കോഴിക്കോട് വീട്ടുമുറ്റത്ത് നിര്‍ത്തിയിട്ട മോട്ടോര്‍ ബൈക്ക് സാമൂഹ്യ വിരുദ്ധര്‍ തീയിട്ട് നശിപ്പിച്ചു. അരൂര്‍ പെരുമുണ്ടശേരി സുധീഷിന്റെ പാഷന്‍ പ്ലസ് ബൈക്കിനാണ് വീട്ടുമുറ്റത്ത് നിന്നും മാറ്റി കൊണ്ടുപോയി തീയിട്ട് നശിപ്പിച്ചത്. പുലര്‍ച്ചെ ഒരുമണിയോടെയാണ് സംഭവം. സുധീഷിന്റെ പരാതിയില്‍ നാദാപുരം സ്ഥലത്തെത്തി പരിശോധന നടത്തി അന്വേഷണം ആരംഭിച്ചു.

മൊബൈല്‍ ഫോണ്‍ വാങ്ങിയതിന്റെ തിരിച്ചടവ് മുടങ്ങിയതിന് ഫിനാന്‍സുകാരുടെ ഭീഷണി മൂലം വീട്ടമ്മ ആത്മഹത്യ ചെയ്തതായി പരാതി. പാലക്കാട് സ്വദേശിനി പത്മാവതിയാണ് മരിച്ചത്. പത്മവതിയെ തിരിച്ചടവ് മുടങ്ങിയതിന്റെ പേരില്‍ ഫിനാന്‍സ് ജീവനക്കാര്‍ ഭീഷണിപ്പെടുത്തിയതിനെ തുടര്‍ന്നാണ് വീട്ടമ്മ ആത്മഹത്യ ചെയ്തതെന്ന് ഇവരുടെ കുടുംബം പൊലീസില്‍ പരാതി നല്‍കി.

2014 രൂപ മുടക്കം വരുത്തിയതിന്റെ പേരിലാണ് ഭീഷണിയെന്ന് കുടുംബാംഗങ്ങള്‍ പറയുന്നത്. ഇവരുടെ മകനാണ് 18,000 രൂപയുടെ ഫോണ്‍ വാങ്ങിയത്. പത്മാവതിയുടെ ആധാര്‍ കാര്‍ഡും മറ്റ് രേഖകളും വച്ചാണ് ഫോണ്‍ വായ്പ്പക്ക് എടുത്തത്. ഇതിനിടയില്‍ ഒരു അടവ് മുടങ്ങിയതിന്റെ പേരിലാണ് ഫിനാന്‍സ് കമ്പനിയിലെ വനിത ജീവനക്കാരി വീട്ടിലെത്തി ഭീഷണിപ്പെടുത്തിയതായി പത്മവതിയുടെ കുടുംബം പറയുന്നു.

വടക്കാഞ്ചേരി കരിങ്കയം വട്ടപ്പാറ വനമേഖലയില്‍നിന്ന് ലക്ഷങ്ങളുടെ മരങ്ങള്‍ മുറിച്ചുകടത്തിയ സംഭവത്തില്‍ രണ്ടുപേര്‍ക്കെതിരെ ആലത്തൂര്‍ വനം റേഞ്ച് ഓഫിസര്‍ കേസെടുത്തു. ഒരു മാസത്തോളമായി ഇവിടെനിന്ന് മരങ്ങള്‍ മുറിച്ചിട്ടുണ്ട.് കരിങ്കയം പി.ടി. സനീഷ് (39), ഷിനു ജോസഫ് (35) എന്നിവര്‍ക്കെതിരെയാണ് കേസ്.

ആലത്തൂര്‍ വനം റേഞ്ചിലെ പുഴക്കലിടം മലവാരത്തില്‍പ്പെട്ട അര ഏക്കര്‍ വനഭൂമിയില്‍നിന്നാണ് തേക്ക്, ഇരുപൂള്‍, ചടച്ചി, മരുത് തുടങ്ങി 20ളം മരങ്ങള്‍ കടത്തിയത്. ജീപ്പ്, പിക്അപ് വാന്‍ പോലുള്ള വാഹനങ്ങളിലാണ് തടി കടത്തിയത്. കടത്താന്‍ ഉപയോഗിച്ച വാഹനങ്ങള്‍ പിടികൂടിയിട്ടില്ല. സംഭവസ്ഥലത്ത് മുറിച്ചിട്ട കഷണങ്ങള്‍ മാത്രമാണ് അധികൃതര്‍ കസ്റ്റഡിയിലെടുത്തത്.