വെസ്റ്റ് ബാങ്കില്‍ ഇസ്രയേല്‍ വെടിവെയ്പ്പ്. വെസ്റ്റ് ബാങ്കിലെ ജെറിനില്‍ ഇസ്രയേല്‍ സൈന്യം നടത്തിയ റെയഡിനെത്തുടര്‍ന്നുണ്ടായ വെടിവെപ്പിനിടയില്‍ 9 പലസ്തീനുകാര്‍ കൊല്ലപ്പെട്ടു. അക്രമികളെ പിടികൂടാന്‍ ശ്രമിക്കുന്നതിനിടയില്‍ മൂന്നുപേര്‍ സൈന്യത്തിനെതിരെ വെടിവെക്കുകയായിരുന്നെന്ന് ഇസ്രയേല്‍ ഡിഫന്‍സ് ഫോഴ്‌സ് അവകാശപ്പെട്ടു.

ഒരു വലിയ കെട്ടിടത്തിനുള്ളില്‍ ഒളിച്ചിരിക്കുകയായിരുന്നു ഇവര്‍. കെട്ടിടത്തിനുള്ളില്‍ സൂക്ഷിച്ചിരുന്ന നിരവധി സ്‌ഫോടക വസ്തുക്കളും നിര്‍വീര്യമാക്കി. രാജ്യത്തിന്റെ പലഭാഗങ്ങളിലായി സ്‌ഫോടന പരമ്പര ആസൂത്രണം ചെയ്തിരുന്നതായി ഇസ്രയേല്‍ ആരോപിച്ചു.

പലസ്തീന്‍ ഇസ്ലാമിക് ജിഹാദ് സംഘത്തില്‍പ്പെട്ടവരെയാണ് വധിച്ചതെന്ന് ഇസ്രയേല്‍ അറിയിച്ചു. എന്നാല്‍, ജെനിയിലെ അഭയാര്‍ഥി ക്യാമ്പിന് നേരെയാണ് ഇസ്രയേല്‍ വെടിയുതിര്‍ത്തതെന്നും നിലവിലെ സാഹചര്യം അതീവ ഗുരുതരമാണെന്നും പലസ്തീന്‍ ആരോഗ്യമന്ത്രി മൈ എല്‍ കൈല പറഞ്ഞു.

പാലക്കാട് ധോണി ജനവാസ മേഖലയിലിറങ്ങിയതിനെ തുടര്‍ന്ന് വനം വകുപ്പ് പിടിച്ച ‘പിടി7’ എന്ന കാട്ടാനയെ പരിശോധന നടത്തിയതില്‍ ശരീരത്തില്‍ 15 ഓളം പെല്ലെറ്റുകള്‍ കണ്ടെടുത്തതായി റിപ്പോര്‍ട്ട്. നാടന്‍ തോക്കുകളില്‍ നിന്നുള്ള വെടിയുണ്ടകളാണ് കണ്ടെത്തിയത്. ആന മെരുങ്ങിയിട്ടില്ലാത്തതിനാല്‍ വിശദമായ പരിശോധന നടത്താന്‍ സാധിച്ചിട്ടില്ല.

കാട്ടാനയുടെ ശല്യം ഒഴിവാക്കുന്നതിന് വേണ്ടി നാട്ടുകാര്‍ ആരെങ്കിലും വെടിവെച്ചതാവാം എന്നാണ് വനംവകുപ്പിന്റെ നിഗമനം. ആനയുടെ ശരീരത്തില്‍ നിന്നും ഏതാനും പെല്ലെറ്റുകള്‍ വനംവകുപ്പ് അധികൃതര്‍ നീക്കം ചെയ്തു. മയക്കുവെടി വച്ച് പിടികൂടിയ ആനയെ താല്കാലികമായി ധോണി വനം ഡിവിഷന്‍ ഓഫീസിന് സമീപത്തു നിര്‍മ്മിച്ച കൂട്ടിലാണുള്ളത്.

എറണാകുളത്ത് വാഹനാപകടത്തില്‍ ഒരാള്‍ മരിച്ചു. പുത്തന്‍ കുരുശിന് അടുത്ത് വണ്ടിപ്പേട്ടയില്‍ പിക്ക്അപ്പ് ഓട്ടോയും ബൈക്കും കൂട്ടിയിടിച്ചാണ് അപകടം. പിറവം സ്വദേശി വിനോജാണ് മരിച്ചത്. അപകചത്തില്‍ മൂന്നുപേര്‍ക്ക് പരിക്കേറ്റു. പുല്‍ച്ചെ അഞ്ചുമണിക്കായിരുന്നു അപകടമുണ്ടായത്.