തിരുവനന്തപുരം: ഗതാഗത നിയമലംഘനങ്ങള്‍ കണ്ടെത്തി പിഴ ചുമത്താന്‍ ഇന്നുമുതല്‍ നിലവില്‍ വരുന്ന എ.ഐ ക്യാമറകള്‍ സര്‍ക്കാര്‍ ഖജനാവ് നിറക്കാനെന്ന ആക്ഷേപം ശക്തം. പ്രതിദിനം 25 കോടി രൂപ വരെ പിഴ ഈടാക്കുമെന്നറിയുന്നു. രൂക്ഷമായ വിലക്കയറ്റത്തിനും ഇന്ധന സെസ് അടക്കമുള്ള നികുതിഭാരത്തിനും പിന്നാലെ ജനത്തെ പിഴിയാനുള്ള നീക്കമാണിതെന്ന പരാതി വ്യാപകമാണ്. ട്രാഫിക് നിയമങ്ങളെക്കുറിച്ച് യാതൊരുവിധ ബോധവത്കരണവും നടത്താതെ സംസ്ഥാന സര്‍ക്കാര്‍ ക്യാമറകള്‍ സ്ഥാപിച്ച് ജനങ്ങളെ കുത്തിപ്പിഴിയാന്‍ നടപ്പാക്കുന്ന ട്രാഫിക് പരിഷ്‌കാരത്തിനെതിരെ ഇതിനോടകം തന്നെ വ്യാപക പരാതി ഉയര്‍ന്നിട്ടുണ്ട്.

726 അത്യാധുനിക എഐ ക്യാമറകള്‍ ഉപയോഗിച്ച് ആയിരം കോടി രൂപ സമാഹരിക്കാനാണ് സര്‍ക്കാര്‍ ലക്ഷ്യമിടുന്നത്. ട്രാഫിക് പരിഷ്‌കാരം ഇന്ന് നിലവില്‍ വരുമെങ്കിലും വേഗപരിധിയുടെ കാര്യത്തില്‍ സമ്പൂര്‍ണ ആശയക്കുഴപ്പം നിലനില്‍ക്കുന്നുണ്ട്. ദേശീയപാതകളിലെ വേഗപരിധി സംബന്ധിച്ച് കേന്ദ്ര ഗതാഗത മന്ത്രാലയത്തിന്റെ 2018ലെ വിജ്ഞാപന പ്രകാരം ഒരു നിരക്കും സംസ്ഥാന സര്‍ക്കാരിന്റെ 2014 ലെ വിജ്ഞാപന പ്രകാരം മറ്റൊരു നിരക്കുമാണ് നിലവിലുള്ളത്. ഇത്തരം ആശയക്കുഴപ്പം വ്യാപകമായി നിലനില്‍ക്കുമ്പോള്‍ വേഗപരിധി സംബന്ധിച്ച് ആവശ്യത്തിന് സൈന്‍ ബോര്‍ഡുകള്‍ പോലും ഇല്ലാത്തത് യാത്രക്കാരെ കുഴക്കും. നഗരങ്ങളില്‍ പാര്‍ക്കിംഗ് സൗകര്യം ഒരുക്കാതെയാണ് സര്‍ക്കാര്‍ പിഴയീടാക്കാനൊരുങ്ങുന്നത്. ഒരു ക്യാമറ രേഖപ്പെടുത്തിയ കുറ്റകൃത്യത്തിന് തുടര്‍ യാത്രയില്‍ മറ്റൊരു ക്യാമറ രേഖപ്പെടുത്തിയാലും വീണ്ടും പിഴയൊടുക്കേണ്ട സാഹചര്യം വിചിത്രമാണ്.

ഒരേ കാര്യത്തിന് നിരവധി ക്യാമറകളില്‍ നിന്ന് പിഴവന്നാല്‍ അതില്‍ എന്ത് നടപടി സ്വീകരിക്കണമെന്ന് ഇതുവരെ തീരുമാനമായിട്ടില്ല. ഇതില്‍ മാറ്റം വരുത്തണോയെന്ന് സര്‍ക്കാരാണ് തീരുമാനിക്കേണ്ടത്. അതേസമയം എ.ഐ ക്യാമറാ സംവിധാനത്തില്‍ നിന്ന് വി.ഐ.പി വാഹനങ്ങളെ പിഴയില്‍ നിന്ന് ഒഴിവാക്കിയിട്ടുണ്ട്. മുഖ്യമന്ത്രി, മന്ത്രിമാര്‍, സ്പീക്കര്‍, പ്രതിപക്ഷ നേതാവ്, ജഡ്ജിമാര്‍, മറ്റു പ്രധാന പദവികള്‍ വഹിക്കുന്നവര്‍, ക്രമസമാധാന പരിപാലനത്തിനായി ബീക്കണ്‍ ലൈറ്റ് ഘടിപ്പിച്ച വാഹനങ്ങളില്‍ സഞ്ചരിക്കുന്നവര്‍ എന്നിവരുടെ വാഹനങ്ങളാണ് ഒഴിവാക്കുക. വിഐപികളെ ഒഴിവാക്കുമ്പോള്‍ ഇരട്ട നീതിയാണ് സര്‍ക്കാറിന്റേതെന്ന് വ്യക്തം. ഇരുചക്രവാഹനത്തില്‍ കുട്ടികളായാലും രണ്ട് പേരില്‍ കൂടുതലാവുന്നത് നിയമലംഘനമായി കണക്കാക്കുമെന്ന് ഗതാഗത കമ്മിഷണര്‍ എസ്.ശ്രീജിത്ത് അറിയിച്ചിട്ടുണ്ട്. എന്നാല്‍ വന്‍തോതില്‍ പിഴയീടാക്കുംമുമ്പ് നിയമലംഘനങ്ങള്‍ കുറക്കാനുള്ള ബോധവത്കരണം നടത്തിയിട്ടില്ല.