ന്യൂഡല്‍ഹി: വില്‍പ്പനയിടിഞ്ഞതോടെ ഇന്ത്യന്‍ വിപണി വിടാന്‍ ആലോചിച്ച് ആഡംബര ബൈക്ക് നിര്‍മാതാക്കളായ ഹാര്‍ലി ഡേവിഡ്‌സണ്‍. ഇന്ത്യലെത്തി ഒരു ദശാബ്ദം കഴിയുമ്പോഴാണ് അമേരിക്കന്‍ മോട്ടോര്‍ സൈക്കിള്‍ ബ്രാന്‍ഡ് തിരിച്ചു പോകാന്‍ ആലോചിക്കുന്നത്. ഡിമാന്‍ഡ് കുറഞ്ഞതോടെ ഹരിയാനയിലെ യൂണിറ്റ് വൈകാതെ പൂട്ടുമെന്ന് ദ ഹിന്ദു റിപ്പോര്‍ട്ട് ചെയ്തു.

കഴിഞ്ഞ സാമ്പത്തിക വര്‍ഷം 2500 ബൈക്കുകള്‍ മാത്രമാണ് യു.എസ് കമ്പനി ഇന്ത്യയില്‍ വിറ്റത്. ഈ വര്‍ഷം ഏപ്രില്‍ – ജൂണ്‍ കാലയളവില്‍ വെറും നൂറെണ്ണവും. ആഗോള തലത്തില്‍ കമ്പനിയുടെ ഏറ്റവും മോശം വിപണിയാണ് ഇന്ത്യ. ആഗോള പുനഃസംഘടനാ പദ്ധതിയുടെ ഭാഗമായി കമ്പനിയുടെ ഔട്ട്‌ലറ്റ് ഇന്ത്യയില്‍ നിന്ന് സിംഗപൂരിലേക്ക് മാറ്റും എന്നാണ് സൂചന.

നേരത്തെ, കമ്പനിയുടെ ബൈക്കുകള്‍ക്ക് ഇറക്കുമതിച്ചുങ്കം കുറയ്ക്കാന്‍ യു.എസ് പ്രസിഡണ്ട് ഡൊണാള്‍ഡ് ട്രംപ് ഇന്ത്യയോട് അഭ്യര്‍ത്ഥിച്ചിരുന്നു. ഇതുപ്രകാരം നികുതി അമ്പത് ശതമാനം കുറയ്ക്കുകയും ചെയ്തിരുന്നു. വിപണി പിടിക്കാനായി നേരത്തെ രണ്ട് മോഡല്‍ ബൈക്കുകളുടെ വിലയില്‍ 65000-77000 രൂപയുടെ കുറവും കമ്പനി വരുത്തിയിരുന്നു. എന്നാല്‍ ഇതൊന്നും ഏശിയില്ല.

സാമ്പത്തിക പ്രതിസന്ധി മൂലമാണ് ലാഭകരമല്ലാത്ത യൂണിറ്റുകള്‍ പൂട്ടാന്‍ കമ്പനി തീരുമാനമെടുത്തിട്ടുള്ളത്. നേരത്തെ അഞ്ഞൂറു ജോലിക്കാരെ പിരിച്ചു വിടാന്‍ കമ്പനി തീരുമാനിച്ചിരുന്നു. ഇന്ത്യ വിടുമെങ്കില്‍ രാജ്യത്ത് വിപണിയില്‍ ക്ലച്ച് പിടിക്കാതെ തിരിച്ചു പോകുന്ന രണ്ടാമത്തെ യു.എസ് വാഹന കമ്പനിയാകും ഹാര്‍ലി ഡേവിഡ്‌സണ്‍. 2017ല്‍ വിപണി വിട്ട ജനറല്‍ മോട്ടോഴ്‌സ് ആണ് ആദ്യ കമ്പനി.