അമേരിക്കന്‍ ബഹിരാകാശഗവേഷകസംഘടനയായ നാസ ഭൂമിയിലെ രാത്രി ചിത്രം പുറത്തുവിട്ടു. രാത്രിയിലെ വിളക്കുകള്‍ എന്ന അടിക്കുറിപ്പോടെയാണ് ചിത്രം പ്രസിദ്ധീകരിച്ചത്. രാത്രിയില്‍ വിവിധ നഗരങ്ങള്‍ വിളക്കുകളാല്‍ തെളിഞ്ഞുനില്‍ക്കുന്ന മനോഹരകാഴ്ചയാണ് ചിത്രത്തിലുള്ളത്. അമേരിക്കയിലെയും ആഫ്രിക്കയിലെയും ഇന്ത്യയിലെയും ഭാഗങ്ങള്‍ ചിത്രത്തിലുണ്ട്. യൂറോപ്പും വിളക്കുകള്‍ കൊണ്ട് തെളിഞ്ഞുനില്‍ക്കുന്നു.

ഇന്ത്യയിലെ വിവിധ നഗരങ്ങളുടെ രാത്രിദൃശ്യം ഇതില്‍ കാണാം. പ്രധാന നഗരങ്ങളായ മുംബൈ, ഡല്‍ഹി, ബംഗളൂരു, കൊല്‍ക്കത്ത തുടങ്ങിയ ഇടങ്ങളില്‍ വെളിച്ചം കാണുന്നു. യൂറോപ്പിന്റെയും ആഫ്രിക്കയുടെയും വിവിധ നഗരങ്ങളുടെയും വെളിച്ചം ചിത്രത്തിലുണ്ട്. ഇന്ത്യ തിളങ്ങുന്നു എന്നാണ് ചിലരിതിനെ വിശേഷിപ്പിച്ചത്. 206ലെ ചിത്രമാണിതെന്നാണ് പറയുന്നത്. ഇളം നീലനിറമാണ് ഭൂമിക്ക്. നാസയുടെ ഉപഗ്രഹമാണ ്ചിത്രമെടുത്തത്. ഇത് വലിയ ഗവേഷണങ്ങള്‍ക്കും വിശകലനത്തിനും സഹായിക്കുമെന്നാണ് നിഗമനം.

രാത്രി എവിടെ, ഏതെല്ലാം സ്ഥലങ്ങളില്‍ ജീവിതമുണ്ട്, ആഘോഷങ്ങളുണ്ട്, പ്രത്യേക പരിപാടികള്‍ തുടങ്ങിയവ ഇതിലൂടെവിശകലനം ചെയ്യാനാകുമെന്ന് നാസ അധികൃതര്‍ അവകാശപ്പെട്ടു. വൈദ്യുതിനിലച്ചതും മറ്റും ഇതിലൂടെ അറിയാനാകും. ഒരുദിവസത്തിനകം നാസയുടെ ട്വീറ്റില്‍ 25 ലക്ഷം പേരാണ് ഇഷ്ടം രേഖപ്പെടുത്തിയത്. ഹോ ,അല്ഭുതം ,നമ്മുടെ ഭൂമി എന്നാണ് ഒരാള്‍ കമന്റിട്ടത്.

ഖത്തറിലെ മന്‍സൂറ, ബിന്‍ ദിര്‍ഹം ഏരിയയില്‍ തകര്‍ന്ന കെട്ടിടത്തിന്റെ അവശിഷ്ടങ്ങളില്‍ നിന്ന് രണ്ട് സ്ത്രീകളെ ജീവനോടെ പുറത്തെടുത്തു. ഇക്കാര്യം വെളിപ്പെടുത്തി ഖത്തര്‍ ആഭ്യന്തര മന്ത്രാലയം (എം.ഒ.ഐ) ട്വീറ്റ് ചെയ്തു. ഒരാളുടെ ജീവന്‍ അപഹരിച്ച സ്ഥലത്ത് നിന്നാണ് മറ്റ് രണ്ടു പേരെ ജീവനോടെ കിട്ടിയത്. ”ബിന്‍ ദിര്‍ഹം പ്രദേശത്തെ തകര്‍ന്ന കെട്ടിടത്തിന്റെ അവശിഷ്ടങ്ങള്‍ക്കിടയില്‍ നിന്ന് തിരച്ചിലിനിടയിലാണ് സുരക്ഷാ സംഘത്തിന് രണ്ട് സ്ത്രീകളെ ജീവനോടെ പുറത്തെടുക്കാന്‍ കഴിഞ്ഞത്. ഇരുവരേയും ആവശ്യമായ വൈദ്യചികിത്സക്കായി ആശുപത്രിയിലേക്ക് മാറ്റിയിരിക്കുന്നു” ഖത്തര്‍ ആഭ്യന്തര മന്ത്രാലയം ട്വിറ്ററിലൂടെ വിശദീകരിച്ചു. എല്ലാവിധ സജ്ജീകരണങ്ങളോടേയും അപകട സ്ഥലത്ത് തിരച്ചില്‍ തുടരുകയാണ് സുരക്ഷാ സംഘം. തുര്‍ക്കിയിലെ ഭൂകമ്പ ബാധിത മേഖലകളില്‍ രക്ഷാ പ്രവര്‍ത്തനത്തിന് നേതൃത്വം നല്‍കിയ ഖത്തര്‍ സുരക്ഷാ സേനയിലെ സംഘാങ്ങളാണ് തെരച്ചിലിന് നേതൃത്വം നല്‍കുന്നതെന്ന് ഖത്തര്‍ ഇന്‍ര്‍നാഷണല്‍ സെര്‍ച്ച് ആന്റ് റസ്‌ക്യു വിഭാഗത്തിന്റെ കമാന്‍ഡര്‍ ലെഫ്റ്റനന്റ് കേണല്‍ മുബാറക് ഷെരീദ അല്‍കഅബി പറഞ്ഞു. കെട്ടിടത്തില്‍ താമസിച്ചിരുന്ന 12 കുടുംബങ്ങളെ നേരത്തെ ഹോട്ടലിലേക്ക് മാറ്റിയിരുന്നു. ആഘാതത്തില്‍ നിന്ന് മുക്തമാകാന്‍ ഇവര്‍ക്ക് ആവശ്യമായ മാനസിക പരിചരണവും കമ്മ്യൂണിറ്റി പൊലീസിന്റെ നേതൃത്വത്തില്‍ നല്‍കി വരുന്നതായി ആഭ്യന്തരമന്ത്രാലയം പബ്ലിക് റിലേഷന്‍സ് ഡയരക്ടര്‍ ബ്രിഗേഡിയര്‍ ജനറല്‍ അബ്ദുല്ല ഖലീഫ അല്‍മുഫ്ത പറഞ്ഞു. നിസ്സാര പരിക്കുകളുള്ള 7 പേര്‍ക്ക് ചികിത്സ നല്‍കിവരുന്നു. ബുധനാഴ്ച കാലത്ത് എട്ടരയോടെ തകര്‍ന്നു വീണ സന്ദര്‍ഭത്തില്‍ കെട്ടിടത്തില്‍ അറ്റകുറ്റപ്പണികള്‍ നടന്നിരുന്നതായി പ്രാഥമിക അന്വേഷണത്തില്‍ സൂചന ലഭിച്ചിട്ടുണ്ട്. അറ്റകുറ്റപ്പണികള്‍ക്ക് നിയോഗിതരായവര്‍ക്ക് ആവശ്യമായ അനുമതിയുണ്ടോയെന്നും, ഇത് അപകടത്തിന് ഒരു കാരണമായിട്ടുണ്ടോയെന്നും പരിശോധനാവിധേയമാക്കുമെന്നും ആഭ്യന്തര മന്ത്രാലയം അറിയിച്ചു. വിശദമായ അന്വേഷണത്തിന് സംഘത്തെ നിയോഗിച്ചിട്ടുണ്ട്. അപകടം നടന്നയുടന്‍ സിവില്‍ ഡിഫന്‍സ്, അല്‍ഫാസ, ട്രാഫിക് പൊലീസ് സംഘങ്ങള്‍ ആംബുലന്‍സും മറ്റ് പരിചരണ സംവിധാനങ്ങളുമായി സ്ഥലത്തെത്തിയിരുന്നു.

കൂരാചുണ്ടില്‍ കെട്ടിടത്തില്‍ നിന്ന് ചാടി ആത്മഹത്യക്ക് ശ്രമിച്ച റഷ്യന്‍ യുവതി ചികിത്സയില്‍. കോഴിക്കോട് മെഡിക്കല്‍ കോളേജിലെ തീവ്രപരിചരണ വിഭാഗത്തിലാണ് യുവതി ചികിത്സയില്‍ കഴിയുന്നത്. അപകടനില തരണം ചെയ്തതായി ഡോക്ടര്‍മാര്‍ പറഞ്ഞു.

കഴിഞ്ഞദിവസമാണ് കൂരാചുണ്ടില്‍ താമസിച്ചിരുന്ന റഷ്യന്‍ യുവതി കെട്ടിടത്തില്‍നിന്ന് ചാടിയത്. ആണ്‍സുഹൃത്തിന്റെ ഉപദ്രവത്തെ തുടര്‍ന്നാണ് ജീവനെടുക്കാന്‍ ശ്രമിച്ചതെന്ന് സൂചന.

സമൂഹമാധ്യമത്തിലൂടെ പരിചയപ്പെട്ട മലയാളി യുവാവിനെ അന്വേഷിച്ച് മൂന്ന് മാസം മുമ്പാണ് യുവതി കൂരാചുണ്ടിയിലെത്തിയത്. തുടര്‍ന്ന് സുഹൃത്തിനൊപ്പം കൂരാചുണ്ട് കാളങ്ങാലിയില്‍ താമസിച്ചുവരികയായിരുന്നു.

അതേ സമയം യുവതിയുടെ ആണ്‍സുഹൃത്തിനെ ഇതുവരെ കണ്ടെത്താന്‍ കഴിഞ്ഞില്ലെന്നാണ് പൊലീസിന്റെ പ്രതികരണം. യുവതിയുടെ മൊഴി രേഖപ്പെടുത്താന്‍ കഴിയാത്തതിനാല്‍ കേസ് രജിസ്റ്റര്‍ ചെയ്തില്ല.