Connect with us

Career

ഫാഷന്‍ പഠിച്ചുയരാന്‍ ‘നിഫ്റ്റ്’; ഡിസംബര്‍ 31 വരെ അപേക്ഷിക്കാം

റെഗുലര്‍, സ്റ്റുഡിയോ പരിശീലനം, സംയോജിത പ്രവര്‍ത്തനം, സ്വയംപഠനം എന്നിവ സമന്വയിപ്പിച്ച് ഇന്റര്‍ഡിസിപ്ലിനറി സ്വഭാവത്തോടെയുള്ള പഠനരീതിയാണുള്ളത്

Published

on

എന്‍.ഐ.എഫ്.ടി എന്ന ചുരുക്കപ്പേരില്‍ അറിയപ്പെടുന്ന നാഷണല്‍ ഇന്‍സ്റ്റിറ്റിയൂട്ട് ഓഫ് ഫാഷന്‍ ടെക്‌നോളജി ഫാഷന്‍ പഠന രംഗത്ത് മികവ് പുലര്‍ത്തുന്ന പ്രധാന സ്ഥാപങ്ങളിലൊന്നാണ്. രൂപകല്‍പ്പന, ഫാഷന്‍ ടെക്‌നോളജിയുടെ അനുബന്ധ മേഖലകള്‍ എന്നിവയില്‍ അഭിരുചിയുള്ളവര്‍ക്ക് കഴിവും വൈഭവവും പരിപോഷിപ്പിക്കാനുള്ള സവിശേഷമായ സാഹചര്യമാണ് ഇവിടെ ഒരുക്കിയിട്ടുളളത്. മൂന്ന് പതിറ്റാണ്ടിന്റെ പാരമ്പര്യം അവകാശപ്പെടാനാവുന്ന ഈ സ്ഥാപനം ആഗോള തലത്തില്‍ തന്നെ ഫാഷന്‍ സ്ഥാപനങ്ങളുടെ കൂട്ടത്തില്‍ ഒമ്പതാം സ്ഥാനം അലങ്കരിക്കുന്നുണ്ട്. ഫാഷന്‍ രംഗത്ത് ആഗോള തലത്തില്‍ തന്നെ പ്രശസ്തരായ പലരും എന്‍.ഐ.എഫ്.ടിയിലെ പൂര്‍വ വിദ്യാര്‍ഥികളാണെന്നത് ശ്രദ്ധേയ വസ്തുതയാണ്

കണ്ണൂരിലടക്കം രാജ്യത്തൊട്ടാകെയുള്ള 18 ക്യാമ്പസുകളില്‍ പഠിപ്പിക്കപ്പെടുന്ന വിവിധ കോഴ്‌സുകള്‍ അനുദിനം മാറിക്കൊണ്ടിരിക്കുന്ന ഫാഷന്‍ സങ്കല്‍പങ്ങള്‍ക്കനുസൃതയുള്ളതാണ്. ഫാഷന്‍ അനുബന്ധ വിഷയങ്ങള്‍ക്ക് പുറമെ ആശയവിനിമയം, ക്രിയാത്മക ചിന്ത, തൊഴില്‍ നൈതികത എന്നിവക്കൊപ്പം പുതുതായി പ്രസക്തമായിക്കൊണ്ടിരിക്കുന്ന ആര്‍ട്ടിഫിഷ്യല്‍ ഇന്റലിജന്‍സ്, ഫാഷന്‍ തിങ്കിംഗ്, ഓഗ്മെന്റഡ് റിയാലിറ്റി, സ്മാര്‍ട്ട് ജ്വല്ലറി, ത്രീ ഡി പ്രിന്റിങ് തുടങ്ങിയവയും കരിക്കുലത്തില്‍ ഉള്‍പ്പെടുത്തിയിട്ടുണ്ട്. റെഗുലര്‍, സ്റ്റുഡിയോ പരിശീലനം, സംയോജിത പ്രവര്‍ത്തനം, സ്വയംപഠനം എന്നിവ സമന്വയിപ്പിച്ച് ഇന്റര്‍ഡിസിപ്ലിനറി സ്വഭാവത്തോടെയുള്ള പഠനരീതിയാണുള്ളത്.

നാലു വര്‍ഷം ദൈര്‍ഘ്യമുള്ള ബാച്ചിലര്‍ ഓഫ് ഡിസൈന്‍ (ബി.ഡിസ്), ബാച്ചിലര്‍ ഓഫ് ഫാഷന്‍ ടെക്‌നോളജി (ബി.എഫ്.ടെക്) എന്നിങ്ങനെ രണ്ട് കോഴ്‌സുകളാണ് ബിരുദതലത്തില്‍ പഠിപ്പിക്കപ്പെടുന്നത്. ബി.ഡിസ് കോഴ്‌സില്‍ ഫാഷന്‍, ആക്‌സസറി, ഫാഷന്‍ കമ്മ്യൂണിക്കേഷന്‍, നിറ്റ്‌വെയര്‍, ലെതര്‍, ടെക്‌സ്‌റ്റൈല്‍ എന്നിങ്ങനെയുള്ള സ്‌പെഷ്യലൈസേഷനാണുള്ളത്. കണ്ണൂരില്‍ ഫാഷന്‍, ടെക്‌സ്‌റ്റൈല്‍, നിറ്റ്‌വെയര്‍ ഡിസൈന്‍, ഫാഷന്‍ കമ്മ്യൂണിക്കേഷന്‍ എന്നീ ബി.ഡിസ് പ്രോഗ്രാമുകളും അപ്പാരല്‍ പ്രൊഡക്ഷനിലെ ബി.എഫ്.ടെക് പ്രോഗ്രാമുമാണുള്ളത്. കേരളത്തില്‍ പ്ലസ്ടു പഠിച്ചവര്‍ക്ക് കണ്ണൂരില്‍ 7 സീറ്റ് വീതം കൂടുതലായുണ്ടാവും.

ബി.ഡിസ് പ്രവേശനത്തിന് ഏതെങ്കിലും വിഷയത്തില്‍ പ്ലസ്ടു വിജയിച്ചവര്‍ക്ക് അപേക്ഷിക്കാം. എന്നാല്‍ ബി.എഫ്.ടെക് പ്രോഗ്രാമിന് അപേക്ഷിക്കുവാന്‍ ഫിസിക്‌സ്, ഗണിതം എന്നിവ ഉള്‍ക്കൊള്ളുന്ന പ്ലസ്ടു വിജയിച്ചിരിക്കണം. 2023 ല്‍ പ്ലസ്ടു പരീക്ഷ എഴുതുന്നവര്‍ക്കും അപേക്ഷിക്കാം. മാര്‍ക്ക് നിബന്ധനയില്ല. പിഴയില്ലാതെ ഡിസംബര്‍ 31 വരെയും 5,000 രൂപ പിഴയോടെ ജനുവരി ആദ്യവാരം വരെയും അപേക്ഷിക്കാം.

കേന്ദ്ര മാനദണ്ഡപ്രകാരം വിവിധ വിഭാഗങ്ങള്‍ക്ക് സംവരണമുണ്ട്. പൊതു, ഒ.ബി.സി, സാമ്പത്തിക സംവരണ വിഭാഗങ്ങള്‍ക്ക് 3000 രൂപ, പട്ടികജാതി/വര്‍ഗ, ഭിന്നശേഷിക്കാര്‍ എന്നിവര്‍ക്ക് 1500 രൂപയുമാണ് അപേക്ഷാ ഫീസ്. 2023 ഫെബ്രുവരി അഞ്ചിന് നടക്കുന്ന പ്രവേശന പരീക്ഷക്ക് കൊച്ചി, കണ്ണൂര്‍ അടക്കം രാജ്യത്തെമ്പാടുമായി 37 പരീക്ഷാകേന്ദ്രങ്ങളുണ്ട്. ബി.ഡിസ് പ്രവേശനത്തിന് ക്രിയേറ്റീവ് അഭിരുചി പരീക്ഷ (ഇഅഠ) പൊതു അഭിരുചി പരീക്ഷ (ഏഅഠ) എന്നിവയില്‍ യോഗ്യത നേടുന്നവര്‍ സിറ്റുവേഷന്‍ ടെസ്റ്റ് കൂടി വിജയിക്കണം. ഫാഷന്‍ ടെക്‌നോളജി കോഴ്‌സിന് പൊതു അഭിരുചി പരീക്ഷ മാത്രമാണുള്ളത്.

ഫാഷന്‍ അനുബന്ധ മേഖലയില്‍ ഡിപ്ലോമ പൂര്‍ത്തിയാക്കിയവര്‍ക്ക് ലാറ്ററല്‍ എന്‍ട്രി വഴി ബി.ഡിസ് പ്രോഗ്രാമിന്റെ മൂന്നാം സെമസ്റ്ററിലേക്ക് പ്രവേശനം നേടാന്‍ അവസരമുണ്ട്. ബിരുദ കോഴ്‌സുകള്‍ക്ക് പഠനം പൂര്‍ത്തിയാക്കാന്‍ ഫീസായി 13 ലക്ഷം രൂപയോളം ചെലവുണ്ടെങ്കിലും സമര്‍ത്ഥരും നിര്‍ദ്ധനരുമായ വിദ്യാര്‍ത്ഥികള്‍ക്ക് സ്‌കോളര്‍ഷിപ്പ് ലഭിക്കാന്‍ അര്‍ഹതയുണ്ട്.

അംഗീകൃത സര്‍വകലാശാലയില്‍ നിന്ന് ബിരുദം, എന്‍.ഐ.ഡി, എന്‍.ഐ.എഫ്.ടി എന്നിവയില്‍ നിന്ന് ഡിപ്ലോമ എന്നിവ നേടിയവര്‍ക്ക് അപേക്ഷിക്കാവുന്ന മാസ്റ്റര്‍ ഓഫ് ഡിസൈന്‍ (എം.ഡിസ്), മാസ്റ്റര്‍ ഓഫ് ഫാഷന്‍ മാനേജ്‌മെന്റ് (എം.എഫ്.എം), എന്‍.ഐ.എഫ്.ടി യില്‍ നിന്ന് ബി.എഫ്.ടെക്, ഏതെങ്കിലും വിഷയത്തില്‍ എഞ്ചിനീയറിംഗ് ബിരുദം എന്നിവയിലേതെങ്കിലും നേടിയവര്‍ക്ക് അപേക്ഷിക്കാവുന്ന മാസ്റ്റര്‍ ഓഫ് ഫാഷന്‍ ടെക്‌നോളജി (എം.എഫ്.ടെക്) പ്രോഗ്രാമുകളിലേക്കും ഇപ്പോള്‍ അപേക്ഷിക്കാം.

ബിരുദ, ബിരുദാനന്തര കോഴ്‌സുകള്‍ക്കായി മൊത്തത്തില്‍എല്ലാ കോഴ്‌സുകള്‍ക്കുമായി 4700 ലധികം സീറ്റുകളുണ്ട്. അപേക്ഷ സമര്‍പ്പിക്കുവാനും മറ്റു വിശദവിവരങ്ങള്‍ക്കും http://niftadmissions.in എന്ന വെബ്‌സൈറ്റ് പരിശോധിക്കാം.

Career

പി.ടി. സഫ്‌വാൻ ഹുദവിക്ക് ഡോക്ടറേറ്റ്; അഞ്ച് ഭൂഖണ്ഡങ്ങളിൽ നിന്ന് മക്കയിലേക്കുള്ള യാത്രാ വിവരണങ്ങളുടെ താരതമ്യ പഠനത്തിലാണ് ഡോക്ടറേറ്റ്

നിലവിൽ നിലമ്പൂർ അമൽകോളേജ് ഓഫ് അഡ്വാൻസ്ഡ് സ്റ്റഡീസിൽ അസിസ്റ്റൻ്റ് പ്രൊഫസറായ സഫ്‌വാൻ ദേശീയ അന്തർദേശീയ കം പാരറ്റീവ് അസോസിയേഷൻ അംഗമാണ്.

Published

on

റഹൂഫ് കൂട്ടിലങ്ങാടി

മലപ്പുറം: പി.ടി.സഫ് വാൻ ഹുദവി ഹൈദരാബാദ് ഇഫ്ളു സർവകലാശാലയിൽ നിന്ന് ഡോക്ടറേറ്റ് നേടി. ദി വേ ആൻ്റ് ദ വോയേജ്, എ കംപാരറ്റീവ് എൻക്വയറി ഇൻ ടു ജിയോ പൊയറ്റിക്സ് ആൻ്റ് ഇൻ്റർ സ്‌പെഷ്യാലിറ്റി ഇൻ ദ ട്രാവലോഗ്സ് ഓൺ മെക്ക (പഥവും സഞ്ചാരവും: അഞ്ച് ഭൂഖണ്ഡങ്ങളിൽ നിന്ന് മക്കയിലേക്കുള്ള യാത്രാവിവരണങ്ങളിലെ വൈവിധ്യങ്ങൾ സബന്ധിച്ചുള്ള താരതമ്യ പഠനം ഒരു അന്വേഷണം എന്ന വിഷയത്തിലാണ് ഹൈദരാബാദിലെ ഇംഗ്ലീഷ് ആൻ്റ് ഫോറിൻ ലാംഗ്വേജ് യൂണിവേഴ്സിറ്റി (ഇഫ്ളു)
യിൽ നിന്ന് ഡോക്ടറേറ്റ് ലഭിച്ചത്.

ചെമ്മാട് ദാറുൽ ഹുദാ ഇസ്ലാമിക് യൂനിവേഴ്‌സിറ്റിയിൽ നിന്ന് 2012 ൽ ഹുദവി ബിരുദം നേടിയ സഫ്‌വാൻ അതേ വർഷം തന്നെ കാലിക്കറ്റ് യൂനിവേഴ്‌സിറ്റിയിൽ നിന്ന് ഇംഗ്ലീഷ് ലാംഗ്വേജ് ആൻ്റ് ലിറ്ററേച്ചറിൽ ബിരുദവും നേടിയ ശേഷം ഇഫ്ളുവിൽ നിന്ന് ഇംഗ്ലീഷിൽ ബിരുദാനന്തര ബിരുദവും ഹൈദരാബാദ് സർവകലാശാലയിൽ നിന്ന് കംപാരറ്റീവ് ലിറ്ററേച്ചറിൽ എം ഫില്ലും നേടി. നേരത്തെ ഇഫ്ളുവിൽ നിന്ന് തന്നെ അറബിക് ഇംഗ്ലീഷ് ട്രാൻസലേഷനിൽ ഡിപ്ലോമയും നേടിയിട്ടുണ്ട്. തുടർന്നാണ് ഇഫ്ളുവിലെ ഡിപ്പാർട്മെൻ്റ് ഓഫ് കംപാരറ്റീവ് ലിറ്ററേച്ചറിൽ പി.എച്ച്.ഡിക്ക് ചേർന്നത്.

നിലവിൽ നിലമ്പൂർ അമൽകോളേജ് ഓഫ് അഡ്വാൻസ്ഡ് സ്റ്റഡീസിൽ അസിസ്റ്റൻ്റ് പ്രൊഫസറായ സഫ്‌വാൻ ദേശീയ അന്തർദേശീയ കം പാരറ്റീവ് അസോസിയേഷൻ അംഗമാണ്. ഐ.സി.എസ്.എസ്.ആർ ഡോക്ടറൽ ഫെലോഷിപ്പ്, മൗലാനാ ആസാദ് നാഷണൽ ഫെലോഷിപ് എന്നിവക്ക് അർഹത നേടിയിട്ടുണ്ട്.

നിലമ്പൂർ അമൽ കോളേജ് ഇഗ്നോ സ്റ്റഡി സെൻ്റർ അസിസ്റ്റൻ്റ് കോർഡിനേറ്റർ, ശ്രീനാരായണഗുരു ഓപ്പൺ സർവകലാശാല അക്കാഡമിക് കൗൺസിലർ, ന്യൂനപക്ഷ വിദ്യാർത്ഥികൾക്കുള്ള യു.ജി.സി.നെറ്റ് ഇംഗ്ലീഷ് പരിശീലനത്തിൻ്റെ സംസ്ഥാനതല കോർഡിനേറ്റർ, കോളേജ് അധ്യാപക സംഘടനയായ സി.കെ.സി.ടി മലപ്പുറം ജില്ലാ ജോ: സെക്രട്ടറി എന്നീ നിലകളിൽ പ്രവർത്തിക്കുന്നു.

നേരത്തെ, ഹൈദരാബാദ് മൗലാനാ ആസാദ് നാഷണൽ ഉർദു യൂനിവേഴ്‌സിറ്റി, മൗലാനാ ആസാദ് നാഷണൽ ഉറുദു സർവകലാശാല, മലപ്പുറം ഗവണ്‍മെന്റ് ആർട്സ് ആൻ്റ് സയന്‍സ്‌ കോളേജ്, കുറ്റ്യാടി ഐഡിയൽ ആർട്സ് ആൻ്റ് സയൻസ് കോളേജ് എന്നിവിടങ്ങളിൽ
ഗസ്റ്റ് അധ്യാപകനായി ജോലി ചെയ്തിട്ടുണ്ട്.

ദേശീയ തലത്തിൽ ശ്രദ്ധേയമായ എജ്യുക്കേഷൻ ആൻ്റ് സൊസൈറ്റി ജേർണലിൽ ഫാദർ ഫിഗർ ഇൻ മാട്രിലിനി, ഹിസ് റ്റോ റൈസിംഗ് ഫാദർഹുഡ് ഇൻ ദ സോഷ്യോ കൾച്ചറൽ മില്യു ഓഫ് കേരള, ഇൻ്ററോഗേറ്റിംഗ് ദ ന്യു ട്രെൻഡ്സ് ഇൻ ട്രാൻസ് ലേഷൻ സ്റ്റഡീസ്, ദി ഷിഫ്റ്റ് ഫ്രം ലിംഗ്വിസ്റ്റിക് ടേൺ ഇൻ ടു കൾച്ചറൽ ടേൺ തുടങ്ങി ഇരുപതോളം പഠന പ്രബന്ധങ്ങൾ പ്രസിദ്ധീകരിക്കുകയും ദേശീയ അന്തർദേശീയ സെമിനാറുകളിലും ശിൽപ്പശാലകളിലും അവതരിപ്പിക്കുകയും ചെയ്തിട്ടുണ്ട്.

മലപ്പുറം കൂട്ടിലങ്ങാടി ചെലൂരിലെ പുളിക്കത്തൊടി മോയിൻ കുട്ടിയുടെയും കുട്ടശ്ശേരി നഫീസയുടെയും മകനാണ്. ഭാര്യ: കാട്ടിൽ പീടികക്കൽ ശഫ്ന. (മങ്കട പള്ളിപ്പുറം ഹൈസ്കൂൾ അധ്യാപിക). മകൻ: അയ്മൻ അഹമ്മദ് (മൂന്ന് വയസ്). നസീമ, ഫസീന, സുനീറ, നസീറ എന്നിവർ സഹോദരങ്ങളാണ്.

Continue Reading

Career

ഡിപ്ലോമ ഇന്‍ എയര്‍ലൈന്‍ ആന്‍ഡ് എയര്‍പോര്‍ട്ട് മാനേജ്മെന്റ് കോഴ്സിന് അപേക്ഷിക്കാം

അംഗീകൃത പഠന കേന്ദ്രങ്ങളുടെ നേതൃത്വത്തിലാണ് സമ്പര്‍ക്ക ക്ലാസ്സുകള്‍ ക്രമീകരിച്ചിട്ടുള്ളത്.

Published

on

സംസ്ഥാന പൊതുവിദ്യാഭ്യാസവകുപ്പിന് കീഴിലുള്ള സ്റ്റേറ്റ് റിസോഴ്സ് സെന്ററിന്റെ നേതൃത്വത്തില്‍ പ്രവര്‍ത്തിക്കുന്ന എസ്.ആര്‍.സി കമ്മ്യൂണിറ്റി കോളേജ് ജൂലൈ സെഷനില്‍ ആരംഭിക്കുന്ന ഡിപ്ലോമ ഇന്‍ എയര്‍ലൈന്‍ ആന്‍ഡ് എയര്‍പോര്‍ട്ട് മാനേജ്മെന്റിന് (DAM) പ്രോഗ്രാമിലേക്ക് പ്ലസ്ടു അഥവാ തത്തുല്യ യോഗ്യതയോ ഉള്ളവര്‍ക്ക് അപേക്ഷിക്കാം.

അംഗീകൃത പഠന കേന്ദ്രങ്ങളുടെ നേതൃത്വത്തിലാണ് സമ്പര്‍ക്ക ക്ലാസ്സുകള്‍ ക്രമീകരിച്ചിട്ടുള്ളത്. വിവിധ എയര്‍പോര്‍ട്ടുകളില്‍ ഇന്റേണ്‍ഷിപ്പ് ഉള്‍പ്പെടുത്തിയിട്ടുണ്ട്. https://app.srccc.in/register എന്ന ലിങ്കിലൂടെ ഓണ്‍ലൈനായി അപേക്ഷിക്കാം. https://srccc.in/download എന്ന ലിങ്കില്‍ നിന്നും അപേക്ഷാഫാറം ഡൗണ്‍ലോഡ് ചെയ്തും അപേക്ഷിക്കാം. ആഗസ്റ്റ് പത്തിനുള്ളില്‍ അപേക്ഷ സമര്‍പ്പിക്കണം. വിശദ വിവരങ്ങള്‍ തിരുവനന്തപുരം നന്ദാവനത്തുള്ള എസ്.ആര്‍.സി ഓഫീസില്‍ നിന്ന് നേരിട്ടും ലഭിക്കും. വിലാസം: ഡയറക്ടര്‍, സ്റ്റേറ്റ് റിസോഴ്സ് സെന്റര്‍, നന്ദാവനം, വികാസ് ഭവന്‍ പി.ഒ, തിരുവനന്തപുരം-33. ഫോണ്‍: 0471 2570471, 9846033009. വിശദാംശങ്ങള്‍ www.srccc.in എന്ന വെബ്സൈറ്റിലും ലഭിക്കും.

Continue Reading

Career

ചന്ദ്രിക തൊണ്ണൂറാം വാർഷികാഘോഷത്തിൻ്റെ ഭാഗമായി സംഘടിപ്പിക്കുന്ന വിദ്യഭ്യാസ പ്രദർശനവും സെമിനാറുകളും Edu Excel Education Expo ഇന്നും നാളെയും

Published

on

ചന്ദ്രിക തൊണ്ണൂറാം വാർഷികാഘോഷത്തിൻ്റെ ഭാഗമായി സംഘടിപ്പിക്കുന്ന വിദ്യഭ്യാസ പ്രദർശനവും സെമിനാറുകളും Edu Excel Education Expo ഇന്നും നാളെയുമായി കോട്ടക്കൽ പിഎം ഓഡിറ്റോറിയത്തിൽ നടക്കും. മലപ്പുറം ജില്ലയിൽ നിന്ന് ഈ വർഷം എസ്.എസ്.എൽ.സി, പ്ലസ്.ടു പരീക്ഷകളിൽ മുഴുവൻ വിഷയങ്ങളിലും എ പ്ലസ് നേടിയ വിദ്യാർത്ഥികളെ ആദരിക്കുന്ന വിജയമുദ്ര 2023 പരിപാടിയും ഈ അവസരത്തിൽ നടക്കും. പങ്കെടുക്കാൻ മുകളിൽ നൽകിയ QR code scan ചെയ്യുകയോ,https://chandrikanavathi.in/ ഈ ലിങ്ക് ഉപയോഗിച്ച് രജിസ്റ്റർ ചെയ്യുകയോ ചെയ്യുക.

Continue Reading

Trending