വടക്കാഞ്ചേരിയില്‍ ഭര്‍ത്താവ് ഭാര്യയെ വെട്ടിക്കൊലപ്പെടുത്തി. കൊന്നക്കല്‍ കടവ് സായ്കുളമ്പ് കോഴിക്കാട്ടില്‍ വീട്ടില്‍ പാറുക്കുട്ടിയാണ് (75) മരിച്ചത്. സംഭവത്തിന് ശേഷം ഭര്‍ത്താവ് നാരായണന്‍ (80) പൊലീസില്‍ കീഴടങ്ങി.

കഴിഞ്ഞ ദിവസം രാവിലെയാണ് സംഭവം. ദമ്പതികള്‍ മാത്രമാണ് വീട്ടില്‍ താമസിച്ചിരുന്നത്. കുടുംബ വഴക്കിനെ തുടര്‍ന്നാണ് കൊടുവാളും ടാപ്പിങ് കത്തിയും ഉപയോഗിച്ച് വൃദ്ധയുടെ കഴുത്തിലും മുഖത്തും വെട്ടുകയും കുത്തുകയായിരുന്നു എന്നാണ് വിവരം.

വയനാട് കല്‍പ്പറ്റയില്‍ പെണ്‍കുട്ടിയോട് രണ്ടാനച്ഛന്റെ കൊടും ക്രൂരത. സംഭവത്തില്‍ പ്രതിയായ രണ്ടാനച്ഛന്‍ വിഷ്ണുവിനെ പൊലീസ് അറസ്റ്റ് ചെയ്തു. ഏഴ് വയസ്സുകാരിയെ ചട്ടുകം ചൂടാക്കി പൊള്ളിക്കുകയായിരുന്നു. ഇതിന് മുന്‍പും തന്നെ ഉപദ്രവിച്ചിട്ടുണ്ടെന്ന് കുട്ടി മൊഴി നല്‍കി.

ബംഗളൂരു നഗരത്തില്‍ ഓടുന്ന കാറില്‍ യുവതി കൂട്ടബലാത്സംഗത്തിനിരയായി. സംഭവത്തില്‍ നാല് പേര്‍ അറസ്റ്റിലായി. കേസില്‍ അന്വേഷണം പുരോഗമിക്കുകയാണെന്ന് പൊലീസ് അറിയിച്ചു. കഴിഞ്ഞയാഴ്ചയാണ് സംഭവം. പാര്‍ക്കിലിരിക്കുകയായിരുന്ന പെണ്‍കുട്ടിയെ പ്രതികള്‍ തട്ടികൊണ്ട് പോകുകയായിരുന്നു.

കൊറമംഗളയിലെ നാഷണല്‍ ഗെയിംസ് വില്ലേജ് പാര്‍ക്കില്‍ സുഹൃത്തിനൊപ്പമിരിക്കുകയായിരുന്നു പെണ്‍കുട്ടി. പാര്‍ക്കില്‍ രാത്രി വൈകിയും ഇരിക്കാനാവില്ലെന്ന് പെണ്‍കുട്ടിയോടും സുഹൃത്തിനോടും പ്രതികളിലൊരാള്‍ പറയുകയായിരുന്നു. പിന്നീട് പെണ്‍കുട്ടിയുടെ സുഹൃത്ത് മടങ്ങിയതിന് പിന്നാലെ ഇയാള്‍ തന്റെ മൂന്ന് സുഹൃത്തുക്കളെ വിളിച്ചുവരുത്തി. തുടര്‍ന്ന് പെണ്‍കുട്ടിയെ തട്ടികൊണ്ട് പോകുകയായിരുന്നു. കാറില്‍ വെച്ച് കൂട്ടബലാത്സംഗത്തിനിരയാക്കിയ ശേഷം വീടിനടുത്ത് ഉപേക്ഷിച്ചു.