ന്യൂഡല്‍ഹി: മഹാപ്രളയക്കെടുതിയില്‍ അകപ്പെട്ട കേരളത്തിന് സഹായം നല്‍കരുതെന്ന് സാമൂഹ്യമാധ്യമങ്ങളിലൂടെ ആഹ്വാനം ചെയ്ത സംഘപരിവാര്‍ പ്രവര്‍ത്തകന്‍ സുരേഷ് കൊച്ചാട്ടിലിന് സുരക്ഷ നല്കാനാകില്ലെന്ന് സുപ്രീം കോടതി. കേരളത്തിന് എതിരായ ആഹ്വാനത്തിന് ശേഷം തനിക്ക് നിരവധി ഭീഷണികള്‍ വരുന്നുണ്ടെന്നും സുരക്ഷ നല്‍കണമെന്നും ആവശ്യപ്പെട്ടാണ് ഇയാള്‍ കോടതിയെ സമീപിച്ചത്. എന്നാല്‍ സുരേഷിന്റെ ഹരജി പരമോന്നത നീതിപീഠം തള്ളുകയായിരുന്നു.

കേരളത്തിന് സഹായങ്ങള്‍ നല്‍കരുതെന്ന സുരേഷ് കൊച്ചാട്ടിലിന്റെ ശബ്ദ രേഖ വാട്‌സാപ്പിലൂടെയാണ് പ്രചരിച്ചത്. പ്രളയം തകര്‍ത്തെറിഞ്ഞ കേരളത്തിലെ ജനങ്ങള്‍ക്ക് ധനസഹായമോ മറ്റ് ആവശ്യ വസ്തുക്കളോ ആരും നല്‍കേണ്ടതില്ലെന്നും ഇവിടെയുള്ളവര്‍ എല്ലാം ധനവാന്മാരാണെന്നുമാണ് ആര്‍.എസ്.എസ് പ്രവര്‍ത്തകനായ ഇയാള്‍ സമൂഹ മാധ്യമങ്ങളിലൂടെ ആഹ്വാനം ചെയ്തത്.

കേരളത്തിന് സഹായങ്ങള്‍ നല്‍കരുതെന്ന് ആഹ്വാനം പ്രചരിച്ചതോടെ സുരേഷിനെതിരെ പ്രതിഷേധം ശക്തമായിരുന്നു. തുടര്‍ന്നാണ് സുരേഷ് കോടതിയെ സമീപിച്ചത്.
തനിക്കും തെലങ്കാനയിലുള്ള കുടുംബത്തിനും സുരക്ഷ നല്‍കണമെന്ന സുരേഷിന്റെ ആവശ്യമാണ് സുപ്രീം കോടതി തള്ളിയത്. സുരക്ഷാ ഭീഷണി ഉണ്ടെങ്കില്‍ പോലീസിനെ അറിയിക്കാനും സുപ്രീംകോടതി കൊച്ചട്ടിലിന് നിര്‍ദേശം നല്‍കി.

2014 ല്‍ലോകസഭാ തെരഞ്ഞെടുപ്പില്‍ ബി.ജെ.പിയുടെ സോഷ്യല്‍ മീഡിയ പ്രചാരക സംഘത്തിലെ അംഗമായിരുന്നു സുരേഷ്.