Connect with us

columns

കാലം ആവശ്യപ്പെടുന്നത് തിരംഗ കൂട്ടായ്മകള്‍-ഡോ. ഫിര്‍ദൗസ് ചാത്തല്ലൂര്‍

വര്‍ഗീയ വിദ്വേഷം നടത്തുന്നവരെ അസ്ഥിരപ്പെടുത്തുന്ന തിരംഗ കൂട്ടായ്മകള്‍ ജഹാംഗീര്‍പുരിയിലെന്നപോലെ കേരളത്തിലും രൂപപ്പെടേണ്ടതുണ്ട്.

Published

on

ഉത്തരേന്ത്യന്‍ വര്‍ഗീയ വിഭ്രാന്തിയുടെ മൂര്‍ത്തഭാവങ്ങള്‍ കേരളത്തിലും തലപൊക്കികൊണ്ടിരിക്കുന്നു. മതഭ്രാന്ത് ബാധിച്ചവരും രാഷ്ട്രീയ പാപ്പരത്തം പേറുന്നവരും മനുഷ്യനെ മതത്തിന്റെ പേരില്‍ വേര്‍തിരിക്കാനും രക്തം ചിന്താനും പ്രേരിപ്പിച്ചുകൊണ്ടിരിക്കുന്നു. സഹിഷ്ണുതയോടെ ജീവിക്കാനും വര്‍ഗീയത വെടിയാനുമാണ് മതങ്ങള്‍ കല്‍പ്പിക്കുന്നത്. എന്താണ് വര്‍ഗീയത എന്ന ചോദ്യത്തിന് പ്രവാചകന്‍ നല്‍കിയ മറുപടി, തന്റെ ജനതയെ അക്രമത്തിലേക്ക് നയിക്കുക എന്നാണ്. എല്ലാ പച്ച കരളുള്ള ജീവിയിലും നിങ്ങള്‍ക്ക് പുണ്യമുണ്ട് എന്നും, ഒരു വ്യക്തിയെ അന്യായമായി കൊല ചെയ്താല്‍ ലോകത്തുള്ള മുഴുവന്‍ മനുഷ്യരെയും കൊന്നൊടുക്കിയതുപോലെയാണെന്നുമാണ് ഇസ്‌ലാം പഠിപ്പിക്കുന്നത്. രാഷ്ട്രീയ കൊലപാതകങ്ങളിലൂടെ കൊല ചെയ്യുന്ന മുസ്‌ലിം ചേരിയിലുള്ള സംഘടനകളെ നിഷിതമായി എതിര്‍ക്കുന്ന മുസ്‌ലിം പണ്ഡിതരെയും സംഘടനകളെയും കാണാന്‍ സാധിക്കും.

എല്ലാ രാഷ്ട്രീയ മത കൊലപാതകങ്ങളെയും എതിര്‍ക്കുന്ന അതിനോട് ശക്തമായ വിയോജിപ്പ് പ്രകടിപ്പിച്ചുകൊണ്ടേയിരിക്കുന്ന നേതൃത്വനിരയുടെ തിരംഗ കൂട്ടായ്മകള്‍ എല്ലാ സമുദായത്തില്‍ നിന്നും രൂപപ്പെട്ടുവരേണ്ടിയിരിക്കുന്നു. ആ നേതൃത്വനിര നല്‍കുന്ന മതേതര പരിപാടികള്‍ ജനാധിപത്യ ഇന്ത്യക്കും മാനവികതക്കും ശക്തമായ മുതല്‍ക്കൂട്ടാവുകയും ചെയ്യും. ഡല്‍ഹിയിലെ ജഹാംഗീര്‍പുരിയിലെ തിരംഗയാത്ര ഇതിനുദാഹരണമാണ്. ഹിന്ദു മുസ്‌ലിം കലാപഭൂമിയാക്കാന്‍ ശ്രമിച്ച ജഹാംഗീര്‍പുരിയിലെ ഫാസിസ്റ്റ് ഗൂഢാലോചനയെ പ്രദേശവാസികളായ ഹിന്ദു മുസ്‌ലിം സഹോദരന്‍മാരും അവരുടെ നേതൃത്വവും നേരിട്ടത് ത്രിവര്‍ണ്ണ പതാകയേന്തി സൗഹൃദത്തിന്റെ അന്തരീക്ഷം സൃഷ്ടിക്കാനാണ്. ജഹാംഗീര്‍ ജനതയില്‍ വര്‍ഗീയ വിഷവിത്തുക്കള്‍ പാകാന്‍ സംഘ്പരിവാരങ്ങളെ അനുവദിക്കില്ലയെന്ന ബോധത്തോടെയും ആഹ്വാനത്തോടെയുമാണ് അവര്‍ സമാധാന ഐക്യജാഥകള്‍ അവസാനിപ്പിച്ചത്. പതിമൂന്ന് വര്‍ഷമായി അവിടെ കച്ചവടം നടത്തിയ മുഹമ്മദ് ഹസന്‍ നൂര്‍ എന്ന യുവാവ് കലാപ ദിവസം നഷ്ടപ്പെടുമായിരുന്ന തന്റെ സാധന സാമഗ്രികളുമായി എടുത്തോടിയത് അടുത്ത അമ്പലത്തിലേക്കായിരുന്നു. ഹസന്‍ നൂറിന്റെ കച്ചവട സാധനങ്ങള്‍ പണ്ഡിത്ജി അമ്പലത്തില്‍ സൂക്ഷിച്ചുവെക്കുകകയും ഒരാളും അക്രമിക്കുകയില്ലയെന്ന സുരക്ഷിത ബോധവും നല്‍കി. പണ്ഡിത്ജി എനിക്ക് രക്ഷിതാവിനെപ്പോലെയാണ് എന്നാണ് നൂര്‍ പറഞ്ഞത്. ഈയൊരു സംഭവത്തില്‍ പണ്ഡിത്ജി ഹിന്ദുമത ധര്‍മത്തിന്റെ പ്രതീകമാണ്. അമ്പലങ്ങള്‍ സ്‌നേഹത്തിന്റെയും സാന്ത്വനത്തിന്റെയും ഇടങ്ങളുമാണ്. ഈ സനാതന മൂല്യധര്‍മങ്ങളെയാണ് ആര്‍.എസ്.എസ് പോലെയുള്ള തീവ്ര ഹിന്ദുത്വ സംഘടനകള്‍ നശിപ്പിച്ചുകൊണ്ടിരിക്കുന്നത്. സ്‌നേഹ സൗഹൃദ ഹിന്ദു മതത്തിന്റെ ശത്രു സംഘ്പരിവാര ശക്തികളാണ്. അവര്‍ തന്നെയാണ് ഹിന്ദു മത ധാര്‍മിക മൂല്യങ്ങളെ കാര്‍ന്നു തിന്നുന്നതും. അവരില്‍ നിന്ന് ഹിന്ദുവിനെയും അമ്പലങ്ങളെയും സംരക്ഷിക്കുക എന്നതായിരിക്കും മതേതര ഇന്ത്യക്ക് ഹിന്ദു സമൂഹത്തിനും നേതൃത്വത്തിനും നല്‍കാനുള്ള ഏറ്റവും വലിയ ധര്‍മം.

1526ല്‍ ബാബറിന്റെ ആഗമനത്തോടെയാണ് ഇന്ത്യയില്‍ മുഗള്‍ അഥവാ മുസ്‌ലിം ഭരണകൂടം ആരംഭിക്കുന്നത്. 1529ല്‍ മകന്‍ ഹുമയൂണ്‍ ചക്രവര്‍ത്തിയാകുന്ന വേളയില്‍ ബാബര്‍ നല്‍കിയ കത്തില്‍ പറയുന്നത് ഇപ്രകാരമാണ്: നിനക്ക് ഈ നാട് ഭരിക്കണമെങ്കില്‍ ഇവിടത്തെ ജനങ്ങളുടെ മതപരമായ കാര്യത്തില്‍ ഒരിക്കലും ഇടപെടരുത് എന്നാണ്. ഈ ബോധ്യമാണ് ഇന്ന് നഷ്ടപെട്ടിരിക്കുന്നത്. 1206 ല്‍ ഡല്‍ഹി സുല്‍ത്താന്‍മാരുടെ ഭരണം തൊട്ട് നീണ്ട ആറു പതിറ്റാണ്ടുകാലം മുസ്‌ലിം ഭരണം ഇന്ത്യയില്‍ ഉണ്ടായിരുന്നിട്ടും 1872 ല്‍ കൊളോണിയല്‍ കാലത്ത് ബ്രിട്ടീഷുകാര്‍ നടത്തിയ ആദ്യ സെന്‍സസില്‍ ഇന്ത്യയിലെ മുസ്‌ലിം ജന സംഖ്യ 24 ശതമാനമായിരുന്നു. ഇന്ത്യയെ മതാധിഷ്ഠിത മുസ്‌ലിം രാജ്യമാക്കാനോ മതപരിവര്‍ത്തനത്തിന് വിധേയമാക്കാനോ അവര്‍ ശ്രമിച്ചിരുന്നില്ല. കാരണം ബഹുസ്വരതയിലൂന്നിയ രാഷ്ട്രമാണ് ഗുണകരവും ആരോഗ്യപരവുമായത് എന്ന യാഥാര്‍ഥ്യം അവര്‍ മനസ്സിലാക്കിയവരായിരുന്നു

ജാതീയ വേര്‍തിരിവുകളും വിഭാഗീയ കാഴ്ചപ്പാടുകളും ആദര്‍ശവത്കരിക്കുന്നിടത്ത് സജീവമായി കാണുന്ന ഒന്നാണ് ന്യൂനപക്ഷ ഭയം. ശ്രീലങ്കന്‍ നരവംശ ശാസ്ത്രജ്ഞനായ എസ്.ജെ തമ്പായ 1980 കളില്‍ ശ്രീലങ്കയില്‍ നടന്ന വംശീയ ഏറ്റുമുട്ടലിനെ കുറിച്ച് വിശേഷിപ്പിച്ചത് ഇപ്രകാരമാണ്. ജനസംഖ്യയില്‍ എഴുപത് ശതമാനത്തിലേറെയും സിംഹളരായിരുന്നു. രാജ്യത്തെ രാഷ്ട്രീയത്തേയും സൈന്യത്തേയും ഉദ്യോഗസ്ഥരേയും നിയന്ത്രിക്കുന്നതും സിംഹളര്‍ തന്നെയായിരുന്നു. അവരുടെ ബുദ്ധമതമായിരുന്നു ഔദ്യോഗിക മതം. ഭാഷയായ സിംഹള ഭാഷക്ക് മറ്റു ഭാഷകള്‍ക്കുപരിയായി ഔദ്യോഗിക പദവിയുമുണ്ടായിരുന്നു. ഇതൊക്കെയുണ്ടായിട്ടും തങ്ങള്‍ ന്യൂനപക്ഷമായ തമിഴരാല്‍ ആപത്തിലാകുമെന്ന ഭയമാണ് അവര്‍ക്കുണ്ടായിരുന്നത്. അതുകൊണ്ടുതന്നെ ന്യൂനപക്ഷമായ തമിഴര്‍ വംശീയധിക്ഷേപത്തിന് ഇരയായിക്കൊണ്ടേയിരുന്നു.ഇന്ത്യയില്‍ 1964 മുതല്‍ 2020 വരെയുള്ള കാലയളവില്‍ പ്രധാനമായും 9 കലാപങ്ങളാണ് ഉണ്ടായത്. 1964 ല്‍ ബംഗാളില്‍ ഉണ്ടായ കലാപം മുതല്‍ 2020 ല്‍ ഡല്‍ഹിയിലുണ്ടായ കലാപങ്ങളുടെയെല്ലാം പിന്നിലുള്ള മുഖ്യ കാരണം മുസ്‌ലിം വിദ്വേഷവും വെറുപ്പുമായിരുന്നു. തത്ഫലമായി പതിനായിരക്കണക്കിന് മനുഷ്യര്‍ മരണമടയുകയും മൂവായിരത്തിലധികം പേര്‍ക്ക് ഗുരുതരമായി പരിക്കേല്‍ക്കുകയും മൂന്നു ലക്ഷത്തിലധികം പേര്‍ മാറിതാമസിക്കേണ്ടതായും വന്നു. കലാപവുമായി ബന്ധപ്പെട്ട് മാനസിക സംഘര്‍ഷങ്ങളും പിരിമുറുക്കങ്ങളും അനുഭവിക്കുന്നവരുടെ കണക്കുകള്‍ വിവരണാതീതവുമാണ്.

വെറുപ്പുകളെയും വിദ്വേഷങ്ങളും പ്രാരംഭ കാലഘട്ടത്തുതന്നെ ആശയപരമായി നേരിട്ടു കൊണ്ടു വളര്‍ന്നു വ്യാപിച്ച മതമാണ് ഇസ്‌ലാം. അതുകൊണ്ടുതന്നെ വെറുപ്പിനും വിദ്വേഷത്തിനും ഇസ്‌ലാമില്‍ സ്ഥാനമില്ല. സ്‌നേഹവും സൗഹാര്‍ദവുമാണ് ഇസ്‌ലാമിന്റെ മുഖമുദ്ര. വിദ്വേഷകര്‍ക്കെതിരെയും ഫാസിസ്റ്റുകള്‍ക്കെതിരെയും വാളെടുക്കലല്ല ഇസ്‌ലാമിന്റെ താല്‍പര്യവും. ഇസ്‌ലാമിന്റെ പ്രതീകം അതിരുകളില്ലാത്ത മാനവികതയാണ്. അവിടെ വെറുപ്പിന്റെ പ്രത്യയശാസ്ത്രമില്ല. മുസ്‌ലിം വിദ്വേഷം ശക്തമാക്കി കൂട്ടക്കുരുതികളും ബലാല്‍കാരങ്ങളും ആസൂത്രണം ചെയ്യുന്ന ഫാസിസ്റ്റുകള്‍ക്ക്മുമ്പില്‍ ജനാധിപത്യത്തിന്റെ വലയങ്ങളെ ശക്തിപ്പെടുത്തുന്നതില്‍ വിട്ടുവീഴ്ചയില്ലാത്ത പ്രവര്‍ത്തനങ്ങളുമായി മുസ്‌ലിം സമൂഹം ഒരുമയോടെ മുന്നേറണമെന്നതായിരിക്കും സമകാലിക ഇന്ത്യ ആഗ്രഹിക്കുന്നത്. മതേതര ഇന്ത്യയെ ഹിന്ദുത്വ ഭൂമികയാക്കാന്‍ നൂറ് വര്‍ഷത്തോളമായി ഫാസിസ്റ്റുകള്‍ ശ്രമിച്ചുകൊണ്ടിരിക്കുമ്പോള്‍ ആ ഇന്ത്യയെ മതേതരത്വത്തിന്റെ പാളയത്തിലേക്ക് തിരിച്ചുകൊണ്ടുവരുന്നതിന് ഏതു രീതിയിലുള്ള പ്രവര്‍ത്തന പദ്ധതികളാണ് മുസ്‌ലിം സമൂഹം നിര്‍വഹിക്കപ്പെടേണ്ടത് എന്നതിനെകുറിച്ചുള്ള കൃത്യമായ ബോധവും ആസൂത്രണവും മുസ്‌ലിം നേതൃത്വങ്ങള്‍ക്കുണ്ടാവേണ്ടതുണ്ട്. അതായിരിക്കും ഇപ്പോഴത്തെ സാഹചര്യത്തില്‍ ജനാധിപത്യ ഇന്ത്യയോട് നിര്‍വഹിക്കാനുള്ള ഏറ്റവും വലിയ കടമ. മതങ്ങള്‍ ജനാധിപത്യവത്കരിക്കപ്പെടുകയും ആധുനികവത്കരിക്കപ്പെടുകയും ചെയ്തുകൊണ്ടേയിരിക്കേണ്ടതുണ്ട്. സമകാലിക രാഷ്ട്രീയ സാമൂഹിക സാംസ്‌കാരിക വിഷയങ്ങളെ മതപരമായ പ്ലാറ്റ്‌ഫോമുകളിലെ സ്ഥാപനങ്ങളില്‍ നിന്ന് ജനാധിപത്യപരമായി ചര്‍ച്ച ചെയ്യുമ്പോള്‍ അതിനെ സ്വാഗതം ചെയ്യുകയാണ് മതേതര രാഷ്ട്രം ചെയ്യേണ്ടത്.

കൊളോണിയല്‍ കാലത്തുതന്നെ ഇന്ത്യയില്‍ വര്‍ഗീയത രൂപപ്പെട്ടുവന്നിരുന്നുവെന്നും ബ്രിട്ടീഷ് ഭരണതന്ത്രത്തിന്റെ ഭാഗമായി ഇന്ത്യയില്‍ ഹിന്ദു മുസ്‌ലിം സംഘര്‍ഷം സൃഷ്ടിച്ചിരുന്നു എന്നുമാണ് ഇന്ത്യയിലെ വര്‍ഗീയതയെ കുറിച്ച് പഠനം നടത്തിയ ഗ്യാനേന്ദ്ര പാണ്ഡെ Construction of Communalism in Colonial North India എന്ന ഗ്രന്ഥത്തില്‍ പറയുന്നത്. സ്വാതന്ത്ര്യാനന്തര ഇന്ത്യയില്‍ ഗാന്ധിയുടെയും നെഹ്‌റുവിന്റെയും അംബേദ്കറിന്റെയും കാഴ്ചപ്പാടുകള്‍ ഇന്ത്യയെ മതേതരത്വമാക്കുന്നതില്‍ സഹായകമായി. 1980 കളില്‍ മതേതര സമൂഹത്തെ ഹിന്ദുത്വ രാഷ്ട്രീയം ശക്തമായി വെല്ലുവിളി ഉയര്‍ത്തുകയും ചെയ്തു. ശേഷം രാഷ്ട്രീയവും വര്‍ഗീയവുമായ ഭൂരിപക്ഷം 2014 ല്‍ നേടുകയും ചെയ്തു. രാഷ്ട്രീയ ഭൂരിപക്ഷവും വര്‍ഗീയ ഭൂരിപക്ഷവും രണ്ടും രണ്ടാണ്. രാഷ്ട്രീയ ഭൂരിപക്ഷങ്ങള്‍ രൂപപ്പെടുകയോ രൂപപ്പെടാതിരിക്കുകയോ ചിലപ്പോള്‍ പുനര്‍നിര്‍മിക്കപ്പെടുകയോ ചെയ്‌തേക്കാം. അതുകൊണ്ടുതന്നെ രാഷ്ട്രീയ ഭൂരിപക്ഷം സ്ഥായിയായ ഒന്നല്ല. എന്നാല്‍ വര്‍ഗീയ ഭൂരിപക്ഷം സ്ഥായിയായ ഒന്നാണ്. പരിവര്‍ത്തിപ്പിക്കുവാന്‍ കഴിയാത്തതും എന്നാല്‍ നശിപ്പിക്കാന്‍ സാധ്യവുമായ ഒന്നാണ് വര്‍ഗീയ ഭൂരിപക്ഷം എന്നാണ് അംബേദ്കര്‍ വിവക്ഷിച്ചിട്ടുള്ളത്. ജനാധിപത്യവും മതേതരവുമായ പ്രക്രിയയിലൂടെ മാറ്റിനിര്‍ത്തപ്പെടേണ്ടതാണ് വര്‍ഗീയത. അതിന് മതേതര രാഷ്ട്രീയം മാത്രമാണ് ഏക പ്രതിവിധി. ഇന്ത്യയിലുണ്ടായിട്ടുള്ള എല്ലാ വര്‍ഗീയ സംഘര്‍ഷങ്ങളുടെയും തുടക്കം അന്യമത സമുദായത്തെകുറിച്ചുള്ള തികഞ്ഞ അജ്ഞതയും അവിശ്വാസവും തെറ്റിദ്ധാരണകളുമാണ്. വര്‍ഗീയ വിദ്വേഷം നടത്തുന്നവരെ അസ്ഥിരപ്പെടുത്തുന്ന തിരംഗ കൂട്ടായ്മകള്‍ ജഹാംഗീര്‍പുരിയിലെന്നപോലെ കേരളത്തിലും രൂപപ്പെടേണ്ടതുണ്ട്.

Continue Reading
Advertisement
Click to comment

Leave a Reply

Your email address will not be published. Required fields are marked *

columns

കേരളീയം എന്ന ധൂര്‍ത്ത് മേള-എഡിറ്റോറിയല്‍

സംസ്ഥാനം സാമ്പത്തിക പ്രതിസന്ധിയുടെ വന്‍ ഗര്‍ത്തത്തില്‍ അകപ്പെട്ട് നില്‍ക്കുമ്പോള്‍ കേരളീയത്തിന്റെ പേരില്‍ കോടികള്‍ പൊടിപൊടിക്കുന്ന സര്‍ക്കാര്‍ റോമാ നഗരം കത്തിയെരിയുമ്പോള്‍ വീണ വായിച്ച നീറോ ചക്രവര്‍ത്തിമാരെയാണ് ഓര്‍മപ്പെടുത്തുന്നത്.

Published

on

സംസ്ഥാനം സാമ്പത്തിക പ്രതിസന്ധിയുടെ വന്‍ ഗര്‍ത്തത്തില്‍ അകപ്പെട്ട് നില്‍ക്കുമ്പോള്‍ കേരളീയത്തിന്റെ പേരില്‍ കോടികള്‍ പൊടിപൊടിക്കുന്ന സര്‍ക്കാര്‍ റോമാ നഗരം കത്തിയെരിയുമ്പോള്‍ വീണ വായിച്ച നീറോ ചക്രവര്‍ത്തിമാരെയാണ് ഓര്‍മപ്പെടുത്തുന്നത്. ചരിത്രത്തിലെ ഏറ്റവും വലിയ കടബാധ്യതയുമായി, എല്ലാ വകുപ്പുകളിലും കോടികളുടെ കുടിശ്ശിക നിലനില്‍ക്കുന്ന ഒരു സര്‍ക്കാറാണ് കേരളം ഭരിച്ചുകൊണ്ടിരിക്കുന്നത്. ക്ഷേമ പെന്‍ഷനുകള്‍ മുടങ്ങിയിട്ട് മാസങ്ങള്‍ പിന്നിട്ടു, കെ.എസ്.ആര്‍.ടി.സിയില്‍ ശമ്പളവും പെന്‍ഷനുമില്ല, സ്‌കൂള്‍ കുട്ടികളുടെ ഉച്ചഭക്ഷണത്തിനു പോലും പണം നല്‍കാനില്ല, നെല്‍കര്‍ഷകരുടെ കുടിശ്ശിക കൊടുത്തുവീട്ടാന്‍ കഴിയുന്നില്ല, കുടിശ്ശിക നല്‍കാത്തതിനാല്‍ സപ്ലൈക്കോയില്‍ വിതരണക്കാര്‍ ടെണ്ടര്‍ എടുക്കുന്നില്ല, ലൈഫ് മിഷന്‍ പദ്ധതിയിലും കാരുണ്യ ഫണ്ടിലുമൊന്നും തുക ലഭ്യമാകുന്നില്ല തുടങ്ങിയ അതി ഗുരുതരമായ സാമ്പത്തിക സാഹചര്യമാണ് സംസ്ഥാനത്ത് നിലനില്‍ക്കുന്നത്. സാമ്പത്തിക തകര്‍ച്ചയിലേക്ക് കൂപ്പുകുത്തിയ ഭരണകൂടങ്ങള്‍ പ്രകടമാക്കിയ എല്ലാ തരത്തിലുള്ള അസ്ഥിരതകളും ഈ സര്‍ക്കാര്‍ കാണിച്ചുകൊണ്ടിരിക്കുകയാണ്. ഈ ഘട്ടത്തിലാണ് തകര്‍ച്ചക്ക് ആക്കം കൂട്ടുന്ന രീതിയില്‍ ധൂര്‍ത്തിന്റെ മഹാമേളയായി കേരളീയം തലസ്ഥാന നഗരിയില്‍ അരങ്ങേറുന്നത്. 27 കോടി രൂപ ചിലവഴിച്ച് സര്‍ക്കാര്‍ നടത്തുന്ന ഈ മഹാമഹം ധൂര്‍ത്തിന്റെ മാത്രമല്ല അഴിമതിയുടെയും കൂടിച്ചേരല്‍ കൂടിയാണ്. ടെണ്ടര്‍പോലുമില്ലാതെ ഇഷ്ടക്കാര്‍ക്ക് പരിപാടിയുടെ കരാര്‍ നല്‍കിയതു മുതല്‍ തുടങ്ങുന്നു അഴിമതിയുടെ ഗന്ധം.

കേരളം നിലവില്‍ വന്നതിനു ശേഷമുള്ള മുഴുവന്‍ വികസന പ്രവര്‍ത്തനങ്ങളുടെയും പിതൃത്വം നിര്‍ലജ്ജം തന്റെ പേരിനോട് ചേര്‍ത്തുവെക്കുന്ന മുഖ്യമന്ത്രി അതേ അല്‍പ്പത്തരത്തോടെ തന്നെ കേരളീയവുമായി ബന്ധപ്പെട്ട് സംസ്ഥാനത്തുടനീളം തന്റെ മുഖം പ്രതിഷ്ടിച്ചുകൊണ്ടിരിക്കുകയാണ്. മാധ്യമങ്ങളായ മാധ്യമങ്ങളിലെല്ലാം ബഹുവര്‍ണ ചിത്രങ്ങള്‍ വെച്ചുള്ള പരസ്യം നല്‍കിയിട്ടും മതിവരാഞ്ഞിട്ട് പ്രധാന നഗരങ്ങളില്‍ കോടികള്‍ ചിലവഴിച്ച് ബഹുരാഷ്ട്ര കമ്പനികളുടെ പരസ്യബോര്‍ഡുകളെ വെല്ലുന്ന ഫോള്‍ഡിങ്ങുകള്‍ സ്ഥാപിച്ച് സായൂജ്യമടയുകയാണ്. ജി ട്വന്റി ഉച്ചകോടിയുടെ പേരില്‍ ഡല്‍ഹി നഗരം തന്റെ മാത്രം ചിത്രങ്ങളാല്‍ അലങ്കരിച്ച് ലോക രാഷ്ട്രങ്ങള്‍ക്കു മുന്നില്‍ രാജ്യത്തെ നാണംകെടുത്തിയ പ്രധാനമന്ത്രിയുടെ അതേ പാത പിന്തുടര്‍ന്ന് കേരളീയം നടക്കുന്ന തിരുവനന്തപുരം നഗരത്തെ തന്റെ സ്വന്തമാക്കിമാറ്റിയിരിക്കുകയാണ് മുഖ്യമന്ത്രി. വിവിധ സെഷനുകളില്‍ പങ്കെടുക്കുമ്പോള്‍ സ്വന്തം പേര് പ്രിന്റ് ചെയ്ത മുണ്ടും ഷര്‍ട്ടും കൂടി ധരിക്കാന്‍ ശ്രദ്ധിച്ചാല്‍ പ്രധാനമന്ത്രിയെപോലെ സമ്മേളനത്തെ കൈയ്യിലെടുക്കാന്‍ മുഖ്യമന്ത്രിക്കും സാധിക്കുന്നതേയുള്ളൂ.

ലോക കേരള സഭ പോലെ സംസ്ഥാന സര്‍ക്കാറിന്റെ നേട്ടങ്ങളെ ലോകം മുഴുവന്‍ എത്തിക്കുക എന്നതാണ് പരിപാടിയുടെ പ്രഖ്യാപിത ലക്ഷ്യമായി സര്‍ക്കാര്‍ പറയുന്നത്. എന്നാല്‍ കോടികള്‍ ചിലവഴിച്ച് നടത്തുന്ന ലോക കേരള സഭകള്‍ സംസ്ഥാനത്തിന് എന്ത് നേട്ടമുണ്ടാക്കി എന്നന്വേഷിക്കുമ്പോഴാണ് ഈ പരിപാടികളുടെ പൊള്ളത്തരം വ്യക്തമാകുന്നത്. വേണ്ടപ്പെട്ടവരെ ആനയിച്ചു കൊണ്ടുവന്ന് തങ്ങളെക്കുറിച്ച് മുഖസ്തുതി പറയിപ്പിക്കുക എന്നതല്ലാതെ ലോക കേരള സഭ വഴി സംസ്ഥാനത്തുണ്ടായ എന്തെങ്കിലുമൊരു നേട്ടം എടുത്തുകാണിക്കാന്‍ സര്‍ക്കാറിന് സാധ്യമല്ല. ഈ സാഹചര്യത്തിലാണ് ഇതേ മാതൃകയില്‍ തന്നെ വിവിധ മേഖലകളിലെ പ്രമുഖരെക്കൊണ്ട് മുഖ്യമന്ത്രിയുടെയും സര്‍ക്കാറിന്റെയും അവതാനങ്ങള്‍ പാടിപ്പുകഴ്ത്തിക്കുകയും അതുകാണിച്ച് ആരാധക വൃന്തത്തെ ആനന്ദലബ്ധിയില്‍ ആറാടിപ്പിക്കുകയും ചെയ്യുന്നത്. തിരഞ്ഞെടുപ്പ് പ്രചരണം പോലെയുള്ള രംഗങ്ങളില്‍ ഈ സംവിധാനങ്ങളെല്ലാം ഉപയോഗപ്പെടുത്തുകയും ചെയ്യുക എന്ന ലക്ഷ്യവും ഇതിനെല്ലാം പിന്നിലുണ്ടാകാം. നഷ്ടപ്പെട്ടുപോയ ജന പിന്തുണ തിരിച്ചു പിടിക്കാന്‍ പി.ആര്‍ ഏജന്‍സികള്‍ പറഞ്ഞു തരുന്ന എന്ത് ചെപ്പടി വിദ്യകളും ഉപയോഗിക്കാനുള്ള പൂര്‍ണ സ്വാതന്ത്ര്യം പിണറായി വിജയനുണ്ട്. പക്ഷേ അത് സ്വന്തം ചിലവില്‍ ആകണമെന്നു മാത്രം. ജനങ്ങളുടെ നികുതിപ്പണം ഉപയോഗിച്ച് നടത്തിക്കൊണ്ടിരിക്കുന്ന ഈ കോപ്രായങ്ങല്‍ക്കെല്ലാം കാലം മറുപടി പറയിപ്പിക്കുമെന്ന കാര്യം നിസ്സംശയമാണ്.

 

Continue Reading

columns

ഗസ്സ മരണ മുനമ്പാക്കിയത് ആര്

അമേരിക്കന്‍ പിന്തുണയോടെ ഇസ്രാ ഈല്‍ നിരപരാധികളായ നൂറുകണക്കിന് ഫലസ്തീന്‍ കുഞ്ഞുങ്ങളേയും സ്ത്രീകളേയും നിഷ്‌കരുണം ബോംബിട്ട് കൊല്ലുകയാണ്. മരണ മുനമ്പായിമാറിയിരിക്കുന്നു ഗസ്സ.

Published

on

റിയാസ് ഹുദവി പുലിക്കണ്ണി

അമേരിക്കന്‍ പിന്തുണയോടെ ഇസ്രാ ഈല്‍ നിരപരാധികളായ നൂറുകണക്കിന് ഫലസ്തീന്‍ കുഞ്ഞുങ്ങളേയും സ്ത്രീകളേയും നിഷ്‌കരുണം ബോംബിട്ട് കൊല്ലുകയാണ്. മരണ മുനമ്പായിമാറിയിരിക്കുന്നു ഗസ്സ. അയ്യായിരത്തോളം പൗരന്‍മാന്‍ നിഷ്ഠൂരമായി കൊല്ലപ്പെട്ടു, നിരപരാധികളായ ആയിരക്കണക്കിന് കുട്ടികളും സ്ത്രീകളും അവയില്‍ ഉള്‍പ്പെടുന്നുണ്ട്. യുദ്ധത്തിന്റെ സര്‍വ മര്യാദകളും ധാരണകളും ലംഘിച്ച് ഇസ്രാ ഈല്‍ നരനായാട്ട് തുടരുകയാണ്. കഴിവതും വേഗം പ്രശ്‌നങ്ങള്‍ പരിഹരിച്ച് സമാധാനം പുന:സ്ഥാപിക്കേണ്ട ഐക്യരാഷ്ട്ര സഭയും മറ്റു ലോക രാഷ്ട്രങ്ങളും ഇസ്രാ ഈലിന്റെ കിരാതന തേര്‍വാഴ്ചയെ തള്ളിപറയുന്നതിനപ്പുറം കര്‍ക്കശമായ മറ്റൊരു കടുത്ത നിലപാടിലേക്കും കടക്കാതെ കാഴ്ചക്കാരായി നില്‍ക്കുന്നുവെന്നതാണ് ഏറെ ദു:ഖകരം. ഭക്ഷണം, കുടിവെള്ളം, വൈദ്യുതി, ഇന്ധനം തുടങ്ങി സര്‍വ മേഖലയിലും ഉപരോധം ഏര്‍പ്പെടുത്തിയും പാര്‍പ്പിടങ്ങളും സ്‌കൂളുകളും അഭയാര്‍ത്ഥി ക്യാമ്പുകളും ബോബിട്ട് നിലം പരിശാക്കിയും ഫലസ്തീന്‍ ജനതയെ ക്രൂരമായി പീഡിപ്പിച്ചിട്ടും, അക്രമിച്ചിട്ടും യാതൊരു ദാക്ഷിണ്യവുമില്ലാതെ ആയിരക്കണക്കായ പിഞ്ചുകുഞ്ഞുങ്ങളും സ്ത്രീകളും പരിക്കേറ്റ് ചികിത്സയില്‍ കഴിയുന്ന ആശുപത്രികള്‍പോലും മനുഷ്യത്വം ഇല്ലാത്ത ഇസ്രാ ഈല്‍ സൈന്യം ബോംബിട്ട് നശിപ്പിച്ചു. പ്രാചീന കാലത്തേക്കാള്‍ ലോകം മനുഷ്യത്വപരമായും ധാര്‍മികമായും വളര്‍ച്ച കൈവരിച്ചുവെന്ന് അവകാശവാദം ഉന്നയിക്കുന്ന പുതിയ കാലത്ത് ഇങ്ങനെയൊക്കെ സംഭവിക്കുന്നുവെന്നത്തന്നെ മനുഷ്യത്വമുള്ളവര്‍ക്ക് ചിന്തിക്കാനും ചെയ്യാനും കഴിയാത്തതാണ്. അത്രമേല്‍ ഭീകരമാണ് ഹമാസിനെ പ്രത്രിരോധിക്കുന്നുവെന്ന പേരില്‍ ഇസ്രാ ഈല്‍ ഗസ്സയിലും ഫലസ്തീനിന്റെ മറ്റു പ്രദേശങ്ങളിലും നടത്തികൊണ്ടിരിക്കുന്ന മനസ്സുലക്കുന്ന കൃത്യങ്ങള്‍.

ഇറാന്‍, ഖത്തര്‍, സഊദി അടക്കമുള്ള അറബ് രാജ്യങ്ങള്‍ ഇസ്രാഈലിന്റ അതിരുകടന്ന അക്രമങ്ങളെയും ഫലസ്തീന്‍ അധിവേശത്തേയും അപലപിച്ചിട്ടും നിലവിലെ ഇസ്രാഈലിന്റെ ഇടപെടലുകള്‍ പശ്ചിമേഷ്യയില്‍ കൂടുതല്‍ രക്ത ചൊരിച്ചിലുകള്‍ക്ക് വഴിവെക്കുമെന്ന് വ്യക്തമാക്കിയിട്ടും തങ്ങളുടെ പ്രഖ്യാപിത നിലപാടില്‍നിന്ന് പിന്നോട്ട് പോകാതെ ഇസ്രാഈല്‍ രക്തരൂക്ഷിതമായ യുദ്ധത്തിനു മുതിരുന്നതിന്റെ പൂര്‍ണ ഉത്തരവാദിത്വം ലോക പൊലിസായി ചമയുന്ന അമേരിക്കക്കു മാത്രമാണ്. കാരണം ഇസ്രാഈലിനെതിരെ ഹമാസിന്റെ അപ്രതീക്ഷിത ആക്രമണം നടന്നപ്പോള്‍ മുമ്പും പിമ്പും നോക്കാതെ പൂര്‍ണ പിന്തുണ പ്രഖ്യാപിച്ച രാജ്യമാണ് അമേരിക്ക. മാത്രമല്ല, തങ്ങളുടെ വിദേശകാര്യ സെക്രട്ടറി ആന്റണി ബ്ലിങ്കണ്‍ ഹമാസിന്റെ ആക്രമണത്തെ അപലപിച്ചു നടത്തിയ ആദ്യ പ്രതികരണം താനും ഒരു ജൂതനാണെന്നാണ്. അതോടൊപ്പം നാളിതുവരെ തങ്ങള്‍ ചെയ്ത്‌കൊണ്ടിരിക്കുന്ന കണ്ണില്ലാത്ത ക്രൂരതകളെ മറച്ചുപിടിക്കാനും ലോക രാജ്യങ്ങളുടെ പിന്തുണ നേടാനും ഹമാസിനെ തീവ്രവാദ സംഘടനയായി മുദ്രകുത്താനും ജൂത സൈന്യം പടച്ചുണ്ടാക്കിയ ‘ബന്ദികളായ 40 കുട്ടികളെ ഹമാസ് പോരാളികള്‍ കഴുത്തറത്ത് കൊന്നെന്ന’ കല്ലുവെച്ച നുണകള്‍ അപ്പാടെ നിസ്സംശയം മാധ്യമങ്ങള്‍ക്ക്മുമ്പാകെ ഏറ്റുപറഞ്ഞ് ഇസ്രാഈലിനെ പരസ്യമായി പിന്തുണക്കുന്ന അമേരിക്കന്‍ പ്രസിഡന്റ് ബൈഡന്റെ കാഴ്ചയും കണ്ടതാണ്. ഫലസ്തീനിലെ നിലവിലെ സാഹചര്യങ്ങളെ കൂടുതല്‍ വഷളാക്കിയത് അമേരിക്കയാണെന്ന് പറയുന്നതായിരിക്കും കൂടുതല്‍ നല്ലത്. റഷ്യ യുക്രെന്‍ യുദ്ധം പൊട്ടി പുറപ്പെട്ടപ്പോള്‍ യൂറോപ്യന്‍ യൂണിയനെ കൂട്ടുപ്പിടിച്ച് റഷ്യക്കെതിരെ സാമ്പത്തിക ഉപരോധം ഏര്‍പ്പെടുത്തി ഇരയോടൊപ്പമാണെന്ന് പ്രസ്താവിച്ച അമേരിക്കയും ബൈഡനും സയണിസ്റ്റ് സൈന്യത്തിന്റെ മിസൈല്‍ ആക്രമണത്തില്‍ ദിനംപ്രതി മരിച്ച് വീഴുന്ന നൂറുകണക്കിനു കുഞ്ഞുങ്ങള്‍ക്കു വേണ്ടിയും തകര്‍ന്നടിഞ്ഞ പാര്‍പ്പിടങ്ങള്‍ക്കിടയില്‍ സര്‍വതും നഷ്ടപ്പെട്ട് നിലവിളിക്കുന്ന നിരപരാധികളായ ആയിരങ്ങള്‍ക്കു വേണ്ടിയും പ്രസ്താവന പോലും നടത്താത്തത്. പിറന്ന മണ്ണില്‍ അധിവസിക്കാന്‍ അധിനിവേശ ശക്തിക്കെതിരെ പോരാട്ടം നടത്തുന്ന ‘ഹമാസിനെ’ ഇസ്‌ലാമിക് സ്റ്റേറ്റിന്റെ അക്രമങ്ങളോട് തുലനം ചെയ്യാനും ഇസ്രാഈലിനെ വെള്ളപൂശാനും അമേരിക്കയും മറ്റു പാശ്ചാത്യശക്തികളും ശ്രമിക്കുന്നത് ജൂതരാഷ്ട്ര പിറവിയുടെ ചരിത്രം അറിയാത്തതു കൊണ്ടോ ഓര്‍മയില്ലാത്തതുകൊണ്ടോയല്ല, മറിച്ച് മുസ്‌ലിം വിരോധത്തിന്റെയും മത വര്‍ഗ വെറിയുടേയും അവര്‍ണ ബോധം ഇപ്പോഴും വെള്ളക്കാരന്റെ മനോമുകുരങ്ങളില്‍ അന്തര്‍ലീനമായി കിടപ്പുണ്ടെന്നതിന്റെ പ്രകടമായ പ്രതീകം കൂടിയാണ്. രണ്ടാം ലോക യുദ്ധാനന്തര ജാരസന്തതിയായി പാശ്ചാത്യ രാജ്യങ്ങളുടെ കുടില തന്ത്രങ്ങളാല്‍ പിറവി കൊണ്ട ജൂത രാഷ്ട്രത്തിന് ഇപ്പോഴും നല്‍കികൊണ്ടിരിക്കുന്ന അകമഴിഞ്ഞ പിന്തുണയും. കൂടാതെ പശ്ചിമേഷ്യന്‍ രാജ്യങ്ങളില്‍ ഇടക്കിടെ യുദ്ധവും ഒടുങ്ങാത്ത ആഭ്യന്തര കലാപങ്ങളും സംഘര്‍ഷങ്ങളും സൃഷ്ടിച്ചു ആയുധ കച്ചവടം പൊടിപൊടിക്കാനും അതിലൂടെ സാമ്പത്തിക നേട്ടം കൊയ്യാനും അമേരിക്കയടങ്ങുന്ന പാശ്ചാത്യന്‍ സാമ്രാജ്യത്വ ശക്തികള്‍ കാലങ്ങളായി നടത്തികൊണ്ടിരിക്കുന്ന മനുഷ്യത്വരഹിതമായ നാടകം കൂടിയാണ് ഇസ്രാഈല്‍ ഫലസ്തീന്‍ വിഷയത്തില്‍ അമേരിക്ക ഇപ്പോള്‍ നടത്തികൊണ്ടിരിക്കുന്ന അനുനയനീക്കങ്ങള്‍ എന്നു കൂടി അനുമാനിക്കാം. അതിനാല്‍ നിലവിലെ ഫലസ്തീന്‍ ഇസ്രാഈല്‍ സംഘട്ടനങ്ങളുടെ താത്കാലിക വിരാമത്തിനുള്ള നയതന്ത്ര നീക്കങ്ങളല്ല ലോക രാജ്യങ്ങളും ഐക്യരാഷ്ട്ര സഭയും നടത്തേണ്ടത്, മറിച്ച് കുടിയിറക്കപ്പെട്ട് ആട്ടിയോടിക്കപ്പെട്ട ഒരു വിഭാഗം ജനതക്ക് അധിവസിക്കാനൊരിടം അനുവദിച്ചതിന്റെ പേരില്‍ സൈ്വര്യമായ ഉറക്കവും സുരക്ഷിതമായ പാര്‍പ്പിടവും സ്വരാജ്യംതന്നെയും കാലങ്ങളായി നഷ്ടപ്പെട്ട ഫലസ്തീനികള്‍ക്ക് സ്വതന്ത്രമായൊരു രാജ്യം സാക്ഷാത്കരിച്ച് കൊടുക്കുകയെന്നതാണ് സുതാര്യമായ പരിഹാരം. എങ്കിലേ നിരന്തരം ഉയരുന്ന ഗസ്സയിലെ പതിനായിരങ്ങളുടെ രോദനം എന്നെന്നേക്കുമായി നിലച്ച് സമാധാനത്തിന്റെ പുതിയ സൂര്യോദയങ്ങള്‍ ഉദയം ചെയ്യൂ.

 

Continue Reading

columns

പ്രവാചക നാമത്തിൻ്റെ പൊരുൾ

ലോകത്ത് വളരെ കൂടുതൽ ഉച്ചരിക്കുകയും സ്തുതി കീർത്തനങ്ങൾക്ക് വിധേയമാവുകയും ചെയ്യുന്ന നാമമാണ് മുഹമ്മദ് .പ്രാർത്ഥനകളിൽ, കാവ്യങ്ങളിൽ , കഥാവിഷ്കാരങ്ങളിൽ ആ നാമം ആവർത്തിച്ചു വരുന്നു.

Published

on

പാണക്കാട് സയ്യിദ് മുനവ്വറലി
ശിഹാബ് തങ്ങൾ

ലോകത്ത് വളരെ കൂടുതൽ ഉച്ഛരിക്കുകയും സ്തുതി കീർത്തനങ്ങൾക്ക് വിധേയമാവുകയും ചെയ്യുന്ന നാമമാണ് മുഹമ്മദ് .പ്രാർത്ഥനകളിൽ, കാവ്യങ്ങളിൽ , കഥാവിഷ്കാരങ്ങളിൽ ആ നാമം ആവർത്തിച്ചു വരുന്നു .തിരുനബിയുടെ നാമകരണ ചടങ്ങിൽ പ്രപിതാവായ അബ്ദുൽ മുത്തലിബിനോട് ബന്ധുക്കളായ ഖുറൈശികൾ ചോദിക്കുന്നുണ്ട്: കൊച്ചു മകനെ എന്ത് പേരാണ് വിളിക്കുന്നത്? അദ്ദേഹം മറുപടി നൽകി: പ്രിയങ്കരനായ പേര് മുഹമ്മദ് .ലോകാലോകങ്ങളിൽ ഉള്ളവർ അവനെ അനുധാവനം ചെയ്യണമെന്ന് ആഗ്രഹിക്കുന്നു.” വന്ധ്യവയോധികനായ ഉപ്പൂപ്പയുടെ ആഗ്രഹത്തിന് പടച്ചവൻ ഉത്തരം നൽകി. മണ്ണിൽ മനുഷ്യരും ആകാശത്ത് മാലാഖമാരും ആ പേര് ഉൾപ്പുള്കത്തോടെ ഉരുക്കഴിക്കുന്നു .തിരുനബിയുടെ നാമകീർത്തനം പാഠവത്കരിക്കുകയും അത് വിശ്വാസിയുടെ ഉത്തരവാദിത്തമാണെന്ന് നിർദ്ദേശിക്കുകയും ചെയ്ത ഖുർആൻ ഇങ്ങനെ പ്രഖ്യാപിച്ചു :നബിയുടെ മേൽ അല്ലാഹു അനുഗ്രഹം വർഷിക്കുന്നു, മലക്കുകൾ പ്രാർത്ഥിക്കുന്നു, സത്യവിശ്വാസികളെ നബിക്ക് അനുഗ്രഹം. സമാധാന വർഷത്തിനായി നിങ്ങളും പ്രാർത്ഥിക്കുക.

56 തലമുറകളിലൂടെ തുടരുന്ന ഈ മുഹമ്മദീയ പ്രകീർത്തനത്തിൻറെ പൊരുൾ എന്താണ് ?അനുയായികളാൽ ആപാദചൂഢം പിന്തുടരുന്ന ഒന്നായി മുഹമ്മദ് എന്ന നാമവും നബിയുടെ ചര്യകളും മാറുന്നതെന്തുകൊണ്ട് എന്നത് വിമർശകരെ പോലും വിസ്മയിപ്പിക്കുന്നതാണ്. കൗമാരപ്രായത്തിൽ കേട്ട മുഹമ്മദ് എന്ന നാമത്തിന്റെ സൗന്ദര്യത്തിന് പിന്നാലെ സഞ്ചരിക്കുകയും ചരിത്രത്തിലും കവിതയിലും നാടകത്തിലും ആവർത്തിക്കുന്ന ആ പേരിൻറെ ആവിഷ്കാരങ്ങളെ നാലു പതിറ്റാണ്ടുകളിലൂടെ നീളം പഠിക്കുകയും ചെയ്ത ജർമൻ ഓറിയന്റലിസ്റ്റ് ആൻമേരി ഷിമ്മൽ രചിച്ച ‘ മുഹമ്മദ് ദൈവത്തിൻറെ തിരുദൂതർ ‘എന്ന പുസ്തകം പ്രസിദ്ധമാണ്. മധ്യകാലത്ത് നിലനിന്ന നബിനിന്ദക്കുള്ള പണ്ഡിതോചിതമായ പ്രായശ്ചിത്തമായി വേണം ഈ പുസ്തകത്തെ കണക്കാക്കാൻ. സെമറ്റിക്പാരമ്പര്യത്തിലും ആഫ്രിക്കാൻ പാശ്ചാത്യ പൗരസ്ത്യ ദേശങ്ങളിലും നബി ചരിത്രരചനയുടെയും കീർത്തനങ്ങളുടെയും കുത്തൊഴുക്ക് വലിയൊരു പഠന മേഖലയാണ് തോമസ് കാർലൈൽ 19-)0 നൂറ്റാണ്ടിന്റെ ആദ്യത്തിൽ ലണ്ടനിൽ നടത്തിയ മൂന്നു പ്രഭാഷണങ്ങളിൽ ഒന്ന് ഹീറോ ആസ് എ പ്രോഫറ്റ് ‘ എന്ന തലവാചകത്തിൽ മുഹമ്മദ് നബിയെ കുറിച്ചായിരുന്നു .അതുവരെ പ്രചരിക്കപ്പെട്ടിരുന്ന എല്ലാ ആരോപണങ്ങൾക്കും വസ്തുതകൾ അപഗ്രഥിച്ച് യുക്തിസഹമായി മറുപടി പറഞ്ഞു .ഇസ്ലാം വാളുകൊണ്ട് പ്രചരിപ്പിക്കപ്പെട്ട മതമാണെന്ന വിമർശനത്തിന് അദ്ദേഹം നൽകിയ മറുപടി പ്രസക്തമാണ്. കാറിൽ പറയുന്നു ,ഏതൊരു രാഷ്ട്രീയവും ഒരാളുടെ മനസ്സിൽ ആണല്ലോ ആദ്യമായി ഉദിക്കുക.മുഹമ്മദിന് ലഭിച്ച ഇസ്ലാം എന്ന ആശയം പ്രചരിപ്പിക്കാൻ ലോകത്ത് അപ്പോൾ മുഹമ്മദ് മാത്രമേയുള്ളൂ .തന്റെ കയ്യിൽ ഒരു വാളും. ഈ അവസ്ഥയിൽ എങ്ങനെയാണ് മുഹമ്മദിന് ലോകം കീഴടക്കാൻ സാധിക്കുക? വാളുകൊണ്ട് പ്രചരിപ്പിക്കാൻ ആണെങ്കിൽ വേണ്ടത്ര വാളുകളും പ്രയോഗിക്കാൻ അനുയായികളും വേണം. മുഹമ്മദിന് അതിനായി അനുയായികൾ ഉണ്ടായേ പറ്റൂ. ഈ വസ്തുത തെളിയിക്കുന്നത് വാളുകൊണ്ടല്ല ഇസ്ലാം പ്രചരിച്ചത് എന്ന സത്യമാണ് .തിരുനബിനൽകിയ രണ്ട് സന്ദേശങ്ങൾ എടുത്തു പറയേണ്ടതാണ്. ഒന്ന് ,ഐഹികവും പാരത്രികവുമായ അഥവാ ഭൗതികവും ആധ്യാത്മവുമായ രണ്ട് തലങ്ങൾ ഉൾച്ചേർന്നതാണ് ജീവിതം എന്ന കാഴ്ചപ്പാട്. മതമെന്നത് പ്രാർത്ഥനകളുടെയും ആരാധനകളുടെയും (സഷ്ടാവുമായുള്ള കെട്ടുപാടുകളുടെയും കേവലസംഹിതം മാത്രമല്ല, മറിച്ച് നാഗരിക രാഷ്ട്രീയ നിർമാണത്തിന്റെ ബഹുപാOങ്ങൾ ചേർത്ത് സർഗാത്മകവും സാമൂഹികോ ന്മുഖവുമാക്കേണ്ടതാണെന്ന് തിരുനബി പഠിപ്പിച്ചു. ഇത് കൂടുതൽ ജനപ്രിയമായ ഒരു മതത്തിന്റെയും ജനോപകരമായ ജീവിത പദ്ധതിയുടെയും ഉയർപ്പിന് കാരണമായി.അബ്ബാസിയ ഖിലാഫത്തിൻ്റെയും സ്പാനിഷ് മുസ്ലിം ഭരണത്തിന്റെയും കാലത്ത് തുടക്കം കുറിച്ച വൈജ്ഞാനിക പുരോഗതിയുടെയും നാഗരിക വളർച്ചയുടെയും പാരമ്പര്യം ഈ സാമൂഹിക കാഴ്ചപ്പാടിന്റെ ഭാഗമായിരുന്നു. നവോത്ഥാനകാലത്ത് ഉയർന്നു വരാൻ യൂറോപ്പിന് സകല സാധ്യതയും നൽകിയതിൽ തിരുനബിയുടെ പിന്തുണക്കാരിലൂടെ വളർന്ന വൈജ്ഞാനിക വിപ്ലവത്തിന് ചെറുതല്ലാത്ത പങ്ക് ഉണ്ടായിരുന്നു .ഇസ്ലാം തുടങ്ങിയത് പൂർത്തീകരിക്കുക അല്ലാതെ യൂറോപ്പിന് മറ്റൊന്ന് ചെയ്യാൻ ഉണ്ടായിരുന്നില്ല എന്ന് ഫിലിപ് കെ ഹിറ്റി ഈ ചരിത്രത്തെ പറ്റി എഴുതുന്നുണ്ട് .ഇത്തരത്തിൽ ആഘോഷിക്കപ്പെട്ട ഒരു ജനകീയ പ്രവാചകൻ ലോകത്തിനു മുമ്പിൽ ഉണ്ട്. അതിലൂടെയാണ് മുഹമ്മദ് എന്ന സ്തുതിക്കപ്പെട്ട നബി രൂപപ്പെട്ടുവന്നത്. രണ്ടാമതായി എടുത്തു പറയേണ്ടത്, സഹിഷ്ണുത എന്ന വലിയ മൂല്യത്തെ യാഥാർത്ഥ്യമാക്കുന്നതിലും ജനകീയമാക്കുന്നതിലും മുഹമ്മദ് നബി വഹിച്ച പങ്കാണ് പതിറ്റാണ്ടുകൾ യുദ്ധത്തിൽ ഏർപ്പെട്ടുപോകുന്ന ഗോത്രങ്ങളെ തമ്മിലടുപ്പിക്കിയും സഹോദര മതക്കാരെ വിശ്വാസത്തിൽ എടുത്തും മദീനയിൽ നിർമ്മിച്ച രാഷ്ട്രത്തിൻറെ അത്ഭുതം എടുത്തു പറയേണ്ടതാണ് .വിടവാങ്ങൽ പ്രസംഗത്തിൽ ലോക മനസ്സാക്ഷിക്ക് നൽകിയ സമഭാവനയുടെ ഉൾക്കാഴ്ചകൾ അവസാനമില്ലാത്തതാണ്. ഇത്തരത്തിൽ ഇന്ന് കാണുന്ന ലോകത്തെ സമാധാനപൂർണ്ണമായ നിലനിർത്തുന്നതിൽക്കുള്ള പങ്കാളിത്തത്തിന്റെ പേരിൽ കൂടിയാണ് മുഹമ്മദ് സ്തുതിക്കപ്പെട്ടവൻ എന്ന പേര് അർത്ഥപൂർണ്ണം ആകുന്നത്

(മലയാള മനോരമ ദിനപത്രത്തിൽ 28-09-2023 ന് പ്രസിദ്ധീകരിക്കപ്പെട്ടത് )

Continue Reading

Trending