെ പ്രമുഖ ചാനല്‍ കണ്ണൂര്‍ സര്‍വകലാശാലയില്‍ സമര്‍പ്പിച്ച വിവരാവകാശ നിയമപ്രകാരമുള്ള അപേക്ഷയിന്മേല്‍ സ്ഥാപനത്തിലെ സ്റ്റേറ്റ് പബ്ലിക് ഇന്‍ഫര്‍മേഷന്‍ ഓഫീസര്‍ നല്‍കിയ മറുപടി ചര്‍ച്ചാവിഷയമായിരിക്കുന്നു. സര്‍വകലാശാല നടത്തിയ ഓണ്‍ലൈന്‍ ഇന്റര്‍വ്യൂവിന്റെ വിശദാംശങ്ങള്‍ ആവശ്യപ്പെട്ടു നല്‍കിയ അപേക്ഷയിന്‍മേല്‍ നിയമനവുമായി ബന്ധപ്പെട്ട് ഫയല്‍ ചെയ്ത റിട്ട് ഹര്‍ജി കേരള ഹൈക്കോടതിയുടെ പരിഗണനയിലായതിനാല്‍ അഭിമുഖവുമായി ബന്ധപ്പെട്ട വീഡിയോ അനുവദിക്കുന്നത് ഇപ്പോള്‍ പരിഗണിക്കാന്‍ സാധിക്കുകയില്ല എന്ന മറുപടിയാണ് നല്‍കിയിരിക്കുന്നത്. 2005 ലെ വിവരാവകാശ നിയമം 8 (1) , 9 വകുപ്പുകള്‍ പ്രകാരം ചില വിവരങ്ങള്‍ വെളിപ്പെടുത്തലില്‍നിന്നും ഒഴിവാക്കിയിട്ടുണ്ട്. 8 (1) വകുപ്പിലെ (b), (d) ,(e) എന്നീ ഉപവകുപ്പുകള്‍ പ്രകാരം പബ്ലിക് ഇന്‍ഫര്‍മേഷന്‍ ഓഫീസര്‍മാര്‍ വിവരം നിരസിക്കുന്നത് അപ്പീലുകള്‍ക്കും കോടതി വ്യവഹാരങ്ങള്‍ക്കും ഇടയാകുന്നുണ്ട്.

വിവരാവകാശ നിയമം 8 (1) (b) വകുപ്പ് കോടതികളും ട്രിബ്യൂണലുകളുമായി ബന്ധപ്പെട്ട വിവരങ്ങളെ സംബന്ധിച്ചുള്ളതാണ്. ഈ വകുപ്പ് പ്രകാരം ഏതെങ്കിലും നിയമ കോടതിയാലോ, ട്രിബ്യൂണലാലോ പ്രത്യക്ഷമായി പ്രസിദ്ധീകരണം നിരോധിച്ചിട്ടുള്ള വിവരങ്ങളും വെളിപ്പെടുത്തിയാല്‍ കോടതിയലക്ഷ്യമാകുന്ന വിവരങ്ങളുടേയും വെളിപ്പെടുത്തലുകള്‍ ഒഴിവാക്കപ്പെട്ടിരിക്കുന്നു. കണ്ണൂര്‍ സര്‍വകലാശാല നല്‍കിയ മറുപടിയില്‍ അപേക്ഷകന്‍ ആവശ്യപ്പെട്ട വിവരം കോടതിയുടെ പരിഗണനയിലിരിക്കുന്ന വിഷയമായതിനാല്‍ ഇപ്പോള്‍ പരിഗണിക്കാന്‍ സാധ്യമല്ല എന്ന് അറിയിച്ചിരിക്കുന്നു. നിയമത്തിലെ 8 (1) (b) വകുപ്പ് ആധാരമാക്കി, കോടതി വ്യവഹാരവുമായി ബന്ധപ്പെട്ട് പൊതു അധികാരിയുടെ കൈവശമുള്ള അന്വേഷണ റിപ്പോര്‍ട്ടുകള്‍, നിയമോപദേശങ്ങള്‍, വസ്തുതാപ്രശ്‌നം, സത്യവാങ്മൂലം തുടങ്ങിയവയുടെ പകര്‍പ്പുകള്‍ ആവശ്യപ്പെട്ടുകൊണ്ട് സമര്‍പ്പിക്കുന്ന അപേക്ഷകള്‍ സാധാരണയായി നിരസിക്കുകയാണ് കണ്ടുവരുന്നത്. ഇത് പൊതു അധികാരികള്‍ നിയമത്തിലെ വകുപ്പുകളുടെ സൂക്ഷ്മ വ്യാഖ്യാനങ്ങളെപറ്റി ബോധവാന്മാരല്ലാത്തതുകൊണ്ടാണെന്ന് പറയേണ്ടിയിരിക്കുന്നു. ആവശ്യപ്പെട്ട വിവരം കോടതിയുടെ പരിഗണനയിലിരിക്കുന്നു എന്നതിന്റെ അടിസ്ഥാനത്തില്‍മാത്രം വിവരം നിരസിക്കാന്‍ സാധിക്കുകയില്ലെന്നും വെളിപ്പെടുത്തിയാല്‍ കോടതിയലക്ഷ്യമാകുന്ന വിവരങ്ങളാണ് നിയമത്തിലെ 8 (1) (യ) വകുപ്പുപ്രകാരം നിരസിക്കാന്‍ സാധിക്കുന്നതെന്നും പബ്ലിക് ഇന്‍ഫര്‍മേഷന്‍ ഓഫീസര്‍മാര്‍ അറിഞ്ഞിരിക്കേണ്ടതാണ്. മാത്രമല്ല, രഹസ്യമായി സൂക്ഷിക്കേണ്ടതാണെന്ന് കോടതി പ്രത്യക്ഷമായി ഉത്തരവായിട്ടുള്ള വിവരങ്ങള്‍ മാത്രമേ കക്ഷികള്‍ക്ക് ലഭിക്കാതിരിക്കുകയുള്ളൂ. കോടതി വ്യവഹാരവുമായി ബന്ധപ്പെട്ട മിക്കവാറും രേഖകള്‍ കോടതിയില്‍നിന്നും കക്ഷികള്‍ക്ക് അപേക്ഷ പ്രകാരം ശേഖരിക്കാവുന്നതാണ്. ആയതിനാല്‍ കോടതി ഏതെങ്കിലും വിവരം വെളിപ്പെടുത്തല്‍ പ്രത്യക്ഷമായി വിലക്കിയിട്ടില്ലെങ്കില്‍ പ്രസ്തുത വിവരം വെളിപ്പെടുത്തുന്നത് കോടതിയലക്ഷ്യമാവുകയില്ല.

നിയമത്തിലെ 8 (1) (d) വകുപ്പും വിവരം നിരസിക്കുന്നതിന് പൊതു അധികാരികള്‍ ദുരുപയോഗം ചെയ്യുന്നുണ്ട്. തക്കതായ അധികാര സ്ഥാനത്തിന് പൊതുജനത്തിന്റെ ഭൂരിപക്ഷ താല്‍പര്യം അത്തരം വിവരത്തിന്റെ വെളിപ്പെടുത്തല്‍ ആവശ്യപ്പെടുന്നുവെന്ന് ബോധ്യപ്പെടുന്നുവെങ്കിലല്ലാതെ മൂന്നാം കക്ഷിയുടെ മത്സരാവസ്ഥയ്ക്ക് ദോഷം ചെയ്യുമെന്നുള്ള വാണിജ്യ രഹസ്യത്തിന്റെയും വ്യാപാര രഹസ്യത്തിന്റെയും ബൗദ്ധിക സ്വത്തുക്കളും ഉള്‍പ്പെടെയുള്ള വിവരത്തിന്റെ വെളിപ്പെടുത്തലുമാണ് പ്രസ്തുത വകുപ്പുപ്രകാരം ഒഴിവാക്കിയിട്ടുള്ളത്. ലളിതമായി പറഞ്ഞാല്‍, മൂന്നാം കക്ഷി രഹസ്യമായി സൂക്ഷിക്കാന്‍ ഉദ്ദേശിച്ച രേഖകളാണ് യഥാര്‍ത്ഥത്തില്‍ ഈ വകുപ്പ് പ്രകാരം ഒഴിവാക്കാന്‍ സാധിക്കുന്നത്. ഇത്തരം സാഹചര്യങ്ങളില്‍ വിവരാവകാശ നിയമം വകുപ്പ് 11 അനുശാസിക്കുന്ന പ്രകാരം മൂന്നാം കക്ഷിയില്‍ നിന്നുള്ള വിവരം സംബന്ധിച്ചുള്ള നടപടിക്രമങ്ങള്‍ പബ്ലിക് ഇന്‍ഫര്‍മേഷന്‍ ഓഫീസര്‍ എടുക്കേണ്ടതാണ്. അപേക്ഷ ലഭിച്ച് 5 ദിവസത്തിനുള്ളില്‍ മൂന്നാം കക്ഷിക്ക് അപേക്ഷയെ സംബന്ധിച്ചും വിവരമോ രേഖയോ വെളിപ്പെടുത്തുന്നതിന് ഉദ്ദേശിക്കുന്നുവെന്നുള്ള വസ്തുതയും വിവരം വെളിപ്പെടുത്തേണ്ടതാണോ എന്നതു സംബന്ധിച്ച ലിഖിതമായോ വാക്കാലുള്ളതോ ആയ നിര്‍ദ്ദേശം നല്‍കുന്നതിന് മൂന്നാം കക്ഷിയെ ക്ഷണിച്ചുകൊണ്ടും ലിഖിതമായി നോട്ടീസ് നല്‍കേണ്ടതും മൂന്നാം കക്ഷിയുടെ അത്തരം നിര്‍ദ്ദേശം വിവരത്തിന്റെ വെളിപ്പെടുത്തല്‍ സംബന്ധിച്ച തീരുമാനമെടുക്കുമ്പോള്‍ ബന്ധപ്പെട്ട പബ്ലിക് ഇഫര്‍മേഷന്‍ ഓഫീസര്‍ പരിഗണിക്കേണ്ടതുമാണെന്ന് ഈ വകുപ്പ് നിര്‍ദ്ദേശിക്കുന്നു. ഇവിടെ പബ്ലിക് ഇന്‍ഫര്‍മേഷന്‍ ഓഫീസറുടെ വിവേചനാധികാരം പ്രയോഗിക്കാവുന്നതാണ്. മൂന്നാം കക്ഷി വിവരം നല്‍കുന്നതിന് വിസമ്മതം പ്രകടിപ്പിച്ചാല്‍ പോലും നിയമത്താല്‍ സംരക്ഷിക്കപ്പെട്ടിട്ടുള്ള വ്യാപാരത്തിന്റെയോ വാണിജ്യത്തിന്റെയോ രഹസ്യത്തിന്റെ സംഗതിയിലൊഴികെ, മൂന്നാം കക്ഷിയുടെ താല്‍പര്യത്തിന് ഉണ്ടാവുന്ന ഹാനിക്കോ നഷ്ടത്തേക്കാളോ കൂടുതല്‍ പ്രാധാന്യം പൊതു താല്‍പര്യത്തിനുണ്ടെങ്കില്‍ വെളിപ്പെടുത്തല്‍ അനുവദിക്കാവുന്നതാണ്. ഇത്തരം സാഹചര്യത്തില്‍ സമര്‍പ്പിക്കപ്പെട്ട അപേക്ഷയില്‍മേല്‍ ‘പൊതു താല്‍പര്യം’ കണ്ടെത്താന്‍ കഴിയാതെ അല്ലെങ്കില്‍ അതിന് ശ്രമിക്കാതെ വിവരം നിരസിക്കാനാണ് മിക്കവാറും ഇന്‍ഫര്‍മേഷന്‍ ഓഫീസര്‍മാര്‍ തയ്യാറാകുന്നത്.

നിയമത്തിലെ 8 (1) (e) വകുപ്പ് വിശ്വാസാധിഷ്ഠിതമായ (Fiduciary relationship) വിവരങ്ങള്‍ വെളിപ്പെടുത്തുന്നതിനെ സംബന്ധിച്ചുള്ളതാണ്. അഭിഭാഷകനും കക്ഷിയും ഡോക്ടറും രോഗിയും നികുതി വകുപ്പ് ഉദ്യോഗസ്ഥനും സ്റ്റോക്ക്‌ബ്രോക്കറും കസ്റ്റമറും തമ്മിലുള്ള ബന്ധം ഇത്തരത്തിലുള്ളതാണ്. ഒരു വ്യക്തി തന്നെക്കാള്‍ യോഗ്യതയുള്ളതും തന്റെ താല്‍പര്യങ്ങള്‍ സംരക്ഷിക്കാന്‍ കഴിവുണ്ടെന്ന് താന്‍ വിശ്വസിക്കുന്നതുമായ മറ്റൊരു വ്യക്തിയില്‍ വിശ്വാസം അര്‍പ്പിക്കുമ്പോഴാണ് ഇത്തരത്തിലൊരു ബന്ധം രൂപപ്പെടുന്നതെന്ന് സാമാന്യമായി പറയാം. ഇവിടെയും വിവരം വെളിപ്പെടുത്തുന്നത് പരിഗണിക്കുമ്പോള്‍ പൊതുജനത്തിന്റെ ഭൂരിപക്ഷ താല്‍പര്യം കണക്കിലെടുക്കേണ്ടിയിരിക്കുന്നു.

നിയമത്തിലെ വകുപ്പ് 9 പകര്‍പ്പവകാശവുമായി ബന്ധപ്പെട്ടതാണ്. വെളിപ്പെടുത്തല്‍ ഒരു വ്യക്തിയുടെ പകര്‍പ്പവകാശത്തിന്റെ ലംഘനമാകുന്ന വിവരങ്ങളാണ് ഈ വകുപ്പു പ്രകാരം ഒഴിവാക്കിയിട്ടുള്ളത്. സര്‍ക്കാരിന്റെ പകര്‍പ്പവകാശം ഈ വകുപ്പിന്റെ പരിധിയില്‍ വരുന്നില്ല. ഏറ്റവും ശക്തമായ ജനപക്ഷ നിയമമാണ് വിവരാവകാശ നിയമം. ഈ നിയമത്തിലെ വ്യവസ്ഥകളെക്കുറിച്ച് അപേക്ഷകര്‍ക്കും അധികാരികള്‍ക്കും ശരിയായ ബോധ്യമുണ്ടെങ്കില്‍ മാത്രമേ അറിയാനുള്ള അവകാശം പൂര്‍ണ തോതില്‍ പ്രാവര്‍ത്തികമാകുകയുള്ളൂ.

എ.എന്‍ ഷംസീര്‍
(കേരള നിയമസഭാ സ്പീക്കര്‍)

രാജ്യത്തിന്റെ അടിത്തറയെന്ന് വിശേഷിപ്പിക്കാവുന്ന ഇന്ത്യയുടെ ഭരണഘടനക്ക് അംഗീകാരം ലഭിച്ചിട്ട് ഇന്നേക്ക് എഴുപത്തിമൂന്ന് വര്‍ഷം പൂര്‍ത്തിയാവുന്നു. ഇന്ത്യന്‍ ഭരണഘടന, രാജ്യത്തെ ഓരോ പൗരന്റേയും അവകാശങ്ങളെയും ചുമതലകളെയും കുറിച്ച് ബോധ്യപ്പെടുത്തുന്നുണ്ട്. രാജ്യത്തിന്റെ ജനാധിപത്യവും മതനിരപേക്ഷതയും ഊട്ടിയുറപ്പിക്കുന്ന, പൗരാവകാശങ്ങള്‍ ഉയര്‍ത്തിപ്പിടിക്കുന്ന ഭരണഘടന സംരക്ഷിക്കപ്പെടേണ്ടത് വര്‍ത്തമാനകാലത്തെ ഏറ്റവും പ്രധാനപ്പെട്ട കാര്യമാണ്.

ഓരോ ഇന്ത്യക്കാരന്റേയും ജീവിതത്തില്‍ നിറഞ്ഞുനില്‍ക്കുന്ന, ദിശാബോധം നല്‍കുന്ന ആധികാരിക മാര്‍ഗരേഖയാണ് ഭരണഘടന. രാജ്യത്തിന്റെ സംസ്‌കാരം എന്നത് ഭരണഘടന ഉയര്‍ത്തിപ്പിടിക്കുന്ന ബഹുസ്വരതയാണ്. ജനാധിപത്യവും മതനിരപേക്ഷതയുമാണ് ഭരണഘടനയുടെ ഉള്‍ക്കാമ്പ്. ഭരണനിര്‍വഹണം, നിയമനിര്‍മാണം, നീതിന്യായ പരിപാലനം തുടങ്ങിയ ഭരണയന്ത്രത്തിന്റെ വ്യത്യസ്ത വിഭാഗങ്ങള്‍ തമ്മിലും കേന്ദ്ര സര്‍ക്കാര്‍, സംസ്ഥാന സര്‍ക്കാരുകള്‍, പ്രാദേശിക സ്വയംഭരണ സ്ഥാപനങ്ങള്‍ തുടങ്ങിയ വ്യത്യസ്ത മേഖലകള്‍ തമ്മിലുമുള്ള ബന്ധങ്ങള്‍ നിര്‍ണയിക്കുകയും നിര്‍വചിക്കുകയും ചെയ്യുന്നത് ഭരണഘടനയാണ്. പ്രാരംഭത്തില്‍ 22 ഭാഗവും 395 അനുച്ഛേദങ്ങളും 9 പട്ടികയുമുണ്ടായിരുന്ന ഭരണഘടനയായിരുന്നു. തുടര്‍ന്നുവന്ന നൂറിലധികം ഭേദഗതികളിലൂടെ അമ്പതിലധികം അനുച്ഛേദങ്ങളും 3 പട്ടികകളും ഭരണഘടന യില്‍ കൂട്ടിച്ചേര്‍ക്കുകയുണ്ടായി.

ഭരണഘടനയില്‍ ഭേദഗതികളും പൊളിച്ചെഴുത്തും കൂട്ടിച്ചേര്‍ക്കലും വേണമെന്ന് പല ഘട്ടങ്ങളിലും പലരും ആവശ്യപ്പെട്ടിട്ടുണ്ട്. അതില്‍ മിക്ക ആവശ്യങ്ങളും ഭരണഘടനയുടെ ജനാധിപത്യത്തിന്റെയും സമത്വാശയങ്ങളുടെയും ഭാഗം കൂടുതല്‍ ശക്തിപ്പെടുത്തുന്നതിന് വേണ്ടിയായിരുന്നു. ആ കാഴ്ചപ്പാടിലാവണം ഓരോരുത്തരും ഇന്ത്യന്‍ ഭരണഘടനയെ സമീപിക്കേണ്ടത്.

ഭരണകൂടത്തെ ഉപയോഗിച്ചുകൊണ്ട് ഭരണഘടനയെ ദുര്‍ബലപ്പെടുത്താനുള്ള നീക്കങ്ങള്‍ നടക്കുന്നുവെന്ന ആക്ഷേപം ശക്തമായുണ്ട്. പൗരത്വ നിയമഭേദഗതി പാര്‍ലമെന്റില്‍ പാസാക്കിയത് ഇതിനൊരു ഉദാഹരണമായി ചൂണ്ടിക്കാണിക്കപ്പെടുന്നുണ്ട്. ‘ഭരണഘടന എത്ര നല്ലതാണെങ്കിലും അത് നടപ്പാക്കുന്നവര്‍ നല്ലതല്ലെങ്കില്‍ അത് ചീത്തയാകു’മെന്ന് 1949 നവംബര്‍ 25ന് ഭരണഘടനാഅസംബ്ലിയില്‍ അംബേദ്കര്‍ നല്‍കിയ മുന്നറിയിപ്പാണ് ഇത്തരം നീക്കങ്ങളുണ്ടാവുമ്പോള്‍ ഓര്‍മ്മവരുന്നത്. രാജ്യത്ത് പതിനൊന്നോളം സംസ്ഥാനങ്ങള്‍ക്ക് ഒരുവിധത്തില്‍ അല്ലെങ്കില്‍ മറ്റൊരു വിധത്തില്‍ പ്രത്യേക പദവികളോ പരിഗണനകളോ ഉണ്ട്. അതെല്ലാം നിലനിര്‍ത്തിക്കൊണ്ടുതന്നെ ജമ്മു കശ്മീരിനുള്ള പ്രത്യേക പദവി എടുത്തുകളയുന്നത് കണ്ടു. കാര്‍ഷിക ഭേദഗതി നിയമം, തൊഴില്‍ നിയമം, അയോധ്യാ വിധി നടപ്പാക്കല്‍ തുടങ്ങിയവയെല്ലാം ഭരണഘടനാപരമായിരുന്നോ എന്ന കാര്യത്തിലും വ്യാപകമായ ചര്‍ച്ചകള്‍ നടന്നുവരുന്നു. മതത്തിന്റെ പേരില്‍ പൗരത്വം നിഷേധിക്കാന്‍ പാടില്ലെന്നും വിവേചനമോ പ്രീണനമോ പാടില്ലെന്നും ഭരണഘടന ഊന്നുന്നുണ്ട്. പരമാധികാര, സോഷ്യലിസ്റ്റ്, മതനിരപേക്ഷ, ജനാധിപത്യ റിപ്പബ്ലിക് എന്നാണ് ഇന്ത്യന്‍ റിപ്പബ്ലിക്കിന് ഭരണഘടന നല്‍കിയ വിശേഷണങ്ങള്‍. ഇതിലെ മതനിരപേക്ഷത ഉള്‍പ്പെടെയുള്ള വിശേഷണങ്ങള്‍ അനാവശ്യമാണെന്ന് പറഞ്ഞുകൊണ്ട് അത്തരം മൂല്യങ്ങളെ ദുര്‍ബലപ്പെടുത്താനുള്ള നീക്കങ്ങള്‍ രാജ്യത്തിന്റെ പല ഭാഗത്തും അരങ്ങേറുന്നുണ്ട്. ഭരണഘടനയെ പിച്ചിച്ചീന്താനുള്ള ഇത്തരം നീക്കങ്ങളെ ജനാധിപത്യ, മതനിരപേക്ഷ വാദികള്‍ ചെറുത്തുതോല്‍പ്പിക്കണം. ഭരണഘടനാസംരക്ഷണത്തിന് ഏറെ പ്രാധാന്യമുണ്ട്. ഇന്ത്യന്‍ ഭരണഘടനയോട് പ്രതിബദ്ധത പുലര്‍ത്തി പ്രവര്‍ത്തിക്കാനും ഭരണഘടന മുന്നോട്ടുവെക്കുന്ന മതനിരപേക്ഷ ജനാധിപത്യം, ഫെഡറലിസം, സാമൂഹ്യനീതി, സാമ്പത്തിക പരമാധികാരം തുടങ്ങിയവയെല്ലാം സംരക്ഷിക്കാനുള്ള ശക്തമായ പ്രവര്‍ത്തനങ്ങള്‍ കേരളത്തില്‍ നിന്ന് ഉയര്‍ന്നുവരണം.

ഭരണഘടനയെ കുറിച്ചുള്ള അറിവ് ഈ കാലഘട്ടത്തില്‍ പരമപ്രധാനമായ ഒന്നാണ്. ഓരോ മലയാളിക്കും ഭരണഘടനാ സാക്ഷരത പകര്‍ന്നുനല്‍കാനുള്ള വിപുലമായ കാമ്പയിന് രാജ്യത്തിന്റെ ഭരണഘടനാ ദിനമായ ഇന്ന് കേരള നിയമസഭ തുടക്കം കുറിക്കുകയാണ്. കുടുംബശ്രീയുമായി സഹകരിച്ച് നടപ്പിലാക്കുന്ന കാമ്പയിനിലൂടെ സംസ്ഥാനത്തെ 45 ലക്ഷത്തിലേറെ കുടുംബങ്ങളിലേക്ക് ഭരണഘടനയെ കുറിച്ചുള്ള അറിവ് എത്തിക്കാനാവുമെന്നാണ് പ്രതീക്ഷിക്കുന്നത്. കുടുംബശ്രീയുടെ യൂണിറ്റ് മുതലുള്ള വിവിധ തലങ്ങളില്‍ നടക്കുന്ന ക്യാമ്പയിനിലൂടെ ഭരണ ഘടനയുടെ ആവിര്‍ഭാവത്തെ കുറിച്ചും ഭരണഘടനാമൂല്യങ്ങളെ സംബന്ധിച്ചും വിപുലമായ ബോധവത്കരണ പ്രവര്‍ത്തനങ്ങള്‍ സംഘടിപ്പിക്കും. രാജ്യത്തിന്റെ നിലനില്‍പ്പ് ആഗ്രഹിക്കുന്നവര്‍ക്ക് ഭരണഘടനയെ പ്രകാശിപ്പിക്കാതിരിക്കാനാവില്ല. അതിന്റെ വെളിച്ചത്തിലാണ്‌വരും തലമുറ വളരേണ്ടത്.