മലപ്പുറം: അഖിലേന്ത്യാ സെവൻസ് ഫുട്‌ബോൾ ടൂർണമെൻറിനിടെ സഹതാരത്തിന്റെ നെഞ്ചിൽ ബൂട്ടിട്ട് ചവിട്ടിക്കയറി വിദേശ താരത്തിന് വിലക്ക് ഏർപ്പെടുത്തി സെവൻസ്് ഫുട്‌ബോൾ അസോസിയേഷൻ. സൂപ്പർ സ്റ്റുഡിയോയുടെ താരമായ വിദേശ താരം സാമുവലിനെയാണ് ഈ സീസണിൽ വിലക്കേർപ്പെടുത്തിയത്.

എടത്തനാട്ടുകര ചലഞ്ചേഴ്‌സ് ക്ലബ് ഗവ. ഓറിയന്റൽ ഹയർ സെക്കൻഡറി സ്‌കൂൾ ഫ്‌ലഡ്ലിറ്റ് സ്റ്റേഡിയത്തിൽ സംഘടിപ്പിക്കുന്ന ടൂർണമെന്റിൽ കളിക്കുന്നതിനിടെ വീണ ഉദയ പറമ്പിൽപീടിക ടീമിലെ താരത്തെയാണ് സൂപ്പർ സ്റ്റുഡിയോ താരമായ വിദേശ താരം സാമുവൽ ചവിട്ടിയത്. ചൊവ്വാഴ്ച രാത്രിയാണ് സംഭവം.

സൂപ്പർ സ്റ്റുഡിയോ ടീം 2-ാം ഗോൾ അടിച്ച് ജയിച്ച് നിൽക്കുന്ന സമയത്താണ് ഗ്രൗണ്ടിൽ വീണു കിടക്കുകയായിരുന്ന താരത്തെ ചവിട്ടിയത്.
ഈ സീസണിലെ ടൂർണമെന്റുകളിലാണ് എസ്.എഫ്.എ വിലക്കേർപ്പെടുത്തിയത്. ചവിട്ടിക്കയറുന്ന ദൃശ്യം സമൂഹമാധ്യമങ്ങളിൽ പ്രചരിച്ചതോടെയാണ് ഫുട്ബാൾ പ്രേമികൾ താരത്തിനെതിരെ നടപടിക്കായി ശബ്ദം ഉയർത്തിയത്. ഇദ്ദേഹത്തെ കളിപ്പിച്ചാൽ കളിക്കളങ്ങൾ ബഹിഷ്‌കരിക്കുമെന്ന മുന്നറിയിപ്പ് വ്യാപകമായതോടെയാണ് അസോസിയേഷൻ വിലക്ക് ഏർപ്പെടുത്തിയത്.

വിലക്ക് എർപ്പെടുത്തിയ തീരുമാനം എസ്.എഫ്.എ പ്രസിഡൻറ് ഹബീബ്, ജനറൽ സെ ക്രട്ടറി സൂപ്പർ അഷറഫ് ബാവ, ട്രഷറർ എസ് എം. അൻവർ എന്നിവർ സൂപ്പർ സ്റ്റുഡിയോ മലപ്പുറത്തെ അറിയിക്കുകയായിരുന്നു. സംഭവം വിവാദമായതിനെ തുടർന്ന് പരിക്കേറ്റ കളിക്കാരനെ സാമുവൽ സന്ദർശിക്കുന്ന ചിത്രങ്ങളും സമൂഹമാധ്യങ്ങളിൽ പ്രചരിച്ചിരുന്നു.

ചാമ്പ്യന്‍സ് ലീഗില്‍ നിര്‍ണായക മത്സരം ജയിച്ചുകയറി മുന്‍ ചാമ്പ്യന്മാരായ റയല്‍ മഡ്രിഡ്. തുടര്‍ച്ചയായ രണ്ടു തോല്‍വികളുമായി നോക്കൗട്ട് റൗണ്ട് സാധ്യത ഭീഷണിയിലായ സ്പാനിഷ് ക്ലബ് രണ്ടിനെതിരെ മൂന്ന് ഗോളുകള്‍ക്കാണ് അറ്റ്‌ലാന്റയെ വീഴ്ത്തിയത്.

സൂപ്പര്‍താരങ്ങളായ കിലിയന്‍ എംബാപ്പെ, വിനീഷ്യസ് ജൂനിയര്‍, ജൂഡ് ബെല്ലിങ്ഹാം എന്നിവര്‍  റയലിനായി വലകുലുക്കി. ചാള്‍സ് ഡി കെറ്റെലറെ, അഡെമോളെ ലുക്ക്മാന്‍ എന്നിവരാണ് ഇറ്റലി ക്ലബിന്റെ ഗോള്‍ സ്‌കോറര്‍മാര്‍. മത്സരത്തില്‍ 10ാം മിനിറ്റില്‍ ബ്രാഹിം ഡിയാസിന്റെ പാസില്‍നിന്ന് സൂപ്പര്‍ താരം എംബാപ്പെ റയലിനെ മുന്നിലെത്തിച്ചു. ചാമ്പ്യന്‍സ് ലീഗില്‍ താരത്തിന്റെ 50ാം ഗോളാണിത്. സീസണില്‍ റയലിനായി താരത്തിന്റെ 12ാം ഗോളും. ഇതിനിടെ താരത്തിന് പരിക്കേറ്റ് കളം വിടേണ്ടി വന്നത് റയലിന് തിരിച്ചടിയായി. 36ാം മിനിറ്റില്‍ പകരക്കാരനായി ബ്രസീല്‍ താരം റോഡ്രിഗോ ഗ്രൗണ്ടിലെത്തി.

ആദ്യ പകുതിയിലെ ഇന്‍ജുറി ടൈമില്‍ (45+2) ചാള്‍സ് ഡി കെറ്റെലറെയിലൂടെ അറ്റ്‌ലാന്റ സമനില പിടിച്ചു. ബോക്‌സിനുള്ളില്‍ സീഡ് കൊലാസിനാക്കിനെ ഫൗള്‍ ചെയ്തതിനാണ് അറ്റ്‌ലാന്റക്ക് അനുകൂലമായി സ്‌പോട്ട് കിക്ക് വിധിച്ചത്. എന്നാല്‍ രണ്ടാം പകുതിയില്‍ കൂടുതല്‍ ഉണര്‍ന്ന് കളിച്ച റയല്‍ പരിക്ക് ഭേദമായി തിരിച്ചെത്തിയ ബ്രസീല്‍ വിങ്ങര്‍ വിനീഷ്യസ് ജൂനിയറിലൂടെ വീണ്ടും മുന്നിലെത്തി. 56ാം മിനിറ്റിലായിരുന്നു ഗോള്‍. മൂന്ന് മിനിറ്റിനുള്ളില്‍ വിനീഷ്യസിന്റെ അസിസ്റ്റില്‍നിന്ന് ബെല്ലിങ്ഹാം ടീമിന്റെ മൂന്നാം ഗോളും നേടി. 65ാം മിനിറ്റില്‍ ലുക്ക്മാന്‍ അറ്റ്‌ലാന്റയുടെ തോല്‍വി ഭാരം കുറച്ചു.

എംബാപ്പെ 79 ചാമ്പ്യന്‍സ് ലീഗ് മത്സരങ്ങളില്‍നിന്നാണ് 50ാം ഗോള്‍ നേട്ടത്തിലെത്തിയത്. ചാമ്പ്യന്‍സ് ലീഗിന്റെ ചരിത്രത്തില്‍ ഗോളുകളില്‍ ഫിഫ്റ്റിയടിക്കുന്ന ഏറ്റവും പ്രായം കുറഞ്ഞ രണ്ടാമത്തെ താരമാണ് (25 വയസ്സും 356 ദിവസവും). ലോക ചാമ്പ്യന്‍ ലയണല്‍ മെസ്സിയാണ് ഒന്നാമത് (24 വയസ്സും 284 ദിവസവും). പി.എസ്.ജിയില്‍നിന്ന് സീസണില്‍ ക്ലബിലെത്തിച്ച എംബാപ്പെ ഫോമിലേക്ക് ഉയരുന്നതിനിടെയാണ് താരത്തിന് പരിക്കേല്‍ക്കുന്നത്. പരിക്ക് ഗുരുതരമല്ലെന്നാണ് ക്ലബ് അധികൃതര്‍ നല്‍കുന്ന സൂചന.

ഡാനി കാര്‍വഹാല്‍, എഡര്‍ മിലിറ്റാവോ, കമവിംഗ എന്നിവരെല്ലാം പരിക്കേറ്റ് ടീമിന് പുറത്താണ്. ആറ് മത്സരങ്ങളില്‍നിന്ന് മൂന്ന് ജയവും മൂന്ന് തോല്‍വിയുമായി ഒമ്പത് പോയന്റുള്ള റയല്‍ 18ാം സ്ഥാനത്താണ്. ആറ് മത്സരങ്ങളില്‍നിന്ന് മൂന്ന് ജയവും രണ്ട് സമനിലയും ഒരു തോല്‍വിയുമായി 11 പോയന്റുള്ള അറ്റ്‌ലാന്റ ഒമ്പതാം സ്ഥാനത്തും. ആദ്യ എട്ട് സ്ഥാനക്കാര്‍ നേരിട്ട് നോക്കൗട്ടിലേക്ക് യോഗ്യത നേടും. ബാക്കിയുള്ള എട്ടു ടീമുകള്‍ പ്ലേ ഓപ് കളിച്ചുവേണം അവസാന പതിനാറിലെത്താന്‍.

ലാലിഗയില്‍ റയല്‍ മാഡ്രിഡിന് അപ്രതീക്ഷിത തോല്‍വി . അത്‌ലറ്റിക് ക്ലബ്ലിനോട് ആണ് ആഞ്ചലോട്ടിയുടെ സംഘം പരാജയപ്പെട്ടത്. ലാലിഗയിലെ തുടര്‍ച്ചയായ മൂന്ന് വിജയങ്ങള്‍ക്ക് ശേഷമാണ് റയല്‍ 2-1ന്റെ തോല്‍വി ഏറ്റുവാങ്ങിയത്. 2015 മാര്‍ച്ചിന് ശേഷം ഇതാദ്യമായാണ് അത്‌ലറ്റിക് ക്ലബ് ലാലിഗയില്‍ റയലിനെ തോല്‍പ്പിക്കുന്നത്.

53ാം മിനുറ്റില്‍ അലഹാണ്ട്രോ ബെറന്‍ഗ്വറിലേൂടെ അത്ലറ്റിക് ക്ലബാണ് മുന്നിലെത്തിയത്. എന്നാല്‍ 68ാം മിനുറ്റില്‍ അന്റോണിയോ റൂഡിഗറിനെ ഫൗള്‍ ചെയ്തതിന് റയലിന് അനുകൂലമായി പെനല്‍റ്റി വിധിച്ചു. എന്നാല്‍ കിക്കെടുത്ത എംബാപ്പെക്ക് പിഴച്ചു.

ഏതാനും ദിവസങ്ങള്‍ക്ക് മുമ്പ് ചാമ്പ്യന്‍സ് ലീഗില്‍ ലിവര്‍പൂളിനെതിരായ മത്സരത്തിലും എംബാപ്പെ പെനല്‍റ്റി പാഴാക്കിയിരുന്നു. 78ാം മിനുറ്റില്‍ ജൂഡ് ബെല്ലിങ്ഹാമിലൂടെ റയല്‍ ഒപ്പമെത്തിയെങ്കിലും വെറും രണ്ട് മിനുറ്റുകള്‍ക്ക് ശേഷം അത്ലറ്റിക് ക്ലബ് സമനില പിടിക്കുകയായിരുന്നു.

റയല്‍ പ്രതിരോധതാരം ഫെഡറിക്കോ വാല്‍വെര്‍ഡെയുടെ പിഴവില്‍ നിന്നായിരുന്നു അത്!ലറ്റിക്കിന്റെ രണ്ടാം ഗോള്‍ പിറന്നത്. തോല്‍വിയോടെ 15 മത്സരങ്ങളില്‍ നിന്നും 33 പോയന്റുമായി റയല്‍ രണ്ടാമതാണ്. 16 മത്സരങ്ങളില്‍ നിന്നും 27 പോയന്റുള്ള ബാഴ്‌സലോണ ഒന്നാം സ്ഥാനത്ത് തന്നെതുടരുന്നു. 16 മത്സരങ്ങളില്‍ 29 പോയന്റുള്ള അത്‌ലറ്റിക് ക്ലബ് നാലാം സ്ഥാനത്താണ്.