സാന്‍ഫ്രാന്‍സിസ്‌കോ: എ.ഐ അടിസ്ഥാനമാക്കിയുള്ള വിഡിയോ ജനറേറ്റിങ് ആപ്പായ സോറ ഇനി ആന്‍ഡ്രോയ്ഡ് ഉപയോക്താക്കള്‍ക്കും ലഭ്യമാണ്. നവംബര്‍ 4ന് ഓപ്പണ്‍ എ.ഐ പുറത്തിറക്കിയ സോറ 2 മോഡല്‍ അടിസ്ഥാനമാക്കിയാണ് ഈ ആപ്പ് പ്രവര്‍ത്തിക്കുന്നത്.

സെപ്റ്റംബര്‍ 30ന് ഐ.ഒ.എസ് പതിപ്പ് പുറത്തിറങ്ങിയതിന് പിന്നാലെ ഉപയോക്താക്കളുടെ മികച്ച പ്രതികരണമാണ് ആപ്പിന് ലഭിച്ചത്. ഇപ്പോള്‍ ആന്‍ഡ്രോയ്ഡ് ഉപയോക്താക്കള്‍ക്കും ആപ്പ് തുറന്ന് നല്‍കിയിരിക്കുകയാണ് ഓപ്പണ്‍ എ.ഐ.

യു.എസ്, കാനഡ, തായ്‌വാന്‍, തായ്ലാന്‍ഡ്, വിയറ്റ്‌നാം എന്നീ രാജ്യങ്ങളിലാണ് നിലവില്‍ ആപ്പ് ലഭ്യമാക്കിയിരിക്കുന്നത്. ആപ്പിന്റെ ലോഞ്ച് വിവരം മോധാവി ബില്‍ പീബിള്‍സ് എക്‌സിലൂടെയാണ് പുറത്തുവിട്ടത്.

ലോഞ്ച് ചെയ്തതിനു പിന്നാലെ ഒരു ദശലക്ഷം ഡൗണ്‍ലോഡുകള്‍ നേടി സോറ വന്‍ ജനപ്രീതി നേടിയതായി റിപ്പോര്‍ട്ടുകള്‍ പറയുന്നു. വിദഗ്ധര്‍ ചൂണ്ടിക്കാണിക്കുന്നത്, ഈ വളര്‍ച്ചാ നിരക്ക് ചാറ്റ് ജിപിടിയേക്കാള്‍ വേഗത്തിലാണ് എന്നതാണ്.

സോറയുടെ പ്രത്യേകതകള്‍ ഉപയോക്താക്കള്‍ക്ക് പത്ത് സെക്കന്‍ഡ് ദൈര്‍ഘ്യമുള്ള ചെറു വിഡിയോകള്‍ എ.ഐ ഉപയോഗിച്ച് സൃഷ്ടിക്കാം,
മറ്റുള്ളവര്‍ നിര്‍മിച്ച വിഡിയോകള്‍ റീമിക്‌സ് ചെയ്യാനും സാധിക്കും, ഉപയോക്താക്കള്‍ക്ക് ദിവസേന നിര്‍മിക്കാവുന്ന വിഡിയോകളുടെ എണ്ണം പരിമിതമാണ്, ചാറ്റ് ജിപിടി പ്രോ സബ്സ്‌ക്രൈബര്‍മാര്‍ക്ക് പ്രതിദിനം 100 വിഡിയോകള്‍ മാത്രമേ നിര്‍മ്മിക്കാന്‍ കഴിയൂ.

ഓപ്പണ്‍ എ.ഐയുടെ സോഷ്യല്‍ വിഡിയോ ആപ്പ് എന്ന നിലയില്‍ സോറക്ക് വേഗത്തില്‍ പ്രചാരം ലഭിക്കുന്നതായും, ഭാവിയില്‍ കാമിയോ ഫീച്ചര്‍ ഉള്‍പ്പെടെയുള്ള പ്രധാന അപ്ഡേറ്റുകള്‍ അവതരിപ്പിക്കാനുണ്ടെന്നും കമ്പനി അറിയിച്ചു.

ന്യൂഡല്‍ഹി: വാട്‌സാപ്പ് ഉപയോക്താക്കളുടെ വിവരങ്ങള്‍ പരസ്യ ആവശ്യങ്ങള്‍ക്കായി മെറ്റയുമായി പങ്കുവെക്കാനുള്ള അനുമതി ലഭിച്ചു. ദേശീയ കമ്പനി നിയമ അപ്പലറ്റ് ട്രൈബ്യൂണല്‍ (എന്‍സിഎല്‍എടി) മത്സരകമ്മിഷന്റെ വിലക്ക് റദ്ദാക്കി. 2024 നവംബര്‍ 18-നാണ് മത്സരകമ്മിഷന്‍ വാട്‌സാപ്പിന് 213.14 കോടി രൂപ പിഴ ചുമത്തുകയും, ഉപയോക്തൃവിവരങ്ങള്‍ മെറ്റയുമായി പങ്കുവെക്കുന്നത് അഞ്ച് വര്‍ഷത്തേക്ക് വിലക്കുകയും ചെയ്തത്. എന്നാല്‍ ജസ്റ്റിസ് അശോക് ഭൂഷണ്‍ അധ്യക്ഷനായ രണ്ടംഗ ബെഞ്ച് ചൊവ്വാഴ്ച നല്‍കിയ ഉത്തരവിലൂടെ ആ വിലക്ക് നീക്കി. ഇതോടെ വാട്‌സാപ്പിന് വീണ്ടും മെറ്റയുമായി ഉപയോക്തൃവിവരങ്ങള്‍ പങ്കുവെക്കാന്‍ സാധിക്കും. അതേസമയം വാട്‌സാപ്പിന്റെ 2021 ലെ സ്വകാര്യതാനയം വിപണിയിലെ ആധിപത്യം ദുരുപയോഗം ചെയ്യുന്നതാണെന്ന് കണ്ടെത്തിയ മത്സരകമ്മീഷന്റെ വിലയിരുത്തലിനെയും ചുമത്തിയ പിഴയെയും എന്‍സിഎല്‍എടി ശരിവെച്ചു. മത്സരകമ്മിഷന്‍ തന്റെ ഉത്തരവില്‍ വ്യക്തമാക്കിയിരുന്നത്,വാട്‌സാപ്പ് ഉപയോക്താക്കളുടെ തന്റെ വിവരങ്ങള്‍ പങ്കുവെക്കുന്നത് അഞ്ചു വര്‍ഷത്തേക്ക് വിലക്കണമെന്നും, ശേഖരിക്കുന്ന ഓരോ ഡാറ്റയുടെയും ലക്ഷ്യം വ്യക്തമാക്കണമെന്നും ആയിരുന്നു. കൂടാതെ ഇന്ത്യയില്‍ സേവനം ലഭിക്കുന്നതിന് ഡാറ്റ പങ്കുവെക്കല്‍ മുന്‍കൂര്‍ നിബന്ധനയാക്കുന്നത് വിലക്കുകയും ചെയ്തിരുന്നു. കമ്മിഷന്‍ വാദിച്ചതനുസരിച്ച്, ടെലഗ്രാം ,സിഗ്നല്‍ പോലുള്ള എതിരാളികള്‍ വാട്‌സാപ്പിന്റെ ആധിപത്യത്തിനെതിരെ മത്സരിക്കാന്‍ കഴിയുന്നില്ല. അതിനാല്‍, സ്വകാര്യതാനയം ‘സ്വീകരിക്കുക അല്ലെങ്കില്‍ വിടുക’ എന്ന രീതിയില്‍ ഉപയോക്തക്കളില്‍ നിര്‍ബന്ധം ചെലുത്തിയത് വിപണിയിലെ ആധിപത്യം ദുരുപയോഗം ചെയ്യലാണെന്നും കമ്മിഷന്‍ ചൂണ്ടിക്കാട്ടി. വാട്‌സാപ്പ് സേവനം നഷ്ടപ്പെടുമെന്ന ഭയത്താല്‍ നിരവധി ഉപയോക്താക്കള്‍ സ്വകാര്യതാനയം നിര്‍ബന്ധിതമായി സ്വീകരിക്കേണ്ടി വന്നതായും കമ്മിഷന്‍ വിലയിരുത്തിയുരുന്നു.