ന്യൂഡല്ഹി: വിമാന ടിക്കറ്റ് റീഫണ്ടിങ് നിയമങ്ങളില് വലിയ മാറ്റങ്ങള് കൊണ്ടുവരാന് ഡയറക്ടറേറ്റ് ജനറല് ഓഫ് സിവില് ഏവിയേഷന് ഒരുങ്ങുന്നു. ഇനി വിമാന ടിക്കറ്റ് ബുക്ക് ചെയ്തതിനു ശേഷം 48 മണിക്കൂറിനുള്ളില് റദ്ദാക്കുകയോ യാത്ര തീയതി മാറ്റുകയോ ചെയ്താല് പണം പിടിക്കരുത് എന്നാണ് നിര്ദ്ദേശം. പുതിയ നിയമത്തിന്റെ കരട് ഉടന് പുറത്തിറങ്ങും.
വിമാന യാത്രക്കാരന് ആശ്വാസമാകുന്ന തീരുമാനമാണിത്. ടിക്കറ്റ് റീഫണ്ടിങ് സംബന്ധമായ നിരവധി പരാതികള്ക്കാണ് ഡിജിസിഎ നടപടി സ്വീകരിക്കുന്നത്.
പുതിയ നിര്ദേശങ്ങള് പ്രകാരം ടിക്കറ്റ് ബുക്ക് ചെയ്ത ആദ്യ 24 മണിക്കൂറിനുള്ളില് പേരില് തിരുത്തല് നടത്തുമ്പോള് യാതൊരു ചാര്ജും ഈടാക്കില്ല. 48 മണിക്കൂറിനുള്ളില് യാത്ര തീയതിയില് മാറ്റം വരുത്തുകയോ ടിക്കറ്റ് റദ്ദാക്കുകയോ ചെയ്താലും ചാര്ജ് ഇല്ല. റീഫണ്ട് 21 പ്രവൃത്തി ദിവസത്തിനുള്ളില് യാത്രക്കാരന് ലഭ്യമാക്കണം.
മെഡിക്കല് അടിയന്തരാവസ്ഥകളാല് ടിക്കറ്റ് റദ്ദാക്കുന്നവര്ക്ക് റീഫണ്ട് അല്ലെങ്കില് ക്രെഡിറ്റ് ഷെല് ലഭിക്കും. എന്നാല്, ആഭ്യന്തരമായി അഞ്ച് ദിവസത്തിനുള്ളില് അല്ലെങ്കില് അന്താരാഷ്ട്രമായി പതിനഞ്ച് ദിവസത്തിനുള്ളില് പുറപ്പെടേണ്ട വിമാനങ്ങളുടെ ടിക്കറ്റുകള്ക്ക് ഈ ആനുകൂല്യം പ്രവര്ത്തിക്കില്ല, പ്രത്യേകിച്ച് എയര്ലൈന് വെബ്സൈറ്റ് വഴി നേരിട്ട് ബുക്ക് ചെയ്തവയ്ക്കു.
പുതിയ നിയമം സംബന്ധിച്ച കരട് ഉടന് പ്രസിദ്ധീകരിക്കും, കൂടാതെ നവംബര് 30 വരെ പൊതുജനാഭിപ്രായം സ്വീകരിക്കുമെന്ന് ഡിജിസിഎ അറിയിച്ചു. ഈ നിര്ണായക നിയമനിര്മാണം യാത്രക്കാരുടെ അവകാശങ്ങള് ശക്തിപ്പെടുത്തുന്ന നടപടിയാകും എന്നാണ് പ്രതീക്ഷ.